Sekshon 3
Revelashon duná na José Smith e Profeta, na Harmony, Pennsylvania, na yüli 1828, relashoná ku e pèrdida di 116 página di manuskrito tradusí for di e promé parti di e Buki di Mormon, kual a wòrdu yamá e buki di Lehi. E Profeta a permití ku resistensia pa e páginanan aki pasa for di su kustodia pa esun di Martin Harris, kende a sirbi pa un temporada kòrtiku komo skirbidó den e tradukshon di e Buki di Mormon. E revelashon a wòrdu duná pa medio di e Urim i Tumim. (Wak sekshon 10.)
1–4, E via di Señor ta un giro eterno; 5–15, José Smith mester arepentí òf e lo pèrdè e don pa tradusí; 16–20, E Buki di Mormon ta sali pa salba e desendensia di Lehi.
1 E obranan i e diseñonan i e propósitonan di Dios no por wòrdu frustrá, tampoko nan por wòrdu redusí na nada.
2 Pasobra Dios no ta kana den kamindanan korkobá, tampoko e ta bira na man drechi ni na man robes, tampoko e ta varia for di e lokual el a bisa, pues su kamindanan ta rekto, i su kurso ta un giro eterno.
3 Kòrda, kòrda ku no ta e obra di Dios ta esun ku ta frustra, pero e obra di hende;
4 Pasobra aunke un hende por risibí hopi revelashon, i tin poder pa hasi hopi obra poderoso, sinembargo si e broma den su propio forsa, i despresiá e konsehonan di Dios, i ta sigui e diktadonan di su propio boluntat i deseonan karnal, e mester kai i trese e vengansa di un Dios hustu riba su mes.
5 Mira, bo a wòrdu konfiá ku e kosnan aki, pero kon estrikto bo mandamentunan tabata; i kòrda tambe e promesanan kual a wòrdu hasí n’abo, si bo no transgredí nan.
6 I mira, kon frekuente bo a transgredí e mandamentunan i e leinan di Dios, i a sigui e persuashonnan di hende.
7 Pasobra, mira, bo no mester a teme hende mas ku Dios. Aunke hende ta fiha e konsehonan di Dios komo nada, i ta despresiá su palabranan—
8 Sinembargo bo mester tabata fiel; i e lo a ekstendé su brasa i defendé bo kontra tur e flechanan di kandela di e atversario; i e lo tabata huntu ku bo den tur momento di difikultat.
9 Mira, abo ta José, i bo a wòrdu skohé pa hasi e obra di Señor, pero lo bo kai pa motibu di transgreshon, si bo no ta alèrta.
10 Pero kòrda, Dios ta mizerikòrdioso; pues, arepentí di e lokual bo a hasi kual ta kontrario na e mandamentu kual mi a duna bo, i ainda bo ta skohí, i atrobe bo ta yamá na e obra;
11 Eksepto bo hasi esaki, lo bo wòrdu desampará i bira manera otro hòmbernan, i lo bo no tin don mas.
12 I ora bo a entregá e lokual bo a tradusí pa medio di e vishon i poder ku Dios a duna bo, bo a entregá e lokual tabata sagrado den man di un hòmber malbado;
13 Ku a despresiá e konsehonan di Dios, i a kibra e promesanan di mas sagrado kual a wòrdu hasí dilanti Dios, i a dependé riba su propio huisio i broma den su propio sabiduria.
14 I esaki ta e motibu dikon bo a pèrdè bo privilegio pa un temporada—
15 Pasobra bo a permití pa e konseho di bo direktor wòrdu trapá for di un prinsipio.
16 Sinembargo, mi obra lo avansá, pasobra di tal manera ku e konosementu di un Salbador a bini na mundu, pa medio di e testimonio di e hudiunan, asina tambe e konosementu di un Salbador lo yega na mi pueblo—
17 I na e nefitanan, i e yakobitanan, i e jozefitanan, i e zoramitanan, pa medio di e testimonio di nan tatanan—
18 I e testimonio aki lo yega na e konosementu di e lamanitanan i e lemuelitanan i e ismaelitanan, kende a degenerá den inkredulidat pa motibu di e maldat di nan tatanan, kende Señor a permití pa destruí nan rumannan e Nefitanan, pa motibu di nan maldat i nan abominashonnan.
19 I pa e mesun propósito aki e planchanan a wòrdu preservá, kual ta kontené e registronan aki—pa e promesanan di Señor por wòrdu kumplí, kual el a hasi na su pueblo;
20 I ku e lamanitanan por yega na e konosementu di nan tatanan, i pa nan por sa e promesanan di Señor i pa nan por kere e evangelio i konfia den e méritonan di Hesu-Kristu i wòrdu glorifiká pa medio di fe den su nòmber i ku pa medio di arepentimentu nan por wòrdu salbá. Amèn.