1 Che raʼy ahayhuetéva, ahai jey ndéve reikuaa hag̃ua aikoveha gueteri; ha katu ahai michĩmi pe ivaívagui.

2 Ha péina ápe, che aguerekókuri ñorairõ mbarete lamanita-kuéra ndive, ha upévape ndaorepuʼakái hesekuéra; ha Arqueanto hoʼákuri kysepukúpe, ha avei Luram ha Emrom; heẽ, ha rohundíkuri heta ore kuimbaʼe ojeiporavopyréva.

3 Ha koʼág̃a péina ápe, che raʼy, akyhyje lamanita-kuéra ohunditaha ko tavayguakuérape; noñearrepentírigui hikuái, ha Satana omokyreʼỹ meme chupekuéra pochýpe peteĩva ambue rehe.

4 Péina ápe, che ambaʼapo meme hína hesekuéra; ha añeʼẽ hatã jave chupekuéra Tupã ñeʼẽ oryrýi ha ipochy hikuái chendive; ha ndaiporúiramo mbarete omohatã hikuái ikorasõ upe ñeʼẽ rehe; upévare, akyhyje Ñandejára Espíritu noñorairõveimaha hendivekuéra.

5 Tuichaitereígui ipochy haʼetévaicha chéve ndokyhyjéi hikuái ñemanógui; ha ndojoayhuvéima hikuái, ha ijyʼuhéi meme hikuái tuguy ha vengánsagui.

6 Ha koʼág̃a, che raʼy ahayhuetéva, jepeve oñemohatã hikuái, ñambaʼapo jesarekópe; nañambaʼapovéiramo, jaʼáta kondenasiõme; jaguerekógui peteĩ tembiapo jajapovaʼerã ñaime aja ko tete yvýgui ojejapopyrévape, ñandepuʼaka hag̃ua opa tekojoja rayhuʼỹha rehe, ha ñameʼẽ hag̃ua pytuʼu ñane angakuérape Tupã rréinope.

7 Ha koʼág̃a ahaiʼimi ko tavayguakuéra jehasaʼasýre. Mbaʼe ojeʼe haguéicha chéve Amorón rupi, péina ápe, lamanita-kuéra oguereko heta prisionéro, ojagarravaʼekue hikuái tórre Sherrizah-gui; ha oĩ ijapytepekuéra kuimbaʼe, kuña, ha mitã.

8 Ha koʼã kuña ha mitãnguéra ména ha tuvakuérape ojukákuri hikuái; ha omongaru hikuái kuñanguérape iména roʼópe, ha mitãnguérape ituvakuéra roʼópe; ha nomboyʼúi chupekuéra, ndahaʼéiramo michĩmínte.

9 Ha jepeve ko tuichaite lamanita-kuéra rembiapovai, ndohasái ore tavayguakuéra Moriantón-guápe. Ha péina ápe, ojagarrákuri heta lamanita-kuéra rajy prisionéraramo; ha oipeʼa rire chuguikuéra hepyve ha iporãvéva opa mbaʼégui haʼéva tekopotĩ ha tekomarãʼỹ—

10 Ha ojapo rire upéva ojuka chupekuéra, ivaiveháicha, otorturávo hetekuéra omano meve; ha ojapo rire upéva, hoʼu hikuái hetekuéra mymba saitéicha, ikorasõ atãgui; ha ojapo hikuái ohechauka hag̃ua kyhyjeʼỹ.

11 O che raʼy ahayhuetéva, mbaʼéicha piko peteĩ tavayguakuéra kóichagua, oĩva tekoaranduʼỹre—

12 (Ha ohasántekuri mbovymi ary, haʼehague peteĩ tavayguakuéra hory ha iñarandúva).

13 Ha katu O che raʼy, mbaʼéicha piko kóichagua tavayguakuéra horýva hetaiete mbaʼekyʼápe—

14 Mbaʼéicha piko ikatu ñahaʼarõ Tupã ojoko ipo huísiope ñande rehe?

15 Péina ápe, che korasõ heʼiʼasy: Ái ko tavayguakuéragui. Eju huísio reheve, O Tupã, ha eñomi iñangaipakuéra, ha hekoñaña, ha hekokyʼakuéra nde rova renondégui!

