Ib lub Tsev uas tus Tswv tus Ntsuj Plig Nyob Haud
Nej yuav tau kev xyiv fab ntau heev thaum nej kho nej lub tsev kom ua ib qho chaw muaj kev ntseeg rau ntawm tus Tswv Yexus Khetos thiab ib qho chaw uas muaj kev hlub ib leeg rau ib leeg heev.
Kuv cov kwv tij thiab cov muam, kuv zoo siab uas kuv muaj lub cib fim hais lus rau nej hauv lub Tuam Rooj Sab Laj thib 189 ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Thaum hnub no kiag xyoo 1830, Yauxej Xamiv txhim tsa lub Koom Txoos raws li tus Tswv cov lus qhia. Yog txhim tsa hauv tsev neeg Whitmer lub tsev nyob ze Fayette, New York. Tsuas muaj rau tus mej zeej thiab kwv yees li 50 tus neeg ntxiv uas nyob ntawd.
Txawm hais tias kuv tsis paub hais tias tus Yaj Saub Yauxej hais dab tsi los yog nws zoo li cas thaum nws sawv hais lus rau pawg neeg ntawd los, kuv paub hais tias cov neeg ntawd muaj siab ntseeg rau ntawm Yexus Khetos. Lawv hnov tus Vaj Ntsuj Plig Dawb Huv, thiab lawv xav hais tias lawv nyob hauv ib qho chaw dawb huv. Lawv paub hais tias lawv koom ib lub siab.
Qhov uas koom ib lub siab yog qhov uas peb xav tau rau peb tej tsev neeg. Yog ib yam uas los ntawm qhov uas Pov Lauj hais tias yog ua raws li “Vajtswv tus Ntsuj Plig qhia.”1
Kuv lub ntsiab hnub no yog qhia saib peb yuav ua li cas thiaj tsim nyog muaj tus Ntsuj Plig nrog peb nyob thiab nyob ntev dua. Nej twb paub lawm hais tias, qhov no tsis yooj yim li. Peb yuav tsum tiv thaiv kom tsis muaj kev sib cav, kev muab hlob, thiab kev txhaum. Khetos txoj kev hlub dawb pawg yuav tsum los nyob hauv peb tsev neeg tej siab tej ntsws.
Adas thiab Evas, Lihais thiab Xaliyas, thiab lwm cov niam txiv los ntawm cov vaj lug kub paub hais tias ua li ntawd nyuaj heev. Txawm yog li ntawd, yeej muaj tej yam ntxwv zoo txog kev zoo siab hauv tsev neeg uas pab txhawb nqa peb. Thiab tej yam ntxwv ntawd pab peb pom tau hais tias peb tsev neeg muaj kev zoo siab tau ib yam. Nej paub zaj los ntawm 4 Nifais:
“Thiab tau muaj tias twb tsis muaj kev sib cav sib ceg rau hauv thaj av, vim yog Vajtswv txoj kev hlub uas nyob hauv cov neeg lub siab.
“Thiab twb tsis muaj tej kev xav tau luag tug, los sis tej kev sib cav sib ceg, los sis tej kev sib thab, los sis tej kev sib daj sib deev, los sis tej kev dag, los sis tej kev tua neeg, los sis ib yam kev xav tau daj tau deev li; thiab tseeb tiag ntshe twb tsis tau muaj ib co neeg uas yuav zoo siab tshaj nyob hauv tag nrho cov neeg uas Vajtswv txhais tes tau tsim los.
“Twb tsis muaj tub sab, los sis neeg tua neeg, thiab twb tsis muaj qhov hais tias yog cov Neeg Lamas, los sis yog lwm yam neeg twg hlo li; tiam sis lawv tsuas ua ib pab, uas yog Khetos cov me nyuam, thiab cov uas tau Vajtswv lub nceeg vaj ua lawv tug.
