O Le Olioli o le Au Paia
O le olioli e sau mai le tausiga o poloaiga a Keriso, mai le faatoilaloina o faanoanoaga ma vaivaiga e ala ia te Ia, ma mai le auauna atu e pei ona Ia auauna atu.
O le perofeta o Enosa o le Tusi a Mamona, o le atalii o le atalii o Liae, sa tusia se aafiaga se tasi lea na tupu i le amataga o lona olaga. Ao tulimanu na o ia i le vaomatua, sa amata ona mafaufau loloto Enosa i aoaoga a lona tama, o Iakopo. Sa ia faamatalaina, “O upu sa ou faalogo soo o tautala i ai loʼu tamā e uiga i le ola e faavavau, ma le olioli o le au paia, sa gotouga ifo i loʼu loto.”1 I le matelaina faaleagaga o lona agaga, sa tootuli ai Enosa i le tatalo, o se tatalo ofoofogia na faia i le aso atoa ma oo atu i le po, o se tatalo na oo mai ai ia te ia faaaliga taua, faamautinoaga, ma folafolaga.
E tele na’ua mea e ao ona aoaoina mai le aafiaga o Enosa, ae o le asō o le mea ua tu matilatila i lo’u mafaufau o le manatuaga e Enosa o lona tama o talanoa soo e uiga “i le olioli o le au paia.”
I lenei konafesi i le tolu tausaga talu ai, sa saunoa ai Peresitene Russell M. Nelson e uiga i le olioli.2 Faatasi ai ma isi mea, na ia saunoa ai:
“O le olioli o tatou lagonaina e itiiti lava se mea e faatatau i tulaga o o tatou olaga a o mea uma o loo faatatau i le taulaiga o o tatou olaga.
“Afai o le taulaiga o o tatou olaga e i le fuafuaga o le faaolataga a le Atua … ma ia Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe le o tutupu foi—i o tatou olaga. O le olioli e sau mai [ia te Ia] ma ona o Ia. … Mo le Au Paia o Aso e Gata Ai, o Iesu Keriso o le olioli lea!”3
O le Au Paia o i latou ia ua ulu atu i le feagaiga o le talalelei e ala i le papatisoga ma o loo taumafai ia mulimuli ia Keriso o ni Ona soo.4 O lea, “o le olioli o le au paia” ua faailoa ai le olioli o le avea e faapei o Keriso.
Ou te fia talanoa e uiga i le olioli lea e sau mai le tausiga o Ana poloaiga, le olioli lea e tupu mai le faatoilaloina o faanoanoaga ma vaivaiga e ala ia te Ia, ma le olioli e maua i le auauna ai e pei ona Ia auauna atu.
O Le Olioli o le Tausiga o Poloaiga a Keriso
Ua tatou ola i se vaitau o le faamalieina o tuinanau lea ua fesiliga ai e le toatele le taua o poloaiga a le Alii pe ua faigofie foi ona le amanaiaina latou. O loo tupu soo, o tagata latou te tetee i faatonuga faalelagi e pei o le tulafono o le ola mama, le tulaga faatonuina o le faamaoni, ma le paia o le Sapati, e foliga mai e manuia ma olioli i mea lelei o le olaga, o nisi taimi e sili atu i lo i latou o loo tauivi ia usiusitai. O nisi e amata ona tuufesilisili pe o taua ea taumafaiga ma osigataulaga. Sa i ai se taimi na faitio ai le nuu anamua o Isaraelu:
“Ua le aoga ona auauna atu i le Atua: ma o le a se aoga na tatou tausia ai ana sauniga ma na tatou savavali faanoanoa ai i luma o le Alii o Au?
“Ma o lenei ua tatou ta’u fiafia le ua faamaualuga; ioe, o e ua faia galuega o le amioleaga ua faamautuina; ioe, e oo ia i latou o e ua tofotofo i le Atua ua laveaiina.”5
Ia faatali, sa fetalai ai le Alii, seia oo “i lena aso pe a ou faaputuputu a’u maa taua. … Ona outou … iloa [lea o] le eseesega o le amiotonu ma le amioleaga, i le va o le ua auauna i le Atua ma ia o le ua le auauna atu ia te ia.”6 Atonu o e amioleaga e “maua le olioli ia latou galuega mo se [vai]tau,” ae e le tumau lava.7 O le olioli o le Au Paia e tumau.
