Sekshon 9
Revelashon duná pa medio di José Smith e Profeta na Oliver Cowdery, na Harmony, Pennsylvania, na aprel 1829. Oliver ta wòrdu amonestá pa tene pasenshi i ta urgié pa ta komforme ku skirbi, pa aworaki, riba loke e traduktor ta dikta, na lugá di purba tradusí.
1–6, Otro registronan antiguo mester wòrdu tradusí ainda; 7–14, E Buki di Mormon ta wòrdu tradusí dor di estudio i dor di konfirmashon spiritual.
1 Mira, mi ta bisa n’abo, mi yu, ku pa motibu ku bo no a tradusí di akuerdo ku e lokual bo a deseá di mi, i a kuminsá atrobe na skirbi pa mi siervo, José Smith Jr., asina lo mi kièr pa bo kontinuá te na momento ku bo a konkluí e registro aki, kual mi a konfia na dje.
2 I e ora ei, mira, mi tin otro registronan, ku lo mi duna bo poder pa bo por yuda pa tradusí.
3 Tene pasenshi, mi yu, pasobra e ta segun mi sabiduria, i e no ta oportuno pa bo tradusí na e momento aki.
4 Mira, e obra kual bo ta yamá pa hasi ta di skirbi pa mi siervo José.
5 I, mira, ta pa motibu ku bo no a kontinuá manera bo na komienso, ora bo a kuminsá ta tradusí, ku mi a kita e privilegio aki for di bo.
6 No murmurá, mi yu, pasobra e ta segun mi sabiduria ku mi a obra ku bo na e manera aki.
7 Mira, bo no a komprondé; bo a suponé ku lo mi konsedé n’abo, ora bo no a konsiderá sino di pidi mi.
8 Pero mira, mi ta bisa n’abo, ku bo mester studié den bo mente; e ora ei bo mester puntra mi si e ta korekto, i si e ta korekto lo mi laga bo sinti un kayente intenso den bo pechu; pues, lo bo sinti ku e ta korekto.
9 Pero si e no ta korekto lo bo no tin tal sintimentunan, pero lo bo tin un estado mental insensibel ku lo laga bo lubidá e lokual ta robes; pues, bo no por skirbi e lokual ta sagrado eksepto bo risibié di mi.
10 Awor, si bo tabata sa esaki lo bo por a tradusí; sinembargo, e no ta oportuno pa bo tradusí aworaki.
11 Mira, e tabata oportuno ora bo a kuminsá; pero bo a teme, i e tempu a pasa, i e no ta kumbiniente aworaki;
12 Pasobra bo no ta mira ku mi a duna mi siervo José sufisiente forsa pa medio di kua esaki ta wòrdu kompensá? I ningun di boso dos mi a kondená.
13 Hasi esaki kual mi a manda bo, i lo bo prosperá. Ta fiel, i no sede na ningun tentashon.
14 Para firme den e obra na kual mi a yama bo, i ni un kabei di bo kabes lo bai pèrdí, i lo bo wòrdu alsá na e delaster dia. Amèn.