O Poloaiga Sili e Lua
E tatau ona tatou taumafai ia tausia poloaiga sili uma e lua. O le faia o lea mea, tatou te taumafai ai e savavali faapaleni i le va o le tulafono ma le alofa.
O’u tuafafine pele i le talalelei a Iesu Keriso, ou te faafeiloai atu ia te outou o ni tagata ua atofaina faalelagi e vaaia le aiga faavavau. Na aoaoina i tatou e Peresitene Russell M. Nelson faapea, “Sa toefuataiina lenei Ekalesia ina ia mafai ai ona faatulaga aiga, faamauina, ma faaeaina e faavavau.”1 O lena aoaoga e i ai ni aafiaga taua mo tagata o e faailoa mai o ni faatauafafine, faatauatane, tosina atu i itupa uma e lua, po o se faafafine/faafatama, e masani lava ona ta’ua o le LGBT.2 Na toe faamanatu mai foi e Peresitene Nelson ia i tatou “e le faapea e tatou te ioe i [taimi uma] i isi e alolofa atu ai i isi.”3 E taua nei aoaoga faaperofeta mo talanoaga faaleaiga e tali ai fesili a tamaiti ma le autalavou. Na ou sailia ma le agaga tatalo se musumusuga e talanoa atu ai i lenei aofia ona ua aafia uiga ese outou i nei fesili, lea e aafia tonu ai lava pe leai foi aiga uma i le Ekalesia.
I.
Ou te amata i le mea na aoao mai e Iesu o ni poloaiga sili e lua.
“E te alofa atu i le Alii lou Atua ma lou loto atoa, ma lou agaga atoa, ma lou manatu atoa.
“O le poloaiga muamua lena ma le sili.
“E faapena foi le lona lua, E te alofa atu i le lua te tuaoi, ia pei o oe lava ia te oe.”4
O le uiga o lenei mea ua poloaiina i tatou ia alolofa i tagata uma, talu ai ona o le faataoto a Iesu i le Samaria agalelei o loo aoao mai ai o tagata uma o o tatou tuaoi.5 Ae o lo tatou naunau e tausia lenei poloaiga lona lua e le tatau ona mafua ai ona tatou faagalo le muamua, ia alofa i le Atua ma o tatou loto, agaga, ma mafaufau atoa. Tatou te faaalia lena alofa i le “tausia[ina] o [Ana] poloaiga.”6 E finagalo le Atua ia i tatou ia usiusitai i Ana poloaiga aua e ala atu i lena usiusitai, e aofia ai le salamo, e mafai ai ona tatou toe foi atu e nonofo i Lona afioaga ma ia atoatoa e pei o Ia.
I lana lauga talu ai i talavou matutua o le Ekalesia, na saunoa ai Peresitene Russell M. Nelson e uiga i le mea ua ia ta’ua o le “sootaga malosi i le va o le alofa o le Atua ma Ana tulafono.”7 O tulafono e matuai faatatau lava i faafitauli ia e fesootai ia i latou ua faailoaina o LGBT o tulafono a le Atua o le faaipoipoga ma lana soa tulafono o le ola mama. E taua mea uma e lua i le ata o le faaolataga a lo tatou Tama i le Lagi mo Ana fanau. E pei ona aoao mai e Peresitene Nelson, “O tulafono a le Atua e uunaia atoatoa lava e Lona alofa le mafuatia mo i tatou ma Lona finagalo ia tatou avea uma ma tagata e mafai ona tatou avea ai.”8
Na aoao mai Peresitene Nelson: “O le tele o atunuu … ua pasia ai le tulafono o le faaipoipoga a le itupa e tasi. I le avea ai ma tagata o le Ekalesia, tatou te faaaloalo i tulafono o le laueleele … , e aofia ai faaipoipoga faalemalo. Peitai, o le mea moni, i le amataga … o le faaipoipoga na faauuina e le Atua! Ma e oo mai i lenei aso o Lana faauigaga ua na o le va o se alii ma se tamaitai. E lei suia e le Atua Lana faauigaga o le faaipoipoga.”
