“Fanga Laione ʻi he Vaoʻakaú,” Kaumeʻá, ʻEpeleli 2024, 32.
Kaumeʻa ki he Kaumeʻa
Fanga Laione ʻi he Vaoʻakaú
Mei ha ʻinitaviu mo Linitā Teivisi.
ʻI hoku taʻu onó, naʻe lue lalo homau fāmilí ʻi he ʻotu moʻungá. ʻI heʻemau fokí, naʻá ku lele muʻomuʻa au mo hoku taʻokete ko Peilí. Naʻá ma fiefia!
Naʻá ma saiʻia he sio ki he ngaahi fuʻu maká, matalaʻiʻakaú, manupuná, mo e fanga kiʻi meʻa moʻui īkí. Ka naʻe ʻikai fuoloa kuó ma fakatokangaʻi ʻokú ma toko ua pē, pea ʻikai ke ma toe ʻiloʻi ʻa e halá.
Naʻe ʻikai ke ma ʻilo ʻa e founga ke ma foki aí. Naʻe ʻātakaiʻi kimaua ʻe he ʻuluʻakaú ʻi he feituʻu naʻá ma ʻi aí. Naʻá ku fakakaukau ʻoku toitoi ha fanga laione ʻi he ngaahi fuʻu ʻakaú! Naʻe talamai ʻe Peili ke ma kaila ʻo ui tokoni. Naʻá ma kaikaila ʻo fuoloa, ka naʻe ʻikai ke fanongo mai ha taha ia.
Naʻe fāifai pea tafoki mai ʻa Peili ʻo pehē mai, “ʻOku ou tui ʻoku totonu ke ta lotu.”
Naʻá ku ʻiloʻi ko ha fakakaukau lelei ia. Lolotonga ʻene lotú, naʻe ʻāʻā pē hoku mata ʻe taha ke sio naʻa ʻoku ʻi ai ha fanga laione. Hili ʻema lotú, naʻá ma ongoʻi fiemālie.
ʻI he taimi pē ko iá, naʻá ma ongoʻi ha ngahaha mai mei he ʻuluʻakaú. Naʻá ku ʻiloʻi pau ko ha laione! Ka kimuʻa peá u fuʻu ilifá, naʻá ku sio atu ʻo ʻiloʻi ia. Ko Teti ia! Naʻá ma houngaʻia ʻi hono tali ʻema lotú.
ʻI heʻemau lue foki ki he halá, naʻá ma talaange kia Teti ʻema lotú. Naʻá ne tuʻu ʻo pehē mai, “ʻOku fiemaʻu ke tau toe lotu ʻo fakamālō ki he Tamai Hēvaní ʻi Heʻene tokoní.”
Naʻa mau punou hifo ʻi he loto-fiefia, pea naʻá ku fakamālō kiate Ia ʻi hono tali ʻema lotú. ʻI he taimi ko ʻení, naʻá ku fakapapauʻi ʻoku kuikui lōua hoku ongo matá!
Tā fakatātaaʻi ʻe Kelly Kennedy