Testemoni blong Olgeta Tri Witnes

Toksave i go long evri kantri, famli, lanwis, mo pipol, we bae ol wok ia bae i go long olgeta: Se mifala tru long gladhat blong God Papa, mo Lod blong yumi Jisas Kraes, i bin luk ol buk we i holem ol histri ia, we i wan histri blong ol pipol blong Nifae, mo tu, blong Ol Man blong Leman, ol brata blong olgeta, mo tu, blong ol pipol blong Jared, we i bin kam long taoa we oli bin tokbaot. Mo mifala i save tu se hem i bin transletem olgeta tru long presen mo paoa blong God, from voes blong hem i bin talemaot samting ia long mifala; taswe, mifala i save gud se wok i tru. Mo mifala i testifae tu se mifala i bin luk ol raeting we oli stap long ol buk; mo hem i bin soemaot samting ia tru long paoa blong God, mo i no blong man. Mo mifala i talemaot wetem tru toktok, se wan enjel blong God i bin kamdaon long heven, mo hem i bin karem mo putum long fored blong ol ae blong mifala we mifala i bin luk mo luk gud ol buk ia mo ol raeting we oli stap long hem; mo mifala i save se i tru long gladhat blong God, Papa mo Lod blong yumi Jisas Kraes, we mifala i bin luk mo talemaot se ol samting ia oli tru. Mo samting ia i gud tumas long ol ae blong mifala. Be, voes blong Lod i bin givim oda long mifala se mifala i mas talemaot samting ia. From samting ia, blong obei ol komanmen blong God, mifala i talemaot testemoni long saed blong samting ia. Mo mifala i save se sapos mifala i holemtaet fet long Kraes, bae mifala i wasemaot blad blong ol man long ol klos blong mifala, mo stanap klin long fored blong jea blong jajmen blong Kraes, mo bae mifala i stap wetem hem long heven kasem taem we i no save finis. Mo ol ona i go long Papa, mo long Pikinini, mo long Tabu Spirit, we i wan God. Amen.