“Thiab lawv tau koob hmoov ntau heev! Vim tus Tswv tau foom koob hmoov rau lawv nyob rau tag nrho tej uas lawv ua; muaj tseeb tiag, lawv twb tau koob hmoov thiab vam meej mus txog rau thaum ib puas kaum xyoo tau dhau mus; thiab thawj tiam neeg txij li Khetos los tau dhau mus, thiab tsis tau muaj kev sib cav sib ceg nyob hauv tag nrho thaj av.”2
Nej twb paub lawm hais tias lub caij muaj kev zoo siab li ntawd tsis kav ntev. Zaj lus hauv 4 Nifais piav txog tej cim uas qhia hais tias ib haiv neeg zoo tab tom tsis ua raws li tus Ntsuj Plig qhia. Yog ib tug qauv uas muaj los ib tiam dhau ib tiam hauv ntau haiv neeg, thiab ntxim tu siab heev, hauv tsev neeg thiab. Thaum peb kawm txog tus qauv ntawd, peb yuav pom saib peb yuav tiv thaiv tau peb tsev neeg thiab ua rau peb tsev neeg muaj kev siab hlub dawb paug nyob haud.
Nov yog tej yam uas muaj los tom qab uas cov neeg ua neej no 200 xyoo yam muaj tej kev kaj siab lug uas txoj moo zoo coj los:
Tib neeg muab hlob.
Cov neeg tsis kam muab lawv cov khoom faib ib leeg rau ib leeg.
Lawv pib saib lawv tus kheej muaj qib siab qib qis.
Lawv tsis ntseeg Yexus Khetos zuj zus mus.
Lawv pib sib ntxub.
Lawv pib ua txhaum ntau yam.
Cov niam txiv txawj ntse yuav feeb meej txaus pom tej cim no thaum muaj li no hauv lawv tsev neeg. Lawv ham tsis yuav txhawj xeeb me ntsis. Tiam sis lawv yuav paub hais tias tej ntawd kawj los ntawm qhov uas Ntxwg Nyoog sim coj tib neeg zoo mus ua txhaum thiab tsis muaj tus Vaj Ntsuj Plig Dawb Huv coj lawv kev. Ces niam txiv txawj ntse yuav pom tau hais tias muaj cib fim coj txhua tus me nyuam, thiab lawv tus kheej, los mus txias tus Tswv txoj lus caw los cuag Nws.
Tej zaum nej yuav pab ib tug me nyuam hloov siab lees txim tsis muab hlob ntxiv. Tej zaum nej yuav yaum tau nej cov me nyuam faib lawv cov khoom nrog lwm tus neeg ntau dua. Tej zaum nej yuav qhia tau lawv kom lawv tsis txhob xav tias lawv nyob qib siab dua lwm tus neeg hauv nej tsev neeg. Tiam sis thaum kawg tseem tshuav lub cim uas kuv hais txog puag tas uas yog qhov uas “Lawv tsis ntseeg Yexus Khetos zuj zus mus.”
Txoj kev kho qhov teeb meem no yog tus yawm sij uas yuav coj nej tsev neeg mus rau qhov chaw ntawm sab ntsuj plig uas nej xav kom lawv muaj—thiab rau nej nrog lawv nyob qhov chaw ntawd thiab. Thaum nej pab lawv txoj kev ntseeg rau ntawm Yexus Khetos loj hlob tuaj, hais tias Nws yog Lawv tus Txhiv Dim, lawv yuav xav hloov siab leem txim. Thaum lawv hloov siab lees txim, kev txo hwj chim yuav pauv qhov kev muab hlob. Thaum lawv pib ris tus Tswv txiaj rau txhua yam uas Nws muab pub rau lawv, lawv yuav xav faib rau lwm tus neeg. Kev sib xeem kom ua neeg muaj npe nrov los yog kom tau nqi zog yuav ploj zuj zus mus. Kev hlub yuav ntiab kev ntxub ntxaug tawm. Thiab thaum kawg, ib yam li tau muaj rau Vaj Ntxwv Npeyamis cov neeg, qhov uas lawv xav ua neeg zoo yuav pab tiv thaiv lawv tawm ntawm tej kev ntxias kom ua txhaum. Vaj Ntxwv Npeyamis cov neeg ua tim khawv hais tias lawv “tsis muaj lub siab xav ua phem lawm.”3
Yog li ntawd, txoj kev txhim tsa kev ntseeg rau ntawm Yexus Khetos yog thawj qhov uas nej ua tau kom kho tau nej tsev neeg sab ntsuj plig. Txoj kev ntseeg ntawd yuav coj tau kev hloov siab lees txim ntau dua qhov uas qhuab qhia tawm tsam txhua txhia lub cim uas qhia tias tsis ua raws li tus Ntsuj Plig coj lawm.
