Svucubal Capitulo
Mormón ta xalbe jlamanitaetic ta slajebal c’ac’al ti ac’o xch’unic Cristoe, ti slequil c’ope xchi’uc ti ta xcolique Scotolic ti boch’otic ta xch’unic Bibliae ta xch’unic xtoc ti Slibro Mormone.
1 Ja’ jech tana ti li’e, ta jc’an ta xcalbe jutuc smelolal ta sventa scomelal li’ jteclum ti bu pojbilique, ti me Riox ta xac’ c’opojcun ti c’uxi xu’ xa na’ic ta sventa c’usi spasojic a totique, jech chi c’opoj ta atojolalic ti vo’xuc scomelaloxuc snailal Israele, ja’ ti li’ lo’iletic bu vu’un chi c’opoje.
2 Na’ic me ti ja’oxuc snailal Israele.
3 Na’ic me ti tsc’an cha c’otic c’alalto ta sutesub o’ntonale, ti me mo’oje mu stac’ xa colic.
4 Na’ic me ti tsc’an cha comtsanic ti avabtejebic ta sventa pas c’ope, xchi’uc mu me ja’uc lec xa va’yic ti mal ch’ich’e, mu xa me xa tsaquic yanvelta, ja’ xa no’ox ti me Riox la spasoxuc ta mantale.
5 Na’ic me ti tsc’an cha yotquinic li’ a totique, xchi’uc suteso a vo’ntonic ta sventa amulic xchi’uc ta sventa abolilic xchi’uc ch’unic ti Cristoe, ti ja’ xnich’on Rioxe, xchi’uc ti judioetic la smilique, xchi’uc ti ja’ ta stsatsal jtotic cha’ cux ti c’uxi la spas ta canal ti muquinaltique, xchi’uc ja’ la sbic’ li’ xchopolil lajele.
6 Xchi’uc ja’ ta yu’un ti ta xc’ot ta pasel chcha’ cuxiic animaetique, ti jech ta xcha’ cuxiic viniquetic ti c’uxi ta xbat yac’ sbaic ta stojolal bu ta smeltsanvane.
7 Xchi’uc ja’ la scolta sbejel banamil, ja’ jech ti boch’o muyuc smul chc’ot ta stojolal ti me sta sc’ac’alil ta sq’uel talelile, ta xich’ aq’uel ta bats’imelel ta stojolal Riox ti te bu ta spas mantale, ti c’uxi xu’ sq’uejintaic q’uejimoletic xchi’uquic ti boch’otic te tsq’uejintaic ta vinajele, ta Jtotic ta Nich’onil xchi’uc ta Ch’ul Espíritu, ti ja’ic junic Rioxe, ti te bu oy cuxetel o’ntonal muyuc slajebe.
8 Ja’ jech suteso a vo’ntonic xchi’uc ich’ic vo’ ta sbi Jesús, xchi’uc ac’ abaic ta smantaltac Cristo ti ma’uc no’ox o li ta poco’ lo’iletic ta xich’ aq’uel ta otquinele, yu’un ta xich’ aq’uel ta spoco’ lo’ilic Judioetic xchi’uc ta boch’otic ma’icuc snailal Israel, ti bu poco’ lo’iletic ta xtal ta atojolalique.
9 Ja’ jech, ta xich’ ts’ibael ti li’e ja’ ta sventa ti c’uxi xu’ xa ch’unic ti ta sventa va’ay yantique, yu’un ti me cha ch’unic ti ta sventa va’ay yantique, xchi’uc cha ch’unic xtoc ti ta c’usitic li’e, ti me cha ch’unic ti ta c’usitic li’e, ja’ te cha na’ic ti ta sventa atotique, xchi’uc ti alaq’uic sbaic abtelal la jyich’ic pasbel ta stsatsal Rioxe.
10 Xchi’uc ja’ te cha na’ic xtoc ti ja’oxuc scomelal snitilil snailal Jacobe; ja’ jech te cha vich’ic atael te ta jteclum ti te bu ta ba’yuc c’usi la jyich’ alele, ja’ no’ox venta me la ch’un Cristoe, xchi’uc me la vich’ vo’ ba’yuc ta vo’ ja’o ta c’oc’ xchi’uc Ch’ul Espíritue, xchi’uc ti me ja’ cha pasic batel ti c’usi la spas Jcoltavanej cu’untique, xchi’uc me ja’ jech cha pasic jech chac c’u cha’al la xchanubtasoxuque, ti me jeche lec cha c’ot ta sc’ac’alil c’alal ta sq’ueltalelil. Jechuc.