Rokon ana Boki Moomon

Iroun Unimwaane Ulisses Soares

Man te Kooram n Abotoro n te Tengaun ma Uoman

Koaua rimoa ao taan kakoaua aika onoti n Ana Boki Moomon a kakoaua bwa rokona bon te bwai ae kamimi.

Ngke e botaki ma unimwaanen te Ekaretia n te tai teuana, te Burabeti Iotebwa Timiti e katanoata: “Uota nako Ana Boki Moomon, ao taian kaotioti, ao e nga ara aro? Akea iroura.”¹ Tariu ao mwaneu aika kam tangiraki, n rimwian te Moan Kaotioti, rokon Ana Boki Moomon ae kamimi bon kanikinaean wakinan te kauoua ni bwai ae kakawaki ni Manga kaokakin a na euangkerio Iesu Kristo n te bong aei. Ana Boki Moomon e kaota ana tangira te Atua ibukiia Natina, ao n ana karea ni kamaiu te Uea Iesu Kristo ae aki nanonano ao e roko mai ieta, ao n Ana ibuobuoki ibuakoia Nibwaite imwiin Mangautina.² E kaota naba koauan ae nikiran te bata are Iteraera e na bane n riki n ti teuana rinanon Ana mwakuri ni boong aika kaitira ao man aki tewenakoaki n aki toki.³

Ngkai ti kamatebwaia rokon te boki ae tabu aei ni boong aika kaitira, ti kunea bwa uotakin Ana Boki Moomon nakon te aonaaba e kamiimi—man reken bwaatua koora iroun te Burabeti Iotebwa Timiti mairoun te anera ae tabu nakon rairakina “man ana bwaintangira ao mwaakan te Atua,”⁴ kamanoakina, ao boretiakina man ana ibuobuoki te Uea.

Rokon Ana Boki Moomon e riki imwain reken bwaatua koora iroun Iotebwa Timiti man bain te anera are Moronaai. Burabeti ngkoa a kaman taetae ni burabetiia kaotin te boki aei ni boong aikai.⁵ Itaia e taetae iaon te boki ae kanimwaki n te kanikinaa, are ngkana e kaoti aomata a na kaitaraa ana taeka te Atua. Te kaangaanga aei e na katauraoa te kawai are e na kona iai te Atua ni karaoa Ana “mwakuri ae moan te kamimi,” bwa a na [mauna] rabakauia aia aomata aika rabakau, ao [a na] karabaaki wanawanaia aia aomata aika wanawana” ao aika a nanorinano a na “kabatia aia kimareirei iroun Iehova, ao akana akea aia bwai i buakoia aomata a na kakatonga iroun Atuaia Iteraera ae Tabu.”⁶ Etekiera e taetae iaon ana kai Iuta (te Baibara) ao ana kai Eberaim (Ana Boki Moomon) ake a ikotaki n riki bwa tii teuana. Etekiera (n te O Tetemanti) ao Riaai (n Ana Boki Moomon) a kaotia bwa a na “botaki n rikirake” bwa a na kunei kaairuan reirei aika kewe, ni karekea te rau, ao ni kairiira nakon ataakin berita aika tabu.⁷

N tairikin Tebetembwa 21, 1823, teniua ma te iterana te ririki imwiin reken te Moan ni Mii ni Burabeti, e kawaraki Iotebwa teniua te tai iroun te anera Moronaai, te kabanea ni burabeti irouia Nibwaite i Amerika rimoa, imwiin ana tataro. Inanon aia reitaki are e waaki ni karokoa e bong, Moronaai e tuanga Iotebwa ae iai ana mwakuri te Atua ae kamimi ibukina ae na karaoia—rairan ao boretiakin aia taeka aika anainano burabeti ake ngkoa i Amerika nakon te aonaaba.⁸ Te bong are imwiina, e nakon te tabo Iotebwa, ae aki raroa ma mwengana, are a taunaki iai bwatua iroun Moronaai imwain tokin maiuna. Ikekei Iotebwa e a manga nora riki Moronaai, are e tuangnga bwa e na katauraoia bwa e na karekei bwatua n taai aika a na roko.

