Buk blong Omnae

1 Luk, i bin hapen se mi, Omnae, from mi bin kasem komanmen long papa blong mi, Jerom, we mi mas raet smol long ol buk ia, blong holemtaet ol famli laen blong mifala—

2 Taswe, long ol dei blong mi, mi wantem se yufala i save se mi bin faet plante wetem naef blong faet blong sevem ol pipol blong mi, Ol Man blong Nifae, blong oli no foldaon long ol han blong ol enemi blong olgeta, Ol Man blong Leman. Be luk, mi tu, mi miwan mi wan man nogud, mo mi no bin holem ol loa mo ol komanmen blong Lod olsem we mi sapos blong mekem.

3 Mo i bin hapen se tu handred mo seventi mo sikis yia i bin pas, mo mifala i bin gat plante taem blong pis; mo mifala i bin gat plante taem blong rabis wo mo blad i ron. Yes, mo blong endem, tu handred mo eiti mo tu yia i bin pas, mo mi bin kipim ol buk ia folem ol oda blong ol papa blong mi; mo mi pasem olgeta i go long boe blong mi Amaron. Mo mi stop blong raet.

4 Mo nao, mi Amaron, mi raetem wanem samting we mi raetem, we oli no plante tumas, long buk blong papa blong mi.

5 Luk, i bin hapen se tri handred mo twante yia i bin pas, mo ol moa nogudwan ia blong Ol Man blong Nifae, oli bin kilimded olgeta.

6 From Lod bae i no letem se, afta we hem i bin lidim olgeta oli kamaot long graon blong Jerusalem mo hem i bin holem mo bin sevem olgeta blong oli no foldaon i go long ol han blong ol enemi blong olgeta, yes, hem i no letem se ol toktok we hem i bin talem long ol papa blong mifala, bae oli no save gat pruf; ol toktok ia oli talem se: “Folem hamas we bae yufala i no holem ol komanmen blong mi, bae yufala i no kam antap gud long graon.”

7 Taswe, Lod i bin visitim olgeta wetem bigfala jajmen; be, hem i sevem olgeta we oli stret mo gud blong mekem se bae oli no ded, be hem i bin tekemaot olgeta long ol han blong ol enemi blong olgeta.

8 Mo i bin hapen se mi bin pasem ol buk ia oli go long brata blong mi, Kemis.

9 Nao mi, Kemis, mi raetem wanem smol samting we mi stap raetemdaon, long semfala buk wetem ol brata blong mi; from luk, mi bin luk ol las samting we hem i bin raetem, we hem i bin raetem wetem han blong hem nomo; mo hem i bin raetemdaon samting ia long dei we hem i bin givim ol buk ia long mi. Mo long fasin ia nao mifala i kipim ol histri, from samting ia i folem ol oda blong ol papa blong mifala. Mo mi stop long ples ia.

10 Luk, mi Abinadom, mi mi boe blong Kemis. Luk, i bin hapen se mi bin luk plante wo mo rao bitwin ol pipol blong mi, Ol Man blong Nifae, mo Ol Man blong Leman; mo mi, wetem naef blong faet blong mi, mi bin tekemaot laef blong plante long Ol Man blong Leman blong difendem ol brata blong mi.

11 Mo luk, histri blong pipol ia oli bin raetem long ol buk we ol king oli holem, folem ol jeneresen; mo mi no save wan revelesen be hemia nomo we oli bin raetemdaon, mo tu, i semmak long profesi; taswe, ol samting we oli raetem, oli inaf. Mo mi stop long ples ia.

12 Luk, mi mi Amalekae, boe blong Abinadom. Luk, bae mi toktok long yufala smol long saed blong Mosaea, we i bin kam king long graon blong Sarahemla; from luk, from Lod i bin givim woning long hem se hem i mas aot long graon blong Nifae, mo evriwan we oli wantem mekem folem voes blong Lod, bae oli mas aot long graon wetem hem, i go long waelples—

13 Mo i bin hapen se hem i bin mekem folem samting ia we Lod i bin talem long hem. Mo oli bin aot long graon i go long waelples, olgeta evriwan we bae oli lisin long voes blong Lod; mo plante prijing mo profesi i bin lidim olgeta. Mo oli bin kasem tijing tru long toktok blong God oltaem; mo paoa blong han blong hem i bin lidim olgeta, tru long waelples kasem taem we oli bin kamdaon long graon ia we oli bin singaotem graon blong Sarahemla.

14 Mo oli bin faenem wan pipol, we oli bin singaotem olgeta ol pipol blong Sarahemla. Nao, i bin gat bigfala glad long medel blong ol pipol blong Sarahemla; mo tu, Sarahemla i bin hapi tumas, from se Lod i bin sendem ol pipol blong Mosaea wetem ol buk we oli bin mekem wetem bras we i bin gat histri blong Ol Jiu.

15 Luk, i bin hapen se Mosaea i bin faenemaot se ol pipol blong Sarahemla oli bin kamaot long Jerusalem long taem we Sedekaea, king blong Juda, oli bin tekem hem prisena long Babilon.

