Mukenji wa ku Ngondu wa Bua Dikankamika dia Bansonga, Ngondu wa Dikumi 2026

Dialumingu Disatu

3. Longa bia bungi pa Mukenji wa Bunonoka

Dîku Ditangila ku Bukenka, kudi Lovetta Reyes Cairo, thimfuanyi tshia disanka tshia Havenlight

Nzambi mmuanyisha dipetangana dia muluma ne mukaji anu badi baselangana. Etshi tshidi mukenji wa bunonoka. Mukenji wa bunonoka udi pa dieyemena, bujalama, difuka, ne tshipungidi tshia dîku. Dikala munonoka didi diangata kuepuka bimfuanyi bia masandi ne dienzela mubidi wa bumuntu ne ngumvuilu ya diangatangana bu dipa dia tshijila dia kudi Nzambi. Bidi biumvuija ne kuikala mukezuka ku malu a diangatangana mu meji, mu meyi, mu bienzedi, ne mu masungula a media.

Biambuluisha bikuabu

• Buludiki ku Mifundu, “Bunonoka,” “Buimpa”

• “Enzela Mukenji wa Bunonoka,” Longesha Lumu Luimpa Luanyi, 83–84

• Biena Bualu ne Nkonku, “Chastity” (Tshisangi tshia Mikanda ya Lumu Luimpa)

Eyi idi imua nkonku ne bibilu bia dilonga biwudi mua kuteta:

• Mushindu kayi uwudi mua kuikala munonoka mu meji?

  Kanungu ka dikumi ne kisati ka ditabuja kadi kamba ne tudi tukeba bintu bidi “bimpa ne bia dinanga.” Mushindu kayi uwudi umanya tshintu tshidi tshimpa ne tshia dinanga? Fila bimua bilejilu bia bintu mu moyo weba bidi bipetangana ne diumvuija adi, ne akula pa nkonku eyi.

  Mushindu kayi udi masungula a media alenga meji eba?

  Mushindu kayi udiwu elanga malanda eba.

  Tshinyi tshiwudi mua kuenza bua kudikuba ne kukuba bakuabu ku media adi ashipa? Bu tshitupa tshia muyuki ewu, akula pa maludiki â bua kuambula bujitu bua technologie:

Kipatshila	Bulongolodi	Kuimanyika
Ndi mua kuenzela technologie ne kipatshila. Kena undomboloa to. (Dilongesha ne Bipungidi 112:6.)	Pandi ndongolola bua kuya kumpala, ndi ngumvua biakana ngenza masungula mashema. (Alama 34:32.)	Bidi bimpa buanyi meme bua kuanji kuimanyika ne kuikisha. (Dilongesha ne Bipungidi 101:16.)

Funda mishindu isatu iwudi mua kukuba meji eba lumingu elu (bilejilu: teka mikalu ku diba dia kutangila mu telefone, sungula misambu idi yambuluisha, anyi epuka bileji kampanda bibi.)

• Mushindu kayi uwudi mua kuenzela dikala munonoka mu bienzedi bieba?

  Pawudi wenzela mukenji wa bunonoka, udi ulua muntu udi mua kueyemenyibua, udi ne didikanda, udi unemeka mikalu, ne udi mua kufuka ne kulama malanda a bipungidi. Bala muyuki pa mushindu uvua Yosefu munemeka mukenji wa bunonoka mu Genese 39:7–12. Tshinyi tshiwudi ulonga ku bienzedi bia Yosefu pavuaya mututakenangana ne diteta?

  Tshinyi tshikuabu tshiwudi ulonga ku “kulama mubidi wa bumuntu ne ngumvuila ya diangatangana bia tshijila” mu buludiki bua FSY (dibeji 52) tshidi tshikuambuluisha bua kumvua tshidi tshiumvuija kuikala munonola mu bienzedi bieba?

• Muntu udi mua kubuikidibua yeya mushipa mukenji wa bunonoka anyi?

  Satana udi musua bua tuetu tuitabuja ne patudi tushipa mukenji wa bunonoka, katuena kabidi bapuangana bua kupeta dinanga ne dibuikidila bia Nzambi to. Etshi katshiena tshilelela to. Bala Alama 39:1–15; 42:29–31; 49:30 ne akula pa ditekemena diakumvua Alama bua muanenda Corianton. Kudi anu mushindu wa kupingana. Kupitshila ku Mulambu wa Bupikudi wa Yezu Kilisto, tudi mua kukudimuna mutshima ne kuikala babuikidibua. Dinanga ne mulambu wa bupikudi bia Kilisto bidi binena kutamba tshilema tshionsu.

© 2026 by Intellectual Reserve, Inc. All rights reserved. Bipatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly For the Strength of Youth Message, October 2026. Tshiluba. 20068 760