Insiru Rgħajja
Nittama li dawk li lilhom intom timministraw iħarsu lejkom bħala ħbieb u jirrealizzaw li fikom, huma għandhom xi ħadd li jista’ jiddefendihom u li jistgħu jafdaw fih.
Sena ilu, wieħed tifel tal-Primarja li jien iltqajt miegħu ġewwa ċ-Ċili verament ġabli tbissima fuq fommi. “Bonġu” qalli hu, “Jiena David. Fil-konferenza ġenerali tista’ titkellem dwari?”
Fi skiet, jiena bdejt nixtarr il-kliem xejn mistenni li David laqagħni bih. Ilkoll kemm aħna rridu li niġu rikonoxxuti. Irridu nkunu importanti, li ħadd ieħor jiftakar fina u jħobbna.
Ħuti, intom kollha importanti. Anke jekk ħadd ma jsemmikom waqt il-konferenza ġenerali, is-Salvatur jafkom u jħobbkom. Jekk m’intomx ċerti li dan hu minnu, kull m’għandkom tagħmlu hu li tikkontemplaw li Hu “naqqaxkom fuq il-keffa ta’ jdejh.”1
La nafu li s-Salvatur verament iħobbna, aħna nafu nistaqsu lilna nfusna, b’liema mod aħna nistgħu nuruh imħabbitna?
Is-Salvatur staqsa lil Pietru, “Tħobbni int … ?”
Pietru wieġeb, “Iva, Mulej, int taf li nħobbok. Huwa qallu, Irgħa l-ħrief tiegħi.”
Meta huwa ġie mistoqsi l-mistoqsija għat-tieni u t-tielet darba, “Tħobbni int?” Pietru, ħassu mnikket iżda xorta kkonferma l-imħabba tiegħu: “Mulej, int taf kollox, inti taf li nħobbok. Qallu Ġesù, Irgħa n-nagħaġ tiegħi.”2
Pietru ma kienx wera diġà li huwa kien dixxiplu leali ta’ Kristu? Mill-ewwel laqgħa li huwa kellu miegħu ħdejn xatt il-baħar, hu “mill-ewwel” telaq ix-xbiek biex jimxi wara s-Salvatur.3 Pietru sar sajjied vera tal-bnedmin. Huwa akkumpanja lis-Salvatur waqt il-ministeru personali Tiegħu u għen biex jgħallem l-evanġelju ta’ Ġesù Kristu lil ħaddieħor.
Iżda issa l-Mulej imqajjem mill-imwiet kien jaf li ma kienx se jkun aktar dejjem ħdejn Pietru, fejn joqgħod jurih kif u meta għandu jservi. Fin-nuqqas tas-Salvatur, Pietru kellu jfittex biex jiġi ggwidat mill-Ispirtu, kellu jirċievi r-rivelazzjoni għalih innifsu, u mbagħad kellu jkollu l-kuraġġ u l-fidi li jaġixxi. B’ attenzjoni speċjali fuq in-nagħaġ Tiegħu, is-Salvatur xtaq li Pietru jagħmel dak li seta’ jagħmel kieku Hu stess kien preżenti. Huwa talab lil Pietru biex isir ragħaj.
April li għadda, il-President Russell M. Nelson għamlilna stedina simili biex nirgħu n-nagħaġ ta’ Missierna b’ mod aktar qaddis u biex nagħmlu dan permezz tal-ministeru.4
Biex naċċettaw b’ mod effettiv din l-istedina, jeħtieġ li aħna niżviluppaw fina qalb ta’ ragħaj u nifhmu l-bżonnijiet tan-nagħaġ tal-Mulej. Għalhekk aħna kif nistgħu nsiru r-rgħajja li l-Mulej jeħtieġna nkunu?
Bħal kull mistoqsija oħra li jista’ jkollna, jeħtieġ li aħna nħarsu lejn is-Salvatur tagħna, Ġesù Kristu—ir-Ragħaj it-Tajjeb. Is-Salvatur kien jaf lin-nagħaġ kollha Tiegħu, Huwa kien iħarishom u huma kienu lkoll parti mill-merħla ta’ Alla.
