1. Kua tupu iora te takinga kino a te aronga akarongo kore no runga i te akonoanga, e no te maata o te takinga kino, kua aue ratou ma te koumuumu ki to ratou au arataki, e kua tuatua oki ratou kia Alama, e na Alama i tuku atu i te reira ki to ratou ariki ra kia Mosaia, e kua uriuri atura a Mosaia ki tona au taunga.

2. E kua tuku atura te ariki i tetai akaueanga ki te enua katoatoa, auraka tetai tangata irinaki kore e takinga kino i te tangata o te akonoanga a te Atua ra;

3. E tei roto oki i te au ekalesia katoatoa tetai akaueanga pakari, auraka oki te takinga kino e tupu ki rotopu ia ratou ra, kia aiteite ra te au tangata katoatoa.

4. Kia kore te akaparau e te akateitei e akakore i to ratou au, kia aroa ra te au tangata katoatoa i tona tangata tupu mei iaia uaorai, i te rave anga i te angaanga ma to ratou uaorai rima kia rauka mai to ratou puapinga.

5. Ae, kia rave to ratou au taunga e to ratou au puapii katoatoa i te angaanga ki to ratou uaorai rima, kia rauka mai to ratou puapinga, mari ra, ko tei maki e tei putaua; e no te rave anga i taua au mea ra, kua ki ratou i te meitaki o te Atua ra.

6. E kua tupu akaou te au ki te enua ra; e kua tupu oki te au tangata ki te maata ra, e maata atura oki ratou ki runga i te enua ra, i na, i te pae apatokerau, e i te pae tonga, e i te pae i te itinga o te ra, e i te opunga o te ra, i te akatu anga i te au oire mamaata e te au oire rikiriki ki te au ngai katoatoa o te enua.

7. Kua aroa mai e kua akameitaki mai te Atu ia ratou, e kua riro ratou ei iti tangata maata e te apinga nui.

8. Kua tarē katoaia te au tamariki tamaroa a Mosaia ki rotopu i te aronga irinaki kore ra; e kua tarē katoaia tetai tamaiti a Alama ki rotopu ia ratou ra; kua topaia aia ki te ingoa o tona metua ko Alama; ina ra, kua riro aia ei tangata kino maata e te akamori idolo. E tangata tuatua maata oki aia, e kua tuatua atu aia i te tuatua taparuparu e manganui ki te tangata; no reira kua arataki ke atu aia i te au tangata e manganui i te aru anga atu i tana au angaanga kino.

9. E kua riro aia ei tangata akatupu pekapeka ki te akonoanga a te Atua, i te arataki anga atu i te ngakau o te tangata; e i te akatupuanga i te marō ki rotopu i te tangata, e i te tuku anga atu oki i te ravenga e raukaʼi i te enemi o te Atua ra i te mana ki rungao ia ratou.

10. E te aere rai aia i te takinga kino i te akonoanga, kua aere muna oki aia e te au tamariki tamaroa a Mosaia katoa, i te kimi anga i te ravenga e takinga kino ei ratou i te akonoanga, e kia arataki ke oki te au tangata o te Atu ra, ma te akono kore i te akaueanga a te Atua ra, e ta te ariki katoa oki;

11. E mei taku i tuatua akenei kia kotou, te aaere ra ratou i te patoi anga atu i te Atua, i na, kua mama maira tetai angela a te Atua, kia ratou; e kua eke mai aia, mei te mea, e na roto mai aia i te tiao; e kua tuatua maira aia i te reo mei te mangungu rai te tu, e kua ngaueue oki te enua te ngai i tu ei ratou.

12. E no to ratou mataku maata, kua topa ratou ki runga i te one, e kare oki ratou i marama i te tuatua tana i tuatua mai kia ratou ra.

13. Kua kapiki akaou maira aia, na ko maira, E Alama e tu mai koe ki runga, eaa koe i takinga kino mai ei i te akonoanga a te Atua ra? I tuatua mai oki te Atu ra e, ko teia taku akonoanga, e naku ïa i akatu, e kare oki tetai mea e akauritumu i te reira, mari ra te ara a toku au tangata.