Inanon aua ririki ake imwiina, n Tetembwa 22 ni katoa ririki, e karekei kaetieti tabeua riki Iotebwa mairoun Moronaai ni kaineti ma tararuakin abanuean te Uea ni boong aika kaitira. Ana katauraoi Iotebwa e raonaki naba ma rokoia ana anera te Atua, ngaia are e a kaotinakoa kakawakin ao mimitongin te bwai ae riki aika a na karaoaki ni boong aika kaitira.⁹

Marena ma Emma Hale n 1827 bon mwakoron te katauraoi anne. Emma e karaoa te mwakuri ae kakawaki ni buoka te Burabeti inanon maiuna ao n ana mwakuri. Ni koauana, n Tetebembwa 1827, Emma e raona Iotebwa nakon te katabuki n te tabo are a karabaaki iai taian bwatua, ao e tataningaia ngke e anga rekooti te anera ae Moronaai nakon bain Iotebwa. E karekea te berita Iotebwa ae a na kawakinaki bwaatua ngkana e kona ni kawakin ni karokoa ae a manga kaokaki nakon bain Moronaai.¹⁰

Raoraou aika kam tangiraki, a mwaiti kukune iaon bwaai ake rimoa n taai aikai aika a riki man aia ukeuke taan rabaku iaoia aomata ake rimoa ke man kabuanibwai aika karina man te mwakuri ni kateitei. E ngae n anne, e kairaki Iotebwa Timiti, nakon bwaatua iroun te anera. Mwiin te mwakuri anne bon te kakai.

Wakinan rairan Ana Boki Moomon bon te kakai naba. Te rekooti rimoa ae tabu aei e aki “rairaki” n aron katein te raitaeka are a na kona ataein te reirei n rairia n aron te taetae n rimoa man reiakinan te taetae n rimoa. Ti riai n taraa aron rekena bwa kanga te “kaotioti” ma ibuobuoki man bwaai ni mwakuri aika katauraoaki iroun te Uea ni kaitaraa are e aki butimwaeaki n te “raitaeka” iroun ae iai rabakauna iaon taian taetae. E taekinna Iotebwa Timiti bwa rinanon mwakan te Atua, e “raira Ana Boki Moomon man koroboki [aika korobanna], te atatai are e bua nakon te aonaaba bwa inanon te bwai ae e riki ae tamaroa aei [e] tei n tii ngaia, te kairake ae akea ana reirei, ni buakana wanawanan te aonaaba ao te aki kan mutiakin reirei n ana tai ngkoa Kristo, ma te kaotioti ae boou.”¹¹ Ana ibuobuoki te Uea n rairan bwaatua bon te kakoaua naba ngkana e iangoaki uarereken te tai are rairairi iai Iotebwa Timiti.¹²

Ana taan koroboki Iotebwa a kakoaua mwaakan te Atua are e kaotaki ngke e tabe ni mwakuri n raira Ana Boki Moomon. Oliver Cowdery n te taina e taku: “Aikai boong aika a na aki mwanuokinaki—n tekateka n ongora n tangin te bwana are e kairaki mai i karawa, e kauta korakoran te kakaitau i bwanibwaniu! E nako te bong teuana imwiin teuana, I reitinako, n aki katabetabeaki, ni korei baike a nako mai wiina, ngkai e raira … ‘Ana Boki Moomon.’”¹³

A kaotaki man rongorongon rimoa bwa man te tai are e karekei iai bwaatua Iotebwa n 1827, a kataaki ni karaoaki mwakuri bwa a na anaaki mai irouia. E kunea bwa “a korakora mwakuri ake a wakinaki ibukin anakin [taian bwatua] mai [irouna]” ao bwa “a bane ni kabonganaki aanga ake a kona ni iangoaki ibukin te mwakuri aio.”¹⁴ N tokina Iotebwa ao Emma a kamatoa bwa a na mwaing mai Manchester, New York, nako Harmony, Pennsylvania, ni kakaea te tabo ae mano ma te mwakuri n raitaeka, ni kararoaia taan iowawa ao tabeman aika a tangiria ni kimoai bwaatua.¹⁵ N aron are e koroia temanna te tia koro rongorongo: “Aio te tai are e a toki iai te moan kangaanga iroun Iotebwa n tararuaan bwaatua aikai. … E ngae ngke a mano rekooti, ao n ana kekeiaki ni kamanoi e a tia Iotebwa n reiakin ana kawai te Atua ao te aomata are e na buokia raoi n te tai ae na roko.”¹⁶

