ປຈສ, ໂຢຮັນ 1:1–34. ປຽບທຽບໃສ່ກັບ ໂຢຮັນ 1:1–34
ພຣະກິດຕິຄຸນຂອງພຣະເຢຊູຄຣິດໄດ້ຖືກສັ່ງສອນຕັ້ງແຕ່ຕົ້ນ. ໂຢຮັນບັບຕິສະໂຕແມ່ນອີລາຍ ຜູ້ຕຽມທາງໄວ້ໃຫ້ພຣະຄຣິດ, ແລະ ພຣະເຢຊູຄຣິດແມ່ນອີລາຍ ຜູ້ຟື້ນຟູທຸກສິ່ງທັງປວງ ແລະ ຄວາມລອດມາເຖິງຜ່ານພຣະອົງ.
1 ແຕ່ຕົ້ນເດີມ ພຣະກິດຕິຄຸນໄດ້ຖືກສັ່ງສອນຜ່ານພຣະບຸດ. ແລະ ພຣະກິດຕິຄຸນຄືພຣະຄຳ, ແລະ ພຣະຄຳໄດ້ສະຖິດຢູ່ກັບພຣະບຸດ, ແລະ ພຣະບຸດໄດ້ຢູ່ກັບພຣະເຈົ້າ, ແລະ ພຣະບຸດມາຈາກພຣະເຈົ້າ.
2 ຕັ້ງແຕ່ຕົ້ນພຣະອົງດຽວກັນນັ້ນໄດ້ຢູ່ນຳພຣະເຈົ້າ.
3 ພຣະອົງໄດ້ສ້າງທຸກສິ່ງທັງປວງ; ແລະ ບໍ່ມີສິ່ງໃດທີ່ເປັນມາໂດຍປາດສະຈາກພຣະອົງ.
4 ພຣະກິດຕິຄຸນມີຊີວິດຢູ່ໃນພຣະອົງ, ແລະ ພຣະກິດຕິຄຸນເປັນຊີວິດ, ແລະ ຊີວິດເປັນຄວາມສະຫວ່າງຂອງມະນຸດ;
5 ແລະ ຄວາມສະຫວ່າງສ່ອງເຂົ້າມາໃນໂລກ, ແລະ ໂລກເອົາຊະນະມັນບໍ່ໄດ້ຈັກເທື່ອ.
6 ຊາຍຜູ້ໜຶ່ງໄດ້ຖືກພຣະເຈົ້າສົ່ງມາ, ຜູ້ມີຊື່ວ່າ ໂຢຮັນ.
7 ຄົນດຽວກັນນັ້ນໄດ້ມາສູ່ໂລກເພື່ອເປັນພະຍານ, ເພື່ອເປັນພະຍານເຖິງຄວາມສະຫວ່າງ, ເພື່ອເປັນພະຍານເຖິງພຣະກິດຕິຄຸນຂອງພຣະບຸດ, ແກ່ຄົນທັງປວງ, ເພື່ອວ່າຜ່ານເພິ່ນ ມະນຸດອາດຈະເຊື່ອ.
8 ເພິ່ນບໍ່ແມ່ນຄວາມສະຫວ່າງນັ້ນ, ແຕ່ໄດ້ມາເພື່ອເປັນພະຍານເຖິງຄວາມສະຫວ່າງນັ້ນ,
9 ຊຶ່ງເປັນຄວາມສະຫວ່າງທີ່ແທ້ຈິງ, ຊຶ່ງສ່ອງໃສ່ມະນຸດທຸກຄົນ ຜູ້ໄດ້ເຂົ້າມາສູ່ໂລກ;
10 ແມ່ນແຕ່ພຣະບຸດຂອງພຣະເຈົ້າ. ພຣະອົງຜູ້ເຄີຍຢູ່ໃນໂລກມາແລ້ວ, ແລະ ໂລກໄດ້ຖືກສ້າງຂຶ້ນໂດຍພຣະອົງ, ແລະ ໂລກບໍ່ຮູ້ຈັກພຣະອົງເລີຍ.
11 ພຣະອົງໄດ້ສະເດັດມາຫາຄົນຂອງພຣະອົງເອງ, ແລະ ຄົນຂອງພຣະອົງເອງບໍ່ໄດ້ຕ້ອນຮັບພຣະອົງເລີຍ.
12 ແຕ່ຫລາຍຕໍ່ຫລາຍຄົນທີ່ຕ້ອນຮັບພຣະອົງ, ພຣະອົງກໍປະທານຄວາມສາມາດໃຫ້ກາຍເປັນບຸດຂອງພຣະເຈົ້າ; ພຽງແຕ່ແກ່ພວກເຂົາທີ່ເຊື່ອໃນພຣະນາມຂອງພຣະອົງ.
