Hnov Nws lub Suab
Hauv ib lub ntiaj teb uas muaj suab ntau heev sib xeem kom peb mloog, kuv ua tim khawv hais tias peb Leej Txiv tau npaj kev rau peb hnov tau thiab ua raws li Nws lub suab.
Tag kis no, kuv tus poj niam tus nus tau muab ib daim ntawv rau kuv poj niam uas kuv poj niam tau sau ntawv mus rau nws niam ntau xyoo dhau los. Thaum ntawd, Muam Homer tseem yog ib tug me nyuam ntxhais. Ib feem ntawm nws daim ntawv hais tias, “Nyob zoo kuv Niam, kuv thov txim uas kuv tsis ua tim khawv hnub no—tiam sis kuv hlub koj.” Thaum peb mus noj su, kuv xav tias qhov ntawd ntxim xav txog. Ces kuv cia li zaum, thiab sau ib tsab ntawv uas hais tias, “Nyob zoo Thawj Tswj Hwm Nelson, kuv thov txim uas kuv tsis hais lus hnub no—tiam sis kuv hlub koj.” Thaum kawg kuv xav hais tias ua li ntawd tsis yog. Ces kuv sawv ntawm no, thiab kuv zoo siab ntxiv kuv cov lus rau lawv cov uas tau hais lus hauv tuas no hnub no.
Ntau xyoo dhau los, kuv caij ib lub nyob hoom uas yog ib tug tsav nyob hoom tshiab tsav. Thaum txog lub sij hawm uas yuav los tsaws, peb tau lus tso cai los tsaws. Tiam sis thaum peb nqis los yuav tsaws, kuv hnov ib lub tswb uas ceeb toom tus neeg tsav nyob hoom kom “rub mus saud.” Tus neeg tsav nyob hoom ntsia tus khub tsav nyob hoom, uas txawj tsav zoo dua, es tus khub taw tes mus haud thiab hais tias, “Tam sim no!”
Peb lub nyob hoom tig mus rau sab laug thiab nqis mus, ces rov qab nce mus saud, thiab npaj tsaws dua, ces thaum kawg peb nqis mus tsaws rau peb qhov chaw. Tom qab no peb kawm hais tias muaj dua ib lub nyob hoom uas lawv tau tso cai ya mus. Yog tias peb tau ua raws li lub tswb hais, ces peb yuav tig mus raug lub nyob hoom uas tab tom ya mus. Qhov no qhia ob yam tseem ceeb heev: Qhov thib ib, thaum tej lub sij hawm tseem ceeb hauv peb lub neej, peb yuav hnov ob peb lub suab uas sib xeem kom peb hnov. Thiab qhov thib ob yog, tseem ceeb heev uas peb ua tib zoo mloog tej suab uas yog lawm.
Lwm lub Suab
Peb ua neej nyob hauv ib lub ntiaj teb uas muaj suab ntau heev uas xav kom peb mloog. Muaj xov xwm tshaj tawm, tej tweet, tej blog, tej xov tooj cua, thiab tej lus tswv yim qhuab qhia los ntawm Alexa, Siri, thiab lwm qhov chaw, es ua rau peb tsis paub tseeb hais tias peb yuav ntseeg tau lub suab twg. Qee zaum peb nrhiav kom tau tswv yim los ntawm ntau qhov chaw hauv peb lub neej, es xav hais tias yim muaj ntau lub tswv yim, yim muaj qhov tseeb. Lwm zaus peb “muaj … ob lub siab,”1 es peb txiav txim siab kom ua neeg “tsis kub tsis txias.”2 Ho muaj lwm lub sij hawm uas peb ua raws li qhov yooj yim, tsom ntsoov ib lub suab los yog ib yam twg kom coj peb kev, los yog vam khom peb txoj kev txawj ntse xwb.
