Sbalunebal Capitulo
Moroni ta xic’ ta sutesub o’ntonal scotolic ti boch’otic mu xch’unic Cristoe—Ti stuque ta xalbe sc’oplal batel ti Riox bu ech’em sq’uelubil stsatsale, ti ta xac’ ta na’ele (revelación) xchi’uc ti ta xac’ tsatsalile xchi’uc sq’uelubil ta sbaic boch’otic lec jch’unej mantaletique—Ti sq’uelubil tsatsalile mu xu’ xa xc’ot ta pasel ta sventa bolilil—Ti sq’uelubile ja’ ta st’unic batel ti boch’otic ja’ ta xch’unique—Ta xich’ic albel viniquetic ti ac’o lequicuque xchi’uc ti ac’o xch’unic mantaletique.
1 Xchi’uc ja’ chi c’opoj xtoc ta sventaic ti boch’otic mu xch’unic Cristoe.
2 Ja’ jech ¿me cha ch’unic ti ta baq’uin c’alal cha vich’ic vu’lanel—ja’ jech, ti baq’uin ta xtal ti Cajvaltic, jech, ti va’ay muc’ta c’ac’al ti c’alal ta xot sba jech chac c’u cha’al c’usi xotxot, xchi’uc ti ta x-unij ta sc’ac’al c’oc’ ti c’usitic pasbil oe, jech, ti ta va’ay c’ac’al ti c’alal cha vich’ic iq’uel batel ta stojolal ti xch’iumchij Rioxe—me tavan xa valic ti muyuc Rioxe?
3 ¿Me jech te cha valic o ti muyuc Cristoe, o me stac’ xa vilic ti xch’ium chij Rioxe? ¿Me tavan xa valic me xu’ cha chi’nic ti c’alal jech a na’ojic ti oy amulique? ¿me tavan xa valic me te lec xcuxet avo’ntonic a chi’uquic ti va’ay ch’ul vinic, ti c’alal me jech te c’ux cha va’yic ta ach’ulelic ti a mulic ti ta sventa muyuc xa ch’unic mantaletique?
4 Ja’ jech, cha calboxuc ti ech’em chopoloxuc, ti me te oyoxuc ta stojolal jun ch’ul Riox xchi’uc lec, ti c’alal me ana’ojic ti muyuc lec sacoxuc te ta stojolal, ti me yu’un ja’ xa ac’bil-el ta ch’ayel ta c’atinvac a ch’ulelique.
5 Yu’un ja’ jech, ti c’alal me la ac’bat avilic ti cu x-elan t’analoxuc ta sat ti Rioxe, xchi’uc xtoc ti xojobal Riox xchi’uc ti slequilal Jesucristoe, ja’ me tstsan jun stilemal c’oc’ ti jech mu stac’ tubel ta a tojolalique.
6 Sutanictal cha’e, vo’xuc ti chopoloxuque, sutanictal ta Cajvaltic; c’opanic tsots ti Riox ta sbi Jesuse, ti c’uxi xu’ muyucuc a vi’c’ubalique, lequicoxuque, alac’uc abaique, xchi’uc saquicoxuc ti ta baq’uin muc’ta slajebal c’ac’al, ti me jech la vich’ic sacubtasel ta sventa xch’ich’al chi’umchije.
7 Xhi’uc ta jc’opanoxuc vo’xuc ti boch’otic mu jamaluc cha valic ti c’usi chac’ ta ilel Riox li’ ta orae xchi’uc ti cha valic ti mu xa xu’ xc’ot ta pasele, ti jech mu xa c’usi xu’ xac’ ta ilel li’ Rioxe, xchi’uc ti mu xa xu’ boch’o xu’ xal batel ti c’usi ta xich’ ac’bel yil yu’un Rioxe, xchi’uc tsatsalil ta spasel c’usitic tsots, xchi’uc me ja’uc coltael, xchi’uc me ja’uc c’opojel ta yantic c’op, xchi’uc me ja’uc xu’ xca’ybetic smelolal yantic c’op.
8 Ja’ jech, ta xcal ti boch’o mu jamaluc ta xal ti c’usitic va’aye yu’un mu xotquin ti slequil c’op Cristoe; jech, yu’un muyuc sq’ueloj ti ts’ibiletique; ti me oy sq’ueloje, yu’un muyuc xa’ybe lec smelolal.
