17. B’eenik toj sa’ rokeb’aal li saq’e
Kik’uub’aman elk chaq sa’ Nauvoo, Illinois chiru Marzo toj Abril, a’b’anan rik’in naq eb’ li ch’uut chi aj rahob’tesinel ke’xyeechi’i chaq xkamikeb’, li Awa’b’ej Brigham Young kixb’eresiheb’ laj santil paab’anel naq te’ok chi eelelik chi junpak’al li Nima’ Mississippi chalen 4 Febrero 1846. Li Awa’b’ej Young kikana chi ixb’ej re xk’anjelankil li tiqib’aak choq’ reheb’ laj santil paab’anel, ut ink’a’ ki’el chaq Nauvoo toj reetal sa’ xyitoq Febrero.
K’a’ru kik’ulman: Rub’elaj xkamik, li Profeet aj Jose Smith kixye jo’ profeet: “Junjunq eere laa’ex texxik ut textenq’anq chixk’eeb’al ochoch sa’ li ch’och’ ut chixyiib’ankileb’ li tenamit, ut teerileb’ laj santil paab’anel chi ok choq’ xnimal ru tenamit sa’ xyiheb’ li Tzuul Rocosa.” Ka’ch’in chik ma kab’laju chi mil chi aj santil paab’anel ke’el chaq Nauvoo chalen chaq Febrero toj Septiembre 1846. Chirix naq eb’ laj santil paab’anel ke’el chaq Winter Quarters ut moqon jalaneb’ chik li na’ajej, ke’k’uub’aman sa’eb’ li teep chi lajetq, chi lajetq roxk’aal (50), ut chi cient, rub’el xwankil jun aj taqlanel re teep (Tz. ut S. 136:3). Sa’ Septiembre 1846 jun ch’uut chi aj rahob’tesinel, 800 chi winq rajlankileb’ ke’xsut rix Nauvoo, ut wankeb’ waqib’ lix ninqi puub’. Chirix pleetik chiru junjunq kutan, eb’ laj santil paab’anel li ke’kana ke’mine’ ru chixq’axtesinkil rib’ re xkolb’al xyu’ameb’ ut re te’ruuq chixq’axb’al li nima’. Oob’ malaj waqib’ cient chi winq, ixq, ut kok’al ke’xq’ax li nima’ ut ke’xk’ojob’ rib’ chire li ha’. Li Awa’b’ej Brigham Young kixtaqlaheb’ li teep aj kolonel re xk’amb’aleb’ chaq li “neb’a’ aj santil paab’anel” a’in.