14. Kua tuatua akaou maira te angela na ko maira, i na, kua akarongo akenei te Atu ra ki te pure a tona au tangata, e te pure oki a tona tavini a Alama, toou ra metua; e kua pure oki aia ma te akarongo maata no runga ia koe na, kia aratakiia koe ki te kite i te tuatua mou; e no reira i aere mai ei au e akakite atu kia koe i te mana e te ririnui o te Atua ra, kia pauia te pure a tona au tavini kia tau ki to ratou akarongo ra.

15. E i na, ka rauka ainei ia koe i te patoi i te mana o te Atua? I na oki, kare ainei toku nei reo i akangaueue i te enua ra? E kare ainei koe i kite mai iaku nei ki mua i to aroaro na? E i tonokia mai au no ko mai i te Atua ra.

16. E teianei te tuatua atu nei au kia koe na. E aere ra, e maara i te tuikaaanga o toou ai metua i te enua ra i Hilama, e te enua oki ia Niphai; e maara oki i te au mea mamaata tana i rave no ratou ra, tei roto oki ratou i te tuikaaanga ra, e nana ratou i akaora.

17. Ko te tuatua openga te reira ta te angela i tuatua mai kia Alama e aere atura aia i reira.

18. Kua inga akaou iora a Alama ma ki raro, e maata oki to ratou umere; no te mea kua kite ratou i tetai angela a te Atu ki to ratou uaorai mata; e mei te mangungu oki tona reo, tei akangaueue i te enua ra; e kua kite oki ratou e, kare oki tetai mea, mari ra, te mana o te Atua ra, e rauka kia akangaueue e kia rurutakina oki te enua mei te mea e ka veveteia ïa.

19. E no te maata o te mataku o Alama, kua murare aia, e kare e rauka iaia kia amama i tona vaa, e apikepike akera aia, kare e rauka iaia kia taki i tona rima; e no reira kua raveia aia e tona au taeake, e kua apainaia atura ma te apikepike, e kua tukunaia iora aia ki mua i tona metua.

20. E kua akakite atura ratou ki tona metua i te au mea katoatoa tei tupu kia ratou ra; rekareka iora tona metua no te mea, kua kite aia e, ko te mana ïa o te Atua ra.

21. Kua akaputuputu maira aia i te au tangata e manganui kia kite ratou i ta te Atua ka rave ki tana tamaiti, e tona au taeake.

22. E kua akaputuputu maira aia i te au taunga, e akamata iora ratou i te akakoreanga kai, ma te pure ki te Atu ra to ratou Atua, kia akatuera mai aia i te vaa o Alama, kia rauka iaia kia tuatua; e kia maroiroi oki tona vaevae e tona rima, kia akatueraia te mata o te iti tangata kia kite oki ratou i te meitaki e te kaka o te Atua ra.

23. E akakore akera ratou i te kai ma te pure i nga rā e rua, e e nga po e rua oki, kua maroiroi iora te vaevae o Alama, e kua tu akera aia ki runga e kua akamata iora i te tuatua kia ratou, i te tuatua anga atu kia ratou e, kia akapumaanaia ratou.

24. Kua na ko atura oki aia kia ratou e, kua tataraara akenei au i taku au ara, e kua akaoraia oki e te Atua ra; E i na, kua anau au ki te Vaerua.

25. E kua tuatua maira te Atu kiaku, Auraka koe e umere i te mea kia anau akaouia te tangata katoatoa e tikai, koia oki te au vaine, e te au tane, e to te au enua katoatoa, e to te au reo, e to te au iti tangata, e to te au kopu katoatoa; i na, kia anau i te Atua ra, kia akariroia to ratou inangaro i te au peu o teianei ao ra, ei tumu tuatua tika, kia akaoraia e te Atua, kia riro ei tamaroa ei tamaine nana ra.