13 ພຣະອົງໄດ້ກຳເນີດມາ, ບໍ່ແມ່ນໂດຍອາໄສໂລຫິດ, ຫລື ຕາມຄວາມປະສົງຂອງເນື້ອໜັງ, ຫລື ຕາມຄວາມປະສົງຂອງມະນຸດ, ແຕ່ຈາກພຣະເຈົ້າ.
14 ແລະ ພຣະທຳດຽວກັນນັ້ນໄດ້ມາເກີດເປັນມະນຸດ, ແລະ ໄດ້ອາໄສຢູ່ໃນທ່າມກາງເຮົາທັງຫລາຍ, ແລະ ພວກເຮົາໄດ້ເຫັນລັດສະໝີພາບຂອງພຣະອົງ, ລັດສະໝີພາບຂອງພຣະອົງດຽວທີ່ຖືກຳເນີດຈາກພຣະບິດາ, ເຕັມໄປດ້ວຍພຣະຄຸນ ແລະ ຄວາມຈິງ.
15 ໂຢຮັນເປັນພະຍານເຖິງພຣະອົງ, ແລະ ໄດ້ຮ້ອງປະກາດວ່າ ຜູ້ນີ້ແຫລະ ຄືຜູ້ທີ່ເຮົາໄດ້ກ່າວເຖິງ; ຜູ້ທີ່ມາພາຍຫລັງເຮົາ, ກໍຍິ່ງໃຫຍ່ກວ່າເຮົາ; ເພາະພຣະອົງຢູ່ກ່ອນເຮົາແລ້ວ.
16 ເພາະຕັ້ງແຕ່ຕົ້ນ ພຣະທຳເປັນຢູ່ແລ້ວ, ແມ່ນແຕ່ພຣະບຸດ, ຜູ້ໄດ້ມາເກີດເປັນມະນຸດ, ແລະ ໄດ້ຖືກສົ່ງມາໃຫ້ພວກເຮົາ ໂດຍພຣະປະສົງຂອງພຣະບິດາ. ແລະ ຕາບໃດທີ່ຫລາຍຕໍ່ຫລາຍຄົນເຊື່ອໃນພຣະນາມຂອງພຣະອົງ ຈະໄດ້ຮັບຈາກຄວາມສົມບູນຂອງພຣະອົງ. ແລະ ຈາກຄວາມສົມບູນຂອງພຣະອົງ ເຮົາທັງປວງໄດ້ຮັບ, ແມ່ນແຕ່ຄວາມເປັນອະມະຕະ ແລະ ຊີວິດນິລັນດອນ, ຜ່ານພຣະຄຸນຂອງພຣະອົງ.
17 ເພາະກົດໄດ້ຖືກມອບໃຫ້ຜ່ານໂມເຊ, ແຕ່ຊີວິດ ແລະ ຄວາມຈິງມາເຖິງ ຜ່ານພຣະເຢຊູຄຣິດ.
18 ເພາະກົດເປັນໄປຕາມພຣະບັນຍັດຝ່າຍໂລກ, ສົ່ງຜົນໃຫ້ເກີດຄວາມຕາຍ; ແຕ່ພຣະກິດຕິຄຸນເປັນໄປຕາມພະລັງຂອງຊີວິດທີ່ເປັນນິດ, ຜ່ານພຣະເຢຊູຄຣິດ, ພຣະບຸດອົງດຽວທີ່ຖືກຳເນີດ, ຜູ້ຢູ່ໃນຊວງອົກຂອງພຣະບິດາ.
19 ແລະ ບໍ່ເຄີຍມີມະນຸດຄົນໃດເຄີຍເຫັນພຣະເຈົ້າ ບໍ່ວ່າຈະເປັນເວລາໃດ, ຍົກເວັ້ນແຕ່ຕອນທີ່ພຣະອົງເປັນພະຍານເຖິງພຣະບຸດ; ເພາະເວັ້ນແຕ່ໂດຍຜ່ານພຣະອົງ ບໍ່ມີມະນຸດຄົນໃດຈະລອດໄດ້.
20 ແລະ ນີ້ຄືບັນທຶກຂອງໂຢຮັນ, ເມື່ອຊາວຢິວໄດ້ສົ່ງພວກປະໂລຫິດ ແລະ ຊາວເລວີ ມາຈາກເຢຣູຊາເລັມ ໄປຖາມລາວວ່າ ລາວຄືໃຜ?