Nej yuav coj nej tsev neeg zoo tshaj thaum nej ua yam ntxwv zoo. Cov neeg hauv nej tsev neeg thiab lwm tus neeg yuav pom nej txoj kev ntseeg Yexus Khetos thiab Nws txoj moo zoo loj hlob tuaj. Tsis ntev tas los no, nej tau kev pab ua li no. Cov niam txiv hauv lub Koom Txoos tau koob hmoov los ntawm ib txoj kev kawm vaj lug kub rau tib neeg thiab tsev neeg. Thaum nej siv cov kev kawm ntawd, nej yuav txhim tsa tau nej cov me nyuam tej kev ntseeg rau ntawm tus Tswv Yexus Khetos.
Kev Loj Hlob Tuaj rau ntawm Kev Ntseeg
Nej txoj kev ntseeg rau ntawm tus Cawm Seej tau loj hlob tuaj thaum nej ua raws li Thawj Tswj Hwm Russell M. Nelson txoj lus qhia kom rov qab nyeem Phau Ntawv Maumoos. Nej tau khij tej nqes vaj lug kub uas hais txog tus Cawm Seej. Nej txoj kev ntseeg rau ntawm Yexus Khetos loj hlob tuaj. Tiam sis ib yam li ib tsob yub uas nyuam qhuav tawm tuaj, txoj kev ntseeg Yexus Khetos ntawd yuav qhuav tuaj yog tias nej tsis txiav txim siab kiag kom ua tib zoo xav mus xav los thiab thov Vajtswv kom tau ntxiv.
Tej zaum tag nrhog cov neeg hauv nej tsev neeg yuav tsis ua raws li nej tus yam ntxwv txog kev loj hlob tuaj rau ntawm kev ntseeg tam sim no. Tiam sis cia li tso siab vim yog qhov uas muaj los rau Amas tus Hluas. Thaum nws twb xav tau kev hloov siab lees txim thiab kev zam txim, nws nco qab txog nws leej txiv txoj kev ntseeg Yexus Khetos. Nej cov me nyuam yuav nco tau nej txoj kev ntseeg rau ntawm tus Cawm Seej thaum lub sij hawm uas lawv xav tau kev hloov siab lees txim. Amas hais txog lub sij hawm ntawd:
“Thiab tau muaj tias thaum kuv raug txim nrog txoj kev tsim txom zoo li ntawd, thaum kuv raug tsim txom los ntawm qhov uas kuv nco qab txog kuv tej kev txhaum ntau, saib seb, kuv kuj nco qab txog kuv txiv txoj kev qhia tej yuav muaj los yav tom ntej rau cov neeg ntsig txog qhov uas ib tug hu ua Yexus Khetos, Vajtswv ib tug Tub, yuav los theej neeg ntiaj teb tej kev txhaum.
“Nim no, thaum kuv lub siab tsom ntsoov rau txoj kev xav no, kuv thov nyob hauv kuv lub siab tias: Auj Yexus, koj tus uas yog Vajtswv Leej Tub, thov hlub tshua kuv, tus uas poob siab tag nrho, thiab raug txoj kev tuag uas kav ib txhis tej saw hlau muab khaub zig.