Nafuhom
Hekk kif aħna nagħmlu l-almu tagħna biex nimxu wara l-eżempju tas-Salvatur, aħna, l-ewwel, għandna nkunu nafu lin-nagħaġ Tiegħu u ninnumerawhom. Aħna ġejna assenjati ċerti individwi u familji speċifiċi biex nieħdu ħsiebhom biex inkunu żguri li dejjem ikun hemm xi ħadd li jieħu ħsieb lil kull nagħġa li hemm fil-merħla tal-Mulej u ħadd ma jkun minsi. Li aħna nkunu nafu lin-nagħaġ ifisser li aħna naraw li kull persuna tista’ tħoss l-imħabba tas-Salvatur permezz ta’ xi ħadd li jkun qed iservi f’ismu. B’ dan il-mod, kollha kemm huma jistgħu jagħrfu li Missierna tas-Smewwiet li tant iħobbna lilhom jafhom verament.
M’ilux jiena ltqajt ma’ mara żagħżugħa li ġiet assenjata biex timministra lil waħda oħt li kienet kważi ħames darbiet akbar minnha. Flimkien huma skoprew li t-tnejn li huma jħobbu l-mużika. Meta din it-tfajla tmur iżżurha, huma t-tnejn iqattgħu ħin ikantaw xi kanzunetti favoriti tagħhom. Huma qed joħolqu bejniethom ħbiberija li tberikhom it-tnejn li huma.
Nittama li dawk li lilhom intom timministraw iħarsu lejkom bħala ħbieb u jirrealizzaw li fikom, huma għandhom xi ħadd li jistgħu jafdaw fih—xi ħadd li hu konxju taċ-ċirkustanzi tagħhom u li jissapportjahom fl-aspirazzjonijiet u t-tamiet tagħhom.
Riċentiment jiena rċevejt essajnment biex nimministra lil waħda oħt li la jiena u lanqas is-sieħba tiegħi ma konna nafu sew. Hekk kif jiena tkellimt ma’ Jess, is-sieħba tiegħi ta’ 16-il sena fil-ministeru, hija b’ għaqal issuġġeriet, “Jeħtieġ li aħna nsiru nafuha.”
Immedjatament aħna ddeċidejna li nibagħtulha messaġġ b’ ritratt tagħna u xi żewġ kelmiet biex nintroduċu lilna nfusna. Jiena żammejt il-mowbajl f’ idi u Jess għafset il-buttuna biex tiġbet ir-ritratt. L-ewwel opportunità tagħna fil-ministeru kien fil-fatt sforz ikkumbinat.
Fl-ewwel żjara tagħna, aħna staqsejna lil din oħtna jekk hemm xi ħaġa li nistgħu nitolbu f’isimha fit-talb tagħna. Hija qasmet magħna sfida mill-aktar personali li hija kellha u qaltilna li riedet li ninkluduha f’ talbna. L-onestà u l-kunfidenza tagħha wasslu biex f’ ħin qasir aħna niffurmaw rabta ta’ mħabba bejnietna. X’ privileġġ mill-isbaħ għalija li kelli l-opportunità li niftakar fiha kuljum fit-talb tiegħi.
Hekk kif intom titolbu, intom tħossu fikom l-imħabba ta’ Ġesù Kristu għal dawk li lilhom timministraw. Aqsmu dik l-imħabba magħhom. B’liema mod aħjar intom tistgħu tirgħu lin-nagħaġ Tiegħu milli tgħinuhom iħossu fihom l-imħabba Tiegħu—permezz tagħkom?
Ħarsuhom
It-tieni mod kif aħna nistgħu niżviluppaw qalb ta’ ragħaj hu billi nħarsu lin-nagħaġ Tiegħu. Bħala membri tal-Knisja ta’ Ġesù Kristu tal-Qaddisin tal-Aħħar Jiem, aħna nistgħu nressqu, nirranġaw, insewwu u nibnu mill-ġdid kważi kollox. Aħna ma noqogħdux naħsbuha biex ngħinu lil dak li jkun jew biex neħdulhom xi platt gallettini. Iżda dan biżżejjed?