Ngke e raira Ana Boki Moomon, e reiakinna Iotebwa bwa te Uea e na rineia taan kakoaua bwa a na norii bwaatua.¹⁷ Aio mwakoron te bwai ae karaoia te Uea ngke E kangai, “Ni wiia taan kakoaua aika uoman ke teniman a na kamatoaki taian taeka nako.”¹⁸ Oliver Cowdery, David Whitmer, ao Martin Harris, ake bon moan toan Iotebwa ni katean ana mwakuri te Atua ae kamimi ni boong aikai, bon taan moan tia kakoaua ake a weteaki bwa a na kaota aia koaua ae onoti n Ana Boki Moomon nakon te aonaaba. A kakoaua ae te anera, ae roko mairoun te Uea, e kaoti nakoia rekooti rimoa ao a noori taekaia aika kaaraki inanon bwaatua aikanne. A kakoaua naba bwa a ongo bwanaan te Atua mai karawa n taekinna ae e rairaki te rekooti are ngkoa man ana bwaintituaraoi ao mwakan te Atua. Imwina a tuangaki bwa a na kaota koauana nakon te aonaaba.¹⁹

Te Uea e a manga weteia waniman riki taan kakoaua bwa a na noori bwaatua aika koora n oin mataia ao n riki bwa taan kakoaua aika a onoti ibukin koauan ma tabun Ana Boki Moomon nakon te aonaaba. A kakoaua bwa a noori ao n tuoa ma te karaurau bwaatua ma manna aika kaaraki. E ngae ngke a mena inanon kaangaanga, te bwainikirinaki, aekan kaangaanga ni kabane, ao tabeman aikoa koaua n aia onimaki, taan kakoaua aika tengaun ma temanna n Ana Boki Moomon aika rineaki a aki kakeea aia koaua ae a tia n noori bwatua. Iotebwa Timiti e aki tiku ni maroa ma ana koaua n rokon Moronaai ao bwatua koora.

E koreia Lucy Mack Smith bwa natina te mwaane e okira mweengana ma te kimwareirei ae korakora imwiin kaotakin bwaatua nakoia taan kakoaua. E kabwarabwara Iotebwa nakoia ana karo, “I namakinna ae kanga I a kamaiuaki man te rawawata are e rangi n rawawata are I uouotia, ao e kakukureia tamneiu, bwa ai tiaki tii ngai ae I namakina te namakin anne.”²⁰

Iotebwa Timiti e rinanon te kakaitara ae mwaiti ni boretiakin Ana Boki Moomon ngke e a bane rairana. E anaa nanon te tia boreeti ae arana Egbert B. Grandin i Palmyra, New York, bwa e na boretia ti imwiin Martin Harris, n ana onimaki ao ana motoinnano ae korakora, n anga abana bwa kakoroan boon te boreeti ngkana e aki koro boona. Ngkai e teimatoa te kakaitara imwiin boretiakin Ana Boki Moomon, Martin Harris e kaboa nako ma te onimaki mwakoron abana ae 151 te eka (0.6 km²) abwakina ni kakoroa boon te kabanemwane ibukin te boreeti. Rinanon te kaotioti ae anganaki Iotebwa Timiti, te Uea e tuanga Martin Harris bwa e na aki mataiakina abana ao ni kabwaka te kabanemwane iaon boretiakin te boki are kanoana “te koaua ao ana taeka te Atua.”²¹ Ni Maati 1830 moan kaobiin Ana Boki Moomon ae 5,000 a boretiaki, ao n te bong aei e raka iaon 180 te mirion kaobiina ae a tia ni boretiaki n taetae aika e raka iaon tebubua.

Rongorongo aika koaua ao kakoaua n Ana Boki Moomon a kakoaua bwa rokona bon te bwai ae kamimi. E ngae n anne, mwaakan te boki aei e aki boboto ti n rongorongona ae kamimi ma iaon mwaakan, te rongorongo are akea kabotauana are e a tia ni biti maiuia aika aki kona ni warekaki mwaitiia—n raonaki ma ngai!