“Thiab nim no, saib seb, thaum kuv xav li no, kuv cia li tsis nco qab txog kuv tej kev mob ntxiv lawm; muaj tseeb tiag, kuv cia li tsis raug tsim txom los ntawm txoj kev nco qab txog kuv tej kev txhaum ntxiv lawm.”4
Kev Thov Vajtswv Muaj Kev Siab Hlub
Ntxiv rau nej tus yam ntxwv hais txog kev loj hlob tuaj rau ntawm kev ntseeg, qhov uas nej thov Vajtswv ua ib tse neeg yuav tseem ceeb heev ua rau lub tsev dawb ceev. Feem ntau ib tug neeg yog tus uas hais cov lus thov Vajtswv rau tsev neeg. Thaum thov txog Vajtswv tiag tiag rau cov neeg nrog nej koom txhos caug thiab mloog, txoj kev ntseeg loj hlob tuaj hauv txhua tus neeg lub siab. Lawv paub hais tias nej hlub Leej Txiv Saum Ntuj Ceeb Tsheej thiab tus Cawm Seej heev. Thiab thaum tus neeg uas thov Vajtswv thov txog cov uas txhos caug hauv lub voj tsev neeg ntawd, cov uas xav tau kev pab tag nrho cov uas nyob ntawd muaj kev hlub ib leeg rau ib leeg.
Txawm tias muaj neeg hauv nej tsev neeg uas tsis nyob hauv nej lub tsev lawm, los kev thov Vajtswv rau lawv yeej yuav pab tau kom muaj kev hlub ib leeg rau ib leeg. Kev thov Vajtswv hauv tsev neeg yeej ncav tau thoob lub ntiaj teb. Ntau zaus kuv tau hnov txog kuv ib tug neeg txheeb ze uas nyob deb deb ntawm kuv, thiab nws thov Vajtswv rau tib yam uas kuv thov tam sim ntawd. Rau kuv, zaj paj lug uas hais tias, “Tsev neeg uas thov Vajtswv ua ke, nyob ua ke,” yus muab ntxiv rau hais tias “Tsev neeg uas thov Vajtswv ua ke, twb nyob ua ke, txawm hais tias nyias nyob nyias qhov chaw lawm.”
Qhia txog Kev Hloov Siab Lees Txim Thaum Ntxov
Vim peb tsis yog neeg zoo tag nrho thiab peb tu siab tau yooj yim, tsev neeg ua tau tej tsev dawb ceev tsuas yog thaum peb hloov siab lees txim thaum ntxov. Niam txiv ua tau yam ntxwv rau lawv cov me nyuam. Cov lus hnyav los yog tej kev xav phem yus tso tseg hloov siab lees txim sai tau. Yus hais tau “Kuv thov txim” es ua li no yuav kho tau lwm tus neeg lub siab thiab tau kev zam txim thiab kev hlub.
Tus Yaj Saub Yauxej Xamiv yog ib tug yam ntxwv txog qhov kev zam txim pub rau cov neeg phem, thiab cov ntxeev siab uas tsim txom nws, thiab twb yog thaum nrog nws cov neeg txheeb ze tsis sib haum. Nws zam txim sai, txawm hais tias nws paub hais tias tus tsim txom nws yuav rov qab ua li ntawd. Nws thov kom tau kev zam txim, thiab nws zam txim rau lwm tus neeg sai.5
Ua Ib Yam Li Ib tug Tub Txib Qhia txoj Moo Zoo
Mauxiyas cov tub muaj lub siab xav qhia txoj moo zoo rau txhua tus neeg. Lawv lub siab xav ua li ntawd yog vim rau qhov uas lawv tau hloov siab lees txim tiag. Lawv tsis xav cia leej twg raug txom nyem vim yog tej kev ua txoj ua txhaum ib yam lawv tau raug lawm. Ces lawv ntsib kev xyeej, kev txom nyem, thiab kev xwm txheej ntau xyoo kom thiaj Ua li no, lawv nrhiav tau kev xyiv fab vim yog cov neeg uas hloov siab lees txim thiab txais kev zam txim dhau los ntawm Yexus Khetos txoj Kev Theej Txhoj.
