Yu Save Mekem Wan Samting I Defren

I kam long Presiden Susan H. Porter

Praemeri Jeneral Presiden

Pikja

Susan H. Porter

I kam long wan intaviu wetem Olivia Kitterman mo Rachel Peterson.

Papa long Heven mo Jisas Kraes i lavem yu tumas. From se Tufala i lavem yu, Tufala i bin invaetem yu blong mekem ol kavenan, o ol promes, wetem Tufala. Yu stat blong mekem ol promes ia taem yu kasem baptaes.

Afta long baptaes blong yu, yu kasem presen we i Tabu Spirit. Yu kam wan memba blong Jos Ia blong Jisas Kraes blong Ol Lata-dei Sent. Hemia i minim se Papa long Heven i trastem yu blong yu kipim ol kavenan blong yu.

?Yu save mekem wanem olsem wan memba blong Jos blong kipim ol kavenan blong yu? Yu save welkamem ol narawan long Praemeri. Yu save sidaon wetem wan we i niu mo helpem hem blong lanem ol singsing. Yu save help wetem ol aktiviti blong Praemeri. Yu save stap olsem wan lida tu insaed long famli blong yu. Yu save askem blong yufala i mekem famli prea o serem wanem we yu bin lanem long Praemeri.

Afta we yu kasem Tabu Spirit, yu save luk ol nid blong ol narawan long wan niu wei. Yu save prea long Papa long Heven mo talem, “Helpem mi blong save huia mi save helpem tedei.” Afta, Tabu Spirit i save helpem yu blong luksave wan we i stap sidaon hemwan, o talem long yu blong talem halo long wan fren. Yu save mekem bigfala samting i defren taem yu jusum blong helpem ol narawan. !Yu stap mekem samting olsem wan memba blong Jos blong Papa long Heven!

Papa long Heven i lavem yu. Hem i wantem yu blong yu lidim ol narawan wetem eksampol blong yu long eni ples we yu go long hem, blong mekem se yu save karem ol narawan oli kam moa kolosap long Hem. Be yu no nid blong mekem yuwan. Papa long Heven mo Jisas Kraes bae neva stop blong helpem yu. Yu save filim se yu no fraet taem yu save se Tufala i stap wetem yu. Yu save pikjarem Jisas i stap stanap narasaed long yu oltaem.