Npaj Kom Tau Txhua Yam uas Yuav Tsum Muaj
Peb yuav txais cov koob hmoov kom ua nqi zog thaum peb siv zog ua raws li peb txoj kev lav ris kom kawm thiab nyiam Yexus Khetos txoj moo zoo uas tau muab txum tim rov qab los.
Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg tej txheej xwm thiab yam ntxim saib ntxim ua los haj yam yog tej uas qhia hauv tsev thiab lub Koom Txoos txhawb nqa, raws li tej kev hloov uas tau tshaj tawm hauv lub tuam rooj sab laj tas los. Thawj Tswj Hwm Russell M. Nelson tau ntuas peb hais tias: “Tshuav ntau yam uas yuav muaj los. … Cia li noj nej cov vitamees. So kom txaus. Yav tom ntej yeej yuav zoo heev.”1
Kuv thov thiab caw tus Vaj Ntsuj Plig Dawb Huv txoj kev pab thaum peb xav txog ob peb yam uas yuav muaj los ntawm tej yam uas hloov hauv tus Tswv lub Koom Txoos.
Kev Kawm Txoj Moo Zoo uas Qhia hauv Tsev thiab lub Koom Txoos Txhawb Nqa
Tsis ntev tas los hauv ib lub rooj sab laj rau cov thawj coj ntawm lub pov thawj hwj, Txwj Laug Craig C. Christensen ua kuv tus khub thiab nws tau nug ob yam kom qhia zoo txog lub ntsiab cai uas yog kev qhia hauv tsev thiab kev cia lub Koom Txoos txhawb nqa. Nws hais tias peb tsis tas rov qab mus tsev tom qab muaj kev sib ntsib hauv lub Koom Txoos thaum hnub Sunday thiab nug hais tias, “Nej tau kawm dab tsi txog tus Cawm Seej thiab Nws txoj moo zoo hauv lub koom txoos hnub no?” Tiam sis peb yuav tsum nyob hauv lub Koom Txoos tej kev sib ntsib nug hais tias, “Lub lim tiam no nej tau kawm dab tsi txog tus Cawm Seej thiab Nws txoj moo zoo hauv tsev?” Kev hwm Hnub Caiv, cov ntaub ntawv qhia tshiab, thiab kev teem sij hawm sib ntsib uas tau hloov tag nrho tej no pab peb kawm txog txoj moo zoo hauv tsev thiab hauv lub koom txoos.
Txhua tus mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg muaj kev lav ris kawm thiab ua raws li tus Tswv tej lus qhia thiab txais ob txoj kab ke ntawm kev cawm seej thiab kev tsa nto los ntawm cov uas muaj txoj cai ua. Peb yuav tsum tsis txhob xav tias lub Koom Txoos yuav qhia los sis hais txhua yam peb yuav tsum paub thiab ua kom ua cov thwj tim rau siab heev thiab mob siab nyiaj kom mus txog thaum kawg.2 Tiam sis, peb txhua tus lav ris qhov uas peb yuav kawm tej yam uas peb yuav tsum kawm, ua neej raws li peb yuav tsum ua, thiab hloov los ua neeg zoo li tus Xib Hwb xav kom peb ua. Thiab peb lub tsev yog qhov chaw zoo tshaj plaws rau kev kawm, kev ua neej, thiab kev hloov los ua neeg zoo.
