Kuv Yuav Ua Li Cas To Taub?
Thaum peb rau siab thiab mob siab kawm Yexus Khetos txoj moo zoo kawg siab kawg ntsws thiab ib leeg qhia rau ib leeg, ces tej lus qhia no yuav hloov tib neeg lub siab.
Kuv cov kwv tij thiab cov muam, kuv zoo siab heev uas peb koom ua ke hauv lub tuam rooj sab laj ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg raws li peb tus yaj saub, Thawj Tswj Hwm Russell M. Nelson, txoj kev tswj hwm. Kuv ua tim khawv tias peb yuav muaj cib fim hnov tus Cawm Seej, Yexus Khetos, lub suab los ntawm tej lus qhia ntawm cov uas thov Vajtswv, hu nkauj, thiab hais lus txog tej yam uas peb xav tau hnub no hauv lub rooj sab laj no.
Ib yam li muaj nyob hauv phau Tes Hauj Lwm, Filis tus yawg suab tau qhia txoj moo zoo rau ib tug neeg Ethi-aupias uas yog ib tug neeg sam uas saib xyuas tag nrho tus niam vaj ntxwv Ethi-aupias cov khoom uas muaj nqis.1 Thaum nws tab tom rov qab hauv Yeluxalees mus, nws nyeem phau Yaxayas. Tus Ntsuj Plig tshoov Filis lub siab, es Filis tuaj txog thiab hais tias, “Zaj uas koj nyeem ko, koj puas to taub?
“Tus [neeg sam] ntawd teb hais tias, Twb tsis muaj leej twg qhia lub ntsiab rau kuv, kuv yuav ua li cas to taub? …
“Filis txawm qhia txoj moo zoo uas hais txog Yexus zaj rau tus nom ntawd mloog. Nws qhia zaj uas tus nom ntawd tab tom nyeem ntag.”2
Lo lus uas tus neeg Ethi-aupias no nug yeej ua rau peb nco txog Vajtswv tej lus txib uas Nws hais rau peb txhua tus kom peb xav kawm ntawv thiab kom peb ib leeg qhia ib leeg txog Yexus Khetos txoj moo zoo.3 Hais txog kev kawm ntawv, tej lub sij hawm peb zoo li tus neeg Ethi-aupias—peb xav tau ib tug xib hwb uas muaj siab ntseeg thiab txais kev tshoov siab; thiab tej lub sij hawm peb zoo li Filis—peb yuav tsum qhia thiab txhawb nqa lwm tus txoj kev hloov siab los ntseeg.
Peb lub hom phiaj thaum peb xav kawm thiab thaum peb qhia Yexus Khetos txoj moo zoo yog kom ntxiv zog rau peb txoj kev ntseeg Vajtswv thiab Nws txoj hau kev zoo siab thiab Yexus Khetos thiab Nws txoj kev theej txhoj. Lub hom phiaj kuj yog kom peb hloov siab los ntseeg uas kav ntev. Kev ntseeg li no thiab kev hloov siab los ntseeg yuav pab peb ua raws li peb tej kev khi lus nrog Vajtswv, ua rau peb xav coj raws li Yexus ntxiv thiab ua rau peb hloov peb sab ntsuj plig tiag tiag—los yog hais tias, ua rau peb hloov los ua neeg tshiab, zoo li tus Thwj Tim Povlauj qhia hauv nws tsab ntawv rau cov neeg Kauleethaus.4 Kev hloov siab no yuav ua rau peb zoo siab, khwv tau, thiab muaj kev noj qab nyob zoo thiab pab peb muaj lub zeem muag uas pom tau mus ib txhis li. Twb muaj li no thaum tus neeg Ethi-aupias kawm txog tus Cawm Seej thiab hloov siab los ntseeg lawm puas yog? Vaj lug kub hais tias nws “caij tsheb nees mus tsev; nws zoo siab kawg li.”5
Kev txib kom peb kawm txoj moo zoo thiab kom peb ib leeg qhia ib leeg tsis yog kev txib tshiab; twb hais li no txij thaum chiv keeb los.6 Muaj ib lub sij hawm, thaum Mauxes thiab nws cov neeg nyob hauv tiaj nras Mau-as ua ntej lawv yuav los txog thaj av uas tau cog lus tseg lawm, tus Tswv tshoov nws lub siab kom qhuab ntuas nws cov neeg txog qhov uas lawv yuav tsum kawm cov kev cai thiab kev khi lus uas lawv tau txais los ntawm tus Tswv thiab qhia tej ntawd rau lawv cov xeeb leej xeeb ntxwv,7 vim feem coob tsis tau hla Hiav Txwv Liab thiab tsis nyob thaum Mauxes txais kev tshwm sim nyob rau saum lub Roob Xinais.