E silasila le Atua i mea i o latou vaaiga moni, ma faasoa mai e Ia lena vaaiga ia i tatou e ala i Ana poloaiga, e taialaina ma le mataalia i tatou i faigata ma faafitauli o le olaga faaletino e agai atu i le olioli e faavavau. Sa faamalamalama mai e le Perofeta o Iosefa Samita: “Pe a aoaoina i tatou e Ana poloaiga, e faia i le vaaiga o le faavavau; aua ua silasila mai le Atua i luga ia i tatou e faapei o i ai i tatou i le faavavau; e afio le Atua i le faavavau, ma e le silasila i mea e pei ona tatou vaai i ai”8
Ou te le’i feiloai lava i se tasi na mauaina le talalelei i se taimi mulimuli ane i le olaga o lē e lei moomoo maimau pe ana ia vave maua. “Aue, o filifiliga leaga ma measese sa ono ou alofia,” latou te fai mai ai. O poloaiga a le Alii o lo tatou taiala lea i filifiliga lelei atu ma taunuuga fiafia atu. E matua tatau ona tatou olioli ma faafetai atu ia te Ia mo le faaali mai ia i tatou o lenei ala sili atu ona lelei.
A o talavou Sister Kalombo Rosette Kamwanya mai le D.R. Congo, o loo auauna atu nei i le Misiona a Côte d’Ivoire Abidjan West, sa ia anapogi ma tatalo mo le tolu tausaga ia maua le itu na finagalo le Atua na te uia. I se faalepō ofoofogia, sa faaali atu ai ia te ia ni fale se lua, o se falesa ma le mea ua ia iloa nei o se malumalu. Sa amata ona ia saili ma sa lei pine ae ia maua le falesa na ia vaai ai i lana miti. Sa fai mai le faailo, “O Le Ekalesia a Iesu Keriso o le Au Paia o Aso e Gata Ai.” Sa papatiso Sister Kamwanya ona sosoo ai lea ma lona tina ma ona tuagane e toaono. Sa fai mai Sister Kamwanya, “Ina ua ou maua le talalelei, sa ou lagona e pei o se manulele na pueina ua faasaolotoina. Na faatumulia lo’u loto i le olioli. … Sa ou maua le faamautinoaga e alofa le Atua ia te au.”9
O le tausiga o poloaiga a le Alii ua faagafatiaina atoatoa atili i tatou ma faigofie ona lagonaina atili Lona alofa. O le ala sa’o ma le vaapiapi o poloaiga e tau sa’o atu lava i le laau o le ola, ma o le laau ma ona fua, e sili ona suamalie ma “silisili ona manaomia i mea uma,”10 o le faatusa lea o le alofa o le Atua ma ua faatumulia ai le agaga “i le olioli tele.”11 Na fetalai mai le Faaola:
“Afai tou te tausia a’u poloaiga, ona tumau lea o outou i lo’u alofa; pei ona ou tausia poloaiga a lo’u Tama, ma ou tumau i lona alofa.
“Ua ou fai atu nei mea ia te outou, ina ia tumau ai lo’u olioli ia te outou, ma ia atoatoa foi lo outou olioli.”12
O Le Olioli o le Manumalo e ala ia Keriso
E tusa foi lava pe maua i tatou o tausia ma le faamaoni ia poloaiga, ae o loo i ai pea tofotofoga ma faafitauli e ono faalavelave i lo tatou olioli. Ae a tatou tauivi ia manumalo i nei luitau faatasi ma le fesoasoaniga a le Faaola, na te lagolagoina uma le olioli tatou te lagonaina i le taimi nei ma le olioli o loo tatou tulimatai atu i ai. Na faamautinoa atu e Keriso i Ona soo, “E maua foi outou e le puapuaga i le lalolagi: a ia outou lototetele; ua ou manumalo i le lalolagi.”13 O le liliu atu ia te Ia, usiusitai ia te Ia, fusia o i tatou ia te Ia, lea e liua ai tofotofoga ma faanoanoaga i le olioli. Se’i o’u ta’ua se faataitaiga se tasi.
