Hlub Peb Leej Txiv cov Me Nyuam

Los ntawm Txwj Laug Quentin L. Cook

Ntawm Pawg Kaum Ob tug Thwj Tim

Kev hlub yog tus cwj pwm tseem ceeb thiab yog vim li cas tus yaj saub txib peb ua raws li tej yam kom txhawb nqa peb sab ntsuj plig.

Kuv cov kwv tij thiab cov muam, nov yog ib lub caij nyoog tseem ceeb hauv peb zaj liv xwm. Peb tau koob hmoov vim peb nyob hauv lub caij nyoog tso cai kawg ua ntej tus Cawm Seej txoj Kev Los Zaum Ob. Thaum lub caij nyoog tso cai pib hauv xyoo 1829, xyoo ua ntej tau txhim tsa lub Koom Txoos, Yauxej Xamiv tau txais kev tshwm sim uas qhia tias ib “txoj hauj lwm zoo kawg” yuav luag yuav tawm los. Kev tshwm sim no qhia tias cov uas xav ua hauj lwm rau Vajtswv yuav tsim nyog ua los ntawm “kev ntseeg, kev cia siab, kev siab hlub thiab kev hlub, nrog lub qhov muag uas ntsia ntsoov rau Vajtswv lub yeeb koob.”¹ Kev siab hlub, uas yog “Khetos txoj kev hlub dawb paug,”² kuj yog Vajtswv txoj kev hlub nyob mus ib txhis rau nws cov me nyuam.³

Kuv lub hom phiaj tag kis no yog kom hais txog qhov uas txoj kev hlub li ntawd yeej tseem ceeb thaum ua cov tub txib txoj hauj lwm, ua hauj lwm hauv lub tuam tsev thiab tsev neeg zaj keeb kwm, thiab kev qhia tsev neeg hauv tsev uas lub Koom Txoos txhawb nqa. Kev hlub tus Cawm Seej thiab kev hlub tib neeg⁴ yog tus cwj pwm tseem ceeb tshaj plaws thiab lub hom phiaj ntawm kev txhawb pab lwm tus thiab ntawm sab ntsuj plig⁵ uas peb tus yaj saub Thawj Tswj Hwm Russell M. Nelson tau txib kom peb ua, raws li tau hais thaum xyoo 2018.

Kev Ua Tub Txib Muab Ixayees Sib Sau Ua Ke

Kuv twb kawm txog qhov uas kev ua cov tub txib txoj hauj lwm thiab kev hlub txeeb ze li cas thaum kuv tseem hluas. Thaum kuv muaj 11 xyoos, kuv txais kuv txoj koob hmoov yawg suab los ntawm ib tug yawg suab uas kuj yog kuv tus yawm txiv.⁶ Txoj koob hmoov ntawd hais tias, “Kuv foom koob hmoov rau koj kom koj hlub tib neeg, vim Vajtswv yuav hu koj mus qhia txoj moo zoo rau lub ntiaj teb … kom coj neeg los cuag Khetos.”⁷

Txawm kuv hluas los, kuv to taub hais tias kev qhia txoj moo zoo yog los ntawm kev hlub tag nrho peb Leej Txiv Saum Ntuj Ceeb Tsheej cov me nyuam.

Peb cov Tuam Thawj Coj uas tau ua hauj lwm sau phau Qhia Kuv txoj Moo Zoo 15 xyoos tas los, peb twb txiav txim siab tus cwj pwm uas yog kev hlub yog ib qhov tseem ceeb rau cov tub txib tej hauj lwm hauv peb lub caij nyoog, zoo ib yam li txij puag thaum ub los. Tshooj 6, uas hais txog tej cwj pwm zoo li Khetos, tsis hais kev siab hlub thiab kev hlub, yeej yog tshooj uas cov tub txib nyiam tshaj.

