Scriptures
E Testimonio Di Tres Testigunan


E Testimonio Di Tres Testigunan

Sea konosí na tur nashon, tribu, lenga, i pueblonan, na kua e obra aki lo yega: ku nos, pa medio di e grasia di Dios e Tata, i nos Señor Jesucristo, a mira e plachinan ku tin e registro aki, ku ta un registro di e pueblo di Nefi, i tambe di e lamanitanan, nan rumannan, i tambe di e pueblo di Jared, kendenan a bini for di e toren di kua a wòrdu papiá. I nos sa tambe ku nan a wòrdu tradusí pa e don i poder di Dios, pasobra su stèm a deklará esaki na nos; di manera ku nos sa sigur ku e obra ta bèrdadero. I tambe nos ta testifiká ku nos a mira e grabadonan ku tin riba e plachinan; i nan a wòrdu mustrá na nos pa e poder di Dios, i no di hende.

I nos ta deklará ku palabranan di seriedat, ku un angel di Dios a baha for di shelu, i el a tresé i poné dilanti di nos wowonan, ku nos a ripará i mira e plachinan, i e grabadonan riba nan; i nos sa ku ta pa e grasia di Dios e Tata, i nos Señor Jesucristo, ku nos a mira i duna testimonio ku e kosnan aki ta bèrdat. I ta maravioso den nos bista. Sinembargo, e stèm di Señor a mandanos pa nos duna testimonio di dje; asina ku, pa obedesé e mandamentu di Dios, nos ta duna testimonio di e kosnan aki.

I nos sa ku si nos ta fiel den Cristo, nos lo libra nos paña di e sanger di tur hende, i lo wòrdu hañá sin mancha dilanti e tribunal di Cristo, i lo biba eternamente huntu kuné den e shelunan . I e honor sea na e Tata, i na e Yu, i na e Spiritu Santu, ku ta un Dios. Amèn.

Oliver Cowdery

David Whitmer

Martin Harris