Escritura-kuéra
Moroni 8


Ñembyaty 8

Mitãnguéra ñemongarai haʼe peteĩ tembiapokyʼa vaiete—Mitã michĩ oikove Cristo-pe expiasiõ rupive—Jerovia, arrepentimiénto, tekomarangatu, ha korasõ ñemomirĩ, Espíritu Santo jehupyty, ha ñehaʼãmbaite ipahaite peve oporogueraha salvasiõme. 401–421 ary rupi Cristo rire.

1 Peteĩ che ru Mormón kuatiañeʼẽ, ohaivaʼekue chéve, Moroni; ha ohaíkuri chéve añehenói mboyvemi che ministériope. Ha péicha ohai chéve haʼe heʼívo:

2 Che raʼy ahayhuetéva Moroni, che avyʼaiterei Ñandejára Jesucristo imanduʼa haguére nderehe ha nerenói haguére iministério, ha hembiapo marangatúpe.

3 Ha che tapiaite chemanduʼa nderehe che ñemboʼépe, ajerure memévo Tupã upe Túvape, Itaʼýra Marangatu, Jesús, rérape, imborayhu ha igrásia opaveʼỹva rupi, taneñongatu jerovia hérape ñehaʼãmbaite rupive ipahaite peve.

4 Ha koʼág̃a, che raʼy, che añeʼẽta ndéve chejopyetereívare; chejopyetereígui oĩ haguére joavy pende apytépe.

5 Aikuaáramo añetegua, oĩkuri joavy pende apytépe pene mitãnguéra michĩva ñemongaraíre.

6 Ha koʼág̃a, che raʼy, aipota pembaʼapo jesarekópe, peipeʼa hag̃ua pende apytégui ko jejavy tuichaitéva; ha, upevaʼerã, che ahaíkuri ko kuatiañeʼẽ.

7 Aikuaa riremi koʼã mbaʼe pendehegui aporandúkuri Ñandejárape upe mbaʼe rehe. Ha Ñandejára ñeʼẽ oúkuri chéve Espíritu Santo puʼaka rupive, heʼívo:

8 Ehendu Cristo ne Rredentor ñeʼẽ, Ñandejára, nde Tupã. Péina ápe, che ajúkuri yvórape ndahaʼéi ahenói hag̃ua hekojojávape oñearrepenti hag̃ua; ha katu iñangaipávape; hasyʼỹva noikotevẽi pohãnohára, ha katu umi hasýva oikotevẽ; upévare, mitã michĩva ndahasýi, ndaikatúigui ojapo angaipa; upévare che pype ojeipeʼa chuguikuéra Adán ñeʼẽngái; ha sirkunsisiõ rehegua léi oñekumpli chepype.

9 Ha kóicha ohechaukákuri chéve Espíritu Santo Tupã ñeʼẽ; upévare, che raʼy ahayhuetéva, che aikuaa haʼeha Tupãre ñembohory añete, pemongarai mitã michĩ.

10 Péina ápe che haʼe ndéve péva remboʼéta—arrepentimiénto ha ñemongarai umi oikuaáva ha ikatúvape ojapo angaipa; heẽ, emboʼe tuvakuérape oñearrepenti ha oñemongaraivaʼerãha, ha toñemomirĩ imitã michĩnguéraicha, ha ojesalváta opavave haʼekuéra imitã michĩnguéra ndive.

11 Ha imitã michĩnguéra noikotevẽi arrepentimiéntore, ni ñemongaraíre. Péina ápe, ñemongarai haʼe arrepentimientorã oñekumpli hag̃ua tembiapoukapykuéra angaipa jorarã.

12 Ha katu mitã michĩva oikove Cristo rupive, jepe yvóra ñepyrũmby guive; ndaupéichairire, Tupã haʼe peteĩ Tupã oñemovãva, ha avei peteĩ Tupã oñemoambuéva, omboykéva yvyporakuérape; ha mboy piko oĩ mitãmimi omanovaʼekue ñemongaraiʼỹre!

13 Upévare, mitã michĩva ndaikatúirire ojesalva ñemongaraiʼỹre, koʼãva ohovaʼerãmoʼã peteĩ añaretã opaveʼỹvape.

14 Péina ápe che haʼe ndéve, pe oimoʼãva mitã michĩ oikotevẽha ñemongaraíre oĩ vyʼaʼỹ kuápe ha tembiapovai sãme; ndoguerekóigui jerovia ni ñehaʼarõ, ni karida; upévare, oñeikytĩramo oguereko aja péichagua temiandu oguejymantevaʼerã añaretãme.