Vim lawv yog tus Cawm Seej cov tub txib, lawv feem coob muaj kev hlub li no, thiab thaum lawv muaj tiag tiag, Vajtswv foom koob hmoov rau lawv tej hauj lwm. Thaum cov mej zeej xav muaj kev hlub li no, uas tseem ceeb kom pab tau Nws lub hom phiaj, ces peb ua tau tus Tswv tej hauj lwm.

R. Wayne Shute

Kuv twb muaj cib fim pom tau ib txoj kev hlub zoo kawg li no. Thaum kuv yog tus Thawj Tswj Hwm ntawm Cheeb Tsam Pacific Islands, Thawj Tswj Hwm R. Wayne Shute hu tuaj rau kuv. Thaum nws yog ib tug tub hluas, nws ua tub txib nyob hauv Samoa. Tom qab ntawd, nws rov qab los rau Samoa ua qhov chaw tshaj tawm txoj moo zoo tus thawj tswj hwm.⁸ Thaum nws hu xov tooj rau kuv, nws yog tus thawj tswj hwm ntawm lub Tuam Tsev Apia Samoa lawm. Nws ib tug tub txib, thaum nws yog qhov chaw tshaj tawm txoj moo zoo tus thawj tswj hwm, yog Txwj Laug O. Vincent Haleck, uas tam sim no yog Cheeb Tsam Pacific tus Thawj Tswj Hwm. Thawj Tswj Hwm Shute twb hlub thiab saib Vince thiab nws tsev neeg tag nrho rau nqi. Nws tsev neeg feem ntau yog mej zeej ntawm lub Koom Txoos, tiam sis Vince txiv, Otto Haleck, tus yawg suab ntawm tsev neeg (nws poj koob yawm txwv los ntawm Yelemes thiab Samoa), tsis yog ib tug mej zeej. Thawj Tswj Hwm Shute paub tias kuv tau los koom ceg txheem ntseeg lub rooj sab laj thiab lwm txoj kev sib ntsib nyob hauv American Samoa, thiab nws nug kuv seb kuv puas kam nyob hauv Otto Haleck lub tsev thiab qhia txoj moo zoo rau nws.

Txwj Laug O. Vincent Haleck thaum nws yog ib tug tub txib

Kuv tus poj niam, Mary, thiab kuv wb nyob nrog Otto thiab nws tus poj niam, Dorothy, nyob hauv nkawd lub tsev zoo nkauj. Thaum noj tshais kuv tau hais ib zaj txog txoj moo zoo thiab caw Otto cia cov tub txib qhia nws. Nws ua siab zoo, tiam sis ruaj khov, tsis kawm ua li kuv caw nws. Nws hais tias nws zoo siab ntau tus hauv nws tsev neeg yog Tsoom Haiv Neeg Ntseeg hauv Hnub Nyoog Kawg. Tiam sis nws hais tias nws niam uas yog neeg Samoa cov poj koob yawm txwv yog cov xib hwb ntseeg Khetos nyob hauv Samoa dhau los, thiab nws koom siab nrog rau lawv txoj kev ntseeg Khetos li qub.⁹ Txawm li ntawd los, wb ua phooj ywg zoo thaum kuv mus.

Tom qab ntawd, thaum Thawj Tswj Hwm Gordon B. Hinckley npaj muab lub Tuam Tsev Suva Fiji fij tseg, nws tus kws teem ntawv, Tij Laug Don H. Staheli,¹⁰ hu tuaj rau kuv nyob hauv New Zealand kom npaj tau. Thawj Tswj Hwm Hinckley xav ya los ntawm Fiji mus rau American Samoa ntsib Tsoom Haiv Neeg Ntseeg. Nws yuav pwb hauv ib qho chaw uas twb siv thaum yav tas los. Kuv nug seb nws puas kam hloov qhov chaw pw ntawd. Tij Laug Staheli hais tias, “Koj yog Cheeb Tsam tus Thawj Tswj Hwm; tsis ua li cas.”

