ປຈສ, ຢາໂກໂບ 2:1. ປຽບທຽບໃສ່ກັບ ຢາໂກໂບ 2:1
ສະມາຊິກບໍ່ຄວນນັບຖືຄົນໜຶ່ງສູງກວ່າອີກຄົນໜຶ່ງ.
1 ພີ່ນ້ອງທັງຫລາຍຂອງຂ້າພະເຈົ້າເອີຍ, ພວກທ່ານບໍ່ສາມາດມີສັດທາເຖິງອົງພຣະເຢຊູຄຣິດເຈົ້າຂອງພວກເຮົາ, ພຣະຜູ້ເປັນເຈົ້າແຫ່ງລັດສະໝີພາບ, ແລະ ຍັງເລືອກໜ້າຄົນ.
ປຈສ, ຢາໂກໂບ 2:14–21. ປຽບທຽບໃສ່ກັບ ຢາໂກໂບ 2:14–22
ສັດທາທີ່ບໍ່ມີການປະຕິບັດກໍໄຮ້ຜົນ ແລະ ບໍ່ສາມາດລອດພົ້ນ.
14 ຈະມີປະໂຫຍດຫຍັງ, ພີ່ນ້ອງທັງຫລາຍຂອງເຮົາເອີຍ, ຖ້າຄົນໜຶ່ງຈະເວົ້າວ່າ ຕົນມີສັດທາ, ແຕ່ບໍ່ມີການປະຕິບັດ? ສັດທາຈະເຮັດໃຫ້ລາວລອດພົ້ນໄດ້ບໍ?
15 ແທ້ຈິງແລ້ວ, ຄົນໜຶ່ງອາດເວົ້າວ່າ, ຂ້ອຍຈະສະແດງໃຫ້ເຈົ້າເຫັນວ່າ ຂ້ອຍມີສັດທາ ຊຶ່ງບໍ່ມີການປະຕິບັດ; ແຕ່ເຮົາເວົ້າວ່າ, ຈົ່ງສະແດງໃຫ້ເຮົາເຫັນສັດທາຂອງເຈົ້າ ຊຶ່ງບໍ່ມີການປະຕິບັດ, ແລະ ຝ່າຍເຮົາຈະສະແດງໃຫ້ເຈົ້າເຫັນສັດທາຂອງເຮົາ ດ້ວຍການປະຕິບັດຂອງເຮົາ.
16 ເພາະຖ້າພີ່ນ້ອງຊາຍຍິງຄົນໃດ ບໍ່ມີເຄື່ອງນຸ່ງຫົ່ມ ແລະ ຂາດເຂີນອາຫານປະຈຳວັນ, ແລະ ມີຄົນໃດໃນພວກເຈົ້າເວົ້າແກ່ເຂົາວ່າ, ຈົ່ງໄປເປັນສຸກເທີ້ນ ຂໍໃຫ້ອົບອຸ່ນ ແລະ ກິນອີ່ມ; ແຕ່ເຂົາບໍ່ໄດ້ໃຫ້ສິ່ງຂອງທີ່ຕ້ອງການສຳລັບຕົວນັ້ນ; ສັດທາຂອງເຈົ້າຈະເປັນປະໂຫຍດອັນໃດແກ່ສິ່ງນີ້?
17 ຢ່າງນັ້ນແຫລະ ສັດທາກໍຢ່າງດຽວກັນ, ຖ້າບໍ່ມີການປະຕິບັດ ກໍຕາຍແລ້ວ.
18 ສະນັ້ນ ໂອ້ ຄົນໂງ່ເອີຍ, ເຈົ້າຮູ້ບໍວ່າ ສັດທາທີ່ບໍ່ມີການປະຕິບັດນັ້ນກໍໄຮ້ຜົນ ແລະ ບໍ່ສາມາດຊ່ວຍເຈົ້າໃຫ້ລອດ?
19 ພວກເຈົ້າທີ່ເຊື່ອວ່າ ມີພຣະເຈົ້າຢູ່ອົງດຽວ ກໍດີຢູ່ແລ້ວ; ສ່ວນພວກຜີມານຮ້າຍກໍເຊື່ອເໝືອນກັນ, ແລະ ຢ້ານຈົນຕົວສັ່ນ; ພວກເຈົ້າກໍເຮັດໃຫ້ຕົວເອງເປັນຄືກັນກັບພວກມັນ, ໂດຍທີ່ເປັນຄົນບໍ່ຊອບທຳ.
20 ອັບຮາຣາມບັນພະບຸລຸດຂອງເຮົາເປັນຄົນຊອບທຳ ໂດຍການປະຕິບັດ, ໃນການຖວາຍອີຊາກລູກຊາຍຂອງເພິ່ນເທິງແທ່ນບູຊາ.
21 ເຈົ້າກໍເຫັນແລ້ວວ່າ ການປະຕິບັດກໍໄປຄວບຄູ່ກັບສັດທາຂອງເພິ່ນ, ແລະ ໂດຍການປະຕິບັດ ສັດທາຂອງເພິ່ນຈຶ່ງເຮັດໃຫ້ດີຄົບຖ້ວນໄດ້.