21 ແລະ ລາວໄດ້ຍອມຮັບ, ແລະ ບໍ່ໄດ້ປະຕິເສດວ່າ ລາວຄືອີລາຍ; ແຕ່ໄດ້ປະຕິເສດ, ກ່າວວ່າ; ຂ້າພະເຈົ້າບໍ່ແມ່ນພຣະຄຣິດ.
22 ແລະ ພວກເຂົາໄດ້ຖາມລາວວ່າ ທ່ານເປັນອີລາຍໄດ້ແນວໃດ? ແລະ ລາວໄດ້ກ່າວວ່າ ຂ້າພະເຈົ້າບໍ່ໄດ້ເປັນອີລາຍຄົນນັ້ນ ທີ່ຈະມາຟື້ນຟູທຸກສິ່ງທັງປວງ. ແລະ ພວກເຂົາໄດ້ຖາມລາວວ່າ ທ່ານຄືສາດສະດາຄົນນັ້ນບໍ? ແລະ ລາວໄດ້ຕອບວ່າ ບໍ່ແມ່ນ.
23 ຈາກນັ້ນ ພວກເຂົາໄດ້ກ່າວກັບລາວວ່າ ທ່ານຄືຜູ້ໃດ? ເພື່ອວ່າພວກເຮົາຈະໄດ້ໃຫ້ຄຳຕອບແກ່ຄົນທີ່ສົ່ງພວກເຮົາມາ. ທ່ານຈະກ່າວແນວໃດກ່ຽວກັບຕົວທ່ານເອງ?
24 ລາວໄດ້ກ່າວວ່າ ຂ້າພະເຈົ້າຄືສຽງຂອງຄົນທີ່ຮ້ອງປະກາດ ຢູ່ໃນຖິ່ນແຫ້ງແລ້ງກັນດານ, ຈົ່ງແປງທາງຂອງພຣະຜູ້ເປັນເຈົ້າໃຫ້ຊື່ຕົງ, ດັ່ງທີ່ສາດສະດາເອຊາອັດໄດ້ກ່າວໄວ້.
25 ແລະ ພວກເຂົາເປັນຜູ້ທີ່ຖືກພວກຟາຣີຊາຍສົ່ງມາ.
26 ແລະ ພວກເຂົາໄດ້ຖາມລາວ, ແລະ ກ່າວກັບລາວວ່າ ແລ້ວດ້ວຍເຫດໃດທ່ານຈຶ່ງໃຫ້ບັບຕິສະມາ, ຖ້າຫາກທ່ານບໍ່ໄດ້ເປັນພຣະຄຣິດ, ຫລື ອີລາຍ ຜູ້ຈະຟື້ນຟູທຸກສິ່ງທັງປວງ, ຫລື ສາດສະດາຜູ້ນັ້ນ?
27 ໂຢຮັນໄດ້ຕອບພວກເຂົາວ່າ ຂ້າພະເຈົ້າໃຫ້ຮັບບັບຕິສະມາດ້ວຍນ້ຳ, ແຕ່ມີຄົນໜຶ່ງຢູ່ໃນບັນດາພວກທ່ານ ຜູ້ຊຶ່ງພວກທ່ານບໍ່ຮູ້ຈັກ;
28 ພຣະອົງຄືຜູ້ທີ່ຂ້າພະເຈົ້າກ່າວເປັນພະຍານ. ພຣະອົງຄືສາດສະດາຜູ້ນັ້ນ, ແມ່ນແຕ່ອີລາຍ, ຜູ້ໄດ້ມາຫລັງຈາກຂ້າພະເຈົ້າ, ຜູ້ທີ່ຍິ່ງໃຫຍ່ກວ່າຂ້າພະເຈົ້າ, ຜູ້ຊຶ່ງແມ່ນແຕ່ສາຍເກີບຂອງເພິ່ນ ຂ້າພະເຈົ້າກໍບໍ່ສົມຄວນຈະແກ້ໃຫ້, ຫລື ຕຳແໜ່ງທີ່ຂ້າພະເຈົ້າບໍ່ມີວັນຈະເໝາະສົມ ເພາະພຣະອົງຈະໃຫ້ບັບຕິສະມາ, ບໍ່ພຽງແຕ່ດ້ວຍນ້ຳເທົ່ານັ້ນ, ແຕ່ດ້ວຍໄຟ, ແລະ ດ້ວຍພຣະວິນຍານບໍລິສຸດນຳອີກ.