Tej yam no kuj pab tau peb, tiam sis feem ntau tej no tsis yog tej yam uas peb cia siab rau tau txhua lub sij hawm. Qhov uas tib neeg coob nyiam feem ntau tsis yog qhov zoo tshaj. Muaj ob peb lub siab yeej coj tsis tau peb kev mus zoo. Qhov yooj yim yeej tsis coj peb mus rau qhov uas tseem ceeb tshaj plaws. Qhov uas tsom ntsoov ib lub suab los yog ib yam twg xwb yuav ua rau peb pom tsis tau khav. Thiab qhov uas peb vam khom peb tus kheej tej kev xav xwb yuav coj tau peb los mus ua neeg tsis paub thoob. Yog tias peb tsis ceev faj, ces tej suab phem no yuav coj tau peb mus deb ntawm txoj moo zoo lub hauv paus mus rau tej qhov chaw uas tsis muaj kev ntseeg, thiab uas muaj kev kho siab, kev nyuaj siab, thiab kev tsis txaus siab.
Mloog rau lub Suab Yuam Kev
Cia kuv qhia saib kuv txhais li cas siv ib qho piv txwv thiab ib nqes vaj lug kub. Cov neeg nce roob feem ntau hu tej qho chaw uas siab tshaj 8,000 mev ua qhov chaw “tuag” vim, thaum nyob siab npaum li ntawd, tsis muaj pa txaus yuav txhawb nqa txoj sia. Yeej muaj ib qho chaw tuag rau peb sab ntsuj plig thiab. Yog tias peb siv sij hawm ntau hauv tej qhov chaw uas tsis muaj kev ntseeg, tej suab cuav yuav ua rau peb sab ntsuj plig ua pa tsis tau zoo.
Hauv Phau Ntawv Maumoos, peb nyeem txog Kaulihos, uas tau muaj li ntawd. Nws lub npe nrov heev vim nws cov lus qhia yeej “haum neeg ntiaj teb lub siab.”3 Nws hais tias ib tsoom niam txiv thiab cov yaj saub qhia txog tej kab lis kev cai uas tswj hwm tib neeg thiab ua rau lawv tsis txawj ntse.4 Nws hais tias tib neeg yuav tsum muaj kev ywj siab xaiv ua ib yam dab tsi uas lawv xaiv ua vim tej lus txib tsuas yog tej kev txib uas tib neeg tsim kom tswj hwm thiab kav peb xwb.5 Rau Kaulihos, txoj kev ntseeg Yexus Khetos txoj Kev Theej Txhooj yog “txoj kev xav ntawm lub siab npau xwb,” uas yog txoj kev ntseeg rau ntawm ib tug Vajtswv uas tsis muaj tiag vim peb pom tsis tau hlo li.6
Kaulihos tsim tej kev kub ntxhov ntau heev npaum li tias lawv coj nws mus ntsib thawj tug txiav txim thiab tus pov thawj hlob. Nyob ntawd, nws hais cov lus “khav theeb” heev, thuam cov thawj coj thiab hais kom muab ib lub cim rau nws saib, nws mam li ntseeg. Nws tau ib lub cim tiag. Nws raug ua kom nws tsis hais lus tsis taus hlo li. Ces Kaulihos pom tias Ntxwg Nyoog dag nws, thiab thaum nws xav txog tej qhov tseeb uas nws muab tso pov tseg, nws quaj nyiav hais tias, “Kuv twb ib txwm paub tias muaj tseeb.”7
Ces Kaulihos mus ub mus no taij mov noj mus txog thaum ib pawg neeg Zoramite muab nws tsuj kom tuag.8 Nqes kawg hauv nws zaj dab neeg muaj cov lus no ntxim xav txog uas hais tias: “Thiab li no peb pom tias tus dab yeej yuav tsis pab nws tej me nyuam nyob tom hnub kawg, tiam sis tsuas luag lawv nrawm nroos nqis mus rau hauv ntuj txiag teb tsaus xwb.”9
Lub Suab Zoo Mloog