9 Jech, ¿A me muyuc ta jq’ueltic ta vun ti Riox ja’ co’ol o jech chac c’u cha’al volje, li’ ta ora xchi’uc c’alal ta sbatel osile, xchi’uc ti ta stojolale muyuc c’usi xu’ xjeltaj xchi’uc me ja’uc oy nac’ubalil ti c’uxi xu’ xjeltaje.
10 Ja’ jech lec, me oy a nopoj ta ajol ta xjel ti jun Rioxe, xchi’uc ti me oy nac’ubalil c’uxi ta xjele, yu’un a nopoj jun Riox ti ma’uc jun Riox xu’ xac’ ta ilel tsatsalile.
11 Ja’ jech, vu’un ta xcac’boxuc avilic jun Riox ti xu’ xac’ ta ilel stsatsale, jech ti ja’ Xriox Abrahame, xchi’uc ti ja’ Xriox Isaaque, xchi’uc ti ja’ Xriox Jacobe; ti ja’ ono’ox ti Riox boch’o la spas vinajel xchi’uc banamil, xchi’uc scotol ti c’usitic oy ta scotole.
12 Xchi’uc ja’ la spas Adan, xchi’uc ta Adan tal ti c’uxi yal ta mulil vinique. Xchi’uc ja’ ta sventa c’uxi yal ta mulil vinic, tal ti Jesucristoe, jech ti Totil xchi’uc ti Nich’onile, xchi’uc ja’ ta sventa Jesucristo tal ti coltael ta sventa vinique.
13 Xchi’uc ta sventa c’uxi yich’ coltael vinic, ti tal ta Jesucristo, ta xich’ic iq’uel batel ta stojolal Cajvaltique, jech, ja’ ta va’ay xu’ ta xich’ic coltael ti viniquetique, yu’un ti c’u x-elan cham Cristoe ja’ te tal ti cha’cuxesele, ti ja’ c’uxi xu’ chc’ot ta pasel coltael ta sbatel osil vayel ti bu scotol viniquetic ta xjuloic, ta sventa stsatsal Riox c’alal me bac’ oq’uese (trompeta); xchi’uc ta xloq’uic ololetic xchi’uc muc’tiquetic, xchi’uc ta xc’otic te bu ta smeltsanvan, loq’uesbilic xchi’uc colemic ti li’ ta yaq’uil sbatel osil lajele.
14 Ja’ to te ta xtal ti c’u x-elan ta sq’uel talelil Ch’ul Riox ta stojolalique, xchi’uc ja’ to te chvinaj ti boch’o muyuc leque ja’ me jech muyuc o lec, xchi’uc ti boch’o leque ja’ me jech lec o, ti boch’o xcuxet yo’ntone ja’ me jech xcuxet o yo’nton, xchi’uc ti boch’o muyuc xcuxet yo’ntone ja’ me jech muyuc xcuxet o yo’nton.
15 Xchi’uc ja’ jech lec tana acotolic ti boch’otic a nopojic jun Riox ti mu xu’ xac’ ta ilel tsatsalile, ta jc’an cha jac’boxuc; ¿me ech’em xa o scotol ti c’usitic va’ay la jcale? ¿me c’otem xa ti slajebal c’ac’ale? ja’ jech, ta xcal ti mo’oje; xchi’uc ti Rioxe muyuc chlaj o ti jech ja’ jun Riox ta xac’ ta ilel tsatsaliletique.
16 Ja’ jech, ¿me mu alac’uc sba ta jsatic ti c’usitic spasojan li’ Rioxe? jech, xchi’uc ¿boch’o xu’ xa’ybe lec smelolal ti alaq’uic sba yabteltac li’ Rioxe?
17 ¿Boch’ovan xu’ ta xal ti me mu sq’uelubiluc tsatsalil ti jech ta ya’yej no’ox ti jech ayin vinajel xchi’uc banamile; ti ta stsatsal no’ox ya’yej yich’ liquesel ta spucuquil banamil ti vinique, xchi’uc ti ta stsatsal ya’yej la jyich’ ilel sq’uelubil tsatsalile?
