¶ 1 VAKAI, oku ikai fakanounou ae nima o Jihova, ke ne tae faa fakamoui; bea oku ikai mamafa hono fofoga, ke ne tae faa ogo‘i.

2 Ka ko hoo mou gaahi hia kuo fakamavae akimoutolu mo ho mou Otua, bea i hoo mou agahala kuo ne fakafufu hono fofoga meiate kimoutolu, koeuhi e ikai te ne fanogo.

3 He kuo fakauli ho mou nima aki ae toto, mo ho mou louhi‘i nima aki ae fai kovi; kuo lea loi ho mou lougutu, kuo buaki e ho mou elelo ae kovi.

4 Oku ikai ui ha taha ki he agatonu, be lea ha niihi ki he mooni: oku nau faaki ki he vaiga, bea lea loi; oku nau tuituia i he fai kovi, bea nau fanau‘i ae agahala.

5 Oku nau fofoa‘i ae fua oe gata fekai, bea fi ae matamata kubega oe hina: koia oku ne kai ho nau fua e mate, bea koia kuo laiki oku ha‘u mei ai ae gata fekai.

6 E ikai hoko koe gaahi kofu e nau matamata kubega, bea e ikai te nau ufiufi akinautolu aki e nau gaahi gaue: he koe nau gaahi gaue koe gaue ae agahala, bea oku i ho nau nima ae gaue fakamalohi.

7 Oku lele ho nau va‘e ki he kovi, bea oku nau fai tootoo ke liligi ae toto oe taehalaia: koe nau gaahi mahalo koe gaahi mahalo oe agahala; oku i ho nau gaahi hala ae maumau moe fakaauha.

8 Koe hala oe melino oku ikai te nau ilo‘i; bea oku ikai ha agatonu i ho nau gaahi aluaga: kuo nau gaohi kiate kinautolu ae gaahi hala bikobiko: ko ia e alu ai e ikai te ne ilo ha fiemalie.

¶ 9 Koia oku mamao ai meiate kitautolu ae fakamāu, bea oku ikai hoko mai ae agatonu: oku tau tatali ki he māma, kae vakai koe fakabouli; ki he māma lahi, ka oku tau eveeva i he bouli.

10 Oku tau tautaufā ki he a o hage koe kui, bea oku tau tautaufā o hage oku ikai ha tau mata: oku tau humu i he hoata malie o hage ha bouli; oku tau i he gaahi botu lala o hage koe kakai mate.

11 Oku tau tagi kotoabe o tatau moe faga beaa, bea oku tagi mamahi o hage koe kulukulu, oku tau kumi ki he fakamāu, ka oku ikai; ki he fakamoui, ka oku mamao ia iate kitautolu.

12 He kuo fakalahi e mau gaahi talagataa i ho ao, bea oku talatalaaki‘i akitautolu e he e tau gaahi agahala: he oku iate kitautolu e tau gaahi talagataa; bea koe tau gaahi agahala, oku tau ilo ia;

13 Koe mea i he agatuu moe lohiaki‘i kia Jihova, moe alu mei ho tau Otua, o lea ki he fakamalohi moe fakaaoao, i he mahalo aki moe fakaha mei he loto ae gaahi lea loi.

14 Bea kuo foki kimui ae fakamāu, bea oku i he mamao ae agatonu: he kuo higa ae mooni i he hala, bea oku ikai faa hu ki ai ae fai totonu.

15 Io, kuo mole ae mooni; bea oku lau koe faha aia kuo afe mei he kovi: bea nae afio ki ai a Jihova, bea nae kovi ia ki hono fofoga i he ikai ai ha fakamāu.

¶ 16 Bea naa ne afio‘i oku ikai ai ha tagata, bea ofo ia i he ikai ha fakalalo: koia nae omi e hono nima ae fakamoui kiate ia; bea ko ene maonioni, nae tokoni ia kiate ia.

17 He naa ne ai ae maonioni o hage koe kofu fatafata, bea moe tatā oe fakamoui ki hono fofoga; bea ne ai ae teuga oe houhau koe kofu, bea naa ne kofu aki ae loto fai velega o hage koe kofu tua.

18 O fakatatau ki he e nau gaahi faiaga, e behe ene totogi, aki ae houhau ki he kau agatuu, ae totogi ki hono gaahi fili; ki he gaahi motu te ne fakatatau ae totogi.

19 Koia te nau manavahe ai ki he huafa o Jihova mei he luluga, bea mo hono nāunāu mei he hoboaga laa. Oka oho mai ae fili o hage koe vaitafe lahi, e hiki hake e he Laumalie o Jihova ha fuka kiate ia.

¶ 20 Bea oku behe e Jihova, E ha‘u ae Huhui ki Saione, bea kiate kinautolu oku tafoki mei he talagataa ia Jekobe.

21 Oku behe e Jihova, Ka ko au, ko eku fuakava eni mo kinautolu; Ko hoku laumalie aia oku iate koe, bea mo eku gaahi lea kuou ai ki ho gutu, e ikai alu i ho gutu, be mei he gutu o ho hako, be mei he gutu oe hako o ho hako, oku behe e Jihova, gata mei heni o a‘u o taegata.