Peb tsev neeg yuav muaj lub siab xav qhia txoj moo zoo rau lwm tus neeg ntau dua thaum lawv txais tau kev zam txim. Lawv yuav txais tau kev zam txim thaum lawv ke rov qab khi lus ke noj lub cim nco txog. Txoj kev muaj lub siab xav qhia lwm tus neeg txog txoj moo zoo yuav loj hlob tuaj hauv peb tsev neeg thaum peb txais tau kev xyiv fab los ntawm kev zam txim thaum peb noj lub cim nco txog. Vim yog lawv tus yam ntxwv coj tswm seeb, niam txiv thiab me nyuam yuav sib pab kom tau kev xyiv fab ntawd. Txoj kev xyiv fab ntawd yuav pab peb tej vaj tse ua tej qhov chaw cob qhia cov tub txib qhia txoj moo zoo. Tej zaum tag nrho cov me nyuam yuav tsis mus ua tub txib, tiam sis sawv daws yuav muaj lub siab xav qhia lwm tus neeg txog txoj moo zoo, uas coj kev zam txim thiab kev nyob kaj siab lug los rau lawv. Thiab txawm hais tias peb ua tub txib puv sij hawm los yog ib nrab sij hawm los, peb txhua tus yuav tau kev xyiv fab los ntawm qhov uas peb qhia txoj moo zoo rau lwm tus neeg.
Kev Mus Xyuas lub Tuam Tsev
Rau niam txiv thiab me nyuam huv tib si, kev mus xyuas lub tuam tsev yog lub cib fim zoo heev kom saib tej qhov chaw dawb ceev rau nqi thiab hnov tus Ntsuj Plig nyob ntawd. Qhov ntawd muaj tseeb tiag thaum cov me nyuam tseem me. Cov me nyuam yug los muaj Khetos qhov Kaj. Twb yog ib tug me nyuam mos liab yuav nkag siab tau hais tias ib lub tuam tsev yog qhov chaw dawb ceev. Vim rau qhov uas niam txiv hlub lawv cov me nyuam me, lub tuam tsev yog ib lub cim uas pab lawv muaj kev cia siab hais tias lawv thiab lawv cov me nyuam yuav nyob tau ua ke—mus ib txhis li.
Nej ib txhia muaj duab hais txog cov tuam tsev hauv nej tej vaj tse. Vim muaj tuam tsev ntau zuj zus nyob thoob plaws lub ntiaj teb, cov niam txiv feem coob yuav coj tau lawv tsev neeg mus xyuas lub tuam tsev tej qhov chaw puag ncig. Tej zaum ib txhia yuav mus xyuas tau tej tuam tsev uas qhib tshiab ua ntej muab fij tseg. Niam txiv nug tau lawv cov me nyuam saib lawv xav li cas nyob ze los yog nyob hauv ib lub tuam tsev.
Txhua tus niam txiv yuav ua tau tim khawv saib ib lub tuam tsev tseem ceeb npaum li cas rau nws. Thawj Tswj Hwm Ezra Taft Benson, uas nyiam tej tuam tsev heev, hais lus ntau zaus txog qhov uas nws niam yuav liv nws cev tsoos tsho tuam tsev.6 Thawj Tswj Hwm Benson hais txog qhov uas nws tsev neeg mus xyuas lub tuam tsev thaum nws tseem yog ib tug tub hluas xwb.
