1. E teianei, kua tutara a Mosaia i nga mataiti e toru ma te au, e kua tupu akera tona inangaro kia kite i te tuatua no te aronga tangata i aere ki runga ki te enua ra ko Lihai-Niphai, koia oki te oire ko Lihai-Niphai, No Te Mea kare tona iti tangata i akarongo i te tuatua tei tuatuaia kia ratou mei te tuatau i akaruke atu ei ratou i te enua ko Zarahemela; kua manamanata aia i ta ratou tatiaeae.

2. E kua akatika te ariki ra ko Mosaia kia aere te au tangata maroiroi e okotai ngauru ma ono ki runga i te enua ra ko Lihai-Niphai kia kimi i te tuatua no to ratou au taeake ra.

3. E ao akera, akamata iora ratou i te aere ki runga ra, tei rotopu ia ratou tetai tangata maroiroi e te ririnui, ko Amona, e uanga oki aia no Zarahemela e koia oki to ratou arataki.

4. E teianei, kare ratou i kite i te mataara e aere ei ratou na roto i te metepara e tae atu ei ki te enua ra ko Lihai-Niphai, no reira kua ori aere ua ratou na roto i te metepara i te au rā e manganui, koia oki kua ori aere ratou e ā ngauru rā.

5. E aere ua atura ratou i nga rā e ā ngauru ra, kua tae atura ratou ki tetai tuaivi i te pae i apatokerau i te enua ra ko Siloama, patu iora ratou i to ratou au puakapa ki reira.

6. Rave iora Amona i nga taeake toko toru nona ra, ko Amaleki, ko Hilema, e ko Hema to ratou au ingoa, aere atura ratou ki raro ki te enua ra ko Niphai.

7. E i na, kua aravei atura ratou i te ariki o te iti tangata i noo ki te enua ra ko Niphai, e i te enua ra ko Siloama; koropiniia iora ratou e te vaeau o te ariki ra, kua raveia atura ratou e tapekaia, e tukuia atura ki roto i te are tapekaanga.

8. E tapekaia akera ratou i nga rā e rua ra, kua arataki akaouia atura ki mua i te aroaro o te ariki ra, e kua tataraia te au tapeka, tu au iora ratou ki mua i te ariki ra, e kua akatikaia, e kua akaueia oki kia pau mai ratou i te au uianga tana ka ui atu kia ratou.

9. Kua tuatua maira aia kia ratou i na, ko au nei ko Limihai, te tamaiti a Noa te tamaiti a Zenipha, ko Zenipha oki tei aere mai mei te enua ko Zarahemela e kua noo ki teianei enua, i te enua o to matou au metua, e na te au tangata i akariro iaia ei ariki.

10. E teianei, kua inangaro au kia kite i te tumu i akavaitata mai ei kotou ki te aua o teia oire nei ma te mataku kore, ka noo ei au, ko au uaorai, e toku au vaeau katoa oki ki vao i te ngutupa?

11. E no reira kua akatika au kia ora kotou, kia uiui au kia kotou, naringa kare, kua akaue atu au kia tamateia kotou. E tika ia kotou kia tuatua mai.

12. E kite akera Amona e, kua akatikaia aia kia tuatua atu, kua aere atura aia ki mua i te aroaro o te ariki ra, tupou iora ki raro; e kia tu akaou maira aia kua na ko atura, E te ariki e, te akameitaki nei au i te Atua i teianei rā, i te mea te ora nei rai au, e kua akatikaia oki au kia tuatua; e ka tamata oki au kia tuatua ma te mataku kore.

13. Kua kite oki au e, naringa koe i kite mai ana iaku ra, kare koe e akatika kia tapekaia au ki teianei au tapeka, Ko au nei oki ko Amona, e uanga no Zarahemela ra, e i aere mai matou mei te enua ko Zarahemela i te kimi i to matou au taeake ta Zenipha i arataki mai ki runga mei roto i taua enua ra.

14. E akarongo akera Limihai i te tuatua a Amona, mataora iora aia, e kua na ko akera, E teianei, kua kite papu au e, te ora ua nei rai toku au taeake i te enua ra ko Zarahemela. E teianei, ka tamataora au; e apopo ka tamataora toku nei iti tangata.

15. I na oki, tei roto matou i te tuikaanga ki te ngati Lamana, e kua teroia matou ki te tero teimaa rava kia apai. E teianei, i na, ka akaora to tatou au taeake ia tatou i te tuikaanga, e i te rima oki o te ngati Lamana, e ka riro tatou ei tuikaa na ratou, e ngari ake oki kia tuikaa tatou na te ngati Niphai, i te tutaki atu i te tero ki te ariki o te ngati Lamana ra.

16. Kua akaue atura te ariki ra ko Limihai i tona au vaeau, e auraka ratou e tapeka akaou ia Amona e tona au taeake, kua akaue atura kia aere ratou ki te tuaivi i te pae i apatokerau i Siloama, e arataki mai i to ratou au taeake ki roto i te oire, kia kai e kia inu e kia akangaroi oki i te aereanga i to ratou tere; i rokoia ana oki ratou e te au tumatetenga e manganui; e pongi ana ratou, e i kaki vai ana, e kua roiroi.

17. E ao akera, kua tuku atura te ariki ra ko Limihai i te akaueanga ki tona ra iti tangata, kia akaputuputu mai ratou ki te iero, kia akarongo i te tuatua tana ka akakite atu kia ratou.

