O Le Poloaiga Lona Lua ma le Sili
E oo mai lo tatou olioli silisili pe a tatou fesoasoani atu i o tatou uso ma tuafafine.
O’u uso e ma tuafafine pele, faafetai atu mo mea uma o loo outou faia e fesoasoani ai e faapotopoto Isaraelu i itu uma e lua o le veli, e faamalosia ai o outou aiga, ma ia faamanuia ai olaga o i latou e lē tagolima. Faafetai mo le ola ai o ni soo moni o Iesu Keriso.1 Ua outou iloa ma fiafia e usiusitai i poloaiga sili e lua, ia alofa i le Atua ma ia alofa i ou tuaoi.2
I le gasologa o le ono masina ua alu, sa ma feiloai ai ma Sister Nelson i le faitau afe o le Au Paia a o ma faimalaga atu i Amerika Tutotonu ma Saute, atumotu o le Pasefika, ma le tele o aai i le Iunaite Setete. A o ma faimalaga atu, o le ma faamoemoe ia atiae lo outou faatuatua. Ae ma te foi mai lava i taimi uma ua faamalosia lo ma faatuatua e tagata ma uo ma te feiloai i ai. E mafai ona ou faasoa atua ni taimi anoa se tolu mai i o ma aafiaga talu ai nei?
Ia Me, sa ma malaga ai ma Sister Nelson faatasi ma Elder Gerrit W. ma Sister Susan Gong i le Pasefika i Saute. A o i ai i Aukilani i Niu Sila, sa matou maua le faamamaluga e feiloai ai ma taitai sauniga mai malumalu Mosalemi e lua i Kalaiesetete, Niu Sila, lea i le lua masina na muamua ai, sa tafanaina ai i lalo tagata tapuai lē sala i se faiga faatupu faalavelave matautia.
Sa faailoa atu lo matou tigaalofa i nei uso o se isi faatuatuaga ma toe faamautu i ai lo tatou tautinoga e tasi i le saolotoga o tapuaiga.
Sa ofo atu foi i ai a tatou galuega ofofua ma sina fesoasoaniga tautupe e toefausia ai o latou malumalu. O le matou feiloaiga ma nei taitai Mosalemi sa faatumulia i le faailoaga agamalu o uiga faaleusoga.
Ia Aokuso, faatasi ma Elder Quentin L. ma Sister Mary Cook, sa ma feiloai ai ma Sister Nelson i tagata i Buenos Aires, Atenitina—o le toatele o i latou e le o nisi o lo tatou faatuatuaga—o e ua suia o latou olaga e nofoa faataavalevale na foai atu i ai e ala atu i la tatou Latter-day Saint Charities. Sa musuia i matou a o latou faailoa maia le lotofaafetai na tumu i le olioli mo a latou nofoa fou e feoai ai.
O se taimi lona tolu taua sa tupu i ni nai vaiaso talu ai iinei i le Aai o Sate Leki. Sa oo mai i se tusi tulagaese sa ou mauaina i lo’u aso fanau mai se tamaitai talavou o le a ou ta’ua o Mary—e 14 tausaga.
Sa tusia e Mary ni mea sa tutusa ai ma’ua: “E toa 10 lau fanau. E toa 10 matou le fanau. E te tautala i le Meneterini. E toafitu tamaiti o lo’u aiga, e aofia ai ma a’u, sa vaetama mai Saina, o le Meneterini la le matou gagana muamua. O oe o se fomai tipitipi o le fatu. E lua taotoga o le fatu o lo’u uso sa fai. E te fiafia i le lotu lua-itula. Matou te fiafia i le lotu lua-itula. E lelei lou leo usu pese. E lelei foi le leo o lo’u tuagane. E tauaso o ia e pei o a’u.”
Sa matua ootia a’u i upu a Mary, sa faaalia ai e le gata o lona agaga matagofie ae faapena foi le tuuto o lona tina ma le tama.
O le Au Paia o Aso e Gata Ai, e pei foi o isi soo o Iesu Keriso, o loo tagai i taimi uma mo auala e fesoasoani atu ai, e siitia, ma alolofa i isi. O i latou o loo naunau ina ia ta’ua o le nuu o le Alii ua “loto e tauave le avega a le tasi [ma le isi], … e faanoanoa faatasi ma e e faanoanoa; … ma [ia] faamafanafana atu ia te i latou o e e manaomia le faamafanafanaga.”3
Latou te saili moni lava e ola i poloaiga muamua ma le sili ma le lona lua. A tatou alolofa i le Atua ma o tatou loto atoa, Na te liliu atu o tatou loto i le tulaga manuia o isi i se taamilosaga matagofie ma mama.
