1 Ma o lenei sa fai atu Apinati ia te i latou: Ou te manao ia outou malamalama o le a afio mai le Atua lava ia i totonu o le fanauga a tagata, ma o le a togiola e ia ona tagata.

2 Ma ona e soifua o ia i le tino o le a ta’ua o ia o le Alo o le Atua, ma ona ua tuu atu e ia le tino i le finagalo o le Tamā, ona o ia o le Tamā ma le Alo—

3 O le Tamā, ona sa fanauina o ia i le mana o le Atua; ma o le Alo, ona o le tino; ua faapea ona avea ai o ia o le Tamā ma le Alo—

4 Ma o i la’ua o se Atua e tasi, ioe, o le Tamā Faavavau lava lea o le lagi ma le lalolagi.

5 Ma ua faapea ona avea le tino e pulea e le Agaga, po o le Alo i le Tamā, o se Atua e tasi, e mafatia i tofotofoga, ae lē gaua’i atu i le tofotofoga, ae tuu atu o ia lava e tauemuina, ma sasa, ma tuli i fafo, ma faatō e ona tagata.

6 Ma a mavae nei mea uma, a uma ona faia e ia vavega tetele i totonu o le fanauga a tagata, o le a ta’ita’i atu o ia, ioe, e pei lava ona fai mai Isaia, e pei o se mamoe gūgū i luma o le selefulufulu, ua faapea ona lē tatalaina e ia lona fofoga.

7 Ioe, o le a faapea lava ona ta’ita’i atu o ia, faasatauroina, ma fasia, ma avea ai foi le oti ma pule i le tino, ua o gatasi le loto o le Alo ma le finagalo o le Tamā.

8 Ma e faapea ona motusia e le Atua noataga o le oti, ina ua manumalo o ia i le oti; ma tuu atu ai i le Alo le mana e fai ai le ’ai’oiga mo le fanauga a tagata—

9 Ina ua afio a’e i le lagi, ua ia liuliualo i le alofa mutimutivale; ua faatumuina i le agaalofa i le fanauga a tagata; ua tu i lo latou va ma le faamasinotonu; ona ua motusia e ia fusi o le oti, ma ua ave e ia i ona luga a latou amioletonu ma a latou soligatulafono, ina ua ia togiolaina i latou, ma faamalie manaoga o le faamasinotonu.

10 Ma o lenei ou te fai atu ia te outou, o ai na te tala atu lana tupulaga? Faauta, ou te fai atu ia te outou, pe a faia lona agaga o se taulaga mo agasala, o le a silasila o ia i ana fanau. Ma o lenei pe ni a fa a outou? Ma o ai o le a fai ma ana fanau?

11 Faauta ou te fai atu ia te outou, soo se tasi na faalogo i upu a perofeta, ioe, o perofeta paia uma o e sa vavalo e uiga i le afio mai o le Alii—Ou te fai atu ia te outou, o i latou uma o e na faalogo i a latou upu, ma ua talitonu o le a togiolaina e le Alii ona tagata, ma sa tulimata’i i lena aso mo se faamagaloga o a latou agasala, ou te fai atu ia te outou, o i latou ia o ana fanau, po o i latou ia o suli o le malo o le Atua.

12 Ona o i latou ia na tauave e ia a latou agasala; e mo i latou ia na maliu ai o ia, e togiola i latou mai ia latou soligatulafono. Ma o lenei, pe lē o i latou ea ia o ana fanau?

13 Ioe, ma pe lē o perofeta ea, i latou taitoatasi ia sa tatala lona fofoga e vavalo atu, o e e le’i pa’u’ū atu i le solitulafono, o le uiga o perofeta uma lava ia na soifua talu mai le amataga o le lalolagi? Ou te fai atu ia te outou, o i latou ia o ana fanau.

14 Ma o i latou ia o e na latou tala’i atu le filemu, o e na latou aumai tala e lelei o mea lelei, o e na latou tala’i atu le faaolataga; ma fai atu ia Siona: Ua nofotupu lou Atua!

