“Ko e Muimui kia Sīsū ʻi ʻAilani Tokelaú,” Kaumeʻá, ʻEpeleli 2024, 6–7.
Ko e Muimui kia Sīsū ʻi ʻAilani Tokelaú
Feʻiloaki mo Loli!
Ko e Founga ʻoku Muimui Ai ʻa Loli kia Sīsuú
ʻOku tokoni ʻa Loli ki hono fāmilí ke fakamaau honau falé. ʻOkú ne pehē ko ha meʻa fakalata ʻa hono fufulu e ʻū peletí. ʻOku pehē ʻe Loli, “ʻOku faʻa femoʻuekina ʻaupito ʻa Mami ʻi hono tokangaʻi ha fānau ʻe toko nimá mo e ako ke maʻu hono mataʻitohi ʻi he ʻunivēsití. Ko ia ai kapau te u fai ʻa e meʻa ʻokú ne faʻa faí, ʻe lava ke ne maʻu ha mālōlō.”
Ko hono fakafiemālieʻi ʻa e niʻihi kehé ko ha founga ia ʻe taha ʻoku muimui ai ʻa Loli kia Sīsū Kalaisí. Naʻe toki kau hono kiʻi tuofefiné ki ha kalapu foʻou ʻa e toʻu tupú. Naʻá ne manavasiʻi ʻi he fuofua taimi naʻá ne ʻalu aí. Naʻe fakafiemālieʻi ia ʻe Loli ʻo talaange ʻe sai pē ia. ʻOkú ne pehē, “Naʻá ku fie tokoni kiate ia koeʻuhí ke ne fiefia ʻo hangē ko aú ʻi he taimi naʻá ku ʻalu ai ki aí. Naʻá ku ongoʻi fiemālie ʻi heʻeku ʻiloʻi naʻá ku tokoniʻi ia ke ne fiefiá.”
Fekauʻaki mo Loli
Taʻu Motuʻá: 10
Mei he: Fonua ʻAnitulimí, ʻAilani Tokelau
Lea fakafonuá: Faka-Pilitānia
Taumuʻá: 1) Hoko ko ha tokotaha ʻakapulu. 2) Ngāue fakafaifekau.
Ngaahi Meʻa ʻOku Manako Aí: Vaʻinga soká, vaʻinga papá (board games), mo e pelé
Fāmilí: Mami, Teti, ngaahi tehina ʻe toko tolu, mo ha tuofefine siʻisiʻi ʻe toko taha
Ngaahi Meʻa ʻOku Saiʻia Taha ai ʻa Lolí
Talanoa ʻo e Tohi ʻa Molomoná: Ko hono maluʻi ʻe ʻĀmoni ʻa e fanga sipi ʻa e tuʻí (vakai, ʻAlamā 17)
Tukufakaholo Fakafāmilí: Tui vala mohe ʻoku hoa tatau ʻi he Kilisimasí
Fuaʻiʻakaú: Fainā
Lanú: Pulū
Hiva Palaimelí:“ʻOmi Ki Māmani ʻEne Moʻoní” (Tohi Hiva ʻa e Fānaú, 92–93)