Kuv hu kiag rau Thawj Tswj Hwm Shute thiab qhia nws tias tej zaum peb muaj cib fim ntxiv kom peb tus phooj ywg Otto Haleck txais koob hmoov. Zaum no tus tub txib no yog Thawj Tswj Hwm Gordon B. Hinckley. Kuv nug seb puas tsim nyog kom tsev neeg Haleck cia txhua tus hauv Thawj Tswj Hwm Hinckley pawg pw hauv lawv lub tsev.¹¹ Thawj Tswj Hwm thiab Muam Hinckley, nkawd tus ntxhais Jane, thiab Txwj Laug thiab Muam Jeffrey R. Holland kuj yuav tuaj. Thawj Tswj Hwm Shute tau ua hauj lwm nrog tsev neeg ntawd kom npaj txhua yam.¹²

Thaum peb tuaj ntawm Fiji tuaj tom qab tau muab lub tuam tsev fij tseg, lawv zoo siab tos txais peb.¹³ Hmo ntawd peb tau hais lus rau ntau txhiab tus mej zeej Samoa ces peb mus rau tsev neeg Haleck lub tsev. Thaum sawv ntxov peb tau koom ua ke kom noj tshais, es Thawj Tswj Hwm Hinckley thiab Otto Haleck twb ua phooj ywg zoo lawm. Tej yam uas nkawd tham txog yuav luag zoo ib yam li kuv tau nrog Otto tham ib xyoos dhau los. Thaum Otto hais tias nws qhuas peb lub Koom Txoos tiam sis rov qab hais tias nws rau siab xav mus rau nws lub, Thawj Tswj Hwm Hinckley tso tes saum Otto xub pwg thiab hais tias, “Otto, koj ua li ntawd los tsis txaus; tsim nyog uas koj yog ib tug mej zeej ntawm lub Koom Txoos no. Nov yog tus Tswv lub Koom Txoos.” Yeej zoo li yus pom tau Otto txoj kev tiv thaiv ploj mus es Otto qhib siab rau tej yam uas Thawj Tswj Hwm Hinckley hais.

Cov tub txib pib qhia nws thiab nws txo hwj chim kawm es Otto Haleck tau ua kev cai raus dej thiab txais kev pom zoo ib xyoos tom qab ntawd. Ib xyoos tom qab ntawd, tsev neeg Haleck tau ua kev cai khi ua ib tsev neeg nyob mus ib txhis hauv lub tuam tsev.¹⁴

Haleck tsev neeg ua kev cai sib khi hauv lub tuam tsev

Qhov uas tshoov kuv lub siab thaum muaj lub sij hawm zoo kawg no yog qhov uas Thawj Tswj Hwm Wayne Shute hlub tus uas yog nws tus tub txib dhau los, Txwj Laug Vince Haleck, thiab xav kom tag nrho tsev neeg Haleck koom ua ib tsev neeg nyob mus ib txhis li.¹⁵

Thaum hais txog kev muab Ixayees sib sau ua ke, peb yuav tsum muaj kev hlub li no nyob hauv peb lub siab thiab tsis txhob xav tias yog peb txoj kev lav ris xwb¹⁶ los sis peb muaj txim es peb yuav tsum hlub thiab koom tes pab qhia tus Cawm Seej txoj moo zoo, cov lus qhuab qhia, thiab lub luag hauj lwm rau lub ntiaj teb.¹⁷

Peb uas yog cov mej zeej qhia txog peb txoj kev hlub tus Cawm Seej thiab peb cov kwv tij cov muam nyob thoob plaws lub ntiaj teb thaum peb caw lawv los ua tej yam me me. Kev teem sij hawm sib ntsib tshiab thaum Hnub Sunday yog ib lub cib fim zoo kawg rau cov mej zeej caw phooj ywg nrog kev hlub kom tuaj saib thiab hnov tus Ntsuj Plig hauv lub Koom Txoos.¹⁸ Tom qab kev sib ntsib txais lub cim nco txog uas tsom ntsoov rau tus Cawm Seej, cia siab tias yog dawb ceev npaum li Txwj Laug Jeffrey R. Holland hais txog nag hmo, ces yuav muaj kev sib ntsib uas ntev li 50 feeb uas tsom ntsoov rau Phau Tshiab thiab tus Cawm Seej los yog tej zaj los ntawm lub rooj sab laj uas tsom ntsoov rau tus Cawm Seej thiab Nws cov lus qhuab qhia.

