Mangandam alang sa Templo
“Unsaon man nako sa pagkuha og rekomend?” Nangutana si Ajan.
“Tan-awa nga kamo mohimo sa tanan nga butang diha sa katak[o]s” (Mormon 9:29).
Mipahiyom og dako si Ajan sa dihang siya nakadungog og tuktok sa pultahan. Si Madda (Mama) midapit sa ilang tigpangalagad nga brother aron sa pagtabang sa usa ka espesyal nga home evening.
Giablihan niya ang pultahan. “Wah gwaan, Brother Williams!” (“Kumusta?”)
“Everyting is irie!” Miingon si Brother Williams. (“Maayo ra ang tanan!”) Mitunol siya ngadto ni Ajan og usa ka bag nga mangga gikan sa iyang punoan.
Si Brother Williams milingkod sa sofa. Si Madda mihangyo sa manghod ni Ajan sa pag-ampo.
Pagkahuman niya, si Brother Williams miingon, “Karong tuiga, si Ajan mag-12 anyos na. Aduna bay nakahibalo nganong kini nga tuig espesyal alang kaniya?”
Ang manghod nga lalaki ni Ajan, si Tejaun, mahinamon nga miikid-ikid. “Tungod kay siya makaangkon sa pagkapari ug mopaambit sa sakramento!”
“Husto kana!” Miingon si Brother Williams. “Apan adunay laing rason usab.”
Giukab niya ang iyang pitaka ug mikuha sa gamayng papel. “Kini ang usa ka rekomend sa templo.”
Siya mitunol niini ngadto ni Ajan.
“Kanindot!” Gihikap ni Ajan ang bulawan nga templo diha sa kard. “Unsay imong buhaton niini?”
“Ako kining ipakita ngadto sa tawo nga naglingkod sa front desk sa templo. Magpakita kini nila nga ako takos nga mosulod.”
“Pakit-a ko!” Gikuha kini ni Dana gikan ni Ajan ug gitan-aw kini og maayo.
“Unsa kaha imong bation kon ikaw adunay usa ka rekomend nga imong kaugalingon?” Nangutana si Brother William.
“Ako mobati nga espesyal!” Mitan-aw si Ajan gikan sa kard. “Apan wala ko masayod kon makaadto ba ko sa templo. Mahal kaayo ang pagpalit og usa ka tiket sa eroplano aron makaadto didto.”
“Dili usab ako makaadto sa templo kanunay,” miingon si Brother Williams. “Apan ang akong rekomend nagpahinumdom kanako nga kanunayng mag-andam sa pagsulod.”
Naghunahuna si Ajan sa makadiyot. “Gusto usab ko nga maandam,” miingon siya. “Unsaon man nako sa pagkuha og rekomend?”
“Makigkita ka sa bishop,” miingon si Brother Williams. “Aduna siyay pipila ka mga pangutana aron masuta kon andam na ka.”
“Sa ato pa mura kini og pasulit?” Nangutana si Ajan, gikulbaan og gamay.
“Mura ra og mag-istoryahanay,” miingon si Brother Williams. “Ang bishop imong higala, ug gusto siya nga motabang kanimo nga maandam.”
Misanong si Ajan. Ganahan siya sa bishop.
“Gusto ka ba nga makakita sa mga pangutana?” Gitunol ni Brother Williams ngadto ni Ajan ang usa ka piraso nga papel nga dunay pipila ka mga pangutana niini. Si Dana ug Tejaun mipaduol aron makakita usab.
“Numero uno,” mibasa si Ajan. “‘Ikaw ba adunay hugot nga pagtuo ug usa ka pagpamatuod sa Dios, ang Amahan sa Kahangturan, sa Iyang Anak, si Jesukristo; ug sa Espiritu Santo?’”
Siya misanag. Sayon ra kana. “Oo!”
Gipadayon niya sa pagbasa ang mga pangutana, tagsa-tagsa. Si Madda ug si Brother Williams mipasabot unsa ang kahulugan sa pipila ka butang.
Dayon gibasa ni Ajan ang laing pangutana: “‘Ikaw ba nakasab[o]t ug nagsunod sa Pulong sa Kaalam?’” Siya nagmug-ot. “Usa ka higayon si D‘andre mihatag kanako og juice sinagolan og rum [rum punch] sa dihang miadto ko sa iyang balay,” miingon siya. “Apan dili gayod ko gusto nga moinom niadto pag-usab. Nagpasabot ba kana nga dili ko makadawat og rekomend sa templo?”
“Ang pagtuman sa Pulong sa Kaalam nagpasabot nga dili moinom og alkohol, ug ang juice sinagolan og rum adunay alkohol niini,” miingon si Brother Williams. “Apan ikaw sa kanunay makahinulsol ug mahimong takos sa pag-adto sa templo.”
“Tungod ni Jesus!” miingon si Tejaun.
“Sakto gayod!” Miingon si Brother Williams. “Dayon ang imong rekomend sa templo mopahinumdom nimo sa pagtuman sa Pulong sa Kaalam. Ug kanunayng maandam sa pag-adto sa templo.”
Mingisi si Ajan. Mas maayo na ang iyang gibati.
“Tingali makaadto ko sa templo pohon,” miingon si Ajan. “Ug kon buhaton nako, andam na ko!”
Paghulagway pinaagi ni Shawna J. C. Tenney