Saib Vajtswv tus Me Nyuam Yaj
Qhov uas peb hloov kev sib ntsib thaum hnub Sunday ua rau peb thiaj li saib lub cim nco txog ntawm tus Tswv Pluas Hmo rau nqi uas yog lub sij hawm teev tiam tus Tswv txhua lub lim tiam uas dawb huv thiab qhov uas peb tsom ntsoov.
Kuv tsis ua li cas mus txog thaum kuv pom cov tub hluas ntxhais hluas hauv pawg hu nkauj no los kua muag. Lawv cov kua muag yeej hais ib zaj lus zoo tshaj kuv muaj peev xwm hais.
Los ntawm ntug dej, saib dhau cov neeg coob uas xav kom nws muab lawv ua kev cai raus dej, Yauhas, tus uas Muab Neeg Ua Kev Cai Raus Dej pom nws tus kwv tij, Yexus los ntawm Naxales, rau siab los txog kom thov Yauhas ua zoo ib yam. Yauhas hais nrov txaus kom cov uas nyob ze hnov tau, tiam sis hais raws li kev tswm seeb, hais cov lus qhuas uas ob txhiab xyoo tom qab no tseem tshoov peb lub siab: “Saib Vajtswv tus Me Nyuam Yaj.”1
Qhov uas Yauhas, tus uas cov yaj saub qhia yuav los ua ntej Yexus, tsis tau hu Nws ua “Yehauvas” los yog “Cawm Seej” los yog “Txhiv Dim” los sis “Vajtswv Leej Tub”—tej npe yeej yuav hais yog thiab. Tsis yog li ntawd, Yauhas xaiv kom siv ib lub npe uas twb hais puag thaum ub thiab tej zaum yog lub npe uas txhua tus ntawm nws cov neeg txoj kev ntseeg paub lawm. Nws siv lub cim txog ib tug yaj uas muab ua kev cai txi theej txhoj rau cov neeg tej kev txhaum thiab kev tu siab ntawm neeg ntiaj teb uas tau poob lawm.
Thov cia kuv hais me ntsis txog zaj keeb kwm ntawd.
Tom qab nkawd raug ntiab tawm hauv lub Vaj Edees mus, Adas thiab Evas ntshai yav tom ntej. Vim nkawd qhib kev txawj tuag hauv lub neej ntawm sab cev nqaij daim tawv rau peb, nkawd twb kaw qhov rooj kom txais tsis tau kev tsis txawj tuag thiab txoj sia nyob mus ib txhis. Vim tias nkawd twb txhob txwm ua txhaum kom thiaj muaj tau peb, nkawd yuav tsum raug kev tuag ntawm sab cev nqaij daim tawv thiab raug ntiab tawm ntawm Vajtswv lub xub ntiag mus ib txhis li.2 Nkawd yuav tsum ua li cas? Puas muaj ib txoj kev tawm ntawm qhov teeb meem no? Peb tsis paub tseeb tias ob tug no nco qab pes tsawg cov lus qhia uas nkawd txais hauv lub vaj, tiam sis nkawd twb nco qab tias nkawd yuav tsum muab ib tug me nyuam yaj uas dawb huv thiab tsis muaj qhov ceb, tus txiv uas yog thawj tus uas yug los hauv pab yaj, ua kev cai txi rau Vajtswv.3
Tom qab ntawd ib tug tim tswv los piav tias kev cai txi no yog ib lub cim, yog lub cim txog kev txi uas tus Cawm Seej ntawm lub ntiaj teb uas yuav los yuav ua kom pab nkawd. Tus tim tswv hais tias, “Qhov no yog ib tug yam ntxwv txog kev txi ntawm Leej Txiv Tib Leeg Tub, tus uas muaj txoj kev tshav ntuj thiab kev tseeb nplua mias. Yog li ntawd, … [neb] yuav tsum hloov siab lees txim thiab hu Vajtswv los ntawm Leej Tub lub npe tas mus li.”4 Zoo siab uas muaj ib txoj kev tawm qhov teeb meem no.