Mauxes qhuab ntuas nws cov neeg hais tias:
“Nej yuav tsum coj raws li tej lus uas kuv qhia rau nej, nej thiaj muaj sia nyob ntev, thiab kav lub teb chaws uas tus Tswv uas yog nej cov yawg koob tus Vajtswv muab pub rau nej. …
“… Nej yuav tsum qhia rau nej cov me nyuam thiab nej tej xeeb ntxwv paub txog tej no.”8
Ces Mauxes xaus lus hais tias, “Nej yuav tsum ua raws li tus Tswv tej kev cai uas hnub no kuv qhia rau nej txhua nqe, nej thiab nej tej tub ki thiaj yuav noj qab nyob zoo. Nej yuav muaj sia ua neej nyob ntev hauv lub teb chaws uas tus Tswv uas yog nej tus Vajtswv yuav muab rau nej ua nej tug mus ib txhis.”9
Vajtswv cov yaj saub yeej ib txwm tau qhia peb tias peb yuav tsum tu peb tsev neeg raws li tus Tswv txoj kev cob qhia thiab kev qhuab ntuas10 thiab raws li qhov kaj thiab qhov tseeb.11 Thawj Tswj Hwm Nelson tau hais tias, “Niaj hnub no thaum muaj kev plees kev yi thiab kev saib duab liab qab, cov niam tsev txiv tsev muaj kev lav ris qhia lawv cov me nyuam tias Vajtswv [thiab Yexus Khetos] yeej tseem ceeb rau lawv lub neej.”12
Cov kwv tij thiab cov muam, tus yaj saub cov lus ceeb toom ua rau peb nco ntsoov tias peb yuav tsum xav kawm thiab qhia peb tsev neeg tias muaj ib Leej Txiv Saum Ntuj Ceeb Tsheej uas hlub peb thiab muaj ib txoj hau kev zoo siab rau Nws cov me nyuam; qhia tias Yexus Khetos, Nws Leej Tub, yog neeg ntiaj teb tus Txhiv Dim; thiab kev cawm seej yeej los ntawm kev ntseeg Nws lub npe.13 Peb yuav tsum ua neej kom tsom ntsoov rau lub hauv paus uas yog peb tus Txhiv Dim, Yexus Khetos, uas yuav pab peb txhua tus thiab txhua tsev neeg txais kev tshoov siab, thiab pab peb muaj kev ntseeg nyiaj mus tom ntej.14
Tej zaum nej nco txog qhov uas Yauhas tus uas Muab Neeg Ua Kev Cai Raus Dej muaj ob tug thwj tim uas nrog Yexus Khetos mus tom qab nkawd hnov Yauhas ua tim khawv tias Yexus yog Vajtswv tus Me Nyuam Yaj, tus Mexiyas. Ob tug txiv neej zoo no tau ua raws li Yexus caw lawv kom “los thiab saib”15 thiab nrog Nws nyob hnub ntawd. Nkawd twb los paub tias Yexus yog tus Mexiyas, Vajtswv Leej Tub, thiab lawv tau nrog Nws mus kom tas nkawd lub neej.
Ib yam li ntawd, thaum peb ua raws li tus Cawm Seej tej lus hais kom peb “cia li los saib,” peb yuav tsum muab siab npuab Nws, nyeem vaj lug kub, zoo siab txog cov vaj lug kub, kawm txog Nws cov lus qhuab qhia, thiab sim ua neej raws li Nws ua. Tsuas yog peb ua li ntawd los peb thiaj yuav paub Nws, Yexus Khetos, thiab paub Nws lub suab, thiab paub tias thaum peb los cuag nws thiab ntseeg Nws, peb yeej yuav tsis tshaib los sis nqhis dej.16 Peb yuav paub qhov tseeb txhua lub sij hawm, zoo li ob tug thwj tim uas nyob nrog Yexus hnub ntawd.