Vim peb Leej Txiv Saum Ntuj Ceeb Tsheej xav kom peb tau zoo dua qhov qub, Nws ua rau peb thiaj hnov tau Nws lub suab. Feem ntau, peb hnov Nws dhau los ntawm tej kev tshoov siab los ntawm tus Vaj Ntsuj Plig Dawb Huv. Tus Vaj Ntsuj Plig Dawb Huv yog tus mej zeej thib peb hauv Pawg Vajtswv. Nws ua tim khawv txog Leej Txiv thiab Leej Tub,10 thiab yog xa kom “qhia [peb] txhua tsav txhia yam,”11 thiab yuav “qhia [peb] txhua yam uas [peb] yuav tsum ua.”12
Tus Ntsuj Plig hais lus rau txhua tus neeg nyias sib txawv nyias, thiab tej zaum Nws yuav hais lus rau tib tug neeg ib lub sij hawm txawv ib lub sij hawm. Yog li ntawd, kev kawm saib tus Ntsuj Plig hais lus rau peb li cas yog ib yam uas peb kawm tas sim neej. Qee zaum, Nws hais lus rau peb “lub siab lub ntsws”13 ua ib lub suab uas yau yau, tiam sis muaj hwj chim, chob nkaus “lawv cov … uas hnov lub siab.”14 Hos lwm lub sij hawm, Nws tej kev tshoov siab “puv nkaus [peb] lub siab lub ntsws” los yog “coj … [peb] tej kev xav.”15 Hos lwm zaus, peb lub hauv siab yuav “kub lug.”16 Hos lwm zaus, Nws ua rau peb sab ntsuj plig muaj kev xyiv fab heev, pab peb muaj tswv yim,17 los sis ua rau peb nyob kaj siab lug.18
Nrhiav Kom Tau Nws lub Suab
Wb yuav nrhiav tau peb Leej Txiv lub suab hauv ntau qhov chaw. Peb yuav nrhiav tau Leej Txiv lub suab thaum peb thov Vajtswv, thaum peb kawm vaj lug kub, thiab thaum peb mus tshawj, nrog lwm tus neeg sib tham txog tej kev ntseeg, los yog mus tom lub tuam tsev. Tiag tiag, peb yuav nrhiav tau Vajtswv lub suab hauv lub tuam rooj sab laj no thiab.
Hnub no peb txhawb nqa 15 tug txiv neej ua yaj saub, neeg pom tau, thiab neeg txais kev tshwm sim. Lawv tej sab ntsuj plig thiab tej yam uas tau muaj los rau lawv pab ua rau lawv muaj tej tswv yim uas peb xav tau. Lawv tej zaj lus hais yooj yim nrhiav kom tau thiab muaj cov lus uas meej meej heev. Cov lus ntawd qhia peb saib Vajtswv xav kom peb paub dab tsi, txawm tias tib neeg ntiaj teb nyiam los tsis nyiam los xij.19
Nrhiav kom tau Nws lub suab hauv ib qho chaw no twg yeej zoo, tiam sis nrhiav kom tau Nws lub suab hauv ob peb qho chaw no yeej zoo dua ntais. Thiab thaum peb hnov Nws lub suab, peb yuav tsum ua raws li cov lus qhuab qhia hais. Tus Thwj Tim Yakaunpaus hais tias, “Ua raws li txoj lus, tsis yog cov uas hnov tej lus xwb.”20 Thiab Thawj Tswj Hwm Thomas S. Monson tau qhia hais tias: “Peb saib. Peb tos. Peb mloog lub suab yau yau ntawd. Thaum lub suab hais lus, ces cov txiv neej thiab cov poj niam uas thoob tsib ua raws li lub suab hais.”21
Thaum tej Kev Coj Los Qeeb Qeeb
Thaum kuv nyuam qhuav pib ua hauj lwm tsis ntev, Muam Homer thiab kuv muaj ib lub cib fim hloov hauj lwm. Thaum lub sij hawm ntawd, wb xav hais tias yog ib txoj kev txiav txim siab loj heev. Wb kawm, wb yoo mov, thiab wb thov Vajtswv, tiam sim zoo li Vajtswv teb peb qeeb qeeb. Nyob nyob, wb txiav txim siab thiab ua raws li wb txiav txim siab ntawd. Thaum wb ua li ntawd, wb ob lub siab nyob tu thiab tsis ntev wb kawm hais tias yog ib txoj kev txiav txim siab zoo.
