¶ 1 I HE kuoga koia nae ave e Melotaki‐balatani koe foha o Balatani, koe tu‘i o Babilone, ae gaahi tohi moe mea foaki kia Hesekaia: he kuo ne fanogo nae mahaki ia, bea kuo moui.

2 Bea nae fiefia ai a Hesekaia, bea naa ne fakaha ae fale o ene gaahi mea mahuiga, ae siliva, moe koula, moe gaahi mea namu kakala, moe lolo mahuiga, moe fale kotoa o ene mahafu tau, bea mo ia kotoabe nae ilo i hono gaahi tukuga koloa: nae ikai ha mea i hono fale, be i hono buleaga kotoabe, nae tae fakaha e Hesekaia kiate kinautolu.

¶ 3 Bea nae toki ha‘u a Isaia koe balofita ki he tu‘i ko Hesekaia, bea behe kiate ia, Koeha ae lea ae kau tagata ni? bea naa nau ha‘u meife kiate koe? Bea behe e Hesekaia, Kuo nau ha‘u mei he fonua mamao kiate au, io mei Babilone.

4 Bea behe eia, Koeha kuo nau mamata ai i ho fale? Bea beheage e Hesekaia, Koia kotoabe i hoku fale kuo nau mamata ki ai: oku ikai ha mea i he eku koloa kuou tae fakaha kiate kinautolu.

5 Bea nae toki behe e Isaia kia Hesekaia, Fanogo ki he folofola a Jihova oe gaahi kau tau:

6 Vakai, oku behe e Jihova, E ha‘u ae gaahi aho, e fetuku ki Babilone ae mea kotoabe oku i ho fale, bea mo ia kuo tanaki e hoo gaahi tamai o a‘u ki he aho ni: e ikai ha mea e toe.

7 Bea ko ho gaahi foha e tubu iate koe, aia te ke fakatubu, te nau ave; bea te nau hoko koe kau talifekau i he fale fakaeieiki oe tu‘i o Babilone.

8 Bea nae toki behe e Hesekaia kia Isaia, Oku lelei ae folofola a Jihova aia kuo ke lea aki. Bea naa ne toe behe, Koeuhi e i hoku gaahi aho ooku ae melino moe mooni.