“Silip long Skripja Taem,” Fren, Jenuware. 2024, 30–31.
Silip long Skripja Taem
Nomata se hem i eli. Elvira i save se hem i impoten blong stap ridim olgeta skripja.
Stori ia i hapen long Nowei.
Voes blong Papa i wekemap Elvira. “Taem blong skripja,” hem i talem.
Hem i sidaon long bed blong hem mo rabrabem ol ae blong hem we oli silip. Ples i tudak yet aotsaed. !Mo i kolkol! Elvira i no wantem lego naes wom bed blong hem.
Mama i talem se blong stap ridim ol skripja i olsem wanem oli save kam blong save Jisas moa gud. !Be blong stap ridim skripja evri moning i had!
Elvira i wokbaot slo i go antap long ol step mo sidaon long jea, narasaed long bigfala sista blong hem, Sigrid. Hem i haggem wan pilo mo lisin long naes blangket blong hem we i wom gud. Ol brata blong hem oli stap long nara rum mo oli stap statem onlaen seminari klas blong olgeta.
Telefon blong Papa i ring. Hem i ansarem, mo ol memba blong famli oli kamaot long skrin. Anti Liv i jenis finis mo i rere blong wok. Kasen blong olgeta, Dorthea, i stap werem ol klos blong silip blong hem yet olsem Elvira.
Elvira i saksakem han long olgeta tru long vidio kol mo i pulum longfala win blong hem. Oltaem oli stap mekem skripja taem wetem Anti Liv mo Dorthea. Tufala i stap long wan nara pat blong Nowei we i tekem fo aoa blong kasem olgeta. Hem i moa isi blong olgeta evriwan blong ridim skripja taem oli gat wan gol blong stap ringim olgeta wanwan evri dei. !Mo Elvira i laekem blong stap luk kasen blong hem!
Sam minit afta, Mama i joenem kol tu. “!Halo ol gel!” hem i talem. Hem i stap travel from wok long wik ia, be hem i stil kol long skripja taem.
Oli mekem wan prea. Afta Elvira i openem ol skripja blong hem. Oli stap ridim Buk blong Momon tugeta. Evriwan i gat taem blong ridim ol ves.
Elvira i lisin taem ol narawan oli rid, be i had tumas blong wekap i stap. Sigrid i foldaon mo silip bakegen long jea. Elvira i stikim hem. Be afta wan samting long ves ia i bin kasem ae blong hem.
“Mo mi bin luk wan aean rel, mo i folem saed blong reva, mo i go long tri we mi bin stanap kolosap long hem,” Dorthea i ridim.*
“!Mi save stori ia!” Elvira i talem. “Hem i drim blong Lihae.” Hem i bin luk wan skripja vidio abaot stori ia. I bin gat wan naesfala tri wetem waet frut, mo ol pipol oli hang strong long aean rel blong helpem olgeta blong kasem tri ia.
“?Yu tingbaot se aean rel ia i semmak long wanem?” Mama i askem.
“?Ol skripja?”
“Yes. !Hemia nao!” Papa i talem. “Nifae i tijim afta se, aean rel ia i olsem tok blong God. ?Yu ting se yumi save hang strong long aean rel ia olsem wanem, olsem ol pipol long drim blong Lihae?”
“!Yumi stap hang strong long rel ia naoia!” Elvira i holem Buk blong Momon blong hem i go antap. “Taem yumi stap gat skripja taem.”
Mama i sakem hed blong hem blong agri. “Taem yumi ridim ol skripja, yumi stap kam moa kolosap long Jisas Kraes. Semmak olsem ol pipol ia we oli stap go moa kolosap long tri blong laef taem oli hang strong long rel.”
Taem oli stap gohed blong rid, Elvira i stap pikjarem hemwan we hem i stap hang strong long rel ia mo stap wokbaot i go from naesfala tri ia. Hem i nomo filim silip tumas.
Kolosap hem i taem blong go. Anti Liv mo Mama i nidim blong go long wok. Mo Elvira, Sigrid, mo Dorthea oli nidim blong rere blong go long skul.
“!Tata evriwan!” Elvira i tata long famli blong hem long skrin. “!Lavem yu!”
Taem hem i ron i go daon long step blong go rere from skul, Elvira i filim wom insaed. Mo hem i no from naes, wom blangket blong hem. Hem i save se wom filing ia hem i Tabu Spirit we i stap talem long hem se Buk blong Momon i tru. !Hem i wan gudfala wei blong statem dei!
Pikja i kam long Hector Borlasca