I wareka ni kabane Ana Boki Moomon n te moan n tai inanon ataeiu ngke I kaaina te tieminari. N aron tuangakira irouia au tia reirei, I moana warekana ni moa man baana ni kabwarabwarakina. Te berita inanon moan baan ana Boki Moomon e teimatoa n uringaki ao n namakinaki: “Iangoia raoi [inanom] … , ao imwiina … titirakina te Atua [n te onimaki] … n aran Kristo ngkana e koaua te boki. Aomata ake a waaki ni karaoa aei … a na karekea aia koaua ni koauana ma tabuna man mwaakan te Tamnei ae Raoiroi.”²²

N uringakin te berita anne, kabanea am tai ni kamatebwaia bwa ko aonga n ata riki koauana, ao n te tataro, I korakai n ukoukora riki koauana, I kamatebwaia raoi Ana Boki Moomon, ngke I katiai au bwai n reirei n te tieminari ni katoa wiiki. I uringnga, n aron are ngkoananoa, ae e a moanna n roko te namakin n tangira n rin n tamneiu ao ni kaona nanou, kakorakora otau, ao n rikirake ni kukurei, n aron are kabwarabwaraaki iroun Aramwa n ana kabwarabwara iaon ana taeka te Atua nakoia ana aomata.²³ E waekoa ni bitaki te namakin anne nakon te atatai bwa e a bwebwerake i nanou ao n riki bwa aan au koaua ni bwaai aika riki ao reirei aika kuneaki inanon te boki ae tabu aei.

Rinanon atatai aika ao ake tabeua aika akea boia, e riki Ana Boki Moomon bwa kingin aan ara ekaretia are e kateimatoa au koaua iroun Iesu Kristo ao au koaua n reirein Ana euangkerio. E riki bwa teuana mai buakon boua ake a kakoaua ana karea ni kamaiu Kristo nakoiu. E riki bwa te otanga rinanon maiu n ekinakoi ana kakatai te tia kaaitara are e na kamamaara au onimaki ao ni kamatoa te aki kakoaua inanou ao n anganai te ninikoria n taetaekina au kakoaua ibukin te Tia Kamaiua te Aonaaba.

Raoraou aika kam tangiraki, au koaua n Ana Boki Moomon e roko teutana imwiin teutana²⁴ bwa kanga te kakai nakon nanou. Ngkai, te koaua aei e reitinako n rikirake ngkai I reitinako n ukeuke, ma te nano ni koaua, n ota riki n ana taeka te Atua n aron are inanon te boki ae tabu ma ni kamimi aei.

Nakoia ni kabane ake a ongo bwanau n te bong aei, I kaoi ngkami bwa kam na riki bwa mwakoron rokon Ana Boki Moomon ae tamaroa inanon maiumi. I berita nakoim bwa ngkana ko tataro mwaaka ao n teimatoa ni kamatebwai taekana, ko kona ni karekei ana berita ao ana kakabwaia inanon maium. Ao I a manga kamatoa riki te berita are e taekinaki rinanon baana: are “ngkana kam bubutiia te Atua, te Tama ae Akea Tokina, n aran Kristo, ngkana aki koaua bwaai aikai; ao ngkana kam titiraki ma nanomi n tangira, ma nanomi ni koaua, ao te onimaki iroun Kristo, E na bon “kaota te koaua nakoimi, ni mwaakan te Tamnei ae Raoiroi,”²⁵ I kona ni kakoaua nakoimi bwa E na angani ngkami te kaeka n te kawai ae onoti, n are E a tia ni karaoia ibuku ao tabeman riki ni kabuta te aonaaba. Am koaua e na kakukurei ao n tabu ibukim n aron ana taneiai Iotebwa Timiti i bon ibukina, ti tebo naba ma taan moan tia kakoaua ao ibukiia naba naake a tia n ukoria ni karekea te koaua iaon koauan ao onimakinan te boki ae tabu aei.