Thaum nws ua tus Thawj Tswj Hwm ntawm lub Koom Txoos, nws mus xyuas lub tuam tsev tib lub sij hawm txhua lub lis piam. Nws yeej los ua tej hauj lwm hauv lub tuam tsev rau nws ib tug poj koob yawm txwv. Es nws ua li no vim yog nws niam txiv tus yam ntxwv zoo.
Kuv Zaj Lus Tim Khawv
Nej yuav tau kev xyiv fab ntau heev thaum nej kho nej lub tsev kom ua ib qho chaw muaj kev ntseeg rau ntawm tus Tswv Yexus Khetos thiab ib qho chaw uas muaj kev hlub ib leeg rau ib leeg heev, Khetos txoj kev hlub dawb paug. Txoj kev Txum Tim txoj moo zoo rov qab los pib thaum ib tug tub hluas nug ib los lus nug, thiab txoj kev txum tim yuav muaj tom ntej mus thaum peb txhim tsa thiab xyaum tej ntsiab cai ntawm txoj moo zoo hauv peb tej tsev neeg thiab. Nov yog qhov uas kuv cia siab rau txij thaum kuv yog ib tug me nyuam tub me me. Nej txhua tus tau pom tej tsev neeg uas coj li no. Nej ib txhia, vim yog tus Tswv tej kev pab, muaj ib tse neeg zoo li ntawd thiab.
Ib txhia neeg tau sim kom tau txoj koob hmoov ntawd, tiam sis tseem tsis tau txais. Kuv txoj lus cog rau nej yog ib txoj lus cog uas ib tug neeg ntawm Pawg Kaum Ob tug Thwj Tim tau cog rau kuv. Kuv tau hais rau nws hais tias vim yog tej kev xaiv uas kuv ib co neeg txheeb ze tau xaiv ua, kuv xoom xaim hais tias peb yuav nyob tsis tau ua ke hauv lub neej tom ntej. Tus Thwj Tim ntawd hais rau kuv hais tias, “Koj txhawj txog qhov teeb meem yuam kev. Koj yuav tsum ua neej tsim nyog txais lub nceeg vaj xilethi-aus, koj thiaj yuav muaj ib tse neeg uas zoo tshaj qhov koj xav.”
Kuv ntseeg hais tias tus thwj tim ntawd yuav hais li ntawd rau peb txhua tus uas tau ua txhua yam uas peb ua tau kom thiaj tsim nyog txais thiab pab npaj peb tsev neeg txais lub neej nyob mus ib txhis li. Kuv paub hais tias Leej Txiv Saum Ntuj Ceeb Tsheej txoj kev npaj no yog ib txoj kev kom tau kev zoo siab. Kuv ua tim khawv hais tias Nws txoj hau kev npaj kev rau peb txhua tus uas tau ua raws li peb ua tau kom ua tau tsev neeg sib khi ua ke mus ib txhis li.
Kuv paub hais tias cov yawm sij ntawm lub pov thawj hwj uas Yauxej Xamiv tau txais yog tib co uas Thawj Tswj Hwm Russell M. Nelson muaj niaj hnub nim no. Cov yawm sij no cia peb ua kev cai sib khi rau tsev neeg niaj hnub nim no. Kuv paub hais tias Leej Txiv Saum Ntuj Ceeb Tsheej hlub peb, Nws cov me nyuam ntsuj plig, es txoj kev hlub ntawd zoo tag nrho. Kuv paub hais tias vim yog Yexus Khetos txoj Kev Theej Txhoj, peb hloov siab lees txim tau, raug ntxuav huv, thiab ua neeg tsim nyog ua neej nrog peb tsev neeg uas hlub peb thiab nrog peb Leej Txiv Saum Ntuj Ceeb Tsheej thiab Nws Tib Leeg Tub, Yexus Khetos, mus ib txhis li. Kuv hais lus tim khawv txog qhov no los ntawm Yexus Khetos lub npe, amees.