Nyob hauv tej pawg sab laj saum ntuj ceeb tsheej hauv lub neej ua ntej lub neej no, Vajtswv tau cog lus tias Adas thiab Evas (thiab peb txhua tus) yuav txais kev pab los ntawm Nws, tus uas yog Leej Txiv tus Tub Hlob, dawb huv, tsis muaj qhov ceb, Vajtswv tus Me Nyuam Yaj uas yuav “raug muab tua li tau npaj puag thaum ntuj tsim teb raug los lawm,”5 zoo li tus Thwj Tim Yauhas yuav hais. Los ntawm qhov uas Adas thiab nws cov xeeb leej xeeb ntxwv muab lawv cov yaj ua kev cai txi kom ua lub cim, lawv qhia Vajtswv tias lawv to taub txog thiab tso siab rau Yexus tus uas Vajtswv Pleev Roj Rau txoj kev theej txhoj.6 Tom qab ntawd, yuav ua txoj kab ke no hauv tsev pheeb suab ntaub nyob hauv roob moj sab qhua, thiab tom qab ntawd nyob hauv lub tuam tsev uas Xaulumoos ua.
Tu siab uas txoj kev cai txi tus me nyuam yaj uas tsis muaj qhov ceb, uas yog ib lub cim rau kev hloov siab lees txim tiag tiag thiab kev rau siab ntseeg tas yus ib sim neej. Txoj kev cai no tsis tau pab ntau tus neeg, zoo li Phau Qub hais. Kev cog lus tias yuav ua neej ncaj ncees uas yuav tsum ua nrog rau tej kev cai txi no ntshe tsuas nyob ntev li tau cia cov ntshav qhuav rau ntawm cov pob zeb. Txawm ntev li cas los, kev cog lus no tsis tau nyob ntev txaus kom tiam neeg thib ib txhob muab kwv tij tua tuag, vim Ka-ees muab Anpees tua.7
Yog vim tej kev sim siab thiab tej teeb meem li no twb nyob tau ob peb txhiab xyoo, cov tim tswv saum ntuj ceeb tsheej thiaj li zoo siab hu nkauj thaum Yexus yug los—tus Mexiyas uas tau cog lus tias yuav los. Tom qab Nws txoj kev qhuab qhia hauv lub ntiaj teb, tus me nyuam yaj rau Kev Cai Hla Dhau uas dawb huv tshaj tau npaj Nws cov thwj tim rau Nws txoj kev tuag thaum Nws qhia lawv txog lub cim nco txog ntawm tus Tswv Pluas Hmo, ib txoj kab ke zoo li txoj kab ke uas tau qhia nyob ze Edees. Tseem yuav ua kev cai txi, tiam sis yuav siv ib lub cim uas muaj lub ntsiab tseem ceeb dua, thiab yuav tsum xav txog tus kheej ntau dua li yus ua thaum tso ntshav ntawm thawj tus me nyuam yaj. Rau cov neeg Nifais, tom qab Nws sawv rov los, tus Cawm Seej hais tias:
“Nej tsis txhob tua tsiaj txi rau kuv ntxiv lawm. …
“… Nej yuav muab lub siab puas tas thiab lub siab xav ua zoo ua kev txi rau kuv. Thiab tus uas yuav los cuag kuv nrog lub siab puas tas thiab lub siab xav ua zoo, kuv yuav muab tus ntawd ua kev cai raus ntawm hluav taws thiab ntawm tus Vaj Ntsuj Plig Dawb Huv. …
“… Yog li ntawd hloov siab lees txim, … thiab txais kev dim txim.”8
Kuv cov kwv tij thiab cov muam, vim kev kawm txoj moo zoo ntxiv hauv tsev ntxiv, peb yuav tsum nco ntsoov tias tus Tswv tseem txib peb kom “mus rau hauv lub tsev thov Vajtswv thiab fij [peb] tej cim nco txog thaum yog kuv hnub dawb huv.”9 Ntxiv rau kev siv sij hawm ntxiv hauv tsev qhia txog txoj moo zoo, qhov uas peb hloov kev sib ntsib thaum hnub Sunday yog kom tsis teem sij hawm sib ntsib uas nyuaj dhau peb thiaj li saib lub cim nco txog ntawm tus Tswv Pluas Hmo rau nqi uas yog lub sij hawm teev tiam tus Tswv txhua lub lim tiam uas dawb huv thiab qhov uas peb tsom ntsoov. Peb yuav tsum nco ntsoov tias Khetos tuag vim Nws lub siab puas tas thaum Nws ris kev txhaum thiab kev tu siab tntawm tib neeg txhua leej txhua tus rau nws tus kheej.