Sa faaauau mai pea Peresitene Nelson: “E lei suia foi e le Atua Lana tulafono o le ola mama. O tulaga manaomia e ulufale ai i le malumalu e lei suia.”9
Ua faamanatu mai e Peresitene Nelson ia i tatou uma faapea “o la tatou tiute o ni Aposetolo o le aoao atu na o mea moni. O lena tiute e le o tuuina maia [i Aposetolo] le pule e suia ai tulafono faalelagi.”10 O lea, o’u tuafafine e, e tatau i tatai o le Ekalesia ona aoao atu i taimi uma le taua uigaese o le faaipoipoga i le va o se alii ma se tamaitai ma tulafono o le ola mama e faatatau i ai.
II.
O le galuega a Le Ekalesia a Iesu Keriso o le Au Paia o Aso e Gata Ai e matuai faatatau lava i le sauniaina o fanau a le Atua mo le malo selesitila, ma e sili ona faapitoa mo lona mamalu aupito maualuga, o le faaeaga po o le ola e faavavau. O lena taunuuga aupito maualuga e na o le faaipoipoga mo le ola e faavavau e ausia ai.11 O le ola e faavavau e aofia ai mana foafoa ia e avea ma se vaega taua i le tuufaatasiga o se alii ma se tamaitai12—lea e faamatalaina e faaaliga i ona po nei o le “faaauauina lea o fanau e faavavau ma faavavau lava.”13
I lana saunoaga i le autalavou matutua, na aoao mai ai Peresitene Nelson, “O le usitaia o tulafono a le Atua o le a faatumauina ai lou saogalemu a o e agai atu i luma i le faaeaga mulimuli”14—o lena mea, o le avea e pei o le Atua, faatasi ai ma se olaga faaeaina ma faamoemoega paia o o tatou Matua Faalelagi. O le taunuuga lena tatou te mananao i ai mo tagata uma tatou te alolofa i ai. Ona o lena alofa, e le mafai ai ona tatou tuu lo tatou alolofa ia sili atu i poloaiga ma le fuafuaga ma le galuega a le Atua, lea tatou te iloa o le a aumaia ia i latou tatou te alolofa i ai lo latou fiafiaga silisili.
Ae e toatele tatou te alolofa i ai, e aofia ai nisi ua maua le talalelei toefuataiina, o e le talitonu i ai pe ua filifili e le mulimuli i poloaiga a le Atua e uiga i le faaipoipoga ma le tulafono o le ola mama. Ae faapefea i latou?
Ua faaali mai e aoaoga faavae a le Atua o i tatou uma o Ana fanau ma ua Ia foafoaina i tatou ina ia maua le olioli.15 Ua aoao mai e faaaliga i nei ona po faapea ua saunia e le Atua se fuafuaga mo se aafiaga faaletino lea e mafai ai e tagata uma ona filifili ia usiusitai e saili Ana faamanuiaga aupito silisili pe fai ni filifiliga ia e taitai atu ai i se tasi o malo e itiiti ifo le mamalu.16 Ona o le alofa tele o le Atua mo Ana fanau uma, o loo sili pea ona matagofie na malo itiiti ifo [le mamalu] nai lo le mea e mafai ona malamalama i ai tagata soifua.17 O le Togiola a Iesu Keriso ua mafai ai nei uma, e pei ona Ia “faamamaluina le Tama, ma laveai galuega uma o ona aao.”18
III.
Ua ou talanoa atu i le poloaiga muamua, ae a le lona lua? E faapefea ona tatou tausia le poloaiga o le alofa atu i o tatou tuaoi? Ua matou saili e faatauanau o tatou tagata o le ekalesia e faapea o i latou o e mulimuli i aoaoga ma amioga faatauafafine, faatauatane, tosina i itupa uma e lua, po o itupa ua suia, e tatau ona taulimaina i le alofa lea na poloaiina ai i tatou e lo tatou Faaola ia faaali atu i o tatou tuaoi uma. O le mea lea, ina ua folafola mai le aloaia faaletulafono o faaipoipoga i le itupa e tasi i le Iunaite Setete, na folafola mai ai e le Au Peresitene Sili ma le Korama a le Toasefululua faapea: “Ua aoaoina i tatou e le talalelei a Iesu Keriso ia alolofa atu ma taulima tagata uma i le agalelei ma le migao—e tusa lava pe eseese o tatou manatu. Matou te faamautinoa atu e le tatau ona taulimaina ma le le faaaloalo i latou o e ua latou faaaogaina ia tulafono po o faaiuga o faamasinoga e faatagaina ai le faaipoipoga i le itupa e tasi.”19
Ma le isi, e le tatau lava ia i tatou ona sauaina i latou o e e le tutusa o tatou talitonuga ma tautinoga.20 O le mea e faanoanoa ai, o nisi tagata o fetaiai ma nei faafitauli o loo faaauau pea ona lagona le ta’ufaatauvaaina ma teena e nisi o tagata ma taitai o le ekalesia i totonu o tatou aiga, uarota, ma siteki. E ao ona tatou taumafai uma ina ia agalelei atili ma faaaloalo atili.