16 Mo oli bin wokbaot long waelples, mo han blong Lod i bin tekem olgeta oli krosem ol bigfala wota i go long graon we Mosaea i bin faenem olgeta; mo oli bin stap long ples ia stat long taem ia i go.

17 Mo long taem we Mosaea i bin faenem olgeta, oli bin kam plante tumas. Be, oli bin gat plante faet mo rabis rao, mo oli bin foldaon from naef blong faet long wanwan taem; mo lanwis blong olgeta i bin kam nogud; mo oli no bin karem eni histri wetem olgeta; mo oli bin tanem baksaed blong olgeta long man we i Krieta blong olgeta; mo Mosaea, mo tu, ol pipol blong Mosaea, oli no save andastanem olgeta.

18 Be i bin hapen se Mosaea i bin mekem se bae oli mas tijim olgeta long lanwis blong hem. Mo i bin hapen se afta we oli bin tijim olgeta long lanwis blong Mosaea, Sarahemla i bin talemaot wan famli laen blong ol papa blong hem, folem memori blong hem; mo oli bin raetemdaon ol samting ia, be i no long ol buk ia.

19 Mo i bin hapen se ol pipol blong Sarahemla, mo blong Mosaea, i bin kam tugeta, oli kam wan; mo oli bin jusum Mosaea blong kam king blong olgeta.

20 Mo i bin hapen se long ol dei blong Mosaea, oli bin karem wan bigfala ston i kam long hem we i gat ol raeting long hem; mo hem i bin talemaot mining blong ol raeting ia tru long presen mo paoa blong God.

21 Mo oli bin givim wan histri blong wan man we nem blong hem i Koriantuma mo ol pipol blong hem we oli bin ded. Mo ol pipol blong Sarahemla oli bin faenem Koriantuma; mo hem i bin stap wetem olgeta blong wan taem blong naen mun.

22 Ol raeting ia oli bin tokbaot tu smol long saed blong ol papa blong hem. Mo ol fas bubu blong hem oli bin kamaot long taoa, long taem we Lod i bin miksimap lanwis blong ol pipol; mo rabis panis blong Lod i bin foldaon long olgeta folem ol jajmen blong hem, we oli stret; mo ol bun blong olgeta oli ledaon olbaot long graon long Not.

23 Luk, mi, Amalekae, mi bin bon long ol dei blong Mosaea; mo mi bin stap laef blong luk ded blong hem; mo Benjamin, boe blong hem, i rul long ples blong hem.

24 Mo luk, mi bin luk, long ol dei blong King Benjamin, wan rabis wo mo plante blad i ron bitwin Ol Man blong Nifae mo Ol Man blong Leman. Be luk, Ol Man blong Nifae oli bin kasem moa janis bitim olgeta. Inaf we i mekem se King Benjamin i bin ronem olgeta oli aot long graon blong Sarahemla.

25 Mo i bin hapen se mi bin stat blong kam olfala, mo, from mi no gat pikinini, mo mi save se King Benjamin i wan stret man long fored blong Lod, taswe, bae mi pasem ol buk ia long hem, mo bae mi askem strong long ol man blong kam long God, Tabu Wan blong Isrel, mo biliv long profesi, mo long ol revelesen, mo long ol tijing blong ol enjel, mo long presen blong toktok long plante lanwis, mo long presen blong talem mining blong ol lanwis, mo long evri samting we oli gud; from i no gat wan samting we i gud be nomo sapos i kam long Lod: mo evri samting we i nogud i kam long devel.

26 Mo nao, ol brata blong mi we mi lavem tumas, mi wantem se bae yufala i kam long Kraes, we i Tabu Wan blong Isrel, mo tekem pat long fasin blong hem blong sevem man, mo paoa blong hem we i blong pemaot man. Yes, kam long hem, mo givim ol ful sol blong yufala olsem wan ofring long hem, mo gohed blong livim kakae mo prea, mo stap strong kasem en; mo olsem we Lod i stap laef bae Hem i sevem yufala.

27 Mo nao bae mi toktok smol long saed blong wan namba we i bin go antap long waelples blong gobak long graon blong Nifae; from i bin gat wan bigfala namba we i bin wantem blong stap long graon blong olgeta we i kam long ol papa blong olgeta.

28 Taswe, oli bin go antap long waelples. Mo from lida blong olgeta i bin wan strong mo bigfala man, mo wan stronghed, nao hem i bin statem wan rao long medel blong olgeta; mo oli bin kilimded nogud olgeta evriwan, be fifti nomo i bin stap long waelples mo oli bin gobak bakegen long graon blong Sarahemla.

29 Mo i bin hapen se oli bin tekem tu wan bigfala namba blong ol narafala pipol, mo oli bin tekem wokbaot blong olgeta i gobak long waelples.

30 Mo mi, Amalekae, mi bin gat wan brata we i bin go wetem olgeta tu; mo mi no bin harem wan toktok long olgeta stat long tetaem ia. Mo mi mi stap rere blong ledaon long gref blong mi; mo ol buk ia oli fulap. Mo mi stop long ol toktok blong mi long ples ia.