Cov hauv Koom Haum Niam Tsev ib txhia tau xav tias vim li cas tau txib lawv “muab neeg sib sau ua ke” nrog rau cov hauv tej pawg pov thawj hwj. Muaj tej yam uas qhia vim li cas, thiab Thawj Tswj Hwm Nelson tau hais ntau yam hauv lub tuam rooj sab laj tas los. Nws hais tias, “Peb yeej muab tsis tau Ixayees sib sau ua ke yog tsis muaj nej.”¹⁹ Hauv peb lub caij nyoog peb tau koob hmoov vim 30 feem pua ntawm cov tub txib ntxhais txib yog ntxhais txib. Yog vim li no thiaj li yuav tsum muaj cov muam hauv Koom Haum Niam Tsev kom qhia txoj moo zoo rau lwm tus. Peb txhua leej txhua tus yuav tsum mob siab, muaj siab hlub, thiab cog lus tias peb yuav qhia Yexus Khetos txoj moo zoo—tsis hais txiv neej, poj niam, tub hluas ntxhais hluas, thiab me nyuam los yog. Yog peb ua siab zoo, hlub lawv, thiab txo hwj chim, ntau tus yuav ua raws li peb caw lawv. Cov uas xaiv kom tsis txhob ua raws li peb tej lus caw tseem yuav ua peb cov phooj ywg.

Hauj Lwm hauv lub Tuam Tsev thiab Kev Nrhiav Tsev Neeg Zaj Keeb Kwm Kom Muab Ixayees Sib Sau Ua Ke

Yog vim los ntawm kev hlub, peb thiaj li ua hauj lwm hauv lub tuam tsev thiab nrhiav tsev neeg zaj keeb kwm kom muab Ixayees sib sau ua ke uas nyob sab tod ntawm daim ntaub thaiv. Thaum peb kawm txog tej kev sim siab thiab tej yam nyuaj uas peb cov poj koob yawm txwv raug, peb txoj kev hlub thiab kev ris lawv txiaj loj tuaj. Qhov uas tau kho kev teem sij hawm sib ntsib thaum hnub Sunday thiab cov cov tub hluas ntxhais hluas txoj kev nce theem hauv lawv tej pawg ua rau peb haj yam ua tau hauj lwm hauv lub tuam tsev thiab nrhiav tsev neeg zaj keeb kwm. Tej yam uas tau hloov no ua rau peb tsom ntsoov ntxiv rau kev kawm txog peb cov poj koob yawm txwv thiab kev muab Ixayees sib sau ua ke nyob daim ntaub thaiv sab tod. Tej no pab kev ua hauj lwm hauv lub tuam tsev thiab nrhiav tsev neeg zaj keeb kwm tib si.

Qhov internet yog ib lub cuab yeej uas muaj hwj chim; tam sim no peb lub tsev yog peb qhov chaw nrhiav tsev neeg zaj keeb kwm. Peb cov tub hluas ntxhais hluas muaj txuj ci txawj tshawb fawb txog tsev neeg zaj keeb kwm thiab xav ua kev cai raus dej sawv cev rau lawv cov poj koob yawm txwv, uas lawv hlub thiab ris txiaj. Txij thaum tau hloov hnub nyoog kom cia cov uas muaj 11 xyoos ua kev cai raus dej sawv cev rau cov tuag, cov thawj tswj hwm ntawm lub tuam tsev nyob thoob plaws lub ntiaj teb qhia tias neeg coob ntxiv tuaj. Ib tug thawj tswj hwm ntawm lub tuam tsev tau qhia peb tias “muaj cov neeg coob heev uas tuaj ua kev cai raus dej … thiab qhov uas cov muaj 11 xyoos tuaj tau ua rau tsev neeg ntau ntxiv. … Txawm lawv tseem [hluas] los, zoo li lawv paub nyob tswm seeb thiab paub vim li cas lawv ua txoj kab ke ntawd. Yeej zoo rau peb saib!”²⁰