Thaum nws yog ib tug me nyuam, Yauxej Xamiv kawm txog Vajtswv los ntawm nws tsev neeg. Qhov uas nws rau siab xav kawm Vajtswv lub siab nyiam rau nws ua rau Yauxej nrhiav qhov tseeb nyob hauv lwm txoj kev teev ntuj uas ntseeg Khetos, rau siab xav txog cov vaj lug kub, thiab thov Vajtswv tiag tiag. Thaum Yauxej Xamiv rov qab mus tsev tom qab kiag Leej Txiv thiab Leej Tub tshwm sim rau nws hauv Koog Ntoo Dawb Huv, nws hais lus rau nws niam. Thaum nws “pheeb ntawm lub qhov txos, [nws] niam nug seb nws raug xwm dab tsi. [Yauxej] teb tias, ‘Tsis muaj dab tsi li, yeej tsis muaj dab tsi li.’ Ces [nws] hais rau [nws] niam, ‘Kuv tau kawm paub lawm.’”3 Qhov uas Yauxej ua li no yog ib tug yam ntxwv zoo txog kev kawm txuj ci uas peb txhua tus yuav tsum ua. Peb kuj yuav tsum kawm paub ntawm peb tus kheej thiab.
Lub hom phiaj ntawm Leej Txiv Saum Ntuj Ceeb Tsheej txoj hau kev yog kom Nws cov me nyuam hloov ua neeg zoo li Nws. Yog li ntawd, Nws muab cib fim tseem ceeb rau peb kom peb loj hlob tuaj thiab vam meej. Qhov uas peb tau cog lus tias peb yuav kawm thiab ua neej raws li qhov tseeb yog ib qho tseem ceeb hauv ib lub ntiaj teb uas “ntxhov hnyo”4 thiab muaj kev ntxhov siab thiab neeg ua phem. Tsis tsim nyog uas peb xav tias peb tsuas koom kev sib ntsib hauv lub Koom Txoos thiab koom tej txheej xwm es peb thiaj li yuav txais tau kev txawj ntse thiab kev pov hwm ntawm sab ntsuj plig kom peb “yuav tiv taus hnub phem.”5
“Niam txiv muaj ib lub luag hauj lwm tseem ceeb dawb ceev kom cob nkawd cov me nyuam raws li kev hlub thiab kev ncaj ncees.”6 Cov thawj coj, xib hwb, thiab tej yam ntxim saib ntxim ua hauv lub Koom Txoos uas yog los ntawm kev tshoov siab yuav pab tib neeg thiab tsev neeg txoj kev loj hlob ntawm sab ntsuj plig. Thiab txawm peb txhua tus xav tau kev pab kom mus tom ntej thaum peb ua raws li peb tej kev khi lus, kev lav ris loj tshaj plaws kom muaj zog ntawm sab ntsuj plig yeej nyob ntawm peb ib leeg xwb.
Cia li nco qab tias qhov uas Nifais, tus yaj saub Lihais tus tub, xav pom, hnov, thiab paub ntawm nws tus kheej los ntawm tus Vaj Ntsuj Plig Dawb Huv lub hwj chim txog tej yam uas nws txiv tau kawm thaum nws ua yog toog pom tus ntoo uas cawm txoj sia. Thaum nws tseem hluas Nifais yeej xav tau thiab tau koob hmoov vim nws niam nws txiv coj yam ntxwv thiab qhia nws zoo.7 Tiam sis zoo li Yauxej Xamiv, nws xav kawm thiab paub ntawm nws tus kheej.
Yog tias tag nrho nej los sis kuv paub txog Yexus Khetos thiab Nws txoj moo zoo tsuas yog tej yam uas lwm tus neeg qhia los yog hais rau peb, ces lub hauv paus ntawm peb zaj lus tim khawv txog Nws thiab nws tej hauj lwm hauv hnub nyoog kawg no yeej yog hmoov zeb xwb.8 Tsis tsim nyog peb yuav tso siab rau qhov kaj thiab kev txawj ntse ntawm txoj moo zoo los ntawm lwm tus neeg xwb—tsis hais cov uas peb hlub thiab ntseeg los yog.
