Opogi le Lumanai i le Faatuatua
O le a mamalu le lumanai mo i latou ua saunia ma ē e faaauau pea ona saunia ina ia avea ma meafaigaluega i aao o le Alii.
O se afiafi e le ma faagaloina lenei. O’u tuafafine pele, ua faamamaluina lava a’u e faatasi ma outou. Ua tele ina ou mafaufau ia te outou i le gasologa o nei masina ua tuanai. Ua silia lo outou malosi nai lo le valu miliona. E le gata i lo outou toatele ae o lo outou mana faaleagaga e sui ai le lalolagi. Ua ou vaai o outou faia lena lava mea i lenei taimi o le faama’i oti.
O nisi o outou ua faafuasei lava ona iloa o loo outou sailia ni sapalai ua lē maua po o se galuega fou. E toatele na aoaoina fanau ma asiasi atu i tuaoi. O nisi na vave ona toe faafeiloai atu i faifeautalai i aiga nai lo le taimi na faamoemoeina, ae o isi na suia o outou aiga i ni nofoaga autu e aoao ai faifeautalai. Ua outou faaaogaina tekinolosi e fesootai ai ma aiga ma uo, e auauna atu ai ia i latou sa lagonaina le fai’esea, ma suesue le Sau, Mulimuli Mai ia te A’u faatasi ma isi tagata. Ua outou maua ni auala fou e fai ai le Sapati o se aso fiafia. Ma ua outou faia talifofoga malupuipuia—e faitau miliona!
Faatasi ma le agaalofa ma le alofa, ua ootia lo’u loto i le toatele o tamaitai i le lalolagi atoa ua maliliu ē pele ia i latou. Ua matou fetagisi faatasi ma outou. Ma e matou te tatalo mo outou. Matou te viia ma tatalo mo tagata uma o loo galulue lē faalogologo tiga ia malupuipuia le soifua maloloina o isi.
O outou tamaitai talavou ua ofoofogia foi. E ui ua lolovaia ala o faasalalauga faaleagafesootai i finauga, ae toatele lava ua mauaina auala e faamalosiau ai i isi ma faasoa atu le malamalama o le Faaola.
Tuafafine, o outou lava o toa manumanu! Ou te maofa i lo outou malosi ma lo outou faatuatua. Ua outou faaalia lena mea i tulaga faigata, ua outou faaauau pea ma le lototoa. Ou te alofa ia te outou, ma ou te faamautinoa atu ia te outou e alofa le Alii ia te outou ma silasila mai i le galuega tele o loo outou faatinoina. Faafetai atu! Ua outou toe faamaonia foi o outou moni lava o le faamoemoe o Isaraelu!
Ua avea outou ma faatusa o faamoemoega na i ai ia Peresitene Gordon B. Hinckley mo outou ina ua ia faalauiloa mai le “Aiga: O Se Folafolaga i le Lalolagi” i le 25 tausaga talu ai ia Setema 1995 i le sauniga aoao a le Aualofa. 1 E taua tele lona filifilia e faalauiloa atu lenei folafolaga taua i tuafafine o le Ekalesia. I le faia o lena mea, na faamamafa ai e Peresitene Hinckley le faatosinaga a tamaitai e lē mafai ona suitulaga ai se tasi i le fuafuaga a le Alii.
Ia, ou te fia iloa lava po o a mea na outou aoaoina i lenei tausaga. Pe ua outou tuputupu a’e vavalalata atili i le Alii, pe ua outou lagonaina le mamao ese mai ia te Ia? Ma o a ni outou lagona e uiga i le lumanai ona o mea o loo tutupu i le taimi nei?
