Tus Tswv Yug Yaj Zoo, Vajtswv tus Me Nyuam Yaj
Yexus Khetos hu peb los ntawm Nws lub suab thiab lub npe. Nws nrhiav peb thiab muab peb sib sau ua ke. Nws qhia peb kom paub txhawb pab nrog kev hlub.
Cov kwv tij thiab cov muam, puas tau muaj ib zaug thaum ua nyuaj rau nej tsaug zog es nej thiaj sim suav yaj? Cov yaj muag muag dhia saum ib xov laj kab, nej suav li no: 1, 2, 3, … 245, 246, … 657, 658 …1
Hais txog kuv mas, kev suav yaj tsis ua rau kuv tsaug zog. Ua rau kuv txhawj txog qhov uas ib tug yaj yuav ploj mus, thiab ua rau kuv tsis tsaug zog.
Ib yam li tus tub hluas yug yaj uas tau los ua ib tug vaj ntxwv, peb hais tias:
“Tus Tswv yog tus tsom kwm kuv, kuv muaj txhua yam txaus.
“Nws cia kuv so hauv lub tshav uas muaj zaub mos nyoos ntsuab xiab thiab coj kuv mus rau ntawm lub pas dej ntshiab uas nyob ntsiag to.
“Nws txhawb kuv lub zog.”2
Hauv lub caij Easter no, peb ua koob tsheej txog tus Tswv Yug Yaj Zoo, tus uas yog Vajtswv tus Me Nyuam Yaj Los ntawm tag nrho Nws tej lub npe, tsis muaj lwm lub npe uas mos muag tshaj plaws. Peb kawm ntau yam los ntawm tus Cawm Seej txoj kev hais tias Nws yog tus Tswv Yug Yaj Zoo thiab los ntawm cov yaj saub tej lus tim khawv hais tias Nws yog Vajtswv tus Me Nyuam Yaj. Ob lub luag hauj lwm thiab ob lub cim no yeej sib koom ua ke—tus uas paub pab peb txhua tus me nyuam yaj uas muaj nqis zoo tshaj plaws yog tus Tswv Yug Yaj Zoo, thiab tus Tswv Yug Yaj Zoo tshaj plaws yeej yog Vajtswv tus Me Nyuam Yaj.
“Rau qhov Vajtswv hlub neeg ntiaj teb kawg li, nws thiaj txib nws tib Leeg Tub los,” thiab Vajtswv Tib Leeg Tub twb txo Nws txoj sia kom ua raws li Nws Leej Txiv hais.3 Yexus ua tim khawv tias, “Kuv yog tus tswv yug yaj uas zoo. Tus tswv yug yaj uas zoo txaus siab tuag theej pab yaj.”4 Yexus muaj hwj chim txo Nws txoj sia thiab muaj hwj chim rov qab ciaj.5 Tus Cawm Seej koom siab nrog Nws Leej Txiv foom koob hmoov rau peb, Nws yog tus Tswv Yug Yaj Zoo thiab Vajtswv tus Me Nyuam Yaj.
Vim Nws yog peb tus Tswv Yug Yaj uas Zoo, Yexus Khetos hu peb los ntawm Nws lub suab thiab lub npe. Nws nrhiav peb thiab muab peb sib sau ua ke. Nws qhia peb kom paub txhawb pab nrog kev hlub. Cia peb xav txog peb lub ntsiab no, qhov thib ib yog qhov uas Nws hu peb los ntawm Nws lub suab thiab Nws lub npe.
Qhov thib ib, peb tus Tswv Yug Yaj Zoo “nws cuab nws pab yaj tej npe. … Pab yaj paub nws lub suab.”6 Thiab “nws twb hu nej los ntawm nws lub npe kiag, uas yog Khetos lub npe.”7 Thaum peb xav coj raws li Yexus Khetos tiag tiag, peb txais kev tshoov siab kom ua zoo, hlub Vajtswv, thiab ua hauj lwm rau Nws.8 Thaum peb kawm, xav txog, thiab thov Vajtswv, thaum peb rov qab khi lus thaum txais lub cim nco txog thiab mus rau lub tuam tsev; thiab thaum peb caw txhua tus los ua raws li Nws txoj moo zoo thiab cov kab ke, peb thiaj li mloog Nws lub suab.