Tus Yaj Saub Yauxej Xamiv qhia tias txhua tus Neeg Ntseeg hauv Hnub Nyoog Kawg yuav tsum to taub ntawm nws tus kheej txog “Vajtswv tej lub hom phiaj thiab txheej txheem kom peb los rau hauv lub ntiaj teb no.”9
“Yog tias peb nyeem tau thiab yuav to taub txhua yam uas tau muab sau tseg txij thaum Adas lub caij los, hais los txog Vajtswv thiab cov tim tswv txoj kev nrog tib neeg sib raug zoo yav tom ntej, ces peb yuav paub me me xwb. Thaum nyeem txog lwm tus neeg zaj, los sis tej kev tshwm sim uas lawv tau txais, qhov ntawd yuav tsis pab peb to taub peb zaj thiab peb txoj kev nrog Vajtswv sib raug zoo li cas tiag tiag li. Yus tsuas kawm paub txog tej yam no thaum yus txais Vajtswv tej kab ke uas tau tsa cia rau lub hom phiaj ntawd.”10
Qhov uas peb xav kom muaj raws li lub hom phiaj ntawm sab ntsuj plig tseem ceeb no rau tib neeg thiab tsev neeg yog qhov uas vim li cas Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg tej txheej xwm thiab tej yam ntxim saib ntxim ua haj yam yog tej uas ua hauv tsev thiab lub Koom Txoos txhawb nqa hauv lub caij nyoog tso txoj cai uas muaj txhij txhua.
Lub Ntsiab txog Kev Kawm hauv Tsev thiab lub Koom Txoos Txhawb Nqa
Cia kuv piav ob peb lub ntsiab txog kev kawm txoj moo zoo uas ua hauv tsev thiab lub Koom Txoos txhawb nqa.
Lub tsev cob qhia cov tub txib zoo tshaj plaws yeej nyob hauv peb tsev; qhov chaw cob qhia cov tub txib uas txhawb nqa yeej nyob hauv Provo, Manila, Mexico City, thiab lwm qhov chaw. Tej hoob rau Kev Kawm Vaj Lug Kub zoo tshaj plaws yog peb tus kheej thiab tsev neeg txoj kev kawm hauv peb tsev; Hnub Caiv Kev Kawm Vaj Lug Kub uas pab tau yog nyob rau hauv peb tej tsev sib ntsib.
Nm no peb tej qhov chaw nrhiav tsev neeg zaj keeb kwm yog nyob hauv peb tsev. Kev pab txhawb nqa peb txoj kev nrhiav tsev neeg zaj keeb kwm los nyob hauv peb tej tsev sib ntsib.
Kev npaj rau lub tuam tsev los muaj nyob hauv peb tsev; tej lub sij hawm kev sib ntsib kom npaj mus rau lub tuam tsev kuj yuav muaj hauv peb tej tsev sib ntsib.
Qhov uas peb tsev yog tej qhov chaw rau peb “sawv hauv qhov chaw dawb huv”11 yog ib qho tseem ceeb hauv hnub nyoog kawg no. Thiab txawm txoj kev kawm hauv tsev thiab lub Koom Txoos txhawb nqa yog ib qho tseem ceeb kom peb muaj zog thiab kev pov hwm ntawm sab ntsuj plig hnub no los, thaum yav tom ntej qhov no yuav haj yam tseem ceeb.
Kev Kawm hauv Tsev uas lub Koom Txoos Txhawb Nqa thiab Kev Npaj rau lub Tuam Tsev
Kuv thov kom nej xav txog lub ntsiab cai “kev kawm hauv tsev uas lub Koom Txoos txhawb nqa” yuav ua li cas rau peb txoj kev npaj thiab kev tsim nyog txais cov kab ke thiab kev khi lus dawb huv nyob hauv tus Tswv lub tsev.
Muaj tseeb tiag, kev npaj rau lub tuam tsev yeej zoo tshaj plaws thaum ua hauv tsev. Tiam sis lub Koom Txoos cov mej zeej coob tsis tshua paub tias tsim nyog hais dab tsi thiab tsis tsim nyog hais dab tsi txog lub tuam tsev thaum tsis nyob haud.