Kuv paub tias peb cov thawj coj rau lub Koom Haum Me Nyuam Yaus thiab cov tub hluas ntxhais hluas tseem yuav rau siab ua hauj lwm hauv lub tuam tsev thiab nrhiav tsev neeg zaj keeb kwm. Cov muam hauv Koom Haum Niam Tsev thiab cov kwv tij hauv tej pawg pov thawj hwj pab tau ua raws li lawv txoj kev lav ris ua hauj lwm hauv lub tuam tsev thiab nrhiav tsev neeg zaj keeb kwm thiab tshoov cov me nyuam thiab cov tub hluas ntxhais hluas lub siab kom muab Ixayees sib sau ua ke nyob daim ntaub thaiv sab tod. Nov yog ib yam tseem ceeb heev kom ua hauv tsev thiab ua thaum Hnub Caiv. Kuv cog lus tias qhov uas nej muaj kev hlub ua kab ke rau cov poj koob yawm txwv yuav pab pov hwm cov tub hluas ntxhais hluas thiab tsev neeg nyob hauv ib lub ntiaj teb uas phem zuj zus tuaj. Kuv kuj ua tim khawv tias Thawj Tswj Hwm Russell M. Nelson tau txais kev tshwm sim tseem ceeb hais txog cov tuam tsev thiab kev ua hauj lwm hauv lub tuam tsev.

Npaj Tsev Neeg thiab Tib Neeg Nrog Vajtswv Nyob Mus Ib Txhis

Qhov uas peb kawm thiab ua raws li txoj moo zoo hauv tsev thiab cov ntaub ntawv pab uas lub Koom Txoos muab yog ib lub cib fim zoo kom npaj tsev neeg nyob mus ib txhis thiab npaj tib neeg kom ntsib thiab ua neej nyob nrog Vajtswv.²¹

Thaum ib tug txiv neej thiab ib tug poj niam ua kev cai sib khi hauv lub tuam tsev, nkawd txais tau kev sib yuav dawb huv raws li kev khi lus tshiab thiab kav ib txhis, uas yog ib tug txheej txheem ntawm lub pov thawj hwj.²² Nyob ua ke nkawd txais tau cov koob hmoov thiab hwj chim pov thawj hwj kom coj nkawd tsev neeg. Cov poj niam thiab cov txiv neej nyias muaj nyias lub luag hauj lwm li piav hauv “Tsev Neeg: Ib zaj Lus Tshaj Tawm rau lub Ntiaj Teb,”²³ tiam sis lawv ntiag tug hauj lwm yeej muaj nqi thiab tseem ceeb zoo ib yam.²³ Lawv muaj hwj chim sib npaug kom txais tau kev tshwm sim rau lawv tsev neeg. Thaum lawv ua hauj lwm ua kev nrog kev hlub thiab kev ncaj ncees, Vajtswv foom koob hmoov rau lawv tej kev txiav txim.

Cov uas txawj nrhiav tus Tswv lub siab nyiam rau lawv tus kheej thiab lawv tsev neeg yuav tsum ua ncaj ncees, ua lub siab mos muag, ua siab zoo, thiab hlub lwm tus. Kev txo hwj chim thiab kev hlub yog tej yam tseem ceeb rau cov uas nrhiav tus Tswv lub siab nyiam, qhov tseem ceeb yog rau lawv tsev neeg.