I kaota au koaua bwa ana Boki Moomon bon ana taeka ni koaua te Atua. I kakoaua bwa te rekooti ae tabu aei “e kamatataaki iai reirein te euangkerio, e kamatataa naba te babaire ni kamaiu, ao e tuangiia naba aomata bwaai aika a riai ni karaoi bwa e aonga n reke irouia te rau n te maiu aio ao te kamaiuaki ae akea tokina n te maiu ae e na roko.”²⁶ I kakoaua bwa ana Boki Moomon bon ana bwai ni mwakuri te Atua ni uota ikotakin Iteraera n ara bong ao ni buokiia aomata bwa ana roko ni kinaa Natina, Iesu Kristo. I kakoaua bwa e maiu te Atua ao e tangiriira ao Natina, Iesu Kristo, bon te Tia Kamaiua te aonaaba, bouan te maninganinga n ara aro are moan te kakanato. Ao I atong baiaki n aran te Tia Kabooi maiura ae tabu, ara Mwatita, ao ara Uea, riki Iesu Kristo, amen.

Bwaai aika a na taraaki

1. Joseph Smith, in “Minute Book 1,” 44, josephsmithpapers.org; also at Church History Library, Salt Lake City; capitalization standardized.

2. Taraa 3 Nibwaai 11–26.

3. Taraa Etekiera 37:21–28; 1 Nibwaai 13:34–41; 3 Nibwaai 20:46; 21:1–11; atuun iteranibaan ana Boki Moomon.

4. Kabwarabwara nakon ana Boki Moomon.

5. Taraa Te Kaotioti 14:6–7; 1 Nibwaai 19:21.

6. Itaia 29:14, 19; tarai naba kiibu 11–13.

7. Taraa Etekiera 37:16–17; 2 Nibwaai 3:12.

8. Taraa Iotebwa Timiti—Rongorongo 1:27–47; taraa naba Reirei ao Berita aika Tabu 27:5; Iotebwa Timiti, “Rongorongo, 1838–1856, waorium A-1 [23 Ritembwa 1805–30 Aokati 1834],” 5, josephsmithpapers.org.

9. Taraa Iotebwa Timiti—Rongorongo 1:54; taraa naba Iotebwa Timiti, “Rongorongon te Ekaretia,” Times and Seasons, Maati 1, 1842, 707, josephsmithpapers.org.

10. Taraa Iotebwa Timiti—Rongorongo 1:59; Aia Reirei Beretitenti n te Ekaretia: Iotebwa Timiti (2007), 57–59.

11. Iotebwa Timiti, “History, 1838–1856, volume E-1 [1 July 1843–30 April 1844],” 1775, josephsmithpapers.org; also at Church History Library, Salt Lake City; punctuation standardized. Taraa naba Iotebwa Timiti, “Letter to James Arlington Bennet, 13 November 1843,” 1, josephsmithpapers.org; also at Church History Library, Salt Lake City.

12. Taraa John W. Welch, “Timing the Translation of the Book of Mormon: ‘Days [and Hours] Never to Be Forgotten,’” BYU Studies waorium 57, nambwa. 4 (2018), 11–50.

13. Oliver Cowdery, quoted in Joseph Smith—History 1:71, footnote; taraa naba Latter Day Saints’ Messenger and Advocate, Okitobwa 1834, 14.

14. Iotebwa Timiti—Rongorongo 1:60.

15. Taraa Iotebwa Timiti—Rongorongo 1:60–62.

16. Andrew H. Hedges, “‘All My Endeavors to Preserve Them’: Protecting the Plates in Palmyra, 22 Tebetembwa–Ritembwa 1827,” Journal of Book of Mormon Studies waorium. 8, nambwa. 2 (1999), 23.

17. Taraa 2 Nibwaai 27:12–14; Ita 5:1–3.

18. Mataio 18:16.

19. Taraa “Aia Koaua Taan Kakoaua ake Teniman,” Ana Boki Moomon.

20. Joseph Smith, in Lucy Smith, Biographical Sketches of Joseph Smith, the Prophet, and His Progenitors for Many Generations (1880); see also “Lucy Mack Smith, History, 1845,” 154, josephsmithpapers.org.

21. Reirei ao Berta aika Tabu 19:26.

22. Kabwarabwara nakon ana Boki Moomon,” taraa naba Moronaai 10:3–5.

23. Taraa Aramwa 32:41–43.

24. Taraa 2 Nibwaai 28:30.

25. Moronaai 10:4.

26. Kabwarabwara nakon ana Boki Moomon.