O le a faigata ona fuafua le tele o auaunaga e tuu atu e le Au Paia o Aso e Gata Ai i le lalolagi atoa i aso uma o le tausaga, ae e faigofie ona fuafua le lelei e faia e le Ekalesia o se faalapotopotoga e faamanuia ai alii ma tamaitai—tamaiti ma teineiti—o loo manaomia se lima fesoasoani.
O le galuega alofa aapa atu a le Ekalesia sa tatalaina i le 1984. Ona faia lea o se anapogi a le Ekalesia aoao e saili ai tupe e fesoasoani ai i e na mafatia i se lamala faataumaoi i Aferika i sasae. Sa foai atu e tagata o le Ekalesia le $6.4 miliona i lena aso anapogi e tasi .
Ona auina atu lea o Elder M. Russell Ballard ma Brother Glenn L. Pace i Efiopia e iloilo pe faapefea ona faaaoga na tupe paia i se auala silisili. O lenei taumafaiga na faamaonia ai le amataga o le mea o le a mulimuli ane lauiloa o le Latter-day Saint Charities.
Talu mai lena taimi, ua foai atu ai e le Latter-day Saint Charities le silia ma le lua piliona talā i fesoasoaniga mo i latou ua mafatia i le lalolagi atoa. O lenei fesoasoani ua ofo atu i e mauaina e le afaina pe i ai ni latou fesootaiga ma le ekalesia, tagatanuu, ituaiga, ituaiga faaleitupa, itupa, po o manatu faaupufai.
E le na o le pau lena. Ina ia fesoasoani i tagata o le Ekalesia a le Alii o e o pagatia, tatou te alolofa ma ola i le tulafono anamua o le anapogi.4 Tatou te le aai e fesoasoani ai i isi o loo fiaaai. E tasi le aso i masina taitasi, tatou te le aai ai ae foai atu le tau o lena meaai (ma faasili atu) e fesoasoani ai ia i latou o mafatia.
O le a le galo lava ia te a’u la’u uluai asiasiga i Aferika i Sisifo i le 1986. Na o mai le Au Paia i a matou fonotaga i ni aofaiga tetele. E ui sa itiiti ni a latou mea e fua i meatotino faalelalolagi, ae o le toatele lava na o mai ua laei i ofu papae e leai ma sina pisipisia.
Sa ou fesili i le peresitene o le siteki po o faapefea ona ia tausia tagata sa laiti ni mea na maua. Sa ia tali mai sa iloa lelei e o latou epikopo o latou tagata. Afai na gafatia e tagata ni meaai se lua o le aso, e leai la se fesoasoani na manaomia. Ae afai e na o le tasi le meaai pe itiiti foi na gafatiaina—e tusa lava pe o fesoasoani i ai aiga—e saunia e epikopo meaai, e faatupe mai le taulaga anapogi. Ona ia faaopoopo mai lea o lenei mea moni ofoofogia: o a latou foai o le taulaga anapogi e masani lava ona sili atu i a latou tupe faaalu. Ona auina atu lea o faasiliga o taulaga anapogi i tagata i isi nofoaga o o latou manaoga e sili atu i lo o latou manaoga. O na Au Paia malolosi i Aferika sa aoaoina a’u i se lesona maoae e uiga i le mana o le tulafono ma le agaga o le anapogi.
I le avea ai ma tagata o le Ekalesia, tatou te lagonaina se fesootaiga ia i latou o loo mafatia i soo se auala.5 I le avea ai ma atalii ma afafine o le Atua, o i tatou uma o uso ma tuafafine. Tatou te faalogo i se apoapoaiga o le Feagaiga Tuai: “Ia e matua faamafola atu lou lima i lou uso, i le ua tigaina, ma le ua mativa e ia te oe.”6
Tatou te tauivi foi ia ola i aoaoga a le Alii o Iesu Keriso e pei ona tusia i le Mataio 25:
“Aua na ou fia ai, ona outou avane ai lea ni mea ou te ‘ai ai, na ou fia inu, ona outou avane ai lea ni vai ou te inu ai; sa fai a’u ma tagata ese, ona outou talia lea o a’u:
“Na ou le lavalavā ona outou faaofuina lea o a’u; na ou ma’i, ona outou asiasia mai lea o a’u. …
“… Aua na faia e outou i le tasi o e aupito itiiti o o’u uso nei, o a’u lea na outou faia i ai.”7
Se’i o’u ta’ua ni nai faataitaiga o le auala o loo mulimuli ai le Ekalesia i nei aoaoga a le Faaola.