Vim peb twb muab tej lub nra rau nws ris, peb yuav tsum saib lub sij hawm ntawd rau nqi. Yog li ntawd peb los ntxov thiab nyob tswm seeb, hnav khaub ncaws uas tsim nyog kom koom tes ua txoj kab ke dawb huv no. Cov lus “phim Hnub Sunday” ntshe tsis muaj lub ntsiab ib yam li qub lawm, tiam sis vim peb saib taus Nws, tus uas yog vim peb los koom ua ke, peb yuav tsum rov qab nco txog cov lus no thiab tu cev thiab hnav khaub ncaws zoo thaum twg peb ua tau.
Hais txog kev tuaj raws sij hawm, peb yeej yuav muaj kev hlub zam txim rau cov niam tsev, cov uas coj cov me nyuam, nqa Cheerios, thiab nqa lub hnab daim pawj uas sw sw, vim lawv muaj hmoov zoo uas lawv tuaj taus rau lub koom txoos xwb. Tsis tas li ntawd, yeej muaj lwm tus uas tej lub sij hawm pom tias lawv tus nyuj nyob hauv av nkos thaum Hnub Caiv sawv ntxov. Tiam sis, rau cov uas muaj teeb meem no los peb hais tias yog tuaj lig tej lub sij hawm ces peb yeej to taub, tiam sis yog tias tus nyuj nyob hauv av nkos txhua Hnub Caiv, ces peb ua tib zoo qhia nej tias xav kom nej muag tus nyuj los yog ua rau cov av nkos qhuav.
Hais li ntawd los, peb cov thwj tim thov kom nej tsis txhob nrov nyob hauv peb tej tsev teev ntuj dawb huv. Peb nyiam sib tham, thiab peb yuav tsum ua li ntawd—yog kev xyiv fab uas los ntawm kev koom lub koom txoos—tiam sis yuav tsum tsis txhob ua li ntawd nyob hauv qhov chaw uas peb siv rau kev teev tiam. Kuv ntshai tias cov qhua uas tsis ntseeg li peb xav tsis thoob vim lawv pom neeg uas tsis tswm seeb nyob hauv ib qho chaw uas tsim nyog peb thov Vajtswv, hais lus tim khawv txais kev tshwm sim thiab nyob kaj siab lug. Tej zaum cov nyob saum ntuj ceeb tsheej xav tsis thoob thiab.
Yuav pab peb tej kev sib ntsib txais lub cim nco txog yog tias cov thawj coj sawv pem sam thiaj ua ntej yuav pib, mloog cov nkauj ua ntej thiab nyob tswm seeb kom coj yam ntxwv rau peb txhua tus xyaum. Yog tias muaj neeg sib tham pem sam thiaj, ces cov uas pawg ntseeg yeej yuav sib tham thiab. Peb qhuas tej pawg npisov uas tsis tshaj tawm tej yam uas tsis txhawb nqa peb txoj kev teev tiam. Kuv mas kuv xav tsis tawm txog ib tug pov thawj xws li Xakhaliyas—nyob hauv tus Tswv lub tuam tsev thaum ub, uas tab tom yuav ua kev cai txi raws li nws lub cib fim ua nws txoj hauj lwm pov thawj hlob—kuv xav tsis tawm txog qhov uas nws yuav nres rau ntawm lub thaj kom peb nco txog qhov uas yuav muab me nyuam tsheb sib tw khiav rau lub lim tiam tom ntej thiab yuav tsum sau npe kom ua.