Peb txhua tus lav ris qhov uas peb yuav tsum npaj peb tus kheej kom ua neeg zoo tag nrho, ua neeg tsim nyog txais cov koob hmoov los ntawm kev khi lus, thiab npaj mus ntsib Vajtswv. Peb yuav tsum vam tau rau peb tus kheej thiab rau siab ua kom peb tsev ua tej qhov chaw tiv thaiv cua daj cua dub uas nyob ib puag ncig peb²⁵ thiab “ua tsev uas txhawb nqa kev ntseeg.”²⁶ Cov niam tsev txiv tsev muaj kev lav ris qhia lawv cov me nyuam nrog kev hlub. Tej tsev uas muaj kev hlub puv npo yeej yog kev xyiv fab, kev zoo siab, thiab yog ntuj ceeb tsheej nyob hauv lub ntiaj teb.²⁷

Kuv niam nyiam zaj nkauj qhuas Vajtswv hu ua “Sib Hlub hauv Tsev.”²⁸ Thaum twg nws hnov kab lus no, “Zoo nkauj kawg nyob ib puag ncig yog sib hlub hauv tsev,” ua rau nws txais kev tshoov siab thiab nws los kua muag. Thaum peb yog cov me nyuam peb twb paub tias peb nyob hauv ib lub tsev zoo li ntawd; yog nws lub hom phiaj tseem ceeb tshaj plaws.²⁹

Ntxiv rau kev hlub hauv tsev, Thawj Tswj Hwm Nelson tau hais txog kev txwv tsis pub siv media ntau yog tias cuam tshuam peb lub hom phiaj tseem ceeb tshaj plaws.³⁰ Ib yam hloov tau uas yuav pab txhua tsev neeg yog kom cia qhov internet, social media thiab TV pab yus thiab tsis txhob cia tej ntawd tab kaum, los yog tswj hwm. Kev tsov rog kom tau cov ntsuj plig ntawm txhua tus, tiam sis qhov tseem ceeb yog cov me nyuam, feem ntau yog nyob hauv tsev. Peb cov niam tsev txiv tsev yuav tsum ua tib zoo saib xyuas kom cov media uas lawv saib yog tej uas txhawb kev zoo, tsim nyog rau hnub nyoog, thiab pab sib hlub uas peb xav tsim hauv tsev.

Peb yuav tsum qhia meej thiab zoo hauv tsev³¹ tiam sis peb kuj yuav tsum qhia los ntawm tus Ntsuj Plig, muaj kev xyiv fab, thiab kev hlub.

Kuv cog lus tias thaum peb tsom ntsoov rau kev hlub tus Cawm Seej thiab Nws txoj Kev Theej Txhoj, tsom ntsoov rau Nws thaum peb muab Ixayees sib sau ua ke nyob ob sab ntawm daim ntaub thaiv, txhawb pab lwm tus, thiab npaj peb tus kheej ntsib Vajtswv, ces tus yeeb ncuab lub hwj huam yuav nqig zuj zus thiab kev xyiv fab, kev zoo siab, thiab kev kaj siab lug ntawm txoj moo zoo yuav ua rau peb tsev muaj Khetos txoj kev hlub puv npo.³² Kuv ua tim khawv txog cov lus qhuab qhia no thiab ua tim khawv tseeb txog Yexus Khetos thiab Nws txoj kev theej txhoj uas pab peb, los ntawm Yexus Khetos lub npe, amees.

Lus Cim

1. Lus Qhuab Qhia thiab Kev Khi Lus 4:1, 5.

2. Maulaunais 7:47.

3. Saib “Charity and Love,” Qhia Kuv txoj Moo Zoo: Phau Ntawv Qhia cov Tub Txib, phau uas kho (2019), 124.

4. Saib 2 Kev Cai 6:5; Mathais 22:36–40.

5. Saib “Responsibilities of Elders Quorum and Relief Society Presidencies in Member Missionary and Temple and Family History Work,” tsab ntawv qhia, Kaum Hli Ntuj 6, 2018.