Ina ia fesoasoani e fafaga e fiaaai, o loo faagaoioi ai e le Ekalesia faleteuoloa e 124 a epikopo i le lalolagi atoa. E ala atu ia i latou, pe tusa e 400,000 oka o meaai e tuuina atu i tausaga taitasi i tagata taitoatasi o mafatia. I nofoaga e le o i ai ni faleteuoloa, e tala mai e epikopo ma peresitene o paranesi ni tupe mai le taulaga anapogi a le Ekalesia e tuu atu ai meaai ma sapalai mo o latou tagata le tagolima.
Peitai, o le luitau o le matelaina o loo aafia ai le toatele o tagata nai lo na o tagata o le Ekalesia. O loo faatuputeleina i le lalolagi atoa. Na faailoa i se lipoti talu ai nei a Malo Aufaatasi e faapea o le aofai o tagata e leai ni meaai i le lalolagi ua sili atu nei ma le 820 miliona—pe o le toetoe tasi mai le toaiva tagata o loo i ai i le lalolagi.8
Oka se fuainumera inā matautia. E maeu lo matou faafetai mo a outou saofaga. Faafetai atu i lo outou lotofoai faamaoni, o le a maua ai e le faitau miliona i le lalolagi meaai matua manaomia, lavalava, malutaga le tumau, nofoa faataavalevale, vailaau, vai mama, ma isi.
O le tele o faamai i le lalolagi atoa e mafua mai ona o le lē mama o le suavai. E oo mai i lenei taimi, o ta’imua a galuega alofa a le Ekalesia ua fesoasoani e avatu le suavai mama i le fia selau o nuu i atunuu e 76.
O se poloketi i Luputa, i le Malo Faatemokarasi o Congo, o se faataitaiga lelei lea. I se aofai o tagatanuu e silia ma le 100,000, sa leai se suavai maua i le aai. Sa ao ona savavali tagata i mea mamao mo punavai o suavai saogalemu. Sa maua se vaipuna i le mauga e 18 maila (29 km) le mamao, ae sa le mafai e tagata o le aai ona maua lena vai i se tulaga faifai pea.
Ina ua iloa e a tatou faifeautalai o galuega alofa lenei luitau, sa latou galulue faatasi ma taitai o Luputa e ala i le sapalai atu o anomea ma faia aoaoga e faapaipa atu ai le suavai i le aai. Sa faaalu e tagata o Luputa le tolu tausaga e eliina ai se alavai e tasi-le-mita-le-loloto e oso atu i papa ma le togavao. E ala i le galulue faatasi, na i’u ai ina taunuu mai le aso fiafia ina ua maua le suavai fou ma mama mo tagata uma o lena nuu.
E fesoasoani foi le Ekalesia i tagata sulufai, pe o mai mai taua faalemalo, o faalavelave faalenatura, po o sauaga faalelotu. E silia ma le 70 miliona tagata ua aveesea nei mai i o latou fale.9
I le tausaga 2018 lava ia, sa tuuina atu ai e le Ekalesia sapalai mo faalavelave faafuasei i tagata sulufai i atunuu e 56. Ma le isi, e toatele tagata o le Ekalesia e ofofua atu o latou taimi e fesoasoani ai i tagata sulufai ua nonofo faatasi i ni nuu fou. Matou te faafetai atu i tagata uma o outou o loo aapa atu e fesoasoani ia i latou o e o loo taumafai ia faamautu i ni fale fou.
E ala i foai agaalofa i faleoloa o le Deseret Industries i le Iunaite Setete, e faitau miliona pauna o lavalava ua aoina ma faavasegaina i tausaga taitasi. A o faaaogaina e epikopo i le lotoifale nei foai e tele e fesoasoani ai i tagata mafatia, o le vaega aupito tele e foai atu i isi faalapotopotoga o galuega alofa o loo tufatufa atua ia mea i le lalolagi atoa.