15 Ma ua matagofie na’uā o latou vae i luga o mauga!

16 Ma lea foi, ua matagofie na’uā i luga o mauga vae o i latou o loo latou tala’i atu pea le filemu!

17 O lenei foi, e matagofie na’uā i luga o mauga vae o i latou o e o le a latou talai atu le filemu i le lumanai, ioe, mai i le taimi nei e oo i le faavavau!

18 Ma faauta, ou te fai atu ia te outou, ua lē ona pau lea. Ona ua matagofie na’uā i luga o mauga vae o ia o lē na te aumai tala e lelei, o lē o le faavae o le filemu, ioe, o le Alii lava lea, o lē ua togiolaina e ia ona tagata; ioe, o ia o lē ua tuuina mai e ia le faaolataga i ona tagata;

19 Ona a na leai le togiola ua faia e ia mo ona tagata, lea na saunia mai le faavaega o le lalolagi, ou te fai atu ia te outou, a na leai lenei togiola, po ua fano tagata uma.

20 Ae faauta, o le a motusia noataga o le oti, ma nofotupu le Alo, ma ua ia te ia le pule i luga o e ua oti; o lea, ua aumai ai e ia le toetutu mai o e ua oti.

21 Ma e i ai se toetu e oo mai, o se ulua’i toetu lea; ioe, o se toetutu lea o i latou o e na i ai, ma e o loo i ai, ma e o le a i ai, seia oo mai lava i le toetu mai o Keriso—ona o le a faapea ona ta’ua ai o ia.

22 Ma o lenei, o le toetutu mai o perofeta uma, ma i latou uma o e na talitonu i a latou upu, po o i latou uma o e sa tausi i poloaiga a le Atua, o le a oo mai i le ulua’i toetutu; o lea, o i latou ia o le ulua’i toetutu.

23 E faatutu mai i latou e mau faatasi ma le Atua o lē na togiolaina i latou; o lea ua latou maua ai le ola e faavavau e ala ia Keriso, o lē na ia motusia noataga o le oti.

24 Ma o i latou ia o e ua i ai se vaega i le ulua’i toetu; ma o i latou ia o e na maliliu ae lei afio mai Keriso, i lo latou lē malamalama, ona sa lei folafola atu ia te i latou le faaolataga. Ma e faapea ona faataunuu e le Alii le toefuataiga o i latou ia; ma ua i ai sa latou vaega i le ulua’i toetu, pe ua maua le ola e faavavau, ona ua togiolaina e le Alii.

25 Ma ua maua foi e fanau laiti le ola e faavavau.

26 Ae faauta, ma matata’u, ma gatete i luma o le Atua, ona ua tatau ona outou gatete; ona e lē togiolaina e le Alii soo se tasi faapea o e e fouvale ia te ia ma oti i a latou agasala; ioe, i latou uma ia o e na fano i a latou agasala talu mai le amataga o le lalolagi, o e na fouvale ma le loto i ai e faasaga i le Atua, o e sa latou iloa poloaiga a le Atua, ae sa latou lē tausiaina; o i latou ia e leai sa latou vaega i le ulua’i toetu.

27 O lea pe ua lē tatau ai ea ona outou gatete? Ona e lē oo mai le olataga i ni tagata faapea; ona e lei togiolaina e le Alii se tagata faapea; ioe, pe mafai foi e le Alii ona togiola ni tagata faapea; ona e lē mafai e ia ona teena o ia lava; ona e le mafai ona teena e ia le faamasinotonu, a ua i ai ana aiā.

28 Ma o lenei ou te fai atu ia te outou e oo mai le taimi o le a folafola atu ai le faaolataga a le Alii i atunuu uma, ituaiga, gagana, ma nuu.

29 Ioe, le Alii e, o le a sii a’e e au leoleo o latou leo; ma o le a latou pepese faatasi i le leo e tasi; ona o le a latou faafesagai, pe a toe aumai Siona e le Alii.

30 Alalaga ia i le olioli, pepese faatasi, outou nofoaga tuufua o Ierusalema; ona ua faamafanafanaina e le Alii ona tagata, ua togiola e ia Ierusalema.

31 Ua afe e le Alii lona aao paia i mata o atunuu uma; ma o le a vaai tuluiga uma o le lalolagi i le faaolataga a lo tatou Atua.