Yog li ntawd, wb tau kawm hais tias qee zaum cov lus teb los qeeb qeeb. Qhov no vim rau qhov uas tej zaum tsis yog lub sij hawm yog lawm, tej zaum tsis xav tau lus teb tam sim no, los yog tej zaum Vajtswv tso siab hais tias peb txiav txim siab peb tus kheej tau. Muaj ib zaug, Tswj Laug Richard G. Scott tau qhia hais tias peb yuav tsum ua Vajtswv tsaug rau tej lub sij hawm zoo li no thiab nws tau cog lus hais tias: “Thaum nej ua neej tsim nyog thiab nej xaiv ua tej yam uas ua raws li tus Cawm Seej cov lus qhuab qhia thiab nej yuav tsum ua dab tsi, cia li tso siab ua. … Vajtswv yuav tsis cia nej mus deb heev yog tias nej tau txiav txim siab yuam kev, Nws mam li ceeb toom nej.”22
Peb Yuav Tsum Xaiv
Yog li ntawd, peb yuav tsum txiav txim siab saib peb yuav mloog lub suab twg ntawm ntau lub suab sib txawv. Peb puas yuav mloog tej suab uas dag peb uas yog lub ntiaj teb nyiam, los yog peb puas yuav rau rau siab nrhiav kom tau peb Leej Txiv lub suab los coj peb kev thiab pov hwm peb tawm ntawm tej xwm txheej? Peb yim nrhiav kom tau Leej Txiv lub suab, peb yim hnov tau Nws lub suab khav khav. Tsis yog Leej Txiv lub suab nrov zog tiam sis yog peb hnov tau yooj yim dua. Tus Cawm Seej tau cog lus hais tias yog tias peb “mloog [Nws] tej lus qhia, thiab ua raws li [Nws] tej tswv yim,” Nws “yuav muab ntau zog rau [peb].”23 Kuv ua tim khawv hais tias txoj lus cog no muaj tseeb—rau peb txhu tus.
Ib xyoos dhau los no xwb, kuv tus tij laug raug tsheb sib nrau thiab nws tuag. Thaum ntxov zoo li John ua tau ntau yam tsis paub kawg li. Tiam sis thaum nws loj hlob tuaj, ib lub cev thiab lub paj hlwb uas tsis ua hauj lwm zoo ua rau nws lub neej nyuaj heev. Txawm hais tias nws tsis tau zoo mob zoo nkeeg hauv lub neej no los, John tseem tuav raws nws txoj kev ntseeg, thiab nyiaj mus, raws li nws nyiaj tau, mus txog hnub kawg.
Nim no, kuv paub hais tias John tsis zoo tag nrho, tiam sis kuv tau xav paub saib yog dab tsi uas ua rau nws nyiaj tau nws tej kev cov nyom. Ntau lub suab caw nws mus ua ib tug neeg tsis ntseeg li, tiam sis nws txiav txim siab tsis txhob mus. Nws ua raws li nws ua tau kom tsom ntsoov txoj moo zoo. Nws ua neej raws li txoj moo zoo, vim nws paub hais tias nws yuav nrhiav tau nws tus Xib Hwb lub suab nyob ntawd; nws paub hais tias nws yuav kawm tau tej yam tseem ceeb los ntawm txoj moo zoo.
Lus Xaus
Cov kwv tij thiab cov muam, hauv ib lub ntiaj teb uas muaj suab ntau heev sib xeem kom peb mloog, kuv ua tim khawv hais tias peb Leej Txiv tau npaj kev rau peb hnov tau thiab ua raws li Nws lub suab. Yog tias peb rau rau siab, Nws thiab Nws Leej Tub yuav coj peb kev, ntxiv zog rau peb, thiab pab peb muaj kev zoo siab. Los ntawm Yexus Khetos lub npe, amees.