6. Kuv yawm txiv muaj cai foom koob hmoov rau cov xeeb leej xeeb ntxwv uas nyob hauv lwm ceg txheem ntseeg. Kuv txais kuv li thaum kuv muaj 11 xyoos vim nws mob thiab xav tias tej zaum nws yuav tas sim neej no.

7. Yawg suab txoj kev foom koob hmoov los ntawm Yawg Suab Crozier Kimball muab rau Quentin L. Cook, Kaum Hli Ntuj 13, 1951, Draper, Utah.

8. Thawj Tswj Hwm R. Wayne Shute kuj ua hauj lwm nrog nws tus poj niam Lorna mus ua tub txib txoj hauj lawm nyob hauv Shanghai, China; Armenia; Singapore; thiab Greece. Tom qab Lorna tso lub ntiaj teb no tseg, nws yuav Rhea Mae Rosvall, thiab nkawd ua hauj lwm hauv Qhov Chaw Tshaj Tawm txoj Moo Zoo Australia Brisbane. Xya tus ntawm nws cuaj tus me nyuam tau ua tub txib lawm. Ob xyoos uas nws yog qhov chaw tshaj tawm txoj moo zoo tus thawj tswj hwm nyob hauv Samoa, Txwj Laug John H. Groberg yog qhov chaw tshaj tawm txoj moo zoo tus thawj tswj hwm nyob hauv Tonga. Tej yam uas muaj los rau nkawd ob leeg los yeej tseem ceeb heev.

9. Otta Haleck yog ib tug thawj coj nyob hauv Congregational Christian Church of Samoa, uas lub hauv paus yog los ntawm London Missionary Society. Nws txiv yog neeg Yelemes los ntawm Dessau, Yelemes Teb.

10. Thawj Tswj Hwm Don H. Staheli yog tus thawj tswj hwm ntawm lub Tuam Tsev Bountiful Utah tam sim no.

11. Thawj Tswj Hwm Gordon B. thiab Muam Marjorie P. Hinckley thiab nkawd tus ntxhais Jane Hinckley Dudley, Txwj Laug Jeffrey R. thiab Muam Patricia T. Holland, Txwj Laug Quentin L. thiab Muam Mary G. Cook, thiab Tij Laug Don H. Staheli txhua tus nyob ntawd.

12. Txwj Laug O. Vincent Haleck qhia kuv tias nws txiv caw Vince thiab nws tus kwv David rov qab los kom saib xyuas lub tsev thiab nyob ntawd thaum Thawj Tswj Hwm Hinckley tuaj xyuas. Txwj Laug Haleck hais tias nws txiv hais tias, “Cov no tej zaum yog cov tim tswv.” Nws qhia nws tus tub tias yog lawv yuav cia tus yaj saub tuaj xyuas, ces yuav tsum ua kom lub tsev zoo tag nrho.

13. Cov thawj coj ntawm American Samoa thiab neeg Samoan coob tau ntsib Thawj Tswj Hwm Hinckley nyob hauv qhov chaw saib football.

14. Kev ua cov tub txib tej hauj lwm uas ua rau tsev neeg koom siab koom ntsws yeej yog ib qho zoo ntawm cov neeg Samoa thiab lwm cov neeg Polynesian

15. Tib neeg hlub thiab ris Thawj Tswj Hwm Shute txiaj heev lawv caw nws hais lus hauv Otto Haleck lub ntees tuag thaum xyoo 2006.

16. “Tej lub sij hawm thaum pib ua peb ua vim peb xav tias peb yuav tsum ua tej dej num ntawd, tiam sis kev pab lwm tus li ntawd yuav ua rau peb txais ib yam siab dua … uas ua rau peb siv ‘ib txoj kev zoo dua’ [1 Kauleethaus 12:31]” (Joy D. Jones, “Rau Nws,” Liahona, Kaum Ib Hlis Ntuj 2018, 50).

