¶ 1 KOE tala mamafa oku kau ki Ijibite. Vakai, oku heka a Jihova i he ao gaholo, o haele ki Ijibite: bea e tetetete ae gaahi tamabua o Ijibite i hono ao, bea e vaivai ae loto o Ijibite i loto iate ia.

2 Bea teu fakafehia ae kakai Ijibite ki he kakai Ijibite: bea e tau ae tagata taki taha kotoabe ki hono tokoua, bea taki taha ki hono kaugaabi; ae kolo ki he kolo, moe buleaga ki he buleaga.

3 Bea e vaivai ae laumalie o Ijibite i he lotolotoga oia; bea teu maumau‘i ae fakakaukau aana: bea te nau kumi ki he gaahi tamabua, bea ki he kau fiemana, bea kiate kinautolu oku ai ae gaahi laumalie kovi, bea ki he kau kikite.

4 Bea oku behe e he Eiki, ko Jihova oe gaahi kau tau, Teu tuku atu ae kakai o Ijibite ki he nima o ha eiki oku fakamamahi; bea e bule‘i akinautolu e ha tu‘i oku fai malohi.

5 Bea e maha ae gaahi vai mei he tahi, bea e fakaaau ke momoa ae vaitafe.

6 Bea te nau fakanamuku‘i ae gaahi vaitafe; bea koe gaahi vai oku mou faaki ki ai e fakamaha bea e momoa: e mae ae gaahi kaho moe falaki.

7 Koe goue i he vee vai, i he gutu oe gaahi vai, bea moe gaahi mea kotoabe oku tūtū‘i i he vee vai, e mae, e mole, bea ikai.

8 E mamahi foki ae kau toutai ika, bea e lāuga mo kinautolu kotoabe oku taumatau i he gaahi vai, bea e vaivai mo kinautolu oku lafo kubega ki he gaahi vai.

9 Bea ko kinautolu foki oku gaohi ae tubenu lelei, bea mo kinautolu oku lalaga ae tubenu vavaga, e fakaaau ke vaivai.

10 Bea e maumau‘i ae gaahi tuutuuni okinautolu oku gaohi ae gaahi mataba moe anovai ki he ika.

¶ 11 Koe mooni koe kau vale ae houeiki o Soani, koe fakakaukau oe kau boto o Felo kuo hoko ia koe fakakaukau vale: koeha oku mou behe ai kia Felo, Ko au koe foha oe boto, koe hako oe gaahi tu‘i i mua?

12 Oku ife akinautolu? Oku ife hoo kau tagata boto? tuku ke nau fakaha atu ni kiate koe, bea tuku ke nau ilo be koeha ae finagalo o Jihova oe gaahi kau tau ki Ijibite.

13 Kuo hoko o vale ae houeiki o Soani, kuo kākā‘i ae houeiki o Nofi; bea kuo nau fakahala a Ijibite ae malohiaga o hono gaahi faahiga.

14 Kuo tuku e Jihova ki ho nau lotolotoga ha laumalie talagataa: bea kuo nau fakahala‘i a Ijibite i he ene gaahi gaue kotoabe, o hage koe tajiba ae tagata kona i he ene lua.

15 Bea e ikai ha gaue ki Ijibite, e faa fai e he ulu be koe iku, e he vaa be koe tefito.

16 E tatau a Ijibite i he aho koia moe kau fefine: bea e tetetete mo manavahe ia koeuhi koe lulululu oe nima o Jihova oe gaahi kau tau, aia te ne lulululu kiate kinautolu.

17 Bea e hoko ae fonua ko Juta koe ilifiaaga ki Ijibite, bea ko kinautolu kotoabe oku lea ki ai e tetetete, koeuhi koe tuutuuni a Jihova oe gaahi kau tau, aia kuo ne fakakaukau ki ai.

¶ 18 I he aho koia e lea aki ae lea faka‐Kenani e he kolo e nima i he fonua ko Ijibite, bea te nau fuakava kia Jihova oe gaahi kau tau; bea e ui ae kolo e taha, Koe kolo oe fakaauha.

19 I he aho koia e ai ae feilaulauaga kia Jihova i he loto fonua o Ijibite, bea mo ha bou kia Jihova i hono gataaga.

20 Bea e hoko ia koe fakailoga bea koe fakamooni kia Jihova oe gaahi kau tau i he fonua ko Ijibite: he te nau tagi kia Jihova koeuhi koe kau fakamalohi, bea te ne fekau kiate kinautolu ha fakamoui, koe toko taha oku lahi, bea te ne fakamoui akinautolu.

21 Bea e ilo‘i a Jihova e Ijibite, bea e ilo e he kakai Ijibite a Jihova i he aho koia, bea te nau fai ae feilaulau moe foaki; io, te nau fuakava aki ha fuakava kia Jihova, bea fai ki ai.

22 Bea e ta‘i e Jihova a Ijibite: te ne ta‘i bea fakamoui: bea te nau toe tafoki kia Jihova, bea te ne tali ae nau hu, bea te ne fakamoui akinautolu.

¶ 23 I he aho koia e ai ha hala motua mei Ijibite ki Asilia, bea e ha‘u ae kau Asilia ki Ijibite, bea e alu ae kakai Ijibite ki Asilia, bea e fai fakataha ae kakai Ijibite moe kakai Asilia.

24 I he aho koia e lau ko hono toko tolu a Isileli fakataha mo Ijibite mo Asilia, io koe tabuaki i he loto fonua:

25 Aia e tabuaki e Jihova oe gaahi kau tau, o behe, Ke monuia a Ijibite ko hoku kakai, bea mo Asilia koe gaue a hoku nima, bea mo Isileli ko hoku tofia.