O le mea moni, ua fetalai mai le Alii e uiga i o tatou aso i fetalaiga tuusa’o. Sa Ia lapatai mai i o tatou aso “o le a faavaivaia loto o tagata” 2 ma e oo foi lava i ē filifilia o le a lamatiaina i le faaseseina. 3 Sa Ia ta‘u atu i le Perofeta o Iosefa Samita e faapea “o le a aveesea le filemu mai le lalolagi” 4 ma o le a oo mai mala i luga o tagata. 5
Ae ua saunia foi e le Alii se vaaiga mamao i le ofoofogia o lenei tisipenisione. Na Ia musuia le Perofeta o Iosefa Samita e folafola mai e faapea “o le galuega … o aso nei e gata ai, e maoae lona taua tele. … E lē mafai ona faamatalaina lona mamalu, e lē mafaatusalia foi lona matagofie.” 6
Ia, o le matagofie atonu e le o le upu lea e te filifilia e faamatala ai nai nei masina ua mavae atu! O faapefea ona tatou taulimaina uma valoaga ogaoga ma faasilasilaga mamalu e uiga i o tatou aso? Na ta’u mai e le Alii ia i tatou le auala i se faamautinoaga faigofie, ae ofoofogia: “Afai ua outou saunia o le a outou lē matatau.” 7
E maeu lea folafolaga! O le folafolaga lea e mafai ona suia moni ai le ala tatou te vaai atu ai i lo tatou lumanai. Talu ai nei sa ou faalogo ai i se tamaitai e i ai sana molimau loloto o tautino mai e faapea, o le faama’i oti, na tuufaatasia ma se mafuie i le Vanu o Sate Leki, na fesoasoani ia te ia e iloa ai sa le’i saunia o ia e pei ona sa ia mafaufau ai. Ina ua ou fesili i ai pe sa faatatau lana tala i ana teuga meaai po o lana molimau, sa ia ata’ata ma fai mai, “Ioe!”
Afai o sauniuniga o le tatou ki lea i le opogiina o lenei tisipenisione ma lo tatou lumanai i le faatuatua, e mafai faapefea ona tatou saunia i se ala silisili?
Mo le tele o tausaga, ua augani mai ai lava perofeta a le Alii ia i tatou e teu ni meaai, vai, ma teuga tupe mo se taimi e manaomia ai. Ua toe faamalosia e le faama’i oti o i ai nei le atamai o lena fautuaga. Ou te uunaia outou ia faia ni laasaga ina ia saunia ai faaletino. Ae e sili atu lo’u popole i a outou sauniuniga faaleagaga ma faalelagona.
I lena tulaga, e tele mea e mafai ona tatou aoaoina mai ia Kapeteni Moronae. I le avea ai ma taitai’au o le autau a sa Nifaē, sa fetaia’i o ia ma ni autau fouvale na malolosi atu, toatele atu, ma leaga atu. O lea, sa saunia ai e Moronae lona nuu i ni auala taua se tolu.
Muamua, sa ia fesoasoani ia i latou ia fau ni nofoaga o le a saogalemu ai i latou—“nofoaga o le saogalemu” sa ia faaigoa ai. 8 Lua, sa ia saunia “mafaufau o tagata ia faamaoni i le Alii.” 9 Ma le tolu, na te le’i taofia lava lona sauniaina o lona nuu—faaletino pe faaleagaga. 10 Se’i o tatou iloiloina nei mataupu faavae e tolu.
Mataupu Faavae Numera Tasi: Fau ni Nofoaga o le Saogalemu
Sa faamalosia e Moronae aai uma o sa Nifaē i faupu’ega eleele, olo, ma puipui. 11 Ina ua oo mai sa Lamanā e faasagatau ia i latou, sa “matua ofo lava … ona o le popoto o sa Nifaē i le sauniuniga o o latou nofoaga o le saogalemu.” 12
E faapena foi, a o siomia ai i tatou e faigata, e manaomia ona tatou fauina nofoaga ia tatou te saogalemu ai, i le faaletino ma le faaleagaga. A oo ina avea lou fale ma se malutaga o le faatuatua—lea e afio ai le Agaga—e avea lou fale ma laina muamua lava o le puipuiga.
E faapena foi, o siteki o Siona o “se sulufaiga mai le afā” 13 ona o loo taitaia i latou e ē o loo umiaina ki o le perisitua ma faaaogaina le pule o le perisitua. A o faaauau ai pea ona outou mulimuli i le fautuaga a i latou ua faatagaina e le Alii e taitai outou, o le a outou lagonaina le saogalemu sili atu.
