“Leqa ena Rara ni Gade,” iTokani, Okosita 2023, 46–47.
Leqa ena Rara ni Gade
E a cegu levu o Hunter. “Au sega ni dau cavuta na veivosa vaqori.”
Na italanoa oqo a yaco e Amerika.
E a cici kosova na rara kei ira na nona itokani o Hunter. E a matadredre ni vakila na cagi ni liwa siviti koya. A vakila o koya ni totolo ka mamada!
A tara taumada na bai o Kyle. “Au sa wini!” a kailavaka mai o koya.
A qai yacova na bai o Hunter ena dua na gauna ki muri. “E sega ni dodonu! O a tekivu eliu.”
“Io,” a kaya o Miguel. “Daru veitau ki na vunikau!”
E a tekivu cici tale o Hunter. Ena gauna oqo, a tara eliu o koya na vunikau. Ia o Miguel a volekati koya toka ga yani.
“Au sa wini!” A kaya o Miguel.
“Sega, e wini o Hunter,” a kaya o Piper.
“Io,” a kaya o Kyle.
E a roqota na ligana o Miguel. A qai cavuta e dua na vosa ca.
Era dredre na vo ni gone. E a cavuta tale na vosa oya o Miguel, ka ra dredre vakalevu cake.
A rarawa na loma i Hunter. A kila o koya ni vosa oya e sega ni vinaka me cavuti. Ia a sega ni vinakata me vakatanini. A sega ni tukuna e dua na ka.
A cavuta o Piper e dua tale na vosa ca. Qai cavuta o Kyle e dua tale.
“Cavuta e dua, Hunter,” a kaya o Kyle.
“Io, kusa,” a kaya o Miguel. “Cavuta e dua na vosa ca vou.”
E a cegu levu o Hunter. “Au sega ni dau cavuta na veivosa vaqori.”
“Nomu cavuta e dua na vosa ena sega ni vakamavoataki iko,” a kaya o Kyle.
“Au sega ni via cakava,”a kaya o Hunter.
“O rere?” A dredre o Miguel.
E a wadadamu na matai Hunter. “Au na laki qito ena dua tale na vanua.”
Era a dredre tikoga na vo ni gone ka cavuta tiko na vosa ca. E a vinakata o Hunter me lako tani. E a sega ni marautaki na tiko e rara ena gauna oqo. “Tou qai sota tale,” a kaya vakamalua.
A biuta na ligana o Hunter ena nona taga ka lako siviti ira vakamalua na vo ni gone. A sega tale ni vakila o koya ni totolo se mamada. A vakila ni bikai sobu.
A kunei Na kei Ta ni rau dabe toka ena dua na idabedabe. A biuta sobu o Ta na nona ivola. “O vinaka tiko?”
A vakariqa taba o Hunter. “Era sa tekivu me vosavosa ca. Au sega ni vinakata meu cakava, kau sa mani biubiu mai.”
A matadredre o Na. “Sa vakasakiti dina oqori.”
“Keirau cibitaki iko,” a kaya o Ta. “E dredre me caka na digidigi vinaka ni ra sega ni cakava vakakina o ira na tiko wavoliti keda tu.”
E a cegulevu o Hunter. A marau ni digidigi donu, ia a sega tikoga ni lomavinaka.
“O via lako i vale?” A taroga o Na.
A vakasama o Hunter. “Se bera”, a kaya o koya. A raica o koya e dua tale na ilawalawa gone ni ra qitora tiko e dua tale na qito. “Au na lako i kea.”
Ni lako tiko o Hunter i kea, e a yalovi koya yani e dua vei ira na gone. “Bula, o au o David.”
“O au o Hunter. “Rawa ni’u tomani iko?”
“Io!”
E a vodoka o Hunter na ililili ka vakila na liwa siviti koya ni cagi. Ni qito vata tiko kei Tevita kei ira na kena vo, a vakila tale o koya ni totolo ka mamada. A cakava o koya na ka dodonu, e dina ga ni a dredre. A marau ni a cakava e dua na digidigi vinaka.
Droini mai vei Shawna J. C. Tenney