Nyob hauv peb lub caij nyoog, Thawj Tswj Hwm Russell M. Nelson ntuas peb kom hu lub Koom Txoos no los ntawm lub npe uas Yexus Khetos qhia: Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.9 Tus Tswv hais tias, “Yog li ntawd, txhua yam uas nej yuav ua, nej yuav tsum ua los ntawm kuv lub npe; yog li ntawd nej yuav tsum hu lub koom txoos li kuv lub npe; thiab nej yuav tsum thov Leej Txiv los ntawm kuv lub npe xwv kom nws yuav foom koob hmoov rau lub koom txoos vim yog kuv.”10 Nyob thoob plaws lub ntiaj teb, nyob hauv peb lub siab thiab peb lub tsev, peb thov Leej Txiv los ntawm Yexus Khetos lub npe. Peb ua Vajtswv tsaug vim peb tau koob hmoov los ntawm peb txoj kev teev ntuj, kev kawm txog txoj moo zoo thiab tej yam ntxim saib ntxim ua uas ua hauv tsev thiab lub Koom Txoos txhawb nqa.
Qhov thib ob, peb tus Tswv Yug Yaj Zoo nrhiav peb thiab muab peb sib sau ua ke hauv ib pab. Nws nug hais tias, “Nej cov yog leej twg muaj ib puas tus yaj, yog ib tug ploj lawm, tus tswv yuav ua li cas? Nws yeej yuav tso cuaj caum cuaj tug rau tom hav zaub, thiab mus nrhiav tus yaj uas ploj lawm kom tau.”11
Peb tus Cawm Seej cev tes pab ib tug yaj thiab rau cuaj caum cuaj tus, feem ntau yog thaum tib lub sij hawm. Thaum peb mus txhawb pab lwm tus, peb nco txog cuaj caum cuaj tus uas ruaj khov thiab tsis txav mus, thaum peb mus nrhiav tus uas tau ploj lawm. Peb tus Tswv nrhiav peb thiab tso peb dim tawm “txhua qhov chaw,”12 “nyob plaub ceg kaum ntuj.”13 Nws muab peb sib sau ua ke raws li kev khi lus dawb huv thiab Nws cov ntshav uas theej txhoj.14
Peb tus Cawm Seej qhia Nws cov thwj tim hauv Phau Tshiab hais tias, “Kuv muaj lwm pab yaj uas tsis nyob hauv lub nkauj no.”15 Nyob hauv Amelikas, tus Tswv uas tau sawv rov los ua tim khawv txog Lihais cov me nyuam khi lus, “Nej yog kuv cov yaj.”16 Thiab Yexus hais tias lwm cov yaj yuav hnov Nws lub suab.17 Phau Ntawv Maumoos yog ib txoj koob hmoov vim nws yog ib zaj lus tim khawv txog Yexus Khetos lub suab!
Yexus Khetos caw cov Ntseeg kom txais tag nrho cov uas mloog Nws lub suab18 thiab ua raws li Nws cov lus txib. Khetos cov lus qhuab qhia hais txog kev cai raus dej los ntawm dej thiab los ntawm hluav taws thiab tus Vaj Ntsuj Plig Dawb Huv.19 Nifais hais tias, “Yog hais tias Vajtswv tus Me Nyuam Yaj, uas dawb huv, yuav tsum ua kev cai raus dej, kom ua raws li txhua txoj kev ncaj ncees, auj yog li ntawd, peb cov uas tsis dawb huv, haj yam yuav tsum ua kev cai raus dej, muaj tseeb tiag, twb yog nyob rau hauv dej!”20
Niaj hnub no peb tus Cawm Seej xav kom tej yam peb ua thiab cov neeg uas peb hloov los ua yuav ua rau lwm tus xav los coj raws li Nws. Cia li nrhiav tau kev hlub, kev kho mob, kev sib raug zoo, thiab kev khi lus los ntawm Nws, tsis hais nyob hauv Vajtswv lub tuam tsev dawb huv, qhov chaw uas ua cov kab ke cawm seej uas foom koob hmoov rau txhua tus hauv peb tsev neeg, yog li ntawd ua rau Ixayees sib sau ua ke nyob ob sab ntawm daim ntaub thaiv.21