29 ມື້ຕໍ່ມາ ໂຢຮັນໄດ້ເຫັນພຣະເຢຊູມາຫາລາວ, ແລະ ກ່າວວ່າ ຈົ່ງເບິ່ງພຣະເມສານ້ອຍຂອງພຣະເຈົ້າ, ຜູ້ໄດ້ຮັບເອົາບາບກຳຂອງໂລກໄປ!
30 ແລະ ໂຢຮັນໄດ້ເປັນພະຍານເຖິງພຣະອົງແກ່ຜູ້ຄົນ ໂດຍກ່າວວ່າ ນີ້ຄືພຣະອົງຜູ້ທີ່ຂ້າພະເຈົ້າໄດ້ກ່າວໄວ້; ຊາຍຄົນໜຶ່ງທີ່ຍິ່ງໃຫຍ່ກວ່າຂ້າພະເຈົ້າ ຈະມາຫລັງຈາກຂ້າພະເຈົ້າ; ເພາະພຣະອົງໄດ້ເປັນຢູ່ກ່ອນຂ້າພະເຈົ້າ, ແລະ ຂ້າພະເຈົ້າຮູ້ຈັກພຣະອົງ, ແລະ ວ່າພຣະອົງຈະຖືກສະແດງໃຫ້ປະຈັກແກ່ຊາວອິດສະຣາເອນ; ສະນັ້ນ ຂ້າພະເຈົ້າຈຶ່ງມາໃຫ້ບັບຕິສະມາດ້ວຍນ້ຳ.
31 ແລະ ໂຢຮັນໄດ້ກ່າວເປັນພະຍານບອກວ່າ ເມື່ອພຣະອົງໄດ້ຮັບບັບຕິສະມາຈາກຂ້າພະເຈົ້າ, ຂ້າພະເຈົ້າໄດ້ເຫັນພຣະວິນຍານສະເດັດລົງມາຈາກສະຫວັນດັ່ງນົກເຂົາ, ແລະ ມາສະຖິດຢູ່ເທິງພຣະອົງ.
32 ແລະ ຂ້າພະເຈົ້າຮູ້ຈັກພຣະອົງ; ເພາະ ພຣະອົງໄດ້ສົ່ງຂ້າພະເຈົ້າມາໃຫ້ບັບຕິສະມາດ້ວຍນ້ຳ, ພຣະອົງດຽວກັນນັ້ນໄດ້ກ່າວກັບຂ້າພະເຈົ້າວ່າ ຢູ່ເທິງຜູ້ນັ້ນ ເຈົ້າຈະເຫັນພຣະວິນຍານສະເດັດລົງມາ, ແລະ ສະຖິດຢູ່ເທິງເພິ່ນ, ແລະ ຄົນນັ້ນຄືຜູ້ທີ່ໃຫ້ບັບຕິສະມາດ້ວຍພຣະວິນຍານບໍລິສຸດ.
33 ແລະ ຂ້າພະເຈົ້າໄດ້ເຫັນ, ແລະ ເປັນພະຍານວ່າ ນີ້ແມ່ນພຣະບຸດຂອງພຣະເຈົ້າ.
34 ສິ່ງເຫລົ່ານີ້ ໄດ້ຖືກກະທຳໄປໃນເບັດທາບາຣາ, ເລີຍຈາກແມ່ນ້ຳຈໍແດນໄປ, ບ່ອນທີ່ໂຢຮັນໃຫ້ບັບຕິສະມາ.
ປຈສ, ໂຢຮັນ 1:42. ປຽບທຽບໃສ່ກັບ ໂຢຮັນ 1:42
ເກຟາ ໝາຍເຖິງ “ຜູ້ພະຍາກອນ” ຫລື “ຫີນ.”
42 ແລະ ລາວໄດ້ພາຊາຍຄົນໜຶ່ງໄປຫາພຣະເຢຊູ. ແລະ ເມື່ອພຣະເຢຊູເບິ່ງລາວແລ້ວ, ພຣະອົງໄດ້ກ່າວວ່າ ເຈົ້າຊື່ຊີໂມນ, ລູກຂອງໂຢນາ, ແຕ່ເຈົ້າຈະຖືກເອີ້ນວ່າ ເກຟາ, ຊຶ່ງແປວ່າ ຜູ້ພະຍາກອນ, ຫລື ຫີນ. ແລະ ພວກເຂົາເປັນຄົນຫາປາ. ແລະ ພວກເຂົາໄດ້ປະທຸກສິ່ງທັນທີ, ແລະ ໄດ້ຕິດຕາມພຣະເຢຊູໄປ.