Nakomai Nakon Kristo—Maiuakina aroia Aika Itiaki ni Boong aika Kaitira
T kona ni karaoi bwaai aika kangaanga ao ni buokiia tabeman ni karaoa naba ae ti te arona, ibukina bwa ti ataa are ti na onimakinna.
Ko rabwa, Unimwaane Soares, ibukin korakoran man anainano am kakoaua n te taetae ni burabeti ibukin ana Boki Moomon. N te tai ae nako, I karekea tibwangau ae onoti n taua baan te moan koroboki n ana Boki Moomon. Iaon te iteraniba ae onoti aei, ibukin te moantai ni boong aikai, ana taeka n ninikoria Nibwaai aika a koreaki: “N na nako ao N na karaoi baike e a tia n tua te Uea, bwa I ataia bwa e na bon aki anga te kaetieti te Uea nakoia natiia aomata, ma ti ngkana e a tia ni katauraoa te kawai ibukiia are a na kona iai ni kakoroa bukin te bwai are e tua nakoia.”1
Ngkai I taua te iteraniba aei, I kaonaki n te kakaitau ae moan te korakora ibukin ana kekeiaki Iotebwa Timiti ae 23-ana ririki maiu, are e raira ana Boki Moomon man ana “bwai n tutuaraoi ao mwaakan te Atua.”2 I namakina naba te kakaitau ibukin ana taeka te ataeinimwaane ae Nibwaai, are e tuangaki bwa e na karaoa te mwakuri ae moan te kangaanga ni karekean bwaatua aika buraati mairoun Raban.
E ataia Nibwaai bwa ngkana e teimatoa ni katurua ana iango iaon te Atua, e na bon tokanikai ni kakoroan nanon are e tua te Uea. E teimatoa Nibwaai ni katurua ana iango iaon te Tia Kamaiu ni maiuna ae bwanin e ngae ngke e karawawataki n taian kariiri, kakatai n te rabwata, ao riki bwainikiriinana irouia tabeman ana utu ni kaan.
Nibwaai e ataia bwa antai ae E na onimakinna.3 Teutana imwiin takaruana, “O te aomata Ngai ae e kai nanou! Eng, e rawawata nanou ibukin rabwatau,”4 E taekinna Nibwaai, “Bon Atuau riki te tia buokai; e a tia ni kairirai i nanon au tai ni karawawataki i nanon te rereua; ao e a tia ni kamaiuai i nanon te marawa ae nano.”5
Ngkai taan iriira Kristo, akea temanna ae na aki rinanon kangaanga ao kakatai inanon maiura. Ti kantaningaaki n angin te tai bwa ti na karaoi bwaai aika kangaanga bwa, ngkana ti karaoia n tii ngaira e na rangi ni karawawata ao ni kangaanga karaoana. Ngkai ti butimwaea ana kakao te Tia Kamaiu n “nakomai nakoiu,”6 E na katauraoi boutoka, karaunano, ao te rau are e riai, n ai aron are E karaoia nakon Nibwaai ao Iotebwa. E ngae ngke ti rinanon kataaki aika moan te kangaanga, ti namakinna bwa ti na mwaneaki n Ana tangira ngkai ti onimakinna ao ni butimwaea Ana kantaninga. Ti kona n rinanon te kimwareirei ae katauraoaki ibukiia Ana reirei aika kakaonimaki, bwa Kristo bon te kimwareirei.”7
N 2014, inanon au tai n tararua te mition, iai te bwai ae a rinanona ara utu ae akea kantaningaakina bwa te bwai ae e na riki. Inanon butina rikaaki n te tabuki ae katati iaon te skateboard, natira te mwaane ae ara bina e bwaka ao n ikuaki are e tokarengerenge iai maiuna n ikoakin kaburorona. Ngkai e rikirake ni korakora, taan mwakuri n te onaoraki e waekoa ni karinna n te tabo ni korokoro ibukin te korokoro ae katawe.
