1 Ja’ jech c’ot ta pasel ti ta sjabilal oxib ciento xchi’uc oxib xchanvinic (263) jabile, muyic batel nefitaetic xchi’uc soltarotac ti te ta banamil bu muyuc lec c’usi oye, yu’un jech bat smilic o ti jlamanitaetique.

2 Ja’ jech c’ot ta pasel ti yajsoltarotac nefitaetique la jyich’ic suteseltal c’alalto ta banamil bu muyuc c’usi oy, xchi’uc ti c’alal ja’o jech lubenique, ja’o te c’ot ta stojolalic jtsop ach’ soltarotac yu’un jlamanitaetic; jech te tsots la spasic c’op, jech ja’ to ti c’uxi la jyu’ninic jlamanitaetic ti muc’ta jteclum bu muyuc lec c’usi oye, xchi’uc la smilic epal nefitaetic, xchi’uc la stsaquic ep ta chuquel.

3 Jech ti scomelale jatoic xchi’uc te la stsob sbaic xchi’uquic yajvaltac muc’ta jteclum Teáncum; ti va’aye ja’ te xcom te ta ts’ac, te ta ti’ nab, xchi’uc te noch’ xil ti muc’ta jteclum bu muyuc lec c’usi oye.

4 Xchi’uc ja’ ba’yuc la stij sbaic ti nefitaetic ta stojolalic jlamanitaetique, ja’yo jech la jyich’ic vuq’uesel, ti manchuque muyuc bu la spas canal jlamanita ti jechuque.

5 Ja’ jech tana, ti vocolil ta xac’ Rioxe ta xtal ta stojolalic boch’otic ta tspasic chopolil, xchi’uc ja’ ta sventaic boch’otic muyuc lequic ti ta xich’ic vocolil boch’otic muyuc lequique; yu’un ja’ic ti boch’otic ta sujbeic yo’ntonic xnich’nab viniquetic ta smalic ch’ich’e.

6 Ja’ o jech ti jlamanitaetique la xchapan sbaic ti c’uxi xu’ xbatic ta scontrainel muc’ta jteclum Teáncume.

7 Ja’ jech c’ot ta pasel ti ta sjabilal oxibciento xchi’uc chanib xchanvinic (364) jabil ti c’alal batic ta muc’ta jteclum Teáncum jlamanitaetic ta sventa ti yu’un tsc’an ta xu’ninic ec xtoque.

8 Ja’ o jech ti nefitaetique, la sloq’uesic xchi’uc jato yu’nic. Ti c’alal la jyilic nefitaetic ti jech jato yu’nic jlamanitaetique, la stoy sbaic yanvelta ti ta sventa spersaique, xchi’uc spatoj yo’ntonic loq’uel batel ta sventa stsatsal stuquic, jech bat spojic yanvelta ti muc’ta jteclum bu muyuc lec c’usi oye.

9 Scotolic ti c’usitic va’aye c’otemic xa ta pasel, xchi’uc ep chamic ta xcha’ chopalic, jech chac c’u cha’al nefitaetic xchi’uc jech chac c’u cha’al jlamanitaetic.

10 Ja’ o jech ti c’alal jelo ti sjabilal oxibciento xchi’uc vaquib xchanvinic (366) jabile, ti jlamanitaetique talic yanvelta ta pas c’op xchi’uc nefitaetic; ja’ jech, ti nefitaetique muyuc bu ta sutes yo’ntonic ta sventa ti c’usi chopol ta spasique, xchi’uc ta sc’an ta spasic ta jujuliquel ti sbolilique.

11 Yu’un mu stac’ xal ti oq’uile, xchi’uc me ja’uc vinic xu’ sts’iba scotol ti c’u x elan xibal sba ta smalic ch’ich’e xchi’uc ti ta smil sbaic ta jteclume. Jech chac c’u cha’al nefitaetic xchi’uc jlamanitaetic; xchi’uc scotol o’ntonal la stsatsubtas sbaic, ti yu’un ja’ lec cha’yic ti ta smalic ch’ich’ ta jujuliquele.

