1. E oti akera a Mosaia i te rave i taua au mea, akaunga atura aia i te karere ki te au enua katoatoa e ki rotopu i te au tangata katoatoa, i te ui anga atu ki te tangata kia akakite mai i to ratou manako e, koai te ka riro ei ariki no ratou.

2. Kua tae maira oki te tuatua a te tangata i te na ko anga mai e, kua inangaro matou i taau tamaiti ia Aarona ei ariki e ei tutara no matou.

3. Kua aere ra a Aarona ki te enua ra ko Niphai; no reira, kare e rauka i te ariki i te tuku i te basileia ki runga iaia; e kare oki a Aarona e inangaro i te basileia ki rungao iaia, e kare katoa e tika i tetai i te au tamariki a Mosaia kia tukuia te basileia ki runga iaia.

4. No reira, kua unga akaou atu te ariki ra ko Mosaia i te karere ki rotopu i te au tangata ra. E au tuatua tataia tana i akaunga atu ki rotopu i te tangata ra. Ko te au tuatua oki teia i tataia atu, ko tei na ko atu e,

5. I na, e toku au tangata e, koia oki toku au taeake, te manako nei au e, e taeake kotou noku, ka inangaro oki au ia kotou kia akamanako meitaki kotou no runga i te mea ta kotou e akamanako nei; no te mea te inangaro nei kotou i tetai ariki.

6. Te tuatua atu nei au kia kotou na, kare te tangata nona tikai te basileia i ariki ana, kare oki aia e rave i te basileia kiaia ra.

7. E tenana, kia akataka keia tetai ei mono iaia ra, i na, kua mataku au ko te tupu aea te mārō ki rotopu ia kotou na; koai oki tei kite e, penei ka tupu te riri o taku tamaiti, nona oki te basileia, e arataki ke atu ei aia i tetai papaki o teianei iti tangata, kia aru atu ratou iaia, e na te reira e akatupu i te tamaki e te pekapeka ki rotopu ia kotou: e na te reira oki e akamaringi i te toto maata, e te arai oki i te mataara o te Atu ra, i na, e mate ei te vaerua o te au tangata e manganui.

8. E te tuatua atu nei au kia kotou e, kia pakari tatou e kia akamanako tatou no runga i teia au mea nei, e kare o tatou tika kia takore i taku tamaiti, e kare katoa o tatou tika kia takore i tetai tangata ke, me ka akataka keia aia ei mono iaia ra.

9. E kia oki akaou taku tamaiti ki tona ra akaparau e ki te au mea viivii e tataraara aia i te au mea tana i tuatua, e e inangaro i tana tuanga i te basileia, e na te reira e akatupu ki roto iaia e ki roto i teianei iti tangata i te au ara e manganui.

10. Kia pakari tatou i te akara ki teianei au mea e kia rave tatou i te mea kia akatupu i te au no teianei iti tangata.

11. E tenana, ko au to kotou ariki kia ope te toenga o toku nei au ra. Ina ra, kia akataka tatou i tetai au akava kia akava atu i teia iti tangata mei tei tau ki to tatou ture, e na tatou e akaou i te au mea o teia iti tangata nei, akataka tatou i tetai au tangata marama ra, ei akava, e na ratou e akava atu i teianei iti tangata ki te au akaueanga a te Atua ra.

12. E ngari ake te tangata kia akavaia e te Atua e i ta te tangata akavaanga, kua tika oki te au akaapaanga a te Atua, ta te tangata ra, kare ïa i te tika i te au taime katoatoa.

13. E tenana, naringa ka rauka ia kotou i te iki i tetai tangata tuatua tika ei ariki no kotou, ko te ka akamou oki i te au ture a te Atua, e ka akava atu i teianei au tangata kia tau ki tana au akaueanga; I na, naringa ka rauka ia kotou i te au tangata te ariki te ka rave mei ta toku metua ra mei ta Beniamina i rave no teianei au tangata ra; Te tuatua atu nei au kia kotou, naringa ka rauka mei te reira i te au tuatau katoatoa, e mea meitaki i reira te ariki kia tutara ki runga ia kotou.

14. E kua angaanga au, ko au uaorai ma toku ririnui katoa e toku kite katoa ra, i te apii anga atu kia kotou i te au akaueanga a te Atua, e i te akatupuanga oki i te au ki runga i te enua katoatoa, kia akakore i te tamaki e te mārō, e te keia, e te noni, e te ta tangata e te au tu ara katoatoa ra.

15. Ko te tangata oki tei rave i te ara, ko taku ïa i akautunga atu ki te ture tei orongaia mai kia tatou e to matou ui tupuna.