26. E kia pera, ka riro ratou ei tangata ou; e kia kore ratou e akapera, kare rai ratou e noo ki te basileia o te Atua ra.

27. Te tuatua atu nei au kia kotou, me kore kotou e akapera, ka tuaruia ratou ki vao; e kua kite oki au i te reira, no te mea kua vaitata au i te tuaruia.

28. Ina ra, kia rokoia au e te au tumatetenga mamaata, e kia tataraara oki au e kia vaitata i te mate, kua tika i te Atua kia rave mai iaku ra mei roto mai i te ai mate kore, e kua anau akaou au ki te Atua ra.

29. Kua akaoraia toku vaerua mei roto mai i te kavangu e te au tapeka o te kino ra. Tei roto oki au i te vaarua poiri tikai; i teianei ra, te kite nei au i te marama umere o te Atua, Kua tumatetenga toku vaerua i te mamae mutu kore; kua raveia ra au, e kare toku ngakau i mamae akaou.

30. Kua akaruke au i toku Akaora, e kua patoi oki au i tei tuatuaia mai e to tatou ra au metua; i teianei ra, kia kite ratou e, ka tae mai aia, e te maara nei aia i te au tangata katoatoa tana i anga ra, ka akakite mai aia iaia uaorai ki te tangata katoatoa ra.

31. I na, ka tuturi te au turi katoatoa ki raro, e aaki oki te au vaa katoatoa iaia ra, Ae, e kia tae ki te rā openga ra, kia tu mai te au tangata katoatoa kia akavaia e ïa ra, ei reira e aaki ei ratou e, koia te Atua; ei reira oki te au tangata tei kore i kite i te Atua o teianei ao e aaki ei e, e tau ia ratou te mate o te mamae mutu kore ra, ka ruketekete e ka emi oki ratou ki raro ake i te akara anga a tona mata akara matariki ra.

32. E mei te reira tuatau maira kua akamata a Alama, e ratou katoa oki tei noo ki te pae iaia i te mama anga mai o te angela kia ratou, i te apii atu ki te au tangata; i te aere anga e pini ua ake taua enua katoatoa ra, i te akakite anga atu ki te au tangata katoatoa i te au mea ta ratou i akarongo e ta ratou i kite ra, e i te tutu aere anga i te tuatua a te Atua i te tumatetenga maata, kua takinga kino maataia e te aronga irinaki kore, e e manganui oki ratou tei motoia maira.

33. No atu ra i taua au mea nei, kua akapumaana ratou i te akonoanga i te akamouanga i to ratou akarongo, e i te ako anga atu ia ratou ma te akakoromaki maata, e te tumatetenga maata, kia akono i te au akaueanga a te Atua.

34. E toko ā ia ratou, e au tamariki tamaroa ïa na Mosaia. Ko to ratou ingoa, ko Amona e ko Aarona, ko Omena, ko Emenai; ko te ingoa teia o te au tamariki tamaroa a Mosaia ra.

35. E kua aere ratou e pini ua ake te enua ra ko Zarahemela, e i rotopu i te au tangata katoatoa i raro ake i te au o te ariki ra ko Mosaia; ma te tauta pakari kia akakore i te au kino ta ratou i rave ki te ekalesia ra; i te aakianga i ta ratou au ara katoatoa, i te akakiteanga atu i te au mea ta ratou i kite ra, e i te akatakaanga atu oki i te au totou, e te tuatua i tataia oki ki te tangata katoatoa tei inangaro i te akarongo mai kia ratou ra.

36. E riro iora ratou ei tauturu i roto i te rima o te Atua i te aratakianga i te au tangata e manganui ki te kite i te tuatua mou ra, koia oki, ki te kite o to ratou Akaora.

37. E ao oki to ratou! No te mea kua akakite atu ratou i te au; kua akakite oki ratou i te tuatua meitaki o te meitaki ra; e kua akakite atu oki ratou ki te tangata e, Te tutara nei oki te Atu.