Cov kwv tij thiab cov muam, yeej yuav tsis muaj li no los ntawm txoj hmoov xwb. Kev kho peb tus kheej kom hnov tau tej kev tshoov siab los ntawm Vajtswv yeej tsis yooj yim; Peb yuav tsum thov Vajtswv pab thiab kawm kom ua raws nraim li Yexus Khetos txoj moo zoo. Yog peb ua li ntawd, kuv cog lus tias tus Vaj Ntsuj Plig Dawb Huv tej kev tshoov siab yuav ua rau peb paub qhov tseeb thiab ua tim khawv txog qhov tseeb ntawd,17 yuav qhia txhua yam.18
Qhov uas tus neeg Ethi-aupias nug hais tias, “Twb tsis muaj leej twg qhia lub ntsiab rau kuv, kuv yuav ua li cas to taub?” muaj ib lub ntsiab tshwj xeeb thaum hais txog qhov uas peb txhua tus yuav tsum kawm txog Yexus Khetos txoj moo zoo thiab ua raws li Nws txoj moo zoo hauv peb lub neej. Ua piv txwv, thaum hais txog tus neeg Ethi-aupias, nws twb ua raws li qhov tseeb uas Filis qhia nws. Nws thov kom muab nws ua kev cai raus dej. Nws paub tias Yexus Khetos yog Vajtswv Leej Tub.19
Cov kwv tij thiab cov muam, tej yam peb ua yuav tsum ua raws li tej yam peb qhia thiab kawm. Peb yuav tsum qhia lawv txog peb txoj kev ntseeg los ntawm peb txoj kev ua neej. Tus xib hwb zoo tshaj plaws yog ib tug uas coj yam ntxwv zoo. Kev qhia ib yam uas peb ua tiag tiag los yeej pab tau cov uas peb qhia kom hloov lawv lub siab. Yog peb xav kom cov uas peb qhia, tsis hais peb tsev neeg los yog lwm tus los yog, kom saib cov vaj lug kub thiab cov thwj tim thiab cov yaj saub ntawm peb lub caij nyoog tej lus qhia rau nqi, lawv yuav tsum saib peb muaj kev zoo siab los ntawm tej no. Yog li ntawd, yog peb xav kom lawv paub tias Thawj Tswj Hwm Russell M. Nelson yog tus yaj saub, tus pom tau, thiab tus txais kev tshwm sim hauv peb lub caij nyoog, lawv yuav tsum pom peb tsa tes txhawb nqa nws thiab paub tias peb ua raws li nws tej lus qhia. Ib yam li cov neeg Amelikas hais tias, “Tej yam yus ua yeej nrov dua li tej lus yus hais.”
Tej zaum tam sim no nej ib txhia xav tias, “Txwj Laug Soares, kuv twb ua tag nrho tej no thiab kuv ua raws li tus txheej txheem no kuv tus kheej thiab hauv kuv tsev neeg, tiam sis, kuv cov phooj ywg thiab cov uas kuv hlub ib txhia twb txiav txim siab txav deb ntawm tus Tswv mus. Kuv yuav tsum ua li cas?” Rau nej cov uas tam sim no tu siab, nyuaj siab, los yog khuv xim nej tus kheej tam sim no, thov kom nej paub tias lawv tsis poob tag lawm vim tus Tswv paub tias lawv nyob qhov twg thiab Nws saib xyuas lawv. Cia li nco ntsoov tias, lawv yog Nws cov me nyuam thiab!
Yeej nyuaj kom to taub vim li cas ib txhia twb xaiv ib txoj kev txawv. Thaum muaj xwm txheej li no peb yuav tsum hlub thiab muab siab npuab lawv, thov Vajtswv pab lawv, thiab nrhiav tus Tswv txoj kev pab kom paub ua li cas thiab hais li cas. Cia li koom siab muaj kev xyiv fab thaum lawv vam meej; ua phooj ywg nrog lawv thiab nrhiav qhov zoo nyob hauv lawv lub siab. Peb yeej yuav tsum tsis txhob tso lawv tseg, peb yuav tsum saib xyuas peb txoj kev sib raug zoo. Tsis txhob xyeej los yog txiav txim yuam kev. Cia li hlub lawv xwb! Zaj lus piv txwv txog tus tub ua txhaum qhia peb tias thaum cov me nyuam nco dheev, lawv xav rov qab los tsev. Yog muaj li no rau ib tug uas nej hlub, thov kom nej muab lub siab hlub nws, dhia loo mus puag nkaus nws thiab nwj nws, zoo li leej txiv ntawm tus tub ua txhaum ua.20
Qhov tseem ceeb, ua nej lub neej kom tsim nyog, coj yam ntxwv zoo rau lawv txog tej yam uas nej ntseeg, thiab txav los nyob ze peb tus Cawm Seej Yexus Khetos. Nws paub thiab to taub peb tej kev tu siab thiab kev nyuaj siab, thiab Nws yuav foom koob hmoov rau nej txoj kev pab cov uas nej hlub hauv lub neej no los sis hauv lub neej tom ntej. Cov kwv tij thiab cov muam, cia li nco ntsoov tias kev cia siab yog ib feem tseem ceeb ntawm txoj moo zoo no.
