Sekshon 6
Revelashon duná na José Smith e Profeta i Oliver Cowdery, na Harmony, Pennsylvania, na aprel 1829. Oliver Cowdery a kuminsá su labornan komo skirbidó den e tradukshon di e Buki di Mormon, dia 7 di aprel di 1829. El a risibí un manifestashon divino kaba di e bèrdat di e Profeta su testimonio relashoná ku e planchanan riba kual e registro di e Buki di Mormon tabata grabá. E Profeta a puntra Señor pa medio di e Urim i Tumim i a risibí e kontesta aki.
1–6, Obreronan den e kampo di Señor ta logra salbashon; 7–13, No tin un don mas grandi ku e don di salbashon; 14–27, Ta risibí un testimonio di e bèrdat pa medio di e poder di e Spiritu; 28–37, Wak na Kristu, i hasi bon kontinuamente.
1 Un obra grandi i maravioso ta serka di aparesé entre e yunan di hende.
2 Mira, ami ta Dios; duna oido na mi palabra, kual ta bibu i poderoso, mas skèrpi ku un spada di dos banda, na e divishon di tantu skarnir komo médula; pues, pone atenshon na mi palabranan.
3 Mira, e kampo ya ta blanku pa kosecha; pues, ken ku deseá pa kosechá, lag’é zwai su zeis ku tur su forsa, i kosechá miéntras e dia ta dura, pa e por warda pa su alma salbashon sempiterno den e reino di Dios.
4 Sí, ken ku zwai su zeis i kosechá, ta yamá pa Dios.
5 Pues, si bo pidi mi lo bo risibí; si bo bati lo habri p’abo.
6 Awor, manera bo a puntra, mi ta bisa n’abo, warda mi mandamentunan, i prokurá pa saka na lus i establesé e kousa di Sion;
7 No buska rikesa pero sabiduria, i mira, e misterionan di Dios lo wòrdu revelá n’abo, i e ora ei lo bo ta riku. Mira, riku ta esun ku tin bida eterno.
8 Di bèrdat, di bèrdat, mi ta bisa n’abo, asta manera bo ta deseá di mi lo wòrdu konsedé n’abo; i si bo deseá, lo bo ta e medio pa hasi hopi kos bon den e generashon aki.
9 No prediká nada sino arepentimentu na e generashon aki; warda mi mandamentunan, i yuda saka mi obra na lus, segun mi mandamentunan, i lo bo wòrdu bendishoná.
10 Mira bo tin un don, i bendishoná bo ta pa motibu di bo don. Kòrda ku e ta sagrado i ta bini di ariba—
11 I si bo puntra, lo bo konosé misterionan kual ta grandi i maravioso; pues lo bo ehersé bo don, pa bo por deskubrí misterionan, pa bo por trese hopi na e konosementu di e bèrdat, sí, konvensé nan di e eror di nan kustumbernan.
12 No duna di konosé bo don na ningun hende eksepto ta na esnan ku ta di bo fe. No bagatelisá kosnan sagrado.
13 Si bo hasi bon, sí, i wanta fielmente te na fin, lo bo wòrdu salbá den e reino di Dios, kual ta esun mas grandi di tur e donnan di Dios; pasobra no tin don mas grandi ku e don di salbashon.
14 Di bèrdat, di bèrdat, mi ta bisa n’abo, bendishoná bo ta pa loke bo a hasi; pasobra bo a puntra mi, i mira, kada bia ku bo a puntra bo a risibí instrukshon di mi Spiritu. Si no tabata asina, lo bo no yega na e lugá kaminda bo ta aworaki.
15 Mira, bo sa ku bo a puntra mi i mi a iluminá bo mente; i awor mi ta bisa bo e kosnan aki pa bo por sa ku bo a wòrdu iluminá pa medio di e Spiritu di bèrdat;
16 Sí, mi ta bisa n’abo, pa bo por sa ku no tin ningun otro eksepto Dios ku konosé bo pensamentunan i e intenshonnan di bo kurason.
