1. E kua rekareka te ariki o te ngati Lamana ia Amurona; no reira, kua akatika mai te ariki o te ngati Lamana iaia e tona ra au taeake kia akatakaia ratou ei au puapii ki rungao i tona ra au tangata, koia oki ki runga i te au tangata i te enua ra i Semeroni, e i te enua ra i Siloama, e i te enua ra oki ko Amurona.

2. Tei raro oki taua au enua ra i te ngati Lamana, no reira kua akataka te ariki o te ngati Lamana i tetai au tangata ei ui ariki no taua au enua katoatoa ra.

3. E te ingoa o te ariki o te ngati Lamana, ko Lamana ïa, e kua topaia aia ki te ingoa o tona metua tane; i tuatuaia tona ingoa ko Lamana ariki ra. E ariki aia ki rungao i te au tangata e manganui.

4. E nana oki i akataka i tetai au taeake o Amurona ei puapii i te au enua katoatoa tei nooia e tona ra au tangata; te akamataanga ïa i te apii anga i te reo o te ngati Niphai ki rotopu i te au tangata o te ngati Lamana ra.

5. E au tangata oki ratou tei aroa i tetai ki tetai, kare ra ratou i kite ake i te Atua ra; kare oki te au taeake o Amurona i apii mai ia ratou ki te Atu to ratou Atua ra, kare oki i te ture a Mose ra; kare katoa oki ratou i apii ia ratou ki te tuatua a Abinadaia ra.

6. Kua apii ra ratou kia tata i te papaanga tuatua no ratou, e kia rauka i te tata tetai ki tetai.

7. Puapinga maata akera te ngati Lamana, e kua akamata ratou i te oko atu e i te oko mai tetai ki tetai, e kua maata atura ratou, e riro iora ratou ei iti tangata kite e te pakari o teianei ao; ae, e au tangata karape; i te inangaro i te au tu kino e te noni, mari ra, ki rotopu i to ratou uaorai au taeake.

8. E kua akamata iora a Amurona i te akatietie ia Alama e tona ra au taeake, e te takinga kino atu iaia, e i te akaue atu ki tana ra au tamariki kia takinga kino mai i ta ratou au tamariki.

9. Kua kite oki a Amurona ia Alama, koia tetai o te taunga o te ariki ra, koia oki tei akarongo ki te au tuatua a Abinadaia ra, e tei tuaruia ki vao mei mua atu i te ariki ra; no reira kua riri aia iaia, e tei raro ake oki aia i te ariki ra ia Lamana; e kua mana aia ki runga ia ratou i te tuku anga i te apainga maata ki runga ia ratou, i te tuku anga i tetai au tu angaanga ki runga ia ratou.

10. E no te maata o to ratou tumatetenga, kua akamata ratou i te kaku atu ki te Atua.

11. Akaue atura a Amurona ia ratou kia akamutu i to ratou kaku anga atu, e kua tuku oki aia i te tiaki ki runga ia ratou kia akara matariki kia ratou, e ko te tangata ka kiteaia i te pure anga atu ki tona Atua, ka tamamateia aia.

12. Kare atura a Alama e tona ra au tangata i akateitei i to ratou reo ki runga ki te Atu, ki to ratou Atua, kua aue atu ra to ratou ngakau, e kua kite mai oki aia i te inangaro o to ratou ngakau.

13. Kua tae maira oki te tuatua a te Atu kia ratou i to ratou tumatetenga i te na ko anga mai e, E akateitei ana i to kotou upoko, e kia akapumaanaia, kua kite oki au i te taputou ta kotou i taputou mai kiaku nei, e ka taputou oki au ki toku ra au tangata, e akaora atu ia ratou mei roto mai i te tuikaaanga.

14. E ka akamama oki i te au apainga teimaa i tukuia mai ki runga i to kotou mokotua kia kore kotou e manako e, e apainga tetai i to kotou tuikaaanga ra; e ka rave au i te reira, kia tu meitaki kotou ei au kite noku; e muri atu, ka kite papu kotou e, te atoro ra au, te Atu te Atua ra, i toku ra au tangata i to ratou au tumatetenga.

15. Kua akamamaia iora te au apainga i tukuia mai ki runga ia Alama e tona ra au taeake; Ae, na te Atua ratou i akamaroiroi kia rauka ia ratou i te akakoromaki mai i te au tumatetenga ma te apikepike kore, e kua kauraro iora ratou ma te rekareka e te akakoromaki i te au inangaro o te Atu.

16. No to ratou akarongo maata e to ratou akakoromaki i tae mai ei te tuatua a te Atu kia ratou, i te na ko anga mai e, kia pumaana, apopo oki au e akaoraʼi ia kotou mei roto mai i te tuikaaanga ra.

17. Kua tuatua maira aia kia Alama, e na mua koe i teia iti tangata i te aere, e ka aere katoa rai au e ka akaora atu i teianei iti tangata mei roto mai i te tuikaaanga.

18. I te po ra i akaputuputu mai ei a Alama e tona ra au tangata i ta ratou anana, e ta ratou sitona oki; te akaputuputu ra ratou i ta ratou au anana katoatoa i te po.

19. E popongi akera, kua tuku maira te Atu i tetai moe maata ki runga i te ngati Lamana, ae, e pera katoa to ratou au pu angaanga, kua rokoia katoatoa ratou e te moe maata.

20. Aere atura a Alama e tona ra au tangata ki roto i te metepara; e ope akera te rā i te aereanga, kua patia iora ratou i to ratou au puakapa ki tetai ō, e kua topa iora ratou i te ingoa o taua ō ra ko Alama, koia tei arataki ia ratou i te aereanga na roto i te metepara ra.

21. E i te ō o Alama, kua tuku atura ratou i to ratou akameitakianga ki te Atua ra, no tona aroa mai kia ratou, e no tei akamama mai aia i te au apainga, e kua akaora oki aia ia ratou i te tuikaaanga, kua tuikaa oki ratou, e kare e rauka i tetai kia akaora mai ia ratou mari ra te Atu to ratou Atua ra.

22. E kua akameitaki atura ratou i te Atua, Ae, to ratou au tangata katoatoa, e ta ratou au vaine katoatoa, e ta ratou au tamariki katoatoa, tei kite i te tuatua, kua tuku atura ratou i to ratou reo i te akapaapaa anga atu i to ratou Atua ra.

23. Kua tuatua maira te Atu kia Alama, kia rapurapu koe e teianei iti tangata katoa i te aere anga atu ki vao i te enua nei, kua ara mai oki te ngati Lamana, e te arumaki maira ratou ia koe na; E tenana e aere atu koe ki vao i teia enua nei, e naku oki e tapu i te ngati Lamana i teianei ō kia kore ratou e arumaki akaou i teianei iti tangata.

24. Kua oro atura ratou ki vao i taua ō ra, aere atura ratou na roto i te metepara ra.

25. E tai ngauru ma rua o ratou rā i te metepara, tae atura ratou ki te enua ra ko Zarahemela; e kua aravei katoa a Mosaia ariki ia ratou ma te rekareka.