18 ¿Xchi’uc boch’ovan xu’ ta xal ti Jesucristo muyuc x-abtej ep ta muc’tiquil sq’uelubil tsatsalile? Xchi’uc oy ep muc’tic sq’uelubil tsatsalil la spasic ta sc’opic yaj chanc’optac.
19 Xchi’uc ti me jech la jyich’ pasel sq’uelubil tsatsalile, ¿c’uyu’un ti jech muxa ja’uc Riox xu’ xac’ ta ilel tsatsalil ti Rioxe, xchi’uc ti jech mu xjel oe? Xchi’uc ja’ jech, cha calboxuc ti stuque mu xjel o; ti yu’nuc ja’ jeche, mu xa ja’uc Riox ti jechuque; xchi’uc ti stuque mu xlaj o ti jech ja’ Rioxe, xchi’uc ja’ Riox ti ta xac’ ta ilel tsatsalile.
20 Ta sventa ti me muyuc xa chc’ot ta pasel sq’uelubil tsatsalil ta stojolalic xnich’nab viniquetique ja’ ta sventa ti me muyuc xch’unolajel yo’ntonique, xchi’uc ti me tsvoc’ sbaic ti te ta bu tuc’ lec sbelale, xchi’uc ti me tscomtsanic ta otquinel ti Riox ti boch’o xu’ tspat yo’ntonic xchi’uquic jechuque.
21 Ja’ jech, cha calboxuc tiboch’o ta xch’un Cristoe, xchi’uc ti me muyuc ta snop me mu jechuc, ti c’alal me tsc’an ta Totil ta sbi Cristoe, ta xich’ ac’bel; xchi’uc ti va’ay c’usi yaloje ja’ ta sventa acotolic, xchi’uc c’alalto ta sti’iltac banamil.
22 Yu’un ja’ jech, la jyal ti Cristo, xnich’on Riox, ta yajchanc’optac ti yu’un ja’icuc te oyicuque, jech, xchi’uc xtoc ta scotolic yajchanc’optac, la jyich’ a’yel ta scotolic boch’otic te tsobolic. Batanic ta scotol banamil, xchi’uc bat cholic jlequil c’op ta scotol quirisianoetic.
23 Yu’un ti boch’o ta xch’un xchi’uc ti me ta xich’ vo’e, ja’ ta xcol, ja’uc ti boch’o muyuc ta xch’une, ja’, ta xich’ aq’uel ta ch’ayel.
24 Ja’ li’ ti sq’uelubil xu’ ta sts’aclinic batel ti boch’otic ta xch’unique, ta jbi ta sloq’uesic pucujetic, ta xc’opojic ta ach’ c’opetic; ta xchechic chonetic, xchi’uc ti me la jyuch’ic c’usi xu’ xchamic o yu’une, mu spabatic chopol; ta xac’ sc’obic ta sba jchameletic, xchi’uc ja’ ta scoltaic.
25 Xchi’uc ti boch’o ta xch’un li’ jbie, ti me muyuc ta snop me mu jechuque, vu’un ta xcac’be scotol ti jc’optaque, c’alalto ta sti’iltac banamil.
26 Ja’ jech lec tana, ¿Boch’o xu’ xcuch yu’un ti yabteltac Cajvaltique? ¿Boch’o mu xu’ xal ti ya’yejtaque? ¿Boch’ovan xu’ xlic scontrain ti smuc’ta tsatsal stsatsal Cajvaltique? Boch’ovan xu’ sbajbe ti yabteltac Cajvaltique? ¿Boch’ovan xu’ sbajbe ti xnich’nabtac Cristoe? Me tavan xa valic acotolic vo’xuc ti me bajbiloxuc ti vo’xuc yabteloxuc Cajvaltic ti jech chbat a ch’ulelic xchi’uc ti cha chamique.
27 Oh, mu me xa bajbeic, jech, me ja’uc xbat ach’ulelic, ja’ lec, a’ybeic ti ya’yejtac Cajvaltique, xchi’uc c’anbeic Jtotic, ta sbi Jesús, ti c’usitic chtun avu’nique, mu xa nopic me mu jechuque, ja’uc no’ox jch’unolajelucoxuc; xchi’uc liquesic jech chac c’u cha’al ta sc’ac’aliltac vo’nej, xchi’uc ac’abaic ta Cajvaltic ta scotol avo’ntonic, xchi’uc abtelanic acuxlejalic atuquic ta sventa xi’el xchi’uc ta xq’uexel stuc.