O le malumalu—le maota o le Alii—o se nofoaga o le puipuiga e le tutusa ma se isi lava fale. O iina, ua faaeeina ai outou tuafafine i le mana o le perisitua e ala i feagaiga paia o le perisitua ua outou osia. 14 O iina, ua faamauina ai o outou aiga mo le faavavau. E oo foi i lenei tausaga, ina ua matua faatapulaaina le avanoa e ulufale ai i o tatou malumalu, ae o o outou faaeega paia ua tuu atu ai ia te outou le avanoa tumau e maua ai le mana o le Atua a o outou faamamaluina ai a outou feagaiga ma Ia.
E faigofie lava le faapea, o se nofoaga o le saogalemu, o soo se mea lava e mafai ona e lagonaina ai le mafutaga a le Agaga Paia ma le taitaiina e Ia. 15 A faatasi le Agaga Paia ma oe, e mafai ona e aoao atu le upumoni, e tusa lava pe feagai ma ni manatu lauiloa e tetee i ai. Ma e mafai ona e mafaufau loloto i ni fesili faamaoni e uiga i le talalelei i se siosiomaga o faaaliga.
Ou te valaaulia outou, o’u tuafafine pele, ia fau se fale o se nofoaga o le saogalemu. Ma ou te toe faafou atu la’u valaaulia mo outou ia faatelelina lo outou malamalama i le mana o le perisitua ma feagaiga ma faamanuiaga o le malumalu. O le i ai o nofoaga o le saogalemu ia e mafai ona outou mapu i ai o le a fesoasoani ia te oe e opogi le lumanai i le faatuatua.
Mataupu Faavae Lona Lua: Saunia Lou Mafaufau ina Ia Faamaoni i le Atua
O loo matou faia se poloketi tele lava e faaumiumi ai le aogā ma le malosi o le Malumalu o Sate Leki.
Sa fesiligia e nisi pe sa tatau ona faia ia faatinoga tulagaese faapea. Peitai, ina ua pagatia le Vanu o Sate Leki i se mafui’e e 5.7 le malosi i le amataga o lenei tausaga, sa matua luluina lava lenei malumalu auvaivai lea na pa’ū ese ai le pu o le faatusa o le agelu o Moronae! 16
E pei lava ona tatau ai i le faavae faaletino o le Malumalu o Sate Leki ona lava le malosi e tatalia ai faalavelave faafuasei faalenatura, e tatau foi i o tatou faavae faaleagaga ona mautu. Ona a oo la ina luluina o tatou olaga e ni mafui’e faafaatusa, e mafai ona tatou “tutumau ma lē masi’i’ese” ona o lo tatou faatuatua. 17
Sa aoao i tatou e le Alii i le auala e faateleina ai lo tatou faatuatua e ala i le saili i le“aoao, e faapea foi i le suesue ma le faatuatua.” 18 Tatou te faamalosia lo tatou faatuatua ia Iesu Keriso pe a tatou tauivi e tausia Ana poloaiga ma “manatua pea o Ia.” 19 Ma le isi, e faateleina lo tatou faatuatua i taimi uma tatou te faatino ai lo tatou faatuatua ia te Ia. O le uiga lena o le aoao e ala i le faatuatua.
Mo se faataitaiga, o taimi taitasi tatou te maua ai le faatuatua ina ia usiusitai ai i tulafono a le Atua—e tusa lava pe faamāina i tatou e manatu lauiloa—po o taimi taitasi tatou te teena ai faafiafiaga po o manatu latou te viia le soliga o feagaiga, o loo tatou faatinoina lo tatou faatuatua, lea i lona taunuuga e faateleina ai lo tatou faatuatua.
Ma le isi, e fausia e ni nai mea le faatuatua tele atu i lo le faatofuina e le aunoa i le Tusi a Mamona. E leai se isi tusi ua molimau mai ia Iesu Keriso ma se mana ma le manino faapena. O ona perofeta, e pei ona musuia ai e le Alii, na vaai i o tatou aso ma filifilia le aoaoga faavae ma upumoni o le a fesoasoani sili ia i tatou. O le Tusi a Mamona o lo tatou taiala lea o aso e gata ai e ola ai.