16. E te tuatua atu nei au kia kotou, no te mea kare e tuatua tika ta te au tangata katoatoa, kare e meitaki kia akatika kotou i te ariki e te ui ariki kia tutara ki runga ia kotou.

17. I na oki, te maata o te ara ka rauka i tetai ariki tuatua tika kore i te akatupu. Aue, te au tumtetenga maata e.

18. E akamaara i te ariki ia Noa e tana au ara e tana au angaanga viivii e te au ara e te au angaanga viivii a tona ra au tangata. I na, te au tumatetenga maata i tae mai ki runga ia ratou ra; no ta ratou au apa i akatuikaaiaʼi ratou.

19. Naringa kare te tauturu a Tei Anga ia ratou ra, no ta ratou tataraara tikai, kua vai rai ratou ki te tuikaaanga e tae roa mai ki teianei.

20. Ina ra, kua akaora aia ia ratou, ko tei taakaaka ia ratou uaorai ki mua iaia, e i te mea oki, kua kapiki atu ratou kiaia kia akaora aia ia ratou i te tuikaaanga; te pera maira te Atu i te angaanga i tona mana ki te au mea katoatoa i rotopu i te tamariki a te tangata nei, i te tuku anga atu i tona rima aroa ki tei akarongo kiaia ra.

21. E i na oki, te tuatua atu nei au kia kotou, kare e rauka ia kotou kia tuaru atu i tetai ariki tuatua tika kore, mari ra, na roto i te pekapeka maata e te akamaringi anga i te toto maata.

22. No te mea oki, e au oa tona i te tuatua tika kore, e e noo mai rai i tona au tiaki; e te uritumu ra aia i te au ture a tei tutara ma te tuatua tika i mua ake iaia ra; e te akaapa ra aia i te au akaueanga a te Atua ra.

23. E te maani ra aia i te au ture, e kua tuku atu i te reira ki rotopu i tona ra au tangata, i na, ko te au ture ïa e tau ki tana uaorai au peu viivii; e te tangata oki tei kore e akono i tana ra au ture, ka takoreia aia e ïa; e te au tangata oki te ka uritumu kiaia, e tono atu aia i tona au nuku, e tamaki atu ei kia ratou, e me ka rauka iaia, ka takore aia ia ratou ra, pera te ariki tuatua tika kore i te arai ke atu i te aereanga o te au tuatua tika katoatoa ra.

24. E teianei oki, te tuatua atu nei au kia kotou e, kare e mea meitaki kia tae mai te reira au mea viivii ki runga ia kotou.

25. E tenana, kia iki kotou, e na te katoatoa rai e iki, e au akava kia akavaia kotou kia tau ki ta te au ture i tukunaia mai kia kotou e to tatou ui tupuna ra, ko te tuatua mou ïa, e i orongaia mai oki kia ratou e te rima o te Atu.

26. E teianei, kare te au tangata katoatoa e inangaro i te au mea tei kore e meitaki; te inangaro ra tetai papaki iti o te tangata i te au mea kare e meitaki. E inangaro ra tetai papaki iti o te tangata i te mea tika kore, e tenana, kia akonoia teia ei ture no kotou, koia oki kia raveia te akaaereanga na roto i te reo o te au tangata katoatoa.

27. E kia tae ki te tuatau e riro ei te tuatua a te au tangata katoatoa i te iki i te tuatua tika kore, ei reira e tae mai ei te utunga a te Atua ki runga ia kotou, i na, ei reira aia e aere mai ei kia kotou ma te mate maata, mei tana oki i aere mai ana ki teianei enua.

28. E me e au akava to kotou, e kare ratou e akava ia kotou kia tau ki te ture i orongaia maira, ka rauka kia tukunaia atu ratou kia akavaia ratou e tetai akava maata.

29. Kia kore to kotou au akava maata e akava i te akavaanga tika ra, e akaputuputu katoa i te au akava meangiti, e na ratou e akava atu i to kotou au akava maata, kia tau ki te inangaro o te au tangata.

30. E te akaue atu nei au kia kotou na, kia raveia teia au mea ma te mataku i te Atu ra; te akaue atu nei oki au kia rave katoa i teia au mea, e auraka ei ariki no kotou; e kia rave teia iti tangata i te au ara e te au kino, ka pauia ïa te reira ki runga i to ratou uaorai upoko ra.

31. I na oki, te tuatua atu nei oki au kia kotou e, na te ara a te au ariki i akatupu i te ara a te au tangata e manganui.