17. Saib Tad R. Callister, The Infinite Atonement (2000), 5–8.

18. Lub Koom Txoos cov mej zeej yuav tsum koom tes nrog cov tub txib thaum twg lawv caw lwm tus.

19. Russell M. Nelson, “Cov Muam Kev Koom Tes Muab Ixayees Sib Sau Ua Ke,” Liahona, Kaum Ib Hlis Ntuj 2018, 70.

20. Thawj Tswj Hwm B. Jackson thiab Muam Rosemary M. Wixom, tus thawj tswj hwm thiab tus niam thawj tswj hwm ntawm lub Tuam Tsev Salt Lake qhia lub Koom Haum Me Nyuam Yaus Pawg Tuam Thawj Tswj Hwm, Peb Hlis Ntuj 2019. Ob tug Wixom hais tias yuav tsum “yuav khaub ncaws XXXS ua kev cai raus dej ntxiv vim neeg coob tuaj!”

21. Saib Russell M. Nelson, “Tej Lus Qhib Rooj Sab Laj,” Liahona, Kaum Ib Hlis Ntuj 2018, 6–8.

22. Saib Lus Qhuab Qhia thiab Kev Khi Lus 131:1–4.

23. Saib “Tsev Neeg: Ib zaj Lus Tshaj Tawm rau lub Ntiaj Teb,”Liahona, Tsib Hlis Ntuj 2017, 145.

24. “Txhua tus txiv tsev yog ib tug yawg suab rau nws tsev neeg thiab txhua tus niam tsev yog ib tug niam yawg suab uas yeej sib txig txawm nyias muaj nyias lub luag hauj lwm” (James E. Faust, “The Prophetic Voice,” Ensign, Tsib Hlis Ntuj 1996, 6).

25. Saib Lus Qhuab Qhia thiab Kev Khi Lus 45:26–27; 88:91.

26. Russell M. Nelson, “Rais Los Ua Tsoom Haiv Neeg Ntseeg hauv Hnub Nyoog Kawg Ua Coj Yam Ntxwv Zoo,” Liahona, Kaum Ib Hlis Ntuj 2018, 113.

27. Saib “Lub Tsev Zoo Li Ntuj Ceeb Tsheej,” Cov Nkauj Qhuas Vajtswv, zaj 139.

28. “Hlub Hauv Tsev,” Cov Nkauj Qhuas Vajtswv, zaj 137.

29. Yog peb yuav hlub li no peb yuav tsum ua raws li tej lus qhia nyob hauv Lus Qhuab Qhia thiab Kev Khi Lus 121:41–42:

    “Tsis muaj hwj chim los yog hwj huam uas siv tau los ntawm lub pov thawj hwj, tsuas yog yus ua siab ntev, muaj siab mog siab muag thiab muaj kev hlub tiag tiag;

    “Los ntawm kev siab zoo, thiab kev txawj ntse, uas yuav txhawb tus ntsuj plig tsis muaj kev siab dag, thiab tsis muaj kev ntxias.”

    Yuav tsis txhob cem cov me nyuam heev. Qhov uas lawv ua yuam kev thiab qhov uas tsis muaj tswv yim los yuav tsum qhia lawv, tsis txhob cem. Thaum ua txhaum yuav tsum qhuab ntuas (saib Lus Qhuab Qhia thiab Kev Khi Lus 1:25–27).

30. Saib Russell M. Nelson, “Cov Muam Kev Koom Tes Muab Ixayees Sib Sau Ua Ke,” 69; kuj saib Russell M. Nelson, “Hope of Israel” (kev tshaj tawm rau cov neeg hluas thoob ntiaj teb, Rau Hli Ntuj 3, 2018), HopeofIsrael.

31. Kev qhia hauv tsev zoo li kev qhia txhua tus me nyuam hauv ib chav hauv tsev kawm ntawv. Thaum qhia tus uas muaj 11 xyoos, yuav tsum nco txog tus uas muaj 3 xyoos.

32. Saib Yauhas 17:3; 2 Nifais 31:20; Maulaunais 7:47.