In-nagħaġ tagħna jafu verament li aħna ninsabu nħarsuhom b’ imħabba u li aħna lesti nkunu hemm biex ngħinuhom?
F’ Mattew 25 aħna naqraw:
“Ejjew, imberkin minn Missieri, ħudu b’wirt tagħkom is-Saltna li tħejjiet għalikom … :
“Għax jien kont bil-ġuħ u tmajtuni, kont bil-għatx u sqejtuni, kont barrani u lqajtuni: …
“Mbagħad iweġbuh il-ġusti, ‘Mulej’, jgħidulu, ‘meta rajniek bil-ġuħ u tmajniek, jew bil-għatx u sqejniek ?
“Meta rajniek barrani u lqajniek, jew għeri u libbisniek?”5
Ħuti, il-kelma ewlenija hija rajniek. It-twajbin jaraw lil dawk fil-bżonn għaliex huma jkunu qed iħarsuhom u jinnutawhom. Aħna wkoll nistgħu nżommu ħarsitna fuqhom biex inkunu nistgħu ngħinuhom u nfarrġuhom, biex niċċelebraw u saħansitra noħolmu magħhom. Kif aħna nagħmlu dan, aħna nkunu nistgħu nkunu ċerti mill-wegħda li nsibu f’ Mattew: “Kull ma għamiltu ma’ wieħed mill-iżgħar fost dawn ħuti, … għamiltuh miegħi.”6
Ħabib tiegħi—li nistgħu nsejħulu John—qasam miegħi dak li jista’ jiġri meta aħna ma nintebhux bil-bżonnijiet anqas ovvji tal-oħrajn: “Waħda oħt fil-qasam tiegħi għamlet attentat ta’ suwiċidju. Wara xahrejn, jiena skoprejt li ħadd fil-kworum tiegħi ma kien mar iżur lir-raġel tagħha biex jindirizza din l-esperjenza trawmatika. Sfortunatament, dan kien jinkludi lili wkoll. Finalment, jiena stedint lir-raġel tagħha d-dar għall-ikel. Huwa kien raġel mistħi, kif ukoll xi ftit riservat. U madankollu meta jiena għidtlu, “Martek għamlet attentat ta’ suwiċidju. Nista’ nimmaġina minn xiex għaddejt. Triq nitkellmu ftit dwar dan?’ huwa nfaqa’ jibki quddiemi. Aħna kellna konverżazzjoni mill-aktar tenera u intima u fi ftit minuti żviluppat bejnietna ċerta ħbiberija u fiduċja meraviljuża.”
John kompla jgħid, “Naħseb li t-tendenza tagħna hi li mmorru bil-gallettini f’ idejna minflok ma’ naraw kif għandna niffaċċjaw dak il-mument b’ onestà u mħabba.”7
In-nagħaġ tagħna jafu qed iħossuhom imweġġgħin, mitlufin jew saħansitra jinsabu minn rajhom jiġġerrew lil hin mit-triq. Aħna nistgħu nisimgħu u nħobbu mingħajr ma noqogħdu niġġudikaw u noffru t-tama u l-għajnuna tagħna bil-gwida tal-Ispirtu s-Santu li tgħinna nagħrfu x’ azzjonijiet għandna nieħdu.
Ħuti, it-tama u l-ferħ jistgħu jkunu ferm aktar preżenti fid-dinja grazzi għall-għemejjel tat-tjubija mill-aktar ispirati li intom twettqu. Hekk kif intom tfittxu d-direzzjoni tal-Mulej dwar kif tistgħu twasslu l-imħabba Tiegħu lill-ħaddieħor u taraw il-bżonnijiet ta’ dawk li lilhom timministraw, għajnejnkom jinfetħu. L-essajnments sagri tagħkom tal-ministeru jagħtukom id-dritt divin li tirċievu l-ispirazzjoni. Intom tistgħu tfittxu din l-ispirazzjoni b’ kunfidenza.
Inġabru flimkien fil-Merħla ta’ Alla.