Ntau xyoo uas kuv ua hauj lwm hauv lub Koom Txoos, kuv twb pom cov mej zeej rau siab ntseeg uas mob siab ua raws li cov ntsiab cai no hauv lawv lub neej. Kuv paub ib tug niam tsev uas tsis muaj tus txiv uas zoo li no es kuv yuav hu nws ua “Maiv”. Tu siab uas Maiv thiab nws tus txiv sib nrauj. Thaum lub sij hawm ntawd, Maiv paub tias tej kev txiav txim siab tseem ceeb tshaj plaws rau nws tsev neeg yog los ntawm sab ntsuj plig. Kev thov Vajtswv, kev kawm vaj lug kub, kev yoo moo, thiab kev mus rau lub koom txoos thiab lub tuam tsev puas yuav tseem ceeb rau nws?
Maiv yeej rau siab ntseeg, thiab thaum lub sij hawm tseem ceeb ntawd, nws txiav txim siab ua raws li tej yam uas nws twb paub lawm tias muaj tseeb. Nws txais dag zog los ntawm “Tsev Neeg: Ib Zaj Lus Tshaj Tawm rau lub Ntiaj Teb” uas qhia tej ntsiab cai zoo kawg, xws li qhov uas “niam txiv muaj ib lub luag hauj lwm tseem ceeb dawb ceev kom coj nkawd cov me nyuam raws li kev hlub thiab kev ncaj ncees” thiab kom lawv ua raws li Vajtswv tej lus txib.21 Ntau zaus nws nrhiav kom tau tus Tswv tej lus teb thiab qhia tej lus ntawd rau nws plaub tug me nyuam nyob txhua qhov chaw. Nws tsev neeg tau sib tham txog txoj moo zoo thiab lawv ib leeg qhia txog tej yam uas lawv kawm thiab lawv zaj lus tim khawv rau ib leeg.
Txawm yog cov me nyuam raug kev tu siab, nws cov me nyuam yeej nyiam Khetos txoj moo zoo thiab lawv xav pab lwm tus thiab qhia txog txoj moo zoo rau lwm tus. Peb tug twb mus ua tub txib rov qab los tsev lawm, thiab tus tub ntxawg tam sim no ua tub txib nyob hauv Amelikas Qab Teb. Nws tus ntxhais hlob, uas kuv paub zoo, nws twb sib yuav thiab muaj kev ntseeg heev, nws hais tias, “Kuv yeej tsis xav tias kuv niam tu peb nws tus kheej xwb vim tus Tswv yeej nyob hauv peb lub tsev. Thiab thaum kuv niam ua tim khawv txog Nws rau peb, peb txhua tus tau tig mus rau Nws thaum muaj lus nug. Kuv yeej zoo siab heev vim nws tau ua raws li txoj moo zoo.”
Cov kwv tij thiab cov muam, tus niam tsev no twb ua rau nws lub tsev ua ib qho chaw rau kev kawm txog sab ntsuj plig. Ib yam li tus neeg Ethi-aupias nug Filis, Maiv nug nws tus kheej ob peb zaug hais tias, “Kuv cov me nyuam yuav kawm li cas yog ib tug niam tsev tsis coj lawv kev?”
Kuv cov phooj ywg ntawm txoj moo zoo, kuv ua tim khawv rau nej tias thaum peb rau siab thiab mob siab kawm Yexus Khetos txoj moo zoo kawg siab kawg ntsws thiab ib leeg qhia rau ib leeg raws li tus Ntsuj Plig qhia, ces tej lus qhia no yuav hloov tib neeg lub siab thiab tshoov lawv lub siab kom xav ua raws li Vajtswv tej lus tseeb.
Kuv ua tim khawv hais tias Yexus Khetos yog tus Cawm Seej ntawm lub ntiaj teb. Nws yog tus Txhiv Dim, thiab Nws muaj txoj sia nyob. Kuv paub tias Nws coj Nws lub Koom Txoos los ntawm Nws cov yaj saub, cov pom tau, thiab kev tshwm sim. Kuv kuj ua tim khawv rau nej tias Vajtswv muaj txoj sia nyob, thiab Nws hlub peb. Nws xav kom peb rov qab los cuag Nws—peb txhua leej txhua tus. Nws mloog peb tej lus thov. Kuv ua tim khawv txog tej yam tseeb no los ntawm Yexus Khetos lub npe, amees.