Qhov thib peb, vim Yexus Khetos yog “Ixayees tus Tswv Yug Yaj,”22 Nws coj yam ntxwv rau cov tswv yug yaj nyob hauv Ixayees paub lawv yuav tsum ua kev txhawb pab nrog kev hlub li cas. Thaum tus Tswv nug peb seb peb puas hlub Nws, ib yam li Nws hais rau Ximoos Petus, tus Cawm Seej thov peb hais tias: “Koj cia li yug kuv cov me nyuam yaj. … Yug kuv coj yaj. … Yug kuv coj yaj.”23 Tus Tswv cog lus tias thaum Nws cov neeg yug yaj yug Nws cov yaj thiab cov me nyuam yaj, cov nyob hauv Nws pab yaj “lawv yuav tsis txhawj tsis ntshai, thiab yuav tsis rau txim rau lawv ntxiv lawm.”24
Peb tus Tswv Yug Yaj Zoo ceeb toom hais tias cov neeg yug yaj hauv Ixayees yuav tsum tsis txhob tsaug zog,25 los yog ua rau cov yaj tawg khiav los sis ua yuam kev,26 thiab tsis txhob nrhiav kev kom tau nyiaj txiag.27 Vajtswv cov neeg yug yaj yuav tsum txhawb dag zog, kho mob, kho tej yam uas twb dam lawm, coj tus uas tau raug ntiab tawm mus, nrhiav tus uas poob zoo lawm.28
Tus Tswv kuj ceeb toom txog cov uas luag ntiav zov yaj, uas “tsis mob siab zov pab yaj,”29 thiab “cov yaj saub cuav, thaum lawv tuaj cuag nej, lawv ua txuj ua li lawv yog cov yaj, tiam sis lawv lub siab phem ib yam li hma.”30
Peb tus Tswv Yug Yaj Zoo yeej zoo siab thaum peb siv peb txoj kev ywj siab xaiv kom coj ncaj thiab muaj kev ntseeg. Cov nyob hauv Nws pab yaj saib ntsoov tus Cawm Seej ua Nws tsaug rau Nws txoj kev theej txhoj. Peb khi lus tias peb yuav coj raws li Nws, tsis yog lam ua xwb, los sis tsis rau siab ua, tiam sis peb yeej xav hlub Vajtswv thiab peb tus neeg zej zog kawg siab kawg ntsws, xav kom ib leeg ris ib leeg lub nra thiab sib koom siab thaum muaj kev xyiv fab. Vim Khetos twb txo Nws lub siab nyiam kom ua raws li Leej Txiv lub siab nyiam, peb kuj ris Nws lub npe. Peb zoo siab xav ua Nws tes hauj lwm kom muab tag nrho Vajtswv cov me nyuam sib sau ua ke thiab txhawb pab lawv.
Cov kwv tij thiab cov muam, Yexus Khetos yog peb tus Tswv Yug Yaj Zoo tag nrho. Vim Nws txaus siab tuag theej peb thiab tau sawv rov los lawm, Yexus Khetos kuj yog Vajtswv tus Me Nyuam Yaj uas zoo tag nrho.31
Neeg puag thaum chiv keeb los twb qhia ua ntej txog Vajtswv tus Me Nyuam Yaj uas yuav muab txi. Tus tim tswv qhia Adas hais tias nws txoj kev txi “yog ib tug yam ntxwv txog kev txi ntawm Leej Txiv Tib Leeg Tub,” uas ua rau peb xav “hloov siab lees txim thiab hu Vajtswv los ntawm Leej Tub lub npe tas mus li.”32
Leej Txiv Anplaham, tus uas tau txais cov koob hmoov los ntawm kev khi lus rau tag nrho haiv neeg ntawm lub ntiaj teb no, twb paub lawm tias qhov uas yus muab yus tus tub txi zoo li cas.
“Ixaj hais tias, Txiv. Anplaham teb hais tias, Tub, koj hais dab tsi? Ixaj nug hais tias, Txiv, kuv pom koj muaj hluav taws thiab muaj taws, tiam sis tus me nyuam yaj … nyob qhov twg?
