“Na Siga Bibi nei Giorgia,” iTokani, Okosita 2023, 8–9.
Na Siga Bibi nei Giorgia
“Au sa na vakarau papitaiso ena dua na gauna wale tikoga oqo,” a kaya o Giorgia. “Me vakataki Jisu ga!”
Na italanoa oqo a yaco e Ositerelia.
E a cici cake kina nona rumu o Giorgia ka muri koya yani o Matilda. E dau dua dina na siga marautaki ni lako mai o nona itokani me mai qito.
“E rawa beka ni daru qito kei na nomu matakau?” A taroga o Matilda.
“Io!” A kaya o Giorgia. E dua vei ira na ka edau taleitaka me cakava.
Ni taura mai o Giorgia na matakau, e a vakasarava o Matilda na iyaloyalo ena lalaga nei Giorgia. A dusia o koya na iyaloyalo e loma.
“Na cava o ya?” a taroga.
“O ya o Jisu Karisito ni papitaisotaki tiko,” a kaya o Giorgia. “Ka’u sa na vakarau papitaiso tiko. Me vakataki Koya!”
“Na cava mo papitaiso kina?” A taroga o Matilda.
“Baleta niu vinakata meu muri Jisu,” a kaya o Giorgia. Niu na papitaiso, oqori na ka au na yalataka meu cakava!”
Sa qai yaco mai vei Giorgia e dua na vakasama. “O vinakata beka mo mai tiko ena noqu papitaiso?”
“Au na tarogi tinaqu kevaka e rawa,” a kaya o Matilda.
A sa toro vakavoleka sara mai na siga ni papitaiso nei Giorgia. E a wiliwili mai na nona ivola ni italanoa ni ivolanikalou ka gole kina Lalai ena veimacawa. Ni cavuta oti na nona masu ni moce, ea raica na iyaloyalo kei Jisu. E dau taleitaka me raitayaloyalotaka se na vakacava tu me papitaisotaki.
Ena Sigatabu ni bera nona papitaiso, e caka vei Giorgia na veivakatarogi ni papitaiso. O koya kei rau na nona itubutubu eratou a vosa vua na bisopi ena nona valenivolavola. A taroga vua eso na taro me vukea me vakadeitaka ni sa vakarau tu o koya me papitaisotaki.
“O vakabauta beka ni luve ni Kalou o Jisu Karisito?” a taroga.
E vakakina! “Io” a kaya o koya.
A matadredredre vua na bisopi. “Na papitaiso e dua na digidigi bibi sara. O vinakata mo papitaisotaki?”
A vakasamataka o Giorgia na levu ni nona lomani Jisu ka vinakata me muri Koya. “Io!” a kaya o koya.
Sa qai yaco mai na siga bibi vei Giorgia. Ni kalawa yani i loma ni wai, a raici ira na nona itokani kei na matavuvale nira sarasara tiko. A tiko talega kina o Matilda!
Ni cavuta na masu ni papitaiso o tamana, na qaqana a vakavuna me vakila kina o Giorgia na vakacegu kei na marau e lomana. Sa qai dromuci koya vakamalua e loma ni wai ka vakaduri koya cake tale mai. Ni mata cake mai, a vakila o koya ni marau ka savasava.
E mokoti koya vinaka sara o Ta. A waraki koya toka mai na ulu ni ikabakaba o Na vata kei na itauwelu ka matadredre tu.
A vakila o Giorgia ni katakata na lomana. E dua dina na siga duatani. A digitaka o koya me muri Jisu. Ka vinakata o koya me muri Koya tiko ga e veisiga!
Droini mai vei Shana Keegan