1. E kua oronga atura a Zenipha i te basileia kia Noa, ki tetai tamaiti āna; no reira kua akamata a Noa i te tutara i tona ngai; kare oki aia i aru i te au mataara o tona metua.

2. I na oki, kare aia i akono i te au akaueanga a te Atua, kua akono ra aia i te inangaro o tona uaorai ngakau. E maata oki tana au vaine, e te au vaine akaturi. E kua arataki ke aia i tona iti tangata kia ara ratou, e kia rave ratou i te mea viivii ki mua i te aroaro o te Atu ra. I na, kua akaturi ratou, e kua rave i te au tu angaanga kino katoa ra.

3. E kua tuku aia i te tero, te rima o te tuanga o ta ratou au mea katoatoa, te rima o te tuanga o ta ratou auro e ta ratou ario, e te rima o te tuanga o ta ratou zifa e ta ratou kapa, e ta ratou veo e ta ratou auri, e te rima o te tuanga o to ratou puakatoro angai ra; e te rima o te tuanga oki o ta ratou au tu sitona ra.

4. E kua rave aia i teia kia akono iaia uaorai e tana au vaine e tana au vaine akaturi; e tona au taunga katoa, e ta ratou au vaine, e ta ratou au vaine akaturi; e kua pera aia i te akatuke anga i te akatere anga i te basileia.

5. Kua akaruke oki aia i te au taunga i akatainuia e tona metua, e kua akatainu i tetai au taunga ou ei mono ia ratou, ko tei akateiteiia oki ki te nengonengo o to ratou ngakau.

6. I na, kua pera ratou i te tauturuangaia i roto i to ratou kope, e i roto i to ratou akamorianga idolo, e ta ratou akaturianga, na roto i te tero ta te ariki ra ta Noa i tuku ki runga i tona ra iti tangata; e kua pera teia iti tangata i te angaanga pakarianga kia akono i te kino ra.

7. I na, kua riro ratou ei akamori idolo, no te mea kua vare ratou i te tuatua puapinga kore e te akateitei a te ariki e te au taunga ra; kua tuatua oki ratou i te au tuatua pikikaa kia ratou.

8. E maata te au are mamaata e te manea ta te ariki ra ta Noa i akatu, e kua akamanea aia i te reira ki te au angaanga manea o te rakau, e te au tu apinga oko maata, e te auro, e te ario, e te auri, e te veo, e te zifa, e te kapa;

9. E kua akatu katoa aia i tetai are ariki maata, e tetai terono oki ki roto ra, kua maaniia oki te reira ki te rakau manea, e kua akamaneaia te reira ki te auro, e te ario, e te au mea oko maata ra.

10. E kua akaue atura aia kia rave tona au tangata angaanga i te au tu angaanga manea ki roto i te iero, koia oki te rakau, te kapa e te veo;

11. Kua akamanea iora aia i te au nooanga no te au taunga teitei, ki te auro tikai; ko tei runga ake ïa i te au nooanga katoatoa, kua akaue oki aia kia maaniia tetai atarau ki mua ia ratou, kia irinaki ratou i to ratou kopapa e to ratou rima ki runga i te reira, ka tuatua atu ei ratou i te au tuatua pikikaa e te puapinga kore ki tona ra iti tangata.

12. E kua akatu akera aia i tetai patu i vaitata ki te iero, i na, tetai patu teitei rava, e no te teitei, ka rauka oki iaia te tu ki runga i te take o te reira ka akara atu ei ki runga i te enua ko Siloama e te enua katoa ko Semelona, tei nooia e te ngati Lamana, e pini rava ake te enua.

13. E kua akaue atu aia kia akatuia te au are e manganui i te enua ra ko Siloama; e kua akaue aia kia akatuia tetai patu maata ki runga i te tuaivi i te pae i apatokerau i te enua ko Siloama, tei vai ana ei paruru no te tamariki a Niphai i te tuatau i oro ei ratou ki vao i te enua ra; e kua pera aia i te puapinga i rauka mai iaia na roto i te tuku anga i te tero ki runga i tona ra au tangata.

14. E kua tuku aia i tona ngakau ki runga i tana au apinga, e kua kaimoumou i tona puke ra i te tarekareka neneva ua ma tana au vaine e ma tana au vaine akaturi katoa, e kua pera katoa ana tona au taunga ma te au vaine akaturi.

15. E kua tanu iora aia i te au kainga vine e pini ua ake i te enua nei e kua akatu aia i te au ngai taomianga vine, e kua maani aia i te wina kia maata; no reira i riro ei aia e tona au tangata katoa e au tangata inuinu i te wina.

