Kwaet Voes Abaot Poteto Jips

I Kam long Haley Yancey

(I kamaot long wan tru stori)

Maya i gat wan strong filing blong jekem ol ingridien.

Stori ia i hapen long YSA.

jenisim teks

Maya i katem ol stroberi mo ademap olgeta i go long bol blong salad frut. Ol frut hem i fevret kaekae blong hem. Hem i laekem ol kala we i saen. !Mo hem i neva wari blong kaekae olgeta!

Maya i nogud long fulap kaekae. Hem i mas lukaot gud from sapos hem i kaekae rong kaekae, bae hem i save sik fulap. Taem hem i smol, hem i mestem i dring melek blong buluk mo hem i hadwok blong pulum win. Hem i mas go long hospital. Hem i no wantem hemia blong hapen bakegen.

Samtaem hem i had blong mas kaekae ol defren samting we i no semmak long ol fren mo famli blong hem. Be hem i save se hem i impoten blong stap sef.

Maya i karem salad frut i go long tebol. “Salad i rere.”

Papa i lukluk i kam antap long sospen we hem i stap tantanem kaekae long hem. “!I gud tumas! Bae ol fren we yumi invaetem bae oli kam i no longtaem.”

Maya i harem wan noknok long doa mo hem i ron i go blong openem. Famli Johnson mo ol misinari oli stanap long vranda mo stap smael i kam long hem. Famli Johnson oli ol fren we oli kam olsem famli. Maya i hapi blong olgeta bakegen. Hem i openem doa i bigwan blong evriwan i kam insaed.

Taem oli stap wet long dina, wan long ol misinari i soem wan trik blong majik long Maya. !Hem i no save olsem wanem misinari ia i stap pulumaot wan koen long sora blong hem!

Kolosap hem i taem blong kakae. Brata Johnson i mekem wan prea. Afta olgeta evriwan oli laenap blong kasem ol kaekae long plet blong olgeta.

Taem hem i taem blong Maya, hem i kasem wan bigfala spun blong salad frut. Hem i lego sam kaekae we hem i save se i gat melek long hem.

Afta hem i pikimap bigfala paket blong jips mo kapsaetem sam i go long plet blong hem. Oli luk olsem semmak kaen jips we hem i bin kakae bifo. Hem i putum wan long maot hem.

Be taem hem i stat blong kakae, hem i gat wan strong filing. Jekem ol ingridien, wan voes i talem long maen blong hem.

jenisim teks

Maya i stop blong kakae. Hem i lukluk lis blong ol ingridien long paket blong jips. !Jips ia i gat melek long hem!

Maya i hang long wan napkin mo spetemaot jips hariap taem olsem we hem i save mekem. Ol ae blong hem i fulap long wota. Hem i no bin solemdaon. ?Be bae wan nogud samting i hapen yet?

“!Mama! !Papa!” Maya i ron go long papa mo mama blong hem. “!Mi putum wan jips we i gat melek long hem long maot blong mi!”

“I Oraet,” Mama i talem. “Bae yumi karem sam meresin.” Maya i solemdaon meresin we Mama i givim long hem mo pulum ol bigfala win. Papa i holem Maya taem oli stap wet long meresin blong wok.

Afta long sam minit, Mama i talem, “?Yu filim olsem wanem?”

Maya i filim fraet yet. Be hem i no filim wan samting i rong long bodi blong hem. “Mi ting se mi Oraet. ?Be mi save gat wan blesing?”

“O yes,” Papa i talem. “Bae yumi askem ol misinari blong help.”

jenisim teks

Maya i sidaon long wan jea, mo Papa wetem ol misinari oli putum ol han blong olgeta antap long hed blong hem. Oli blesem hem blong hem i stap sef. Maya i filim kwaet. Evri nogud filing blong hem oli nomo gat.

“?Olsem wanem nao yu save blong jekem ol ingridien long paket blong jips?” Mama i askem.

“!Mi filim wan woning we i kam long Tabu Spirit!”

Papa i givim wan bigfala hag long hem. “Mi glad tumas se yu lisin long kwaet voes ia.”

Maya i saksakem hed blong agri. Hem i save se Papa long Heven i lavem hem mo i kea abaot hem.

Stori PDF

Ol pikja i kam long Chrisanne Serafin