Un Splikashon Breve Riba E Buki Di Mormon

E Buki di Mormon ta un registro sagrado di pueblonan den e antiguo kontinente Merikano, i tabata grabá riba blachinan di metal. Kuater sorto di plachinan di registro di metal ta wòrdu menshoná den e buki mes:

1. E Plachinan di Nefi, ku tabata di dos sorto: E Plachinan Chikí i e Plachinan Grandi. E proménan tabata dediká mas partikularmente na e asuntunan spiritual i e ministerio i siñansanan di e profetanan, mientras e delasternan tabata mas tantu okupá pa un historia sekular di e pueblo konserní (1 Nefi 9:2–4). Sinembargo, for di e tempu di Mosía, e plachinan grandi tambe tabata inkluí kosnan di mayor importansia spiritual.

2. E Plachinan di Mormon, ku ta konsistí di un kompendio hasí pa Mormon for di e Plachinan Grandi di Nefi, ku hopi komentarionan. E Plachinan aki tambe tabata kontené un kontinuashon di e historia pa Mormon i adishonnan pa su yu Moroni.

3. E Plachinan di Eter, ku ta presentá un historia di e jareditanan. E registro aki a wòrdu kompendiá pa Moroni, kende a añadí komentarionan di su mes i a inkorporá e registro huntu ku e historia general bou di e titulo “Buki di Eter”.

4. E Plachinan di Bròns tresé pa e pueblo di Lehi for di Jerusalem na aña 600 P.C. Esakinan tabata kontené “sinku bukinan di Moisés,… I tambe un registro di e hudiunan for di prinsipio,… te na e kuminsamentu di rèinado di Zedekía, rèi di Juda; I tambe e profesíanan di e profetanan santu” (1 Nefi 5:11–13). Hopi sitanan for di e plachinan aki, sitando Isaías i otro profetanan bíbliko i no-bíbliko, ta parse den e Buki di Mormon.

E Buki di Mormon ta kontené diesinku partinan prinsipal òf divishonnan, konosí, ku un eksepshon, manera bukinan, kada un designá pa e nòmber di su outor prinsipal. E promé porshon (e promé seis bukinan, kabando ku Omni) ta un tradukshon di e Plachinan Chikí di Nefi. Entre e bukinan di Omni i Mosía tin un insertashon yamá e Palabranan di Mormon. E insertashon aki ta konektá e registro grabá riba e Plachinan Chikí ku e kompendio di Mormon di e Plachinan Grandi.

E parti mas largu, for di Mosía te Mormon, kapítulo 7, inklusive, ta un tradukshon di e kompendio di Mormon di e Plachinan Grandi di Nefi. E parti final, for di Mormon, kapítulo 8, te na final di e volumen, a wòrdu grabá pa Mormon su yu Moroni, kende despues di a kaba e registro di e bida di su tata, a hasi un kompendio di e registro jaredita (manera e buki di Eter) i despues a añadí e partinan konosí manera e Buki di Moroni.

Den òf rònt di aña A.D. 421, Moroni, e delaster di e profeta-historiadornan nefita, a seya e registro sagrado i a skondé na Señor, pa wòrdu tresé dilanti den e delaster dianan, manera a wòrdu predesí pa e bos di Dios dor di su profetanan antiguo. Na A.D. 1823, e mesun Moroni, e ora ei un personahe resusitá, a bishitá José Smith e Profeta i subsiguientemente a entregá e plachinan grabá na dje.