“Anplaham teb hais tias, Vajtswv yuav muab ib tug me nyuam yaj rau wb.”33
Cov thwj tim thiab cov yaj saub twb pom ua ntej thiab muaj kev xyiv fab txog Vajtswv tus Me Nyuam Yaj lub luag hauj lwm. Yauhas nyob hauv Sab Ntuj Qub thiab Nifais hauv Sab Ntuj Tshiab tau ua tim khawv txog “Vajtswv tus Me Nyuam Yaj,”34 “muaj tseeb tiag, twb yog Leej Txiv tus uas nyob mus ib txhis Leej Tub[,] … neeg ntiaj teb tus Txhiv Dim.”35
Anpinadais tau ua tim khawv txog Yexus Khetos txoj kev theej txhoj: “Peb txhua tus, zoo li tej yaj, tau mus yuam kev; peb txhua tus nyias tig mus nyias txoj kev; thiab tus Tswv tau muab tag nrho peb tej kev ua phem tso rau nws.”36 Amas tau hais tias Vajtswv Leej Tub txoj kev txi kawg uas tseem ceeb yog “ib yam uas tseem ceeb tshaj txhua yam.” Amas yaum hais tias, “Ntseeg Vajtswv tus Me Nyuam Yaj”; “cia li los thiab tsis txhob ntshai.”37
Ib tug phooj ywg zoo tau qhia kuv tias nws tau ua li cas kom paub tias Yexus Khetos txoj Kev Theej Txhoj muaj tseeb. Nws yeej ib txwm ntseeg tias kev txhaum yuav ua rau yus raug txim loj heev, es nyias ris nyias lub txim. Nws tau thov Vajtswv kom to taub tias nws yuav txais kev zam txim il cas. Nws tau thov kom to taub thiab paub tias vim li cas Yexus Khetos ho zam txim rau cov uas hloov siab lees txim, kev hlub tshua yuav ua li cas kom muaj raws li kev txim lij.
Muaj ib hnub ib yam uas ua rau nws hloov nws lub siab teb nws tej lus thov. Ib tug tub hluas khiav tawm ntawm ib lub khw muag khoom noj nqa ob hnab zaub mov uas nws nyiag lawm. Nws khiav mus rau hauv ib txoj kev uas muaj neeg coob, tus saib xyuas lub khw caum qab thiab pib qw nrov thiab ntaus nws. Kuv tus phooj ywg tsis tau txiav txim rau tus tub hluas uas ntshai vim nws yog ib tug tub sab, es xyov ua cas nws ho muaj kev hlub tus tub hluas kawg siab kawg ntsws. Nws tsis tau xav txog nws tus kheej thiab tsis ntshai, es nws mus ncaj qha rau ob tug txiv neej uas sib cav. Nws hais rau nkawd tias, “Kuv yuav them nqi zaub mov. Thov tso nws dim. Thov cia kuv them nqi rau cov zaub mov.”
Vim nws txais kev tshoov siab los ntawm tus Vaj Ntsuj Plig Dawb Huv thiab muaj kev hlub uas nws yeej ib txwm tsis tau muaj dua, kuv tus phooj ywg hais tias, “Kuv tsuas xav pab thiab cawm tus tub hluas no xwb.” Kuv tus phooj ywg hais tias nws pib to taub Yexus Khetos thiab Nws txoj Kev Theej Txhoj—vim li cas thiab ua li cas nrog kev hlub zoo tag nrho Yexus Khetos txaus siab theej nws lub txhoj ua nws tus Cawm Seej thiab tus Txhiv Dim, thiab vim li cas nws xav cia Yexus ua li ntawd.38
Yog li ntawd peb hu nkauj li no:
Saib seb tus Tswv Yug Yaj nrhiav lawv,
Nrhiav cov yaj uas tau ploj lawm,
Nws zoo siab coj lawv rov qab los,
Nws kev theej txhoj tsis paub kawg.39
Vim Nws yog Vajtswv tus Me Nyuam Yaj, tus Cawm Seej paub thaum twg peb kho siab, peb ploj zuj zus, peb tsis paub tseeb, los sis peb ntshai. Nyob hauv kev ua yog toog, Nifais pom Vajtswv tus Me Nyuam Yaj lub hwj chim “tau nqis los rau cov ntseeg ntawm tus Me Nyuam Yaj lub koom txoos, thiab rau tus Tswv cov neeg khi lus.” Txawm lawv “tawg khiav ri niab mus thoob plaws hauv lub ntiaj teb, … lawv tau muab txoj kev ncaj ncees thiab Vajtswv lub hwj chim uas muaj yeeb koob heev los ua ntaj riam thaiv lawv.”40
Kev cog lus txog kev cia siab thiab kev nplij siab hais txog peb lub caij nyoog thiab.