28 Lequicoxuc me ti ta sc’ac’aliltac cha vich’ic q’uelbel a talelique; loq’ueso abaic ta scotol avic’ubalic mu me sa c’anic ti c’usi ja’ no’ox lec cha va’ay ta vo’ntonic atuquique, ja’ no’ox tsots xa c’anic ti c’uxi mu xa vaq’uic mulile, ja’ no’ox stac’ xa abtejic ta bats’imelel Riox bu cuxul.
29 Q’uelo me abaic mu me xa vich’ic vo’ ti me jech oy amulique; q’uelo me abaic mu me xa tsaquic sbec’tal xch’ich’al Cristo ti jech oy amulique, ja’ lec, q’uelic pasic ta lequilal ti c’usitique, xchi’uc pasic ta sbi Jesucristo, ti xnich’on cuxul Rioxe; ti me la pasic va’aye, xchi’uc ti me cuch avu’nic c’alalto ta slajebal c’ac’ale, ti va’aye mu c’uxi xu’ mu xa vich’ic c’anel.
30 Ja’ jech cha jc’opanoxuc jech chac c’u cha’al xco’laj xchi’uc chi c’opojtal ta animaetic ya’eluque; yu’un jna’oj ti avich’ojbicun ti jc’optaque.
31 Mu xa vaq’uicun ta ch’ayel ta sventa yu’un muyuc lecun, me ja’uc jtot ta sventa yu’un muyuc lec, me ja’uc ti boch’otic ta sts’ibaic ba’yuc jech chac c’u cha’al stuque; ja’ lec tojbeic ta vocol Riox ti jech yalojboxuc ti a chopolilique, ti c’uxi xu’ xa chanic apasel abaic ta bij jech chac c’u cha’al vu’uncutique.
32 Xchi’uc ja’ jech, la jts’ibacutic ti li’ poco’ ts’ibiletic jech chac c’u cha’al jna’ojcutique, ti c’u x-elan te ts’ibabile ja’ sbi cu’uncutic egipcio cha’liquesbil ta ach’; la jcalcutic xchi’uc jpasojcutic jech chac c’u cha’al xi c’opojcutique.
33 Ti yu’nuc ep no’ox ti jtaq’uin vuntac-cutique la jts’ibacutic ta hebreo c’op ti jechuque; jech xchi’uc jpasojcutic xtoc ti ta hebreo c’ope; ti yu’unun o no’ox xu’uc cu’uncutic la jpascutic ti ta hebreo c’ope, ja’ jech, muyuc bu oyuc a chopolilic ta jpoco’ c’opcutic ti jechuque.
34 Ja’ no’ox Cajvaltic sna’ojscotol ti c’usitic jts’ibaojcutique, xchi’uc muyuc bu yan jteclum xotquin ti c’u x-elan xi c’opojcutique; xchi’uc ja’ ta sventa ti yu’un mu boch’o yan jteclum xotquin ti c’u x-elan chi c’opojcutique, ja’ jech ja’ la smeltsan ti c’uxi xu’ xich’ albel smelolale.
35 Ta xich’ ts’ibael c’usitic li’e ja’ ta sventa ti c’uxi xu’ xich’ sacubtasel jc’u’tic ta xch’ich’al quermanotactic ti yu’un ja’ spasojic ti bolililetique.
36 Ja’ jech, ti c’usitic li’ ti ja’ ta jc’ancutic ti ta sventaic quermanotactique, ja’ ti ta xich’ cha’liquesel ta ach’ ti c’uxi ta jna’tic Cristoe, ti ja’ co’olsba xchi’uc c’u x-elan tsc’opanic Riox ch’ul viniquetic ti boch’otic li’ ch’i’ic ta banamile.
37 Cajvaltic Jesucristo ac’o yac’ xich’ taq’uel ti c’u x-elan cha c’opanic Riox jech chac c’u cha’al xch’unolajel a vo’ntonique, xchi’uc Riox Totiluc ac’o sna’ ti c’usi yaloj o no’ox ta snailal Israele, xchi’uc ac’o yac’boxuc sventicion ta sbatel osil, ta sventa xch’unolajel o’ntonal ta sbi Jesucristo. Jechuc.