16. E kua akamata te ngati Lamana i te aere mai ki runga ki tona iti tangata, koia oki, ki runga i tetai aronga toko iti, e ta ia ratou i roto i to ratou aua i to ratou tiaki anga i ta ratou au anana.

17. E kua tono atura te ariki ra ko Noa i te au tiaki e pini ua ake te enua kia paruru ia ratou, kare ra i rava te au tiaki tana i tono ra, e kua tae maira te ngati Lamana ki runga ia ratou e ta iora ia ratou, kua tuaru ke atu i ta ratou au anana e manganui ki vao i te enua; e kua pera te ngati Lamana i te akamata anga i te akapou ia ratou, e te akamaata i to ratou makitakita kia ratou.

18. E kua unga atura te ariki ra ko Noa i tona au vaeau kia tamaki atu ia ratou, e kua tuaruia atu ratou, koia oki kua tuaru ke atura ratou ia ratou no tetai tuatau; no reira kua oki mai ratou ma te mataora maata no to ratou manuia i rauka mai.

19. E teianei, no taua tamaki manuia maata ra, kua akateitei ratou i te nengonengo o to ratou ngakau, kua akaparau i to ratou uaorai maroiroi, i te na ko anga e, e rauka i te rima ngauru o ratou, kia tu ua rai ki te tamaki anga atu i nga tausani o te ngati Lamana; i pera rai ratou i te akanengonengo, e kua inangaro ratou i te toto, e i te akamaringi i te toto o to ratou au taeake; e kua pera ratou no te angaanga kino a to ratou ariki e to ratou au taunga ra.

20. E i vai ana tetai tangata i rotopu ia ratou, ko Abinadaia tona ingoa; e kua aere atura aia ki rotopu ia ratou e kua akamata i te totou i te na ko anga e, i na, te na ko maira te Atu, e kua pera maira aia i te akaue anga mai iaku, i te na ko anga mai e, ka aere atu, ka tuatua atu ki teianei iti tangata e, te na ko maira te Atu, Aue oki teianei iti tangata, no te mea kua kite au i ta ratou angaanga viivii, e ta ratou angaanga kino e ta ratou akaturi; kia kore ratou e tataraara, ka atoro mai au ia ratou ki toku nei riri.

21. E kia kore ratou e tataraara, e e ariu ki e Atu i to ratou Atua, i na, ka tuku atu au ia ratou ki roto i te rima o to ratou au enemi; i na, ka akatuikaaia ratou, e ka takinga kinoia ratou e te rima o to ratou au enemi.

22. E ka kite iora ratou e, ko au te Atu, to ratou Atua, e e Atua vareae oki au, i te tutaki anga i te ara a toku iti tangata.

23. E kia kore teianei iti tangata e tataraara, e e ariu mai ki te Atu ki to ratou Atua, ka akatuikaaia ratou; e kare oki tetai e akaora ia ratou, mari ra ko te Atu, te Atua Mana Katoatoa.

24. I na, kia kapiki mai ratou iaku, kare au e akarongo vave i ta ratou kapikianga; i na, e akatika au kia pāpāia ratou e to ratou au enemi.

25. E kia kore ratou e tataraara ma te kakau paoa e te reu ai, e e kapiki ua atu ki te Atu i to ratou Atua, kare au e akarongo i ta ratou au pure, kare oki au e akaora ia ratou i to ratou au tumatetenga; te na ko maira te Atu, e kua pera maira te Atu i te akaue anga mai iaku ra.

26. E oti akera ia Abinadaia te tuatua atu i teianei au tuatua kia ratou, kua riri ratou iaia, e kua titau ratou kia ta iaia; kua akaora ra te Atu iaia mei to ratou rima.

27. E akarongo akera te ariki ra ko Noa i te au tuatua ta Abinadaia i tuatua mai ki te iti tangata, kua riri aia, e kua na ko maira e, koai teia tangata ko Abinadaia, kia akaapaia au e toku iti tangata katoa e ïa? Koai oki te Atu, e tuku mai aia i taua tumatetenga maata ra ki rungao i toku iti tangata?

28. Te akaue atu nei au kia kotou kia arataki mai ia Abinadaia ra, kia ta au iaia; kua tuatua oki aia i taua au mea ra kia akatupu i te riri ki toku iti tangata tetai ki tetai, e kia akatupu oki i te pekapeka ki rotopu i toku iti tangata; no reira ka tamate au iaia.

29. E teianei, kua poiri te mata o te tangata, no reira kua akaketaketa ratou i to ratou ngakau kia kore e āriki i te tuatua a Abinadaia, e kua titau ua atu rai ratou i reira kia opu iaia. E kua akaketaketa te ariki ra ko Noa i tona ngakau i te patoi i te tuatua a te Atu, e kare aia i tataraara i tana ra au angaanga kino.