Nej puas yog tib tug mej zeej ntawm lub Koom Txoos nyob hauv nej tsev neeg, lub tsev kawm ntawv, qhov chaw ua hauj lwm, los sis zej zog? Nej ceg ntseeg puas me me los sis nyob deb heev? Nej puas tau tsiv tsev rau ib qho chaw tshiab, uas tej zaum muaj yam lus los sis kab lig kev cai txawv? Nej lub neej puas tau hloov, thiab nej raug xwm txheej uas nej xav tias nej ib txwm yuav tsis raug? Peb tus Cawm Seej nplij peb lub siab, txawm peb yog leej twg, txawm peb raug xwm txheej dab tsi los, ces zoo li Yaxayas hais tias: “Nws yuav sau zog tej me nyuam yaj los puag rau ntawm nws ob txhais npab, nws yuav muab lawv puag hlo rau hauv nws lub xub ntiag, thiab ua siab ntev coj tej yaj uas muaj me nyuam mos.”41
Cov kwv tij thiab cov muam, peb tus Tswv Yug Yaj Zoo hu peb los ntawm Nws lub suab thiab los ntawm Nws lub npe. Nws nrhiav Nws cov neeg thiab los muab lawv sib sau ua ke. Los ntawm Nws tus yaj saub thiab peb txhua tus, Nws caw peb nrhiav tau kev kaj siab lug, peb lub hom phiaj, kev kho mob, thiab kev xyiv fab nyob hauv Nws txoj moo zoo thiab thaum peb taug Nws txoj kev rau kev khi lus. Nws coj yam ntxwv qhia cov neeg yug yaj ntawm Ixayees kom txhawb pab lwm tus nrog Nws txoj kev hlub.
Vim Nws yog Vajtswv tus Me Nyuam Yaj, cov thwj tim thiab cov yaj saub tau pom thiab muaj kev xyiv fab txog Yexus lub luag hauj lwm. Nws txoj Kev Theej Txhoj, uas nyob mus ib txhis, yeej yog lub ntsiab ntawm txoj hau kev zoo siab thiab yog vim li cas tau tsim ntuj tsim teb. Nws qhia peb tias Nws puag peb hauv Nws lub xub ntiag.
Cov kwv tij thiab cov muam, thov kom peb yuav xav “los ua cov neeg txo hwj chim uas coj raws li Vajtswv thiab tus Me Nyuam Yaj,”42 tej zaum yuav muaj ib hnub uas cov tim tswv yuav sau peb lub npe nyob rau hauv tus Me Nyuam Yaj phau ntawv txheeb txoj sia,43 peb yuav hu nkauj tus Me Nyuam Yaj zaj nkauj,44 thiab tus Me Nyuam Yaj yuav caw peb los rau Nws pluas hmo.45
Vim Nws yog tus Tswv Yug Yaj thiab tus Me Nyuam Yaj, Nws hais kom peb, rov los “paub txog [peb] tus Txhiv Dim, thiab [peb] tus tswv yug yaj tseeb thiab zoo.”46 Nws cog lus tias “nws txoj kev tshav ntuj yuav cia [peb] los ua neeg zoo tag nrho dhau los ntawm Khetos.”47
Hauv lub caij Easter no, peb qhuas Nws hais tias:
“Tus Me Nyuam Yaj zoo kawg nkaus!”48
“Hauxanas rau Vajtswv thiab tus Me Nyuam Yaj!”49
Kuv ua tim khawv txog Nws, peb tus Tswv Yug Yaj Zoo tag nrho, Vajtswv tus Me Nyuam Yaj zoo tag nrho Nws hu peb lub npe, los ntawm Nws lub npe—uas yog Yexus Khetos lub npe dawb huv—amees.