17 Mi ta bisa bo e kosnan aki komo un testimonio pa bo—ku e palabranan òf e obra kual bo a bin ta skirbi ta bèrdat.
18 Pues sea diligente; apoyá mi siervo José fielmente, den kualkièr sirkumstansia difísil ku e por enkontrá su mes pa motibu di e palabra.
19 Amonest’é den su faltanan i tambe risibí amonestashon di dje. Tene pasenshi; ta soberbio; ta moderá; tin pasenshi, fe, speransa i karidat.
20 Mira, abo ta Oliver, i mi a papia n’abo pa motibu di bo deseonan; pues warda e palabranan aki den bo kurason. Ta fiel i diligente den warda e mandamentunan di Dios, i lo mi rondoná bo den e brasanan di mi amor.
21 Mira, ami ta Hesu-Kristu, e Yu di Dios. Mi ta e mesun ku a bini serka esnan di mi, i esnan di mi no a risibí mi. Mi ta e lus kual ta bria den skuridat, i e skuridat no ta komprondé.
22 Di bèrdat, di bèrdat, mi ta bisa n’abo, si bo ta deseá mas testimonio, pensa riba e anochi ku bo a implorá n’ami den bo kurason, pa bo por sa konserniente e bèrdat di e kosnan aki.
23 Mi no a trese pas na bo mente konserniente e asuntu? Ki testimonio mas grandi bo por tin ku di Dios?
24 I awor, mira, bo a risibí un testimonio; pasobra si mi a deklará bo kosnan kual ningun hende sa, bo no a risibí un testimonio?
25 I, mira, mi ta konsedé n’abo un don, si bo ta deseá di mi, pa tradusí, asta meskos ku mi siervo José.
26 Di bèrdat, di bèrdat, mi ta bisa n’abo, ku tin registronan kual ta kontené hopi di mi evangelio, kual a wòrdu retené pa motibu di e maldat di e pueblo.
27 I awor mi ta manda bo, ku si bo tin bon deseonan—un deseo pa warda tesoronan pa bo mes den shelu—e ora ei lo bo asistí den trese na lus, ku bo don, e partinan ei di mi Skrituranan kual a wòrdu skondí pa motibu di maldat.
28 I awor, mira, mi ta duna bo, i tambe na mi siervo José, e yabinan di e don aki, kual lo trese na lus e ministerio aki; i den boka di dos òf tres testigu tur palabra lo wòrdu establesé.
29 Di bèrdat, di bèrdat, mi ta bisa na boso, si nan rechasá mi palabranan, i e parti aki di mi evangelio i ministerio, bendishoná boso ta, pasobra nan no por hasi ku boso mas di loke nan a hasi ku ami.
30 I asta si nan hasi ku boso manera nan a hasi ku ami, bendishoná boso ta, pasobra boso lo habitá ku mi den mi gloria.
31 Pero si nan no rechasá mi palabranan, kual lo wòrdu establesé pa medio di e testimonio kual lo wòrdu duná, bendishoná nan ta, i e ora ei boso lo tin goso den e fruta di boso labornan.
32 Di bèrdat, di bèrdat, mi ta bisa na boso, manera mi a bisa na mi disipelnan, kaminda tin dos òf tres ta reuní den mi nòmber, konserniente algu, mira, einan lo mi ta meimei di nan—asina manera ami ta meimei di boso.
33 No teme pa hasi bon, mi yunan, pasobra lokual boso planta, esei tambe boso lo kosechá; pues, si boso planta loke ta bon boso lo kosechá loke ta bon tambe pa boso rekompensa.
34 Pues, no teme, mi lamchinan; hasi bon; laga tera i fièrnu kombiná kontra boso, pasobra si boso ta edifiká riba mi baranka, nan no por prevalesé.
35 Mira, mi no ta kondená boso; bai boso kamindanan i no peka mas; kumpli ku solemnidat e obra kual mi a manda boso.
36 Wak na ami den kada pensamentu; no duda, no teme.
37 Mira e heridanan kual a traspasá mi kustia, i tambe e markanan di e klabunan den mi man i pianan; ta fiel, warda mi mandamentunan, i boso lo heredá e reino di shelu. Amèn.