Thawj Tswj Hwm Ezra Taft Benson piav vim li cas cov meej tsis paub tseeb li no:
“Lub tuam tsev yog ib qho chaw dawb ceev, thiab cov kab ke hauv lub tuam tsev dawb ceev thiab. Vim tej no dawb ceev heev peb thiaj li tsis tshua xav hais dab tsi txog lub tuam tsev rau peb cov me nyuam thiab cov xeeb leej xeeb ntxwv.
“Yog li ntawd, neeg coob tsis tshua xav mus rau lub tuam tsev, los sis thaum lawv mus, lawv tsis tau kawm ntau lawv thiaj li tsis npaj siab txais tej kev lav ris thiab kev khi lus uas lawv khi haud.
“Kuv ntseeg tias thaum cov tub hluas ntxhais to taub zoo los yog kawm keeb kwm ces yuav pab lawv npaj mus rau lub tuam tsev … [thiab] yuav ua rau lawv xav txais tau lawv cov koob hmoov pov thawj hwj ib yam li Anplaham xav tau nws li.”12
Ob lub ntsiab cai yuav pab peb to taub zoo li Thawj Tswj Hwm Benson hais.
Ntsiab Cai #1 Vim peb hlub tus Tswv, peb yeej yuav tsum muaj kev tswm seeb thaum hais txog Nws lub tsev dawb huv. Peb yuav tsum tsis txhob hais los sis piav txog tej cim tshwj xeeb uas muaj feem nrog tej kev khi lus uas peb txais los ntawm cov kab ke dawb ceev hauv lub tuam tsev. Peb kuj yuav tsum tsis txhob hais txog tej yam dawb huv uas peb cog lus hauv lub tuam tsev tias peb yuav tsis qhia tawm.
Ntsiab Cai #2 Lub tuam tsev yog tus Tswv lub tsev. Txhua yam nyob hauv lub tuam tsev ua rau peb xav txog peb tus Cawm Seej, Yexus Khetos. Peb muaj cai sib tham txog cov lus qhuab qhia thiab cov ntsiab cai uas muaj feem nrog cov kab ke thiab kev khi lus hauv lub tuam tsev.
Thawj Tswj Hwm Howard W. Hunter qhia tias: “Cia peb qhia peb cov me nyuam txog tej kev tshoov siab ntawm sab ntsuj plig uas peb txais hauv lub tuam tsev. Thiab cia peb rau siab thiab txaus siab qhia lawv txog tej yam uas tsim nyog peb hais txog qhov uas vim li cas peb muaj tus Tswv lub tsev.”13
Nyob hauv txhua tiam neeg pib ntawm tus Yaj Saub Yauxej Xamiv mus txog Thawj Tswj Hwm Russell M. Nelson, cov thawj coj ntawm lub Koom Txoos tau piav txog cov lus qhuab qhia ntawm cov kab ke thiab kev khi lus hauv lub tuam tsev.14 Muaj ntau yam uas pab tau nej xws li cov ntawv uas luam tawm, kev kaw suab, cov video, thiab lwm yam uas pab tau peb kawm txog cov kab ke chiv thawj, vaj txiaj ntsim, kev sib yuav, thiab lwm txoj kab ke khi.15 Kuj muaj cov xov xwm txog kev coj raws li tus Cawm Seej thaum peb txais thiab ua raws li peb tej kev khi lus kom coj raws li kev cai mloog lus, kev cai txi, kev cai ntawm txoj moo zoo, kev cai coj dawb huv, thiab kev cai fij siab.16 Txhua tus mej zeej ntawm lub Koom Txoos yuav tsum paub zoo txog cov ntaub ntawv uas muaj nyob rau ntawm temples.ChurchofJesusChrist.org.