12 Jech muyuc baq’uin spasic bolilil ti xnich’nab Lehie, xchi’uc me ja’uc te ta scotol snailal Ismael, jech chac c’u cha’al ya’yejtac Cajvaltic jech chac c’u cha’al li’ to ox oy ta jteclume.

13 Ja’ jech c’ot ta pasel ti jlamanitaetic la jyu’ninic ti muc’ta jteclum bu muyuc lec c’usi oye, yu’un ja’ ta sventa ti yu’un ja’ epic jech chac c’u cha’al nefitaetique.

14 Xchi’uc te batic ta scontrainel ti muc’ta jteclum Teáncume; xchi’uc la sjipic loq’uel ta stojolalic ti yajvaltaque, xchi’uc ep la stiq’uic ta chuquel, jech chac c’u cha’al antsetic xchi’uc ololetic, xchi’uc la smilic ta sventa smoton yaj loc’om santoic.

15 Ti ta sjabilal oxib ciento xchi’uc vucub xchanvinic (367) jabile, c’ot ta pasel ti ta nefitaetique, ilinic ta sventa ti yu’un jech yich’ic milbel yajnilique xchi’uc xnich’nabique, jech batic ta stojolal jlamanitaetic, xchi’uc jech tsots ti sc’ac’al yo’ntonic, ta sventa ti yu’un la jyich’ic tsalel yu’un jlamanitaetique, xchi’uc ti la jyich’ic loq’uesel ta sbanamilique.

16 Ti jlamanitaetique muyuc xa sutic ti ta stojolalic nefitaetique, ja’ to ti ta sjabilal oxib ciento xchi’uc vo’lajuneb xchanvinic (375) jabile.

17 Ti ta va’ay sjabilale, yalic yanvelta ta stojolalic nefitaetic xchi’uc scotol spersaic, jech muyuc xich’ic atael yu’un tu j ech’em yepalic.

18 Ja’ xa te o ti muyuc bu la spasic ta canal jlamanitaetic ti nefitaetique, jech te lic sac ch’ayuc ta satic, jech chac c’u cha’al ts’ujul ta x ul ta sat c’ac’ale.

19 Ja’o jech ti jlamanitaetique te c’otic ta sba ti muc’ta jteclum bu muyuc lec c’usi oye; jech te lic muc’ta pas c’op ti te ta banamil bu muyuc lec c’usi oye, jech la xchib yo’ntonic ti nefitaetique.

20 Jech te jatoic ta stojolalic jlamanitaetic, jech te c’otic ta muc’ta jteclum Boaz; xchi’uc ja’to te la sva’lin sbaic xchi’uc stsatsal yo’ntonic ta stojolal ti jlamanitaetique, xchi’uc ti jlamanitaetique muyuc xa bu la spasic canal jech batic xchibal velta.

21 Ti c’alal la spasic jech xchibal veltae, ti nefitaetique te la jyich’ic svocolic xchi’uc ep la jyich’ic milel ta pas c’op, xchi’uc ti yajnilique ti xnich’navique la jyich’ic aq’uel ta smoton yajsanto sloc’omic yanvelta.

22 Jech ti nefitaetique jatoic batel yanvelta, xchi’uc la jyiq’uic batel scotol ti jnaclejetique, jech chac c’u cha’al muc’tiquil jteclum xchi’uc jech chac c’u cha’al bic’taquil jteclum.

23 Jech tana, ti vu’un Mormonune, ti jech ta xquil ti jlamanitaetic jutuc xa sc’an stsal yu’nic ti banamile, li bat te ta vits sbiinoj Shim, xchi’uc la jtsob scotol ti poco’ lo’iletic bu snac’oj o no’ox Ammaron ta sventa Cajvaltique.