IV.
Mo mafuaaga tatou te le malamalama i ai, ua ia i tatou ni luitau eseese i o tatou aafiaga faaletino. Ae ua tatou iloa o le a fesoasoani mai le Atua ia i tatou taitoatasi ia manumalo i nei luitai pe afai tatou te saili atu ma le faamaoni i Lana fesoasoani. A mavae ona puapuagatia ma salamo mo le solia o tulafono ia na aoaoina ai i tatou, tatou te faamoemoe uma lava mo se malo o le mamalu. O le faamasinoga mulimuli ma faaiu o le a faia e le Alii, ona ua na o Ia e i ai le malamalama, atamai, ma le alofa tunoa e manaomia e faamasino ai i tatou taitoatasi.
I le taimi nei, e tatau ona tatou taumafai ia tausia poloaiga sili uma e lua. O le faia o lena mea, tatou te savavali faapaleni ai i le va o le tulafono ma le alofa—tausia o poloaiga ma savavali i le ala o feagaiga, a o alolofa atu i o tatou tuaoi i luga o le ala. O lenei savaliga, e manaomia ai lo tatou sailia o musumusuga faalelagi i mea e lagolago ai ma mea e tetee atu ai ma le auala e alofa atu ai ma faalogo ma le faaaloalo ma aoao atu ai i le faagasologa. O la tatou savaliga, e manaomia ai lo tatou le fetuunaia o poloaiga ae ia faaali atu se fuataga atoa o le malamalama ma le alofa. O la tatou savaliga, e tatau ona mafaufau i tamaiti o e e le o mautinoa o latou tulaga faaleitupa, ae e le fautuaina le vave faailogaina o i latou aua o le toatele lava o tamaiti e tutupu ae ma o ese mai ia lagona.21 O la tatou savaliga, e tetee atu i faiga e aveesea ai tagata mai le ala o feagaiga, ma teenaina le lagolagoina o soo se tasi na te taitaieseina tagata mai le Alii. O nei mea uma ia tatou manatua ai ua folafola mai e le Atua le faamoemoe ma le olioli ma faamanuiaga tupito mo tagata uma o e tausia Ana poloaiga.
V.
O tina ma tama ma i tatou uma e nafa ma le aoao atu o poloaiga sili uma e lua. Mo tamaitai o le Ekalesia, ua faamalamalama mai ai e Peresitene Spencer W. Kimball lena tiute i lenei valoaga sili: “O le tele o le faatupulaia ua oo mai i le Ekalesia i nei aso e gata ai, o le a oo mai ona o le toatele o tamaitai lelei o le lalolagi … o le a tosina mai i le Ekalesia i ni vaega toatele. O le a tupu lenei mea i se maualuga e faapea ona atagia mai ai i tamaitai o le Ekalesia le amiotonu ma le tulaga lelei i o latou olaga, atoa foi ma le maualuga o loo vaaia ai tamaitai o le Ekalesia o ni tamaitai iloga ma le tulaga ese … mai tamaitai o le lalolagi. … O lea la o le a avea ai faataitaiga tamaitai o le Ekalesia ma se uunaiga taua i le tuputupu ae o le faitau aofai ma le faaleagaga o le Ekalesia i aso amuli.”22
O le talanoa ai i lena valoaga, na tautino mai ai e Peresitene Russell M. Nelson e faapea “o le aso na valoia e Peresitene Kimball o le taimi nei. O outou o tamaitai na ia muai vaai i ai!”23 E aunoa ma lo tatou iloaina e i tatou o e na faalogo i lena valoaga i le 40 tausaga ua mavae, o nisi o na tamaitai e ono laveaiina e tamaitai o lenei Ekalesia, o a latou lava uo pele ma aiga o e o loo aafia i le taimi nei i mea faalelalolagi ua faamuamua ma mea taufaasese faatiapolo. O la’u tatalo ma le faamanuiaga lea ina ia e aoao atu ma galue e faataunuu lena valoaga, i le suafa o Iesu Keriso, amene.