Ara utu a katorobubua iaontano n te ruu teuana n te onaoraki ae akea kaaina, ao ti bunra nako nanora n tataro nakon te Atua. Inanon namakinan te tai aei ae kananououa ao ni kamaraki, ti kaonaki n ana tangira ma ana rau Tamara are i Karawa.
Ti aki ataia bwa tera ae na riki ke ngkana tina kona n noora natira ni manga maiu riki. Ti mataata raoi bwa e tararuaki maiuna iroun te Atua ao mwiina, man te taratara ae akea tokina, a na nakoraoi ibukina ao ibukira. Rinanon ana bwai n tituaraoi te Tamnei ae Raoiroi, ti bane n tauraoi ni butimwaei baika a na riki.
E bon aki beebete! Te kabuanibwai e a katikua inanon uoua namwakaina n te onaoraki ngkai ti tararua iaoia 400 mitinare aika a bwanin aia tai. Natira te mwaane e bua ana ururing. Kamarurungana e anaa te tai ae maan ao ni kangaanga n aron bwainaorakiana irouia aika rabakau aika kamarurung n te rabwata, n te taetae, ao n te mwakuri. E teimatoa n iai te kangaanga, ma n te tai ae mwaiti ti kakoaua bwa iai te kakai.
Ti mataata raoi bwa mwiin kataaki ni kabane ake ti kaitarai tina bon aki karekea te kantaninga are ti kantaningaia. E ngae n anne, ngkai ti teimatoa ni katurua ara iango iaon te Tia Kamaiu, ti na namakina te rau ao n noori ana kakai te Atua, bwa aekakira aroia, ni bon Ana tai ao n Ana kawai.
A na iai taai are ti na aki kona n noora te kawai ni bwaai aika a riki ngkai bwa a na nakoraoi ao ti na bae naba n taekina, n aron Nibwaai, “E rawawata nanou ibukin rabwatau.”8 A na iai taai are tii te kantaninga ae ti karekea bon tii iroun Iesu Kristo. Bon te kakabwaia karekean te kantaninga anne ao n onimakinna. Kristo bon ngaia are e kawakin Ana berita n taainako. Ana rau e na reke nakoia ni kabane ake a Nakoina.9
Ara taan kairiiri a tangiriia aomata ni kabane bwa a na namakina te rau ao te mwengaraoi are e rokon rinanon onimakinan ao katuruan ara iango iaon te Tia Kamaiu Iesu Kristo.
Ara burabeti ae maiu, Beretitenti Russell M. Nelson, e reitaki ma te Uea n te mii ni burabeti, ibukin te aonaaba ao ibukiia kaain ana Ekaretia Kristo: “Ara rongorongo nakon te aonaaba e bebete ao ni koaua: ti kaoiia natin te Atua ni kabane n iteran te rabuna aika uoua n nakon aia Tia Kamaiu, ni karekei kakabwaia man te tembora ae tabu, ni karekea te kimwareirei ae teimatoa, ao n tau ibukin te maiu ae akea tokina.”10
Te kakao aei bwa a na “nako nakon Kristo” bon te mwakuri ae onoti ae a na maiuakinna Aika Itiaki ni Boong aika Kaitira.11 Ngkai kaain ana Ekaretia te Tia Kamaiu, ti a tia ni karaoi berita aika tabu ma Ngaia ao n riki bwa natina mwaane ao aine n tamnei aika tatangiraki.12 Ti a tia naba n anganaki te tibwanga bwa ti na mwakuri ma te Uea ni kaoia tabeman bwa a na nako nakoIna.
Ngkai ti mwakuri ma Kristo, ara kekeiaki ae moan te korakora ni kabanea ara iango iaona e riai i bon inanon mweengara. A na iai taai are ngke kaain te utu ao rao aika ti uakaan ma ngaiia a na rinanon taian kangaanga. Ana kairoro te aonaaba, ao tao bon baike e tangiria nanoia, e na karika aia titiraki ibukin te koaua. Ti riai ni karaoi bwaai ni kabane ake ti kona ni buokiia iai ni kaai n namakina ana tangiria te Tia Kamaiu ao ara tangira. I kauringaki n te kibu man koroboki aika tabu are e a riki bwa ara anene n taromauri “Love One Another” are e reireiniira, “Man aei ao a na ataia aomata bwa ngkami au reirei, ngkana kam itangitangiri.”13
N ara tangira ibukiia naake a titiraki ibukin te koaua, te tia kakaitaraa te kimwareirei e kataia ni karekea ara namakin ae ti kamwaneia naake ti tangiriia ngkana ti teimatoa ni maiuakina bwaninin te euangkerio ao n anga reirei ni koauana.