Ma i le tausaga ua te’a, sa tuu atu ai e le Ekalesia se tausiga o le vaai mo le silia ma le 300,000 tagata i atunuu e 35, o le tausiga mo pepe fou mo le faitau afe o tina ma pepe i atunuu e 39, ma nofoa faataavalevale mo le silia ma le 50,000 tagata o loo nonofo i le tele o atunuu.
Ua lauiloa le Ekalesia mo le i ai faatasi ma ē e muamua tali atu pe a tupu se faalavelave. E oo foi lava i le taimi a o lei taia e se afa, e fuafua e taitai o le Ekalesia ma aufaigaluega i nofoaga o le a aafia ni fuafuaga o auala o le a latou avatu ai ni sapalai mo toomaga ma ofofua atu le fesoasoani ia i latou o le a aafia.
I le tausaga na te’a nei, sa faatino ai e le Ekalesia le silia ma le 100 poloketi mo toomaga mai faalavelave faafuasei i le lalolagi atoa, e fesoasoani ai i e na aafia i afa, afi, lologa, mafuie, ma isi mala. Soo se taimi lava e mafai ai, e feoai ai o tatou tagata o le Ekalesia i ta’ofu sasama o Lima Fesoasoani i ni aofaiga toatele e fesoasoani atu ia i latou ua mafatia i faalavelave. O le ituaiga o tautua, e tuuina atu e le toatele o outou, o le ute tonu lea o le auaunaga.
Ou uso e ma tuafafine pele, o gaoioiga ua ou faamatalaina ua na o sina vaega itiiti o le polokalama aapa atu ua faatupulaia a le uelefea ma galuega alofa a Le Ekalesia a Iesu Keriso o le Au Paia o Aso e Gata Ai.10 Ma o outou tagata ia ua mafai ai ona faia nei mea uma. Ona o o outou olaga o faataitaiga, o o outou loto foai, ma o outou lima fesoasoani, e le o se mea e ofo ai le viia o a outou taumafaiga e le toatele o taitai o nuu ma malo.11
Talu ona avea au ma Peresitene o le Ekalesia, ua ou maofa lava i le toatele o peresitene, o palemia, ma amapasa ua faafetai mai ia te au ma le faamaoni mo a tatou fesoasoaniga alofa i o latou tagata. Ma ua latou faailoa maia foi le lotofaafetai mo le malosiaga o loo avatu e o tatou tagata faamaoni i o latou atunuu i le avea ai ma ni tagatanuu lotonuu ma faisaofaga.
Ua ou maofa foi ina ua asiasi mai taitai o le lalolagi i le Au Peresitene Sili ma faailoa mai lo latou faamoemoe mo le Ekalesia ina ia faatuina i totonu o o latou eleele. Aisea? Ona ua latou iloa o le a fesoasoani atu le Au Paia o Aso e Gata Ai e fausia ni aiga ma ni nuu malolosi, ma faia ia lelei atu le olaga mo isi po o fea lava o latou nonofo ai.
Po o fea lava o loo tatou nonofo ai, e lagona e tagata o le Ekalesia ma le faananau e uiga i le tulaga faatama o le Atua ma tulaga faaleusoga o tagata uma. O lea, o lo tatou olioli silisili e oo mai pe a tatou fesoasoani atu i o tatou uso ma tuafafine, po o fea lava o tatou nonofo ai i lenei lalolagi matagofie.
O le tuuina atu o le fesoasoani i isi—i le faia o se taumafaiga manafanafa e popole mo isi e pei, pe sili atu nai lo le tatou popole ia i tatou lava ia—o lo tatou olioli lea. Aemaise lava, ou te fia faaopoopo atu, pe a le talafeagai ma pe a aveesea ai i tatou mai i o tatou tulaga mafanafana. O le ola i lena poloaiga sili lona lua o le ki lea i le avea ai ma se soo moni o Iesu Keriso.
O’u uso e ma tuafafine pele, o outou o ni faataitaiga ola o fua e maua mai i le mulimuli i aoaoga a Iesu Keriso. Ou te faafetai atu ia te outou! Ou te alofa ia te outou!
Ou te iloa o loo soifua le Atua. O Iesu o le Keriso. Ua toefuatai mai Lana Ekalesia i nei aso e gata ai e faataunuu ona faamoemoega paia. Ou te molimau atu ai i le suafa o Iesu Keriso, amene.