32. E teianei, kua inangaro au kia akakoreia taua tu aite kore i te enua nei, i rotopu i teia au tangata noku; kua inangaro ra au kia vai te enua nei ei enua tiama kia rauka i te au tangata katoatoa to ratou tika e i to ratou uaorai inangaro katoa, me ka tika i te Atu kia noo tatou e kia riro te enua ei ipukarea no tatou, i na, kia vai tetai toenga o ta tatou uanga ki runga i te enua.

33. E maata atu rai te au mea ta te ariki ta Mosaia i totou atu kia ratou i te akakiteanga atu i te au tumatetenga e te manamanata oki o te ariki tuatua tika ra kia ratou; koia oki te manamanata o te vaerua i to ratou au tangata, e te au koumuumu a te au tangata ki to ratou ariki, e kua akakite papu atu aia i te reira kia ratou.

34. Akakite atura oki aia kia ratou e, e kare e meitaki taua au mea ra, kia tae ra te apainga ki runga i te au tangata katoatoa e kia rave i te au tangata katoatoa i tana tuanga.

35. E kua akakite katoa iora oki aia i to ratou au pekapeka e te au kino me noo ratou ki raro ake i te tutaraanga o te ariki tuatua tika kore ra.

36. I na, ko tana au ara, e te au peu viivii, e te au tamaki, e te maro, e te akamaringi anga i te toto, e te keia, e te noni, e te akaturi, e te au tu ara katoatoa ra e kare e pou i te tata, i te akakite anga atu kia ratou e, kare e meitaki kia vai rai taua au mea ra, e e au mea tau kore maata oki taua au mea ra ki te akaueanga a te Atua.

37. E kia oti te ariki ko Mosaia ra i te tuku anga atu i taua au mea ra ki rotopu i te au tangata, kua kite iora rotou e, ko te tuatua mou ïa e, kare tuatua maira.

38. Kua akakore akera ratou i to ratou inangaro i te ariki ra, e kua inangaro tikai atura kia aiteite te au tangata katoatoa ra e kia aiteite ratou i te au enua katoatoa; e kua akakite maira te au tangata katoatoa i to ratou inangaro kia akautungaia ratou ki ta ratou uaorai ara i rave ra.

39. E no reira kua akaputuputu ratou ia ratou uaorai ki te au pupu i te enua e pini ua ake, kia tuku i ta ratou tuatua, i te ikianga i te au tangata te ka riro ei akava no ratou ra, kia akavaia ratou ki te ture i orongaia mai kia ratou ra; e rekareka roa akera ratou i te tikaanga i rauka mai ia ratou ra.

40. E maata atura to ratou aroa kia Mosaia, kua maata atu to ratou akangateitei iaia i to ratou akangateiteianga i tetai ua atu tangata, i to ratou akamanakoanga, kare rai aia i te ariki akavi tangata tei kimi i te puapinga, koia oki taua apinga nui ra ka viivii ei te vaerua; e kare rava aia i inangaro mai i to ratou puapinga, e kare katoa oki aia i rekareka i te akamaringianga toto; kua akatupu ra aia i te au ki te enua, e kua tuku atu aia i tona ra au tangata kia akaoraia ratou mei roto mai i te au tu tuikaaanga; no reira, kua aere atu ratou kiaia ma te aroa aite kore.

41. E kua akataka iora ratou i te au akava kia akavaia ratou e kia akava oki ia ratou mei tei tau i te ture ra, e kua pera ratou katoatoa e pini ua ake te enua.

42. E kua akatakaia iora a Alama e koia te akavanui mua; e taunga teitei katoa aia, na tona ra metua tane i akamana iaia ra, e i tuku mai oki i te akaaereanga i te au mea katoatoa o te akonoanga kiaia.

43. E te aere atura a Alama na te mataara o te Atu ra, e kua akono aia i tana ra au akaueanga; e kua akava aia i te akavaanga meitaki e kua au atura to te enua katoatoa.

44. E ko te akamataanga ïa o te tutaraanga o te akava ki runga ake i te enua ra ko Zarahemela, e ki rotopu i te au tangata katoatoa i tuatuaia ko te ngati Niphai; e ko te akavanui mua, ko Alama ïa.

45. E kua mate iora tona metua i te mataiti varu ngauru ma rua, i oraʼi oki aia i te akatupuanga i te au akaueanga a te Atua ra.

46. E kua mate katoa iora a Mosaia i te toru ngauru ma toru mataiti o tona ra tutaraanga, ko tona mataiti e ono ngauru ma toru ïa, i te katoatoa e rima anere ma iva mataiti mei te tuatau i akaruke mai ei a Lihai ia Ierusalema ra.

47. E ko te openga iora ïa o te tutaraanga o te ui ariki ki runga i te au tangata o Niphai; e kua ope te au rā o Alama, ko tei akatu i to ratou akonoanga.