18. E putuputu maira ratou, kua tuatua atura aia kia ratou, na ko atura, e kotou ma, e toku iti tangata e, e akateitei ana kotou i to kotou upoko e kia pumaana; i na oki, teia mai nei te tuatau, koia oki te vaitata mai nei te tuatau e kore ei tatou e kauraro akaou ki to tatou au enemi; no atu e kua puapinga kore ua to tatou au tautaanga i te ora, te manako nei au e, te vai ra te tautaanga e manuiaʼi.

19. E teianei, ka akateitei ana kotou i to kotou upoko ma te mataora, ka irinaki ki te Atua, i te Atua no Aberahama e no Isaaka e no Iakoba, e i taua Atua ra tei arataki mai i te tamariki a Iseraela mei te enua maira mei Aiphiti, e tei arataki ia ratou na roto i te Tai Muramura na runga i te enua maro ra, e tei angai oki ia ratou ki te mānā, kia kore ratou e mate i te metepara ra; e kua maata atu rai te au mea tana i rave no ratou ra.

20. E teianei, na taua Atua rai i arataki mai i to tatou au metua mei te enua maira mei Ierusalema, e kua akono e kua akaora i tona iti tangata e teia noaʼi. E i na, no ta tatou au ara e te angaanga kino, i tuku ei aia ia tatou ki te tuikaaanga.

21. E kite oki kotou katoatoa i teianei ra e, no te inangaro maata o Zenipha, koia te ariki no teia iti tangata nei, i te noo akaou ki te enua o tona ra au metua, kua vare aia i te pakari e te karape o te Ariki ra ko Lamana ko tei papau i tetai koreromotu aū ki te ariki ra ko Zenipha, e tei oronga atu oki ki roto i tona rima i tetai pae o te enua ra, koia oki te oire ra ko Lihai-Niphai, e te oire ra ko Siloama, e te enua e pini ua akera.

22. Kua akapera oki aia, ma te akakoroanga okotai, kia arataki aia i teia iti tangata ki te kauraro anga e te tuikaaanga. E i na, te oronga ua atu nei rai tatou i te tero ki te Ariki o te ngati Lamana ra, e tae ua atu ki te apa o ta tatou koni, e te apa o ta tatou uiti e ta tatou au tu sitona katoatoa e te apa oki o te anana o ta tatou au puakatoro e ta tatou au mamoe, e te rave nei te ariki o te ngati Lamana i te apa o te au mea katoatoa i rauka mai ia tatou, me kore ra, to tatou ora.

23. E teianei, kare ainei te reira i te mea teimaa kia akakoromakiia? Kare ainei e maata to tatou tumatetenga? E teianei, i na, e tumu tikai to tatou no te aue.

24. I na, te tuatua atu nei au kia kotou, e manganui te au tumu kia aue tatou; i na oki, e maata to tatou au taeake i taiaia ra, e kua puapinga kore ua te maringi anga i to ratou toto; e no te ara oki i tupu ei te reira.

25. Naringa kare teianei iti tangata i topa ki roto i te ara ra, kare te Atu e akatika kia tae mai teianei tumatetenga maata ki rungao ia ratou. Ina ra, kare ratou i akarongo i tana tuatua, e kua tupu akera te pekapeka i rotopu ia ratou, e kua akamaringi ratou i te toto i rotopu ia ratou uaorai.

26. E kua ta oki ratou i tetai peroveta a te Atua ra: I na, e tangata ikiia e te Atua, tei akakite mai kia ratou i ta ratou au ara e te au angaanga viivii ra, e kua totou oki aia i te au mea te ka tupu a muri atu, no runga oki i te taeanga mai o te Mesia.

27. E no te mea, kua tuatua maira aia e, ko te Mesia, ko te Atua ïa, te Metua o te au mea katoatoa ra, e kua tuatua mai oki aia e, kua riro oki aia mei te tangata nei rai te tu, i te tutu o te tangata i angaia i muatangana ra; koia oki i tuatua mai aia e, kua angaia te tangata i te tu o te Atua ra, e ka aere mai te Atua ki raro nei ki rotopu i te tamariki a te tangata nei, e ka rave mai oki aia i te kopapa kiko e te toto, e ka aere oki aia na runga i te tua o te enua ra.

28. E teianei, no tei tuatua mai aia i te reira, kua ta ratou iaia; e maata atu rai te au mea ta ratou i rave tei akatae mai i te riri o te Atua ki rungao ia ratou. No reira, koai tei manakonako i te mea, tei roto ratou i te tuikaaanga, e kua papaia ratou ki te au tumatetenga maata ra?

29. I na oki, i tuatua mai ana te Atu e, Kare au e tauturu atu i toku iti tangata i te rā o to ratou tuatua tika kore ra, e arai ra au i to ratou au mataara kia kore ratou e manuia, e ka riro oki ta ratou au ravenga ei turorianga ki mua ia ratou ra.

30. E te tuatua katoa maira aia e, Kia ruru toku ra iti tangata i te mea viivii ra, ka kokoti ratou i te ota no roto mai i te puaioio; e e mea poitini oki tei rauka mai.

31. E te tuatua akaou maira aia e, kia ruru toku ra iti tangata i te mea viivii ra, e kokoti ratou i te matangi no te itinga o te rā, tei apai mai i te mate viviki ra.

32. E teianei, i na, kua tupu te taputou a te Atua; kua papaia kotou e kua rokoia e te tumatetenga maata ra.

33. Kia ariu mai ra kotou ki te Atua ma to kotou ngakau katoa ra, e kia irinaki kotou iaia, e kia akono meitaki iaia ma te ririnui katoa o to kotou manako, me akapera kotou, ka akaora aia ia kotou i to kotou tuikaaanga, mei tei tau ki tona uaorai manako e tona uaorai inangaro.