Ara konabwai ni buokiia tabeman n nakon Kristo ke n oki nakon Kristo e na baireaki man te banna ni katoto are ti kateia rinanon ara motinnano n tiku iaon kawain te berita.
Ngkana nanora ae koaua bwa ti na kamauia naake ti tangiriia, boni ngaira ae ti na tiku ni matoa ma Kristo man mwaneakin Ana Ekaretia ao bwaninn Ana euangkerio.
N okira riki rongorongon Nibwaai, ti ataia bwa nanon Nibwaai n onimakina te Uea e anaaki nanona man aia anainano ana karo n onimakina te Uea ao n aia katoto ni kawakinan aia berita aika tabu. Aio e rang tamaroa kabwarabwaraana ni miin Riaai n te kai ni kamaiu. Imwiin katongan te uaanikai ae karewerewe man kakukurei, Riaai “[e] taratara nako rarikina, bwa [e na] ukeriia naba kaain [ana] utu.”14 E noora Tiera, Taam, ao Nibwaai ao a tei “n taraan ae aki ataa te tabo ae a na nako iai.”15 Riaai e taekinna imwiina, “I anoanoia; ao I tuangiia naba n te bwanaa ae baibati bwa a riai n nakoiu, ao ni kana te uaanikai.”16 Taiaoka ataia bwa Riaai e aki kitana te kai ni kamaiu. E teimatoa n te maiu n tamnei ma te Uea ao e kaoia ana utu bwa a na nako n te tabo are e katoonga iai te uaanikai.
Te tia kaaitara e na kariiria tabeman bwa a na kitana kimwareirein te euangkerio ni karaurenakoa ana anga reirei Kristo ao Ana Ekaretia. E tuangiira bwa ti na kakoaua bwa ti kona ni kateimatoaira n tiku ni kawain ara berita i bon iroura, rinanon maiura n tamnei, n ebiebi n Ana Ekaretia.
Inanon boong aika kaitira, e kaokaki ana Ekaretia Kristo bwa e aonga ni buokiia natin n berita Kristo n tiku ni kawain Ana berita.
N Reirei ao Berita aika Tabu ti warekia, “Nooria, aio au reirei—ane e raira nanona ao n nakoiu, titebo ma au Ekaretia.”17
Rinanon ana Ekaretia Kristo iaon te aba, ti kakorakoraaki rinanon taneiai n aron te kaomiuniti ibukiia aika Itiaki. Ti ongo bwanaana rinaoia Ana burabeti, taan mamata, ao taan karekei kaotioti. Ma ae moan te kakawaki riki, rinanon Ana Ekaretia are ti anganaki kakabwaia man ana Mwakuri ni Kamaiu Kristo are e tii kona n ataaki rinanon karaoan otenanti aika tabu.
Ana Ekaretia Iesu Kristo ibukiia Aika Itiaki ni Boong aika Kaitira bon ana Ekaretia te Atua iaon te aba, e kaokaki ni boong aikai ibukin kabwaiaia natin te Atua ni kabane.
I kaota au koaua bwa ngkai ti “nakon Kristo” ao ni maiu n aroia Aika Itiaki ni Boong aika Kaitira, ti na kakabwaiaki ni mwaitin riki Ana tangira, kimwareireina, ao Ana rau. N aron Nibwaai, ti kona ni karaoi bwaai aika kangaanga ao ni buokiia tabeman ni karaoa naba ae ti te arona, ibukina bwa ti ataa are ti na onimakinna.18 Kristo bon ootara, maiura, ao kamaiuakira.19 N aran Iesu Kristo, amen.