16 Ha avei, che raʼy, oĩ heta imenaveʼỹmava ha imembykuéra opytavaʼekue Sherrizah-pe; ha tembiʼu pehẽngue lamanita-kuéra ndoguerahaivaʼekue, péina ápe, Zenefi ehérsito ojagarrákuri, ha ohejákuri chupekuéra oikorei hag̃ua ikatu hag̃uáme ojuhu tembiʼu; ha heta ig̃uaig̃uíva ipyʼamano tapére ha omano.

17 Ha pe ehérsito oĩva chendive ikangy; ha lamanita-kuéra ehérsito chemopaʼũ Sherriza-gui; ha opa ohasavaʼekue Aarón ehérsitope hoʼákuri iñeinupãvaikuéra guýpe.

18 O ko che tavayguakuéra ñeimevai! Ndoguerekói hikuái ni orden ni poriahuvereko. Péina ápe, che peteĩ kuimbaʼénte, ha aguereko mbarete oguerekóva peteĩ kuimbaʼénte, ha ndaikatuvéima amombaʼapo che rembiapoukapykuéra.

19 Ha haʼekuéra oñemombarete ijeikovaípe; ha iñañaiterei avei, ndohejareíri avavépe, ni imitã, ni itujávape; ha hory hikuái opa mbaʼépe ha katu pe iporãvape nahániri; ha ñane kuñanguéra ha ñande raʼykuéra jehasaʼasy opa ko yvy ape ári tuichave opa mbaʼégui; heẽ, kũ ndaikatúiva heʼi, ni ndaikatúiva ojehai.

20 Ha koʼág̃a che raʼy, nañeʼẽvéima ko mbaʼe vaietére. Péina ápe, nde reikuaa ko tavayguakuéra rekoñaña; reikuaa ndoguerekoiha hikuái tekoporã, ha noñanduvéima; ha hekoñañakuéra tuichave lamanita-kuéragui.

21 Péina ápe, che raʼy, ndaikatúi añeʼẽporã hesekuéra Tupãme ani haʼe chepyʼajopy mbaʼe.

22 Ha katu péina ápe, che raʼy, romeʼẽ Tupãme, ha ajerovia Cristo-re rejesalvataha; ha ajerure Tupãme tosalva nde rekove, haʼe hag̃ua testígo ko tavayguakuéra oujey vove hendápe, térã oñehundipaite vove; che aikuaágui omanovaʼerãha noñearrepentíriramo hikuái ha oujey hendápe.

23 Ha omanóramo hikuái haʼéta jaredita-kuéraicha, ikorasõ atã rupi, ohekávo tuguy ha vengánsa.

24 Ha omanóramo hikuái, jaikuaa heta ñande joykeʼykuéra ohasahague lamanita-kuéra ndive, ha hetave ohasataha avei hendivekuéra; upévare, ehaína michĩmi, rejesalváramo ha che amano ha ndorohechavéiramo; ha katu ajerovia pyaʼe rohechajeytaha; aguerekógui kuatiajehaipyre imarangatúva ameʼẽséva ndéve.

25 Che raʼy, ejeroviareko Cristo-re; ha umi mbaʼe ahaivaʼekue ani ndepyʼapy, ndereity hag̃ua ñemano meve; ha katu Cristo tanembovyʼa, ha ijehasaʼasy ha iñemano, ha hete jehechauka ñande rukuérape, ha iporiahuvereko ha ipyʼaporã, ha iverapy ñehaʼarõ ha tekove opaveʼỹva, topytuʼu ne apytuʼũme tapiaite.

26 Ha Tupã pe Túva grásia, ijapykajegua oĩva yvate yvágape, ha Ñandejára Jesucristo, oguapýva ipuʼaka akatúape, opa mbaʼe oñemoĩ meve ypoguýpe, toho ha topyta nendive tapiaite g̃uarã. Amén.