Cov kwv tij thiab cov muam, rau caum feeb no uas tus Tswv tau pom zoo yog teev dawb ceev tshaj plaws hauv ib lim tiam. Raws li tau txib lawm, peb sib sau ua ke kom txais txoj kab ke uas txhua tus hauv lub Koom Txoos txais. Peb ua kom nco txog Nws, tus uas thov kom tshem lub khob uas nws yuav haus, tiam sis nws tseem tau haus vim Nws paub tias yuav pab peb thiaj li tshem tsis tau. Qhov uas yuav pab peb yog qhov uas peb nco ntsoov tias lub cim txog lub khob ntawd los ib tug dikas uas muaj 11 los yog 12 xyoos muab rau peb thaum tib lub sij hawm ntawd.
Thaum txog lub sij hawm dawb ceev kom ua kev cai txi pub txiaj ntsim rau tus Tswv, peb yuav tsum kho peb tej kev txhaum thiab tej yam peb ua yuam kev; yog vim li no peb thiaj nyob ntawd. Tiam sis tej zaum peb haj yam xav ua zoo yog tias peb nco txog lwm tus uas muaj lub siab puas tas thiab kev tu siab uas nyob ib puag ncig. Tej zaum nyob tsis deb muaj ib co neeg uas quaj—quaj rau neeg pom los sis quaj hauv lawv lub siab—thaum tag nrho lub sij hawm uas lawv hu zaj nkauj thiab cov pov thawj thov Vajtswv foom koob hmoov rau lub cim nco txog. Thaum peb txais cov mov mog thiab khob dej me me kom nco txog lawv thiab muab kev nplij siab thiab kev khuv leej rau lawv—puas tsim nyog nco txog fij tseg rau lawv? los sis rau tus mej zeej uas tsis nyob hauv kev sib ntsib, thiab tsuas yog peb mus ua ib yam dab tsi txhawb pab lawv, ntshe lub lim tiam tom ntej yuav tsis tuaj thiab? los sis rau peb cov kwv tij thiab cov muam uas tsis yog mej zeej ntawm lub Koom Txoos hlo li tiam sis yeej yog peb cov kwv tij thiab cov muam? Yeej muaj kev txom nyem tsis tu tsis tseg hauv lub ntiaj teb no, nyob hauv lub Koom Txoos thiab nyob sab nraud, yog li ntawd, saib qhov twg thiab nej yuav pom ib tug uas lawv nyiaj tsis taus lawv txoj kev nyuaj siab thiab txoj kev ntxhov siab. Ib txoj kev kom “nco ntsoov txog nws”10 yog kom koom tes nrog tus Kws Kho Mob Zoo ua Nws tej hauj lwm uas tsis tu txhawb nqa cov uas ris nra hnyav thiab nplij cov uas ntxhov siab.
Cov kwv tij uas kuv hlub, thaum peb koom siab nyob thoob plaws lub ntiaj teb txhua lub lim tiam kom lees yuav Khetos lub txiaj ntsim rau noob neej, thov kom peb yuav “pab nws nyuaj siab ntxiv [thiab] nco nws kev mob ntxiv” thaum peb los txog ntawm lub thaj rau lub cim nco txog. Ces, thaum peb xav txog, thov Vajtswv, thiab rov qab khi lus, thov kom peb yuav “muaj siab ntev nyiaj mob ntxiv, … qhua rau tus Tswv ntxiv” vim yog los ntawm lub sij hawm dawb ceev ntawd.11 Yog xav ua siab ntev thiab nyiaj mob li ntawd, yog xav tau kev dawb huv thiab kev cia siab li ntawd, kuv thov Vajtswv los ntawm Yexus Khetos lub npe, tus uas tau muab cov mov mog ntawm kev zam txim ntais thiab hliv cov kua txiv hmab ntawm kev txhiv dim, Vajtswv tus Me Nyuam Yaj uas muaj nqis, uas siab hlub, thiab dawb huv, amees.