It-tielet, aħna rridu li n-nagħaġ tagħna jinġabru flimkien fil-merħla ta’ Alla. Biex nagħmlu dan, jeħtieġ li aħna nikkunsidraw fejn huma jinsabu bħalissa fit-triq tal-patt u nkunu lesti li nimxu magħhom fil-vjaġġ tagħhom ta’ fidi. Huwa privileġġ għalina li nsiru nafu x’hemm f’qalbhom u li nidderiġuhom lejn is-Salvatur tagħhom.
Sister Josivini mill-Fiji kellha diffikultà tara jekk hija kenitx tinsab miexja ‘l quddiem fit-triq tal-patt—letteralment. Il-ħabiba tagħha għarfet li Josivini kienet issibha diffiċli biex l-iskrittura taraha ċara biżżejjed li tkun tista’ taqraha. Lil Josivini pprovditilha nuċċali tal-qari ġdid kif ukoll lapes isfar jgħajjat biex timmarka l-kliem kollha li kellhom referenza għal Ġesù Kristu fil-Ktieb ta’ Mormon. Dak li beda bħala sempliċiment xewqa biex timministra u tgħinha fl-istudju tal-iskrittura rriżulta f’ Josivini tattendi t-tempju għall-ewwel darba—28 sena wara li hija tgħammdet.
Kemm jekk in-nagħaġ tagħna huma sodi jew dgħajfin, ferħanin jew imnikktin, aħna jeħtieġ naraw li ħadd ma jimxi waħdu. Aħna nistgħu nħobbuhom, jinsabu fejn jinsabu spiritwalment, u noffrulhom is-sapport u l-inkuraġġiment biex huma jagħmlu l-pass li jmiss ‘il quddiem. Hekk kif aħna nitlobu u nfittxu li nifhmu x’hemm f’ qalbhom, jiena nixhed li Missierna tas-Smewwiet imexxina u l-Ispirtu Tiegħu ikun magħna. Aħna jkollna l-opportunità li nkunu “anġli mdawrin magħhom” daqslikieku Huwa stess ikun jinsab quddiemhom8
Il-Mulej jistedinna biex nirgħu n-nagħaġ Tiegħu, biex nieħdu ħsieb il-merħla Tiegħu kif kieku jieħu ħsiebha Hu. Huwa jistedinna biex inkunu rgħajja ta’ kull ġens, ta’ kull pajjiż. (U iva, Presbiteru Uchtdorf, aħna nħobbuhom ukoll ir-rgħajja Ġermaniżi u għandna bżonnhom.) U Huwa jixtieq jara li ż-żgħażagħ Tiegħu jingħaqdu wkoll f’ din il-kawża.
Iż-żgħażagħ tagħna jistgħu jkunu fost l-aktar rgħajja qalbiena tagħna. Huma, kif qal il-President Russell M. Nelson, “fost l-aqwa li l-Mulej qatt bagħat f’ din id-dinja.” Huma “spirti nobbli,” u “l-aqwa plejers tagħna” li jimxu wara s-Salvatur.9 Tistgħu timmaġinaw il-qawwa li dawn it-tip ta’ rgħajja jġorru magħhom hekk kif huma jmorru jieħdu ħsieb in-nagħaġ Tiegħu? Jekk aħna nimministraw flimkien ma’ dawn iż-żgħażagħ, aħna naslu biex naraw il-meravilji.
Lilkom iż-żgħażagħ tfajliet u ġuvintur, aħna għandna bżonnkom! Jekk intom m’għandkom l-ebda essajnment biex timministraw, tkellmu mal-president tagħkom tas-Soċjetà tal-Għajnuna jew tal-kworum tal-presbiteri. Huma żgur jifirħu meta jaraw kemm intom tinsabu lesti biex issiru tafu n-nagħaġ Tiegħu, u li tieħdu ħsiebhom u tiġbruhom fil-merħla ta’ Alla.
Meta jasal il-jum li aħna ninżlu għarkupptejna f’ riġlejn il-maħbub Salvatur tagħna, wara li nkunu ħadnielu ħsieb il-merħla Tiegħu, jien nitlob li aħna nkunu nistgħu nwieġbu bħal Pietru: “Iva Mulej; int taf li nħobbok.”10 Dawn, in-nagħaġ Tiegħek, huma maħbuba, huma salvi, u jinsabu dar. F’ isem Ġesù Kristu, amen.