Ioe, o lo tatou saogalemu sili lava e oo mai pe a tatou lafo atu i tatou lava i le Tama Faalelagi ma Iesu Keriso! O se olaga e aunoa ma le Atua o se olaga e tumu i le fefe. O se olaga e i ai le Atua o se olaga e tumu i le filemu. E mafua lenei mea ona e oo mai faamanuiaga faaleagaga i ē faatuatua. O le mauaina o faaaliga faaletagata lava ia o se tasi o faamanuiaga silisili o na faamanuiaga.
Ua folafola mai e le Alii e faapea, afai o le a tatou ōle atu, e mafai ona tatou maua “faaaliga e faaopoopo i luga o lea faaaliga.” 20 Ou te folafola atu afai tou te faateleina lo outou gafatia e maua ai faaaliga, o le a faamanuiaina outou e le Alii i le taitaiga faateleina mo lou olaga ma meaalofa lē muta a le Agaga.
Mataupu Faavae Lona Tolu: Aua Ne’i Tuu le Sauniuni
E oo lava i taimi na lelei ai le olaga, sa faaauau pea e Kapeteni Moronae ona saunia lona nuu. Na te le’i taofi lava. Sa le’i faamalieina lava o ia.
E lē taofia foi le osofai o le fili. O lea, e lē mafai ona tuu lo tatou sauniuni! O le faatelelina o lo tatou ola-tutoatasi—faaletino, faalelagona, ma faaleagaga—o le faateleina foi lena o lo tatou saunia e tetee atu i sauaga lē fo’i a Satani.
Tuafafine pele, ua outou atamamai e fau ni nofoaga o le saogalemu mo outou lava ma i latou tou te alolofa i ai. Ma le isi, ua ia te outou se faaeega paia faalelagi lea tou te mafai ai ona atia’e le faatuatua i isi i ni auala faatauanau. 21 Ma tou te lē tuu lava. Na outou toe faaalia foi lena mea i lenei tausaga.
Faamolemole, ia faaauau pea! O lo outou mataāla i le malupuipuia o o outou aiga ma le faatumauina o le faatuatua i loto o ē pele ia te outou o le a selesele mai ai ni taui mo auga tupulaga a sau.
O’u tuafafine pele, ua tele na’ua mea ua tatou tulimatai atu i ai! Ua tuu e le Alii outou iinei i le taimi nei ona ua Ia silafia ua ia te outou le gafatia e taulimaina ai faafitauli lavelave o le vaega mulimuli o nei aso e gata ai. Sa Ia silafia o le a outou malamalama i le mamalu o Lana galuega ma naunautai e fesoasoani i le faataunuuina.
Ou te le o fai atu o aso o i luma atu o le a faigofie, ae ou te folafola atu ia te outou o le a mamalu le lumanai mo i latou ua saunia ma ē e faaauau pea ona saunia ina ia avea ma meafaigaluega i aao o le Alii.
O’u tuafafine pele, ‘aua ne’i tau na ona tatou onosai i lenei vaitaimi ua i ai. Ia tatou opogi le lumanai i le faatuatua! O taimi faigata o avanoa ia mo i tatou e uluuluola ai faaleagaga. O taimi ia e matua sili atu ai ona mataalia a tatou faatosinaga nai lo taimi toafimalie atu.
Ou te folafola atu pe a tatou fauina nofoaga o le saogalemu, saunia o tatou mafaufau ina ia faamaoni i le Atua, ma ia lē tuu lava le sauniuni, o le a faamanuiaina i tatou e le Atua. O le a ia “laveaiina i matou; ioe, [o le a] ia fetalai mai le filemu i o [tatou] agaga, ma [o le a] tuu mai ia te i [tatou] le faatuatua tele, ma … faatonu i [tatou] ia [mafai ona tatou] faamoemoe mo le laveaiga mai ia te ia.” 22
Pe a outou saunia e opogi le lumanai i le faatuatua, o nei folafolaga o le a fai ma outou! Ou te molimau atu ai, faatasi ma le faailoaga o le alofa mo outou atoa ai ma lo’u talitonuga ia te outou, i le suafa paia o Iesu Keriso, amene.