I le 1989, sa auauna atu ai Jack Rushton o le peresitene o le Siteki o Irvine Kalefonia i le Iunaite Setete. I le taimi o se tafaoga faaleaiga i le talafatai o Kalefonia, sa faasee Jack e aunoa ma se laupapa faasee ae ta ai e se galu o ia i se papa i lalo o le sami, ma gau ai lona ua ma manu’a tugā ai lona tuasivi. Mulimuli ane sa fai mai Jack, “O le taimi lava na ou lavea ai, sa ou iloa ai ua pe atoa lo’u tino.”14 Sa le toe mafai ona toe tautala pe mānava foi ia lava.15
Sa lagolagoina e aiga, uo, ma tagata o le siteki Uso Rushton ma lona faletua, o Jo Anne, ma, faatasi ai ma isi mea, sa toe sui se vaega o le latou fale e taulima ai le nofoa faataavalevale a Jack. Sa oo ina avea Jo Anne ma tausima’i autu a Jack mo le isi 23 tausaga na sosoo ai. E faasino atu i tala o le Tusi a Mamona i le auala e asiasi atu ai le Alii i Ona tagata i o latou puapuaga ma faamāmāina a latou avega,16 sa fai mai ai Jo Anne, “E tele ina ou maofa i le māmā o le loto ou te lagonaina i le tausiga o lo’u toalua.”17
O sina suiga i ona totoga e mānava ai na toefuatai ai le gafatia o Jack e tautala, ma i totonu o le tausaga, sa valaauina ai Jack o se faiaoga o Aoaoga Faavae o le Talalelei ma se peteriaka o le siteki. Pe a ia tuu atua se faamanuiaga faapeteriaka, e tuu e se isi e umia le perisitua lima o Uso Rushton i luga o le ao o le tagata e mauaina le faamanuiaga ma lagolagoina ona lima ma ogalima i le taimi o le faamanuiaga. Sa maliu Jack i le Aso Kerisimasi o le 2012, i le mavae ai o le 22 tausaga o auaunaga tuuto.
I se tasi taimi i se faatalanoaga, sa matau ai e Jack: “O le a oo mai faafitauli i o tatou olaga uma; o se vaega o lo tatou i ai iinei i lenei lalolagi. Ma e manatu nisi tagata o le lotu po o le mauaina o le faatuatua i le Atua o le a puipuia oe mai mea leaga. Ou te le manatu o le uiga lena. Ou te manatu o le uiga e faapea, afai e malosi lo tatou faatuatua, lea afai e tutupu mea leaga, ia o le a tutupu lava, o le a mafai ona tatou taulimaina na mea. … E le femououa’i lava lo’u faatuatua, ae e le faapea la sa ou le’i oo ai i ni mafatiaga. Ou te manatu mo le taimi muamua o lo’u olaga sa tulei ai a’u i le mea e gata ai, ma o le mea moni sa leai se mea e liliu i ai, ma o lea sa ou liliu atu ai i le Alii, ma e oo mai i lenei aso, ua ou lagona se olioli inā tele.”18
O le vaitau lenei ua i ai i nisi taimi ni osofaiga lē alofa i luga o ala o faasalalauga faaagafesootai ma patino i tagata e faasaga ia i latou o ē saili e tausi ia tulaga faatonuina a le Alii o laei, faafiafiaga, ma le mamā i feusuaiga. E matele lava i le autalavou ma talavou matutua faatasi ma le Au Paia, faapea ai foi ma tamaitai ma tina, o loo amoina lenei satauro o le tauemuina ma le sauaina. E le faigofie le faatoilaloina o ia sauaga, ae ia manatua upu a Peteru: “Afai e upuleagaina outou ona o le suafa o Keriso, amuia outou, aua o loo tumau ia te outou le Agaga mamalu o le Atua; o loo faifaia o ia e i latou, a ua viia e outou.”19
I le Faatoaga o Etena, sa i ai Atamu ma Eva i se tulaga o le lē sala, “e aunoa ma se olioli, ona sa laua lē iloa se pagatia.”20 O lenei, i le avea ai ma tagata e tali atu mo i tatou lava, tatou te maua le olioli e manumalo ai i le pagatia i soo se ituaiga, pe o se agasala, tofotofoga, vaivaiga, po o soo se isi lava faafitauli i le fiafia. O le olioli lea o le lagonaina o le alualu i luma i le ala o le avea ma soo; le olioli o le “mauaina o se faamagaloga o … agasala, ma ina ua latou maua le filemu o le mafaufau”;21 o le olioli o le lagonaina o le faalauteleina o le agaga o se tasi ma tuputupu ae e ala i le alofatunoa o Keriso.22
O Le Olioli o le Auauna Atu e pei ona Auauna Atu Keriso
E maua e le Faaola le olioli i le aumaia o lo tatou tino ola pea ma le ola e faavavau.23 A o lauga ai e uiga i le Togiola a le Faaola, sa saunoa Peresitene Russell M. Nelson:
“E pei o mea uma, o Iesu Keriso o lo tatou faataitaiga sili, ‘o le na onosai i le satauro, ona o le olioli sa tuu i ona luma’ [Eperu 12:2]. Mafaufau i lena mea! Ina ia mafai ona Ia onosaia aafiaga aupito i faigata e lei onosaia muamua i le lalolagi, na taulai atu ai lo tatou Faaola i le olioli!
