Sekshon 7
Revelashon duná na José Smith e Profeta i Oliver Cowdery, na Harmony, Pennsylvania, na aprel 1829, ora nan a puntra pa medio di e Urim i Tumim si Huan, e disipel stimá, a permanesé den karni òf a muri. E revelashon ta un vershon tradusí di e registro hasí riba ròl di buki di kueru dor di Huan ku e mes a skonde.
1–3, Huan esun Stimá lo biba te na momento ku Señor bini; 4–8, Pedro, Hakobo, i Huan ta poseé e yabinan di evangelio.
1 I Señor a bisa n’ami: Huan, mi stimá, kiko bo ta deseá? Pasobra si bo pidi loke bo ke, e lo wòrdu konsedé n’abo.
2 I mi a bis’é: Señor, duna mi poder riba morto, pa mi por biba i trese almanan n’abo.
3 I Señor a bisa n’ami: Di bèrdat, di bèrdat, mi ta bisa n’abo, pa motibu ku bo ta deseá esaki lo bo permanesé te na momento ku mi bini den mi gloria, i lo profetisá dilanti nashon, tribu, idioma i pueblonan.
4 I pa e motibu aki Señor a bisa na Pedro: Si mi ke pa e permanesé te na e momento ku mi bini bèk, kiko esei tin di aber ku abo? Pasobra el a deseá di mi pa e por trese almanan n’ami, pero abo a deseá pa bo por bini lihé serka mi den mi reino.
5 Mi ta bisa n’abo, Pedro, esaki tabata un bon deseo; pero mi stimá a deseá pa e por hasi mas, òf un obra ainda mas grandi entre hende ku loke el a realisá promé.
6 Sí, el a emprendé un obra mas grandi; pues lo mi hasié manera un vlam di kandela i un angel ministrante; e lo ministrá pa esnan ku lo ta herederonan di salbashon ku ta habitá riba tera.
7 I ami lo laga bo ministrá na dje i na bo ruman Hakobo; i na boso tres lo mi duna e poder aki i e yabinan di e ministerio aki te na e momento ku mi bini.
8 Di bèrdat mi ta bisa n’abo, lo konsedé na boso dos di akuerdo ku boso deseonan, pasobra boso dos tin goso den e lokual boso a deseá.