15 Ivaietereígui tekoñaña ñaimoʼãramo Tupã osalvaha peteĩ mitãme ñemongarai rupive, ha upe aja katu ambue omanovaʼerã noñemongaraíri haguére.

16 Ái umi ombyaívagui kóicha Ñandejára rape, omanótagui noñearrepentíriramo. Péina ápe, añeʼẽ kyhyjeʼỹme, aguerekógui autorida Tupãgui; ha ndakyhyjéi yvypóra ojapóvagui; mborayhu porã oipeʼágui opa kyhyje.

17 Ha che añeñandu cherenyhẽha karidágui, haʼéva mborayhu opaveʼỹva; upévare, opa mitã haʼe peteĩcha cherenondépe; upévare, che ahayhu mitã michĩva peteĩ mborayhu porãme; ha peteĩchapa ha oike hikuái salvasiõme.

18 Che aikuaágui Tupã ndahaʼeiha Tupã oñemovãva, ni peteĩ tekove iñambuéva; ha katu noñemoambuéi ára apyraʼỹgui ára apyraʼỹme.

19 Mitã michĩ ndaikatúi oñearrepenti; upévare, ivaietereíva tekoñaña oñenega chuguikuéra Tupã poriahuvereko añetegua, opavave oikógui ipype iporiahuvereko rupi.

20 Ha pe heʼíva mitã michĩ oikotevẽha ñemongaraíre onega Cristo poriahuvereko, ha ndohayhúi iñexpiasiõ ha irredensiõ puʼaka.

21 Ái koʼãvagui, oĩgui ñemano poguýpe, añaretã, ha peteĩ jehasaʼasy opaveʼỹva. Che añeʼẽ kyhyjeʼỹme; Tupã heʼíkuri chéve. Pehendu koʼã ñeʼẽ, ha peneñeʼẽrendu hese, térã otestifikáta pende rehe Cristo trivunal renondépe.

22 Ha péina ápe opavave mitã michĩ oikove Cristo-pe, ha avei opa umi oĩva leiʼỹre. Pe rredensiõ puʼaka ombaʼapógui opavave umi ileiʼỹvare; upévare upe noñekondenáiva, térã ndaipóriva mbaʼeveichagua kondenasiõ guýpe, ndaikatúi oñearrepenti; ha upévape g̃uarã ñemongarai ndahaʼéi mbaʼeve—

23 Ha katu haʼe peteĩ ñembohory Tupã renondépe, Cristo poriahuvereko, ha Ijespíritu Marangatu puʼaka ñenega, ha jerovia ñemoĩ tembiapo manombyrépe.

24 Péina ápe, che raʼy, koʼã mbaʼe ndaupeichaivaʼerã; pe arrepentimiénto haʼégui umi oĩva kondenasiõ guýpe g̃uarã ha peteĩ léi ojejapyharavaʼekue ñeʼẽngái guýpe g̃uarã.

25 Arrepentimiénto roky ñepyrũ niko haʼe ñemongarai; ha ñemongarai ou jerovia rupi okumpli hag̃ua tembiapoukapykuéra; ha tembiapoukapykuéra ñekumpli ogueru angaipa jora;

26 Ha angaipa jora ogueru tekomarangatu ha korasõ mirĩ; ha pe tekomarangatu ha korasõ mirĩ rupi ou pe Espíritu Santo ñemog̃uahẽ, haʼéva Angapyhyhára oporomyenyhẽva ñehaʼarõ ha mborayhu porãgui, mborayhu opytáva ojejesarekóramo ñemboʼépe, ou peve ipaha, opa imarangatúva oikotahápe Tupã ndive.

27 Péina ápe, che raʼy, che ahai jeýta ndéve nasẽpyʼaéiramo lamanita-kuéra rehe. Péina ápe, ko tetã orgúllo, térã nefita-kuéra tavayguakuéra, haʼékuri iñehundi apoha oñearrepentiʼỹramo hikuái.

28 Eñemboʼe hesekuéra che raʼy, ou hag̃ua chupekuéra arrepentimiénto. Ha katu péina ápe, akyhyje pe Espíritu noñorairõvéimaramo g̃uarã hendivekuéra; ha ko tetã pehẽnguépe oñehaʼã avei hikuái ohundi opa autorida ha puʼaka oúva Tupãgui; ha onega hína hikuái pe Espíritu Santo.

29 Ha orrechasa rire hikuái tuichaite jeikuaa, che raʼy, pyaʼe omanovaʼerã hikuái, oñekumpli hag̃ua profesiakuéra heʼivaʼekue umi proféta, ha umi ñande Salvador ñeʼẽ.

30 Maitei, che raʼy, ahai jey peve ndéve, térã rohecha jey peve.