“Lafet blong Bubuman we I Stret Evriwan,” Fren, Jenuware 2024, 18–19.
Lafet blong Bubuman we I Stret Evriwan
?Olsem wanem sapos ren i no stop blong ren?
Stori ia i hapen long Samoa.
Ol dak klaod oli stap nomo long skae. Alex i lukluk strong i go antap long olgeta.
!BUM!
Sam moa tanda i faerap. Ol bigbigfala drop blong ren i folfoldaon long evri ples.
Alex i saksakem hed blong hem. Hemia i nogud. I nogud nating. Samtaem long Samoa, ren i save ren blong fulap dei mo i no stop nomo. !Be hem i wantem se bae lafet blong betdei blong bubuman blong hem i mas stret gud evriwan!
Alex i go long rum blong hem mo i nildaon long saed blong bed blong hem.
“Dia Papa long Heven,” hem i talem. “Plis mekem ren ia i gowe long taem blong lafet blong betdei blong bubuman tumoro. Mifala i givimaot ol invitesen finis. Long nem blong Jisas Kraes, amen.”
Taem Alex i stanap, hem i luk Mama mo Papa i stap stanap long doa blong hem. Tufala i stap smael.
“Mi hop se yu no wari se mitufala i bin harem prea blong yu,” Mama i talem.
Alex i smael. “Hem i oraet. Mi wantem nomo se bae tumoro i spesel blong bubuman. Bae hem i no semmak sapos yumi mas stap insaed. !Bae yumi nogat inaf spes blong danis!”
Papa i skwisim solda blong Alex. “Nomata se weta i olsem wanem, bubuman bae i save hamas yu yu lavem hem.”
Long nekis moning, Mama mo Papa i askem Alex blong mekem famli prea. Hem i stap gohed yet blong ren strong. Mo i gohed blong luk olsem bae i no stop blong ren yet.
“Plis blesem ren blong i gowe long taem blong lafet,” hem i talem. “Mo plis blesem mifala evriwan blong gat wan gudfala taem. !Speseli bubuman!”
Alex i wajem skae ful moning. Nogat samting i jenis blong wan longfala taem. Be afta, wan gudfala samting i hapen.
“!Luk!” Alex i singaot. “!Wan pis blong blu skae!” Famli blong hem i ron i go aotsaed long yad. Ol klaod oli stat blong kamkamaot.
Long sam aoa nomo, !evri klaod i aot! Ol pul blong wota long graon tu oli drae. Alex i hariap blong dekoretem yad. Bubuman mo ol nara man we oli invaetem, bae oli kam i no longtaem.
Taem bubuman i kasem long we, hem i sapraes. Hem i luk ol laet, ol kalakala kaliko, mo ol man we oli invaetem olgeta. “Evri samting i luk naes tumas,” hem i talem. “!Tangkyu tumas!”
Lafet i bin wan gudfala taem olsem we Alex i bin wantem. Oli danis long ol fevret singsing blong bubuman. Kaekae i bin naes—speseli swit kokonat bred. Alex i iven singsing wetem bubuman.
Bes pat, hem i taem hem i taem blong danis blong Siva Taualuga. Oltaem, danis ia bae man we hem i dei blong hem, bae hem nao i danis long hem. Mo yes, !Hem i bubuman!
Bubuman i girap blong danis, be afta hem i lukluk Alex. “!Kam danis wetem mi Alex!” Bubuman i singaot. Alex i girap mo danis narasaed long bubuman. I no longtaem, ol narawan oli stap danis tu.
Bubuman i bendaon blong haggem Alex. “Yu mekem mi filim spesel tedei,” Bubuman i talem. “Hemia i lafet we i stret evriwan blong betdei.”
Afta we pati i finis, Alex i lukluk i go antap long skae. Ol bigfala tik blak klaod oli kambak bakegen. Ren i stat blong foldaon strong bakegen long olgeta. Be long taem ia, Alex i no wari long hem. Hem i save se Papa long Heven i helpem weta blong i stap naes long taem blong lafet blong bubuman.
“Mi talem tangkyu long Yu from naesfala weta,” Alex i prea. “Mo mi talem tangkyu long Yu from wan naesfala bubuman we i gud tumas.”
Ol pikja oli kam long Augusto Zambonato