Thawj Tswj Hwm Russell M. Nelson tau hais tias yuav tsum ua tib zoo nco txog qhov uas cov kab ke hauv lub tuam tsev dawb ceev heev thiab muaj xov xwm uas muaj nqi txog cov tuam tsev uas lub Koom Txoos tau muab luam tawm uas muaj tseeb, tsim nyog hais, thiab tau tshaj tawm rau cov pej xeem. Nws piav tias: “Kuv xav kom cov mej zeej … nyeem tej zaj hauv Bible Dictionary uas hais txog lub tuam tsev, xws li ‘Pleev Roj,’ ‘Khi Lus,’ ‘Kev Txi,’ thiab ‘Tuam Tsev.’ Tej zaum yus kuj xav nyeem Khiav Dim, tshooj 26–29, thiab Levis Kev Cai, tshooj 8. Phau Qub, tsis hais phau Mauxes thiab Anplaham nyob hauv phau Lub Hlaws uas Muaj Nqis Heev, qhia txog qhov uas kev ua hauj lwm hauv lub tuam tsev qub heev thiab cov kab ke los muaj puag thaum ub.”17
Yog li ntawd, cia li xav tias nej tus tub los yog tus ntxhais nug hais tias, “Ib tug tom tsev kawm ntawv qhia kuv tias yus hnav khaub ncaws txawv txawv hauv lub tuam tsev. Puas yog li ntawd?” Ib daim video tsis ntev los muaj hauv temples.churchofjesuschrist.org hu ua “Khaub Ncaws Dawb Huv ntawm lub Tuam Tsev.” Qhov zoo no piav tias txij puag thaum ub cov txiv neej thiab cov poj niam tau muaj cov nkauj dawb huv, thov Vajtswv, hnav khaub ncaws uas muaj cim, tuav tes, thiab ua kab ke kom qhia tias lawv lub siab xav teev tiam Vajtswv. Yog li ntawd, lub Koom Txoos txhawb nqa peb txoj kev npaj hauv tsev kom txais cov koob hmoov ntawm lub tuam tsev thaum qhia thiab siv tej yam xws li daim video no. Muaj xov xwm ntau uas zoo rau nej siv.18
Thaum peb sim muaj lub siab mos siab muag ua raws li tus Tswv tus Ntsuj Plig qhia,19 peb yuav tau koob hmoov kom peb to taub thiab paub tias tej yam twg tsim nyog hais thiab tsis tsim nyog hais txog cov kab ke thiab kev khi lus dawb ceev hauv lub tuam tsev.
Kev Cog Lus thiab Zaj Lus Tim Khawv
Nyaj nej ib txhia xav seb nej puas muaj peev xwm kom nej kawm txoj moo zoo hauv tsev thiab cia lub Koom Txoos txhawb nqa. Tej zaum nej yog tib tug mej zeej ntawm lub Koom Txoos hauv nej tsev, los sis muaj ib tug khub uas tsis txhawb nqa, los sis nej tsis muaj tus khub, los yog nej nyob ib leeg vim yog ib tug Neeg Ntseeg hauv Hnub Nyoog Kawg uas tsis tau sib yuav los sis tau sib nrauj lawm, thiab nej muaj tej lus nug ntau heev txog qhov uas yuav muab tej ntsiab cai no nruab rau nej tus kheej. Tej zaum nej yog ib tug txiv tsev thiab niam tsev uas ib leeg saib ib leeg thiab nug “Wb puas muaj peev xwm ua li no?”
Muaj mas, nej yeej muaj peev xwm ua! Kuv cog lus tias cov koob hmoov kom nej ua tau yuav los thiab nej yuav paub tseeb txog cov no hauv nej lub neej. Tej qhov rooj yuav qhib. Qhov kaj yuav ci ci. Nej txoj kev muaj peev xwm yuav loj tuaj kom nej rau siab ua thiab ua siab ntev.
Kuv zoo siab ua tim khawv tias peb yuav txais cov koob hmoov kom ua nqi zog thaum peb siv zog ua raws li peb txoj kev lav ris kom kawm thiab nyiam Yexus Khetos txoj moo zoo uas tau muab txum tim rov qab los. Peb yeej yuav “npaj kom tau txhua yam uas yuav tsum muaj.”20 Kuv cog lus thiab ua tim khawv li no los ntawm Yexus Khetos lub npe dawb ceev, amees.