“Ma o le a le olioli lea sa tuu i Ona luma? E mautinoa lava na aofia ai le olioli i le faamamāina, faamaloloina, ma le faamalosia o i tatou; o le olioli o le totogiina mo agasala a tagata uma o le a salamo; o le olioli o le a mafai e oe ma a’u ona toe foi atu—i le mama ma le agavaa—e mau faatasi ma o tatou Matua Faalelagi ma aiga.”24
E faapena foi, o le olioli ua “tuu i o tatou luma” o le olioli lea o le fesoasoani atu i le Faaola i Lana galuega o le togiola. I le avea ai ma fanau a Aperaamo,25 tatou te auai ai i le faamanuiaina o aiga uma o le lalolagi “i faamanuiaga o le Talalelei, o faamanuiaga ia o le faaolataga, o le ola e faavavau.”26
E manatua upu a Alema:
“O lo’u mitamitaga lenei, atonu e avea a’u ma tufugaaao o le Atua i le taitaiina mai o se agaga i le salamo; o lo’u olioli foi lenei.
“Ma faauta, a ou vaai atu i le toatele o ou uso ua salamo faamaoni, ma ua o mai i le Alii lo latou Atua, ona faatumulia lea o lou agaga i le olioli. …
“Peitai ua le na’o lo’u lava manuia ua ou olioli ai, ae ua sili atu le atoatoa o lo’u olioli ona o le manuia o o’u uso, o e na ō ae i le laueleele o Nifae. …
“O lenei, pe a ou mafaufau i le manuia o o’u uso nei e segia ese atu lo’u agaga, ua oo lava e peiseai ua vavae ese atu ai mai le tino, i le tele naua o lo’u olioli.”27
O fua o la tatou auaunaga i le tasi ma le isi i le Ekalesia o se vaega o le olioli ua “tuu i o tatou luma.” E oo lava i taimi o le lotovaivai po o le ātu, e mafai lava ona tatou auauna atu ma le onosai pe afai tatou te taulai atu i le olioli o le faafiafiaina o le Atua ma aumaia ai le malamalama, toomaga, ma le fiafia i Ana fanau, o o tatou uso ma tuafafine.
A o i ai i Haiti i le masina ua te’a mo le faapaiaina o le Malumalu o Port-au-Prince, sa feiloai ai Elder David ma Sister Susan Bednar i se tuafafine talavou o lana tane sa fasiotia i ni nai aso na muamua atu i se faalavelave matautia. Sa la’ua fetagisi faatasi ma ia. Ae i le Aso Sa sa tu ai lenei tamaitai pele i lona tulaga o se faasino nofoa i sauniga o le faapaiaga, ma se ‘ataata agamalu ma talimalo mo tagata uma na ulufale atu i le malumalu.
Ou te talitonu o le “olioli sili o le au paia” e sau mai i le iloaina o loo augani mai le Faaola i lo latou faamoemoega,28 “ma e leai se tasi e mafai ona malamalama i le olioli lea [o le a faatumuina] o latou agaga [ao] tatou [faalogo atu ia Iesu] o tatalo atu i le Tama mo i tatou.”29 Faatasi ai ma Peresitene Russell M. Nelson, ou te molimau atu o lena olioli o se meaalofa mo Au Paia faatuatua “o e na onosaia satauro o le lalolagi”30 ma o e “taumafai ma le naunautai e ola i se olaga amiotonu, e pei ona aoao mai e Iesu Keriso.”31 Tau ina ia tumu lo outou olioli, ou te tatalo ai i le suafa o Iesu Keriso, amene.