ARIT, Mataio 4:1, 5–6, 8–9. Kabotaua Mataio 4:1, 5–6, 8–9; titebo bitaki aika karaoki n Ruka 4:2, 5–11
Iesu e kairaki iroun te Tamnei, tiaki iroun Tatan.
1 I mwina Iesu e kairaki iroun te Tamnei, nakon te rereua, bwa e na mena i rarikin te Atua.
5 I mwina Iesu e kairaki rake nakon te kaawa ae tabu, ao te Tamnei e katoka i aon taubukin te tembora.
6 I mwina te riaboro e roko nakoina ao e taku, Ngkana ngkoe Natin te Atua, ko na ewe nako, bwa e koreaki, Bwa e na anganiia ana anera te mwiokoaki ni kaineti ma ngkoe, ao i nanon baia a na tabekiko rake, bwa e kawa n te taina n toki waem ma te atibu.
8 Ao Iesu e a manga mena iroun te Tamnei, ao e kairia rake nakon te maunga ae moan te rietata, ao e kaotii nakoina abanuea ni kabane n te aonaba ao mimitongia.
9 Ao te riaboro e a manga roko nakoina, ao e taku, Ni kabane bwaai aikai N na anga nakoim, ngkana ko bobaraki ao n taromauriai.
ARIT, Mataio 4:11. Kabotaua Mataio 4:11
Iesu e kanakoia anera bwa a na beku ibukin Ioane te Tia Bwabetito.
11 Ao ngkai Iesu e ataia bwa Ioane e karinaki n te umwa ni kaikain, ao e kanakoia anera, ao, nooria, a roko ao a beku ibukina.
ARIT, Mataio 4:18. Kabotaua Mataio 4:19
Burabeti n te O Tetemanti a taekina Iesu.
18 Ao e taku nakoia, Bon Ngai are e koreaki taekana irouia burabeti; irirai, ao N na karikiko bwa te tia akawaia aomata.
ARIT, Mataio 4:22. Kabotaua Mataio 4:23
Iesu e katoki aorakia aomata i buakoia naake a kakoaua arana.
22 Ao Iesu e nako ni kabuta Kariraia n reireiniia i nanon aia tinakoke, ao n tataekina euangkerion te abanuea; ao ni katoki aoraki n aekaia